Jenesii̱s 39 - Xo̱jo̱n eén Néná

Bi̱ kamaá Kosiee̱ ko̱jo chjo̱ón Potifaa̱r

¹ Kjiꞌanga kui já xí botiñá nii̱ kijíjo̱ Kosiee̱ ki̱a̱ nangi Ejipto̱, nda̱ xi ꞌmí Potifaa̱r tsꞌatsie, kui nda̱ xi ngito̱ko̱o̱ já xí koón nda̱ ree̱.

² Achichí nda kisꞌijña Kosiee̱ ndiꞌaa̱ nda̱ Ejiptoo̱ xi ndi̱a̱a̱ kamá, ngatꞌa̱ Néná tikónjo̱.

³ Kó Potifaa̱r kamábe nga Néná asíko̱jo Kosiee̱, kuíni nga ngayeje ni xi katsꞌén nda kamaá.

^4-6 Kó bo̱a̱ tsꞌén Potifaa̱r nda katsꞌénjo̱ Kosiee̱, kó katsjáxaá nga kui kisꞌijñatjoón ndiꞌaa̱, ko̱jo nga Kosiee̱ xi skoón ngayeje ni xi tjiín Potifaa̱r. Kó ndeskande koó kjiꞌa ta̱ngatꞌanii̱ Kosiee̱ nga Néná katsꞌénchikonñé Potifaa̱r, kó ngiti̱ ingojín ni xi nda̱ kamaá ta̱kuítsí ni xi iskjinie. Kó Kosiee̱ achichí tsjá kisꞌie nga ta̱ꞌyaní xi kamátsjaá,

⁷ kó chjo̱ón Potifaa̱r katsꞌénmején Kosiee̱, kó bi̱ katsoó: —¡Ja̱bítsjanije̱ní!

⁸ Kó kamámejénjiín Kosiee̱, kó bi̱ katsoó chjo̱ón ndi̱a̱a̱: —Ndi̱a̱na achichí ꞌniátakónna kuíni nga ngi̱ya ndsa̱ án katsꞌénkꞌasꞌien ngayeje ni xi tjiín, kó nga an tikóntjóo̱n ngayeje ni xi tjiín, jmíjín ni xi nda̱ maa̱ kui.

⁹ Ngojín ni xi íchjána, kꞌi̱e̱ kui ndiꞌaa̱ jmíjín ingo xi nkꞌa ngase xaá, ta̱nga ji chjo̱ón má ji, kó tsi an kjojñajoo̱, sa̱ꞌin jé an ngindyi̱ko̱n Néná.

¹⁰ Kó ndatsi chjo̱ón Potifaa̱r ndyiojón ndyiojón tsíꞌaá Kosiee̱ nga kjojñájo̱, ta̱nga Kosiee̱ ngongá jmí katsó.

¹¹ Ti̱chaa̱n ngo ndi̱yà nga Kosiee̱ tsꞌasꞌien ndiꞌaa̱ Potifaa̱r nga sa̱ꞌín xá xí tsꞌén, kó kjiꞌanga nde ngojín xi tjín ngi̱ya ndiꞌaa̱,

¹² chjo̱ón Potifaa̱r yíꞌniú ńjño xi yajá Kosiee̱, kó bi̱ katsoó: —¡Tsjajnije̱ní! Kó Kosiee̱ ta̱sá katsjandiè nga kui xota̱chjo̱on iskjíbé ńjñoo̱, kó tsanga má nga jataxie kui ndiꞌaa̱.

¹³ Kó nga kamábe kui naa̱ nga ńjñoo̱ Kosiee̱ tjiyátsjà,

¹⁴ askjandáyà má nga tsíchji̱a̱a̱ moso̱ xi tsꞌénxá ngi̱ya ndiꞌaa̱, kó bi̱ katsoó: —¡Tsitsíjenjnú, nga kui xota̱ ebreo̱ xi jeꞌejo̱ xi̱ꞌinna ta̱kjo̱a̱bena! Kꞌi̱e̱ tsꞌasꞌien kꞌi̱e̱e̱, kó kamámejeén kjojñájo̱ kjo̱a̱ꞌniúna katsaki, ta̱nga ꞌniú askjandáyà an,

¹⁵ kó nga kamábe nga ꞌniú tsꞌénkjandayá an, ¡kꞌi̱e̱ íjñá ńjñoo̱, kósꞌe̱ tsanga má kijí ngijee̱!

¹⁶ Kó kui naa̱ ki̱a̱ jaꞌátjó ńjñoo̱ Kosiee̱ ngaskande nga jachó xi̱ꞌii̱n.

¹⁷ Nga jachó Potifaa̱r ti̱ bi̱ ti̱ katsoó nga: «Kui moso̱ ebreo̱ xi jéꞌe̱je ji, kamámejeén nga kjojñájo̱ kjo̱a̱ꞌniúna.

¹⁸ Ta̱nga nga askjandáyà an, tsi̱ꞌe̱ nga tjín xí ko̱síko̱jona, íjñá ńjñoo̱ tꞌa nínga tikòn an, kósꞌe̱ tsanga má jataxie ngijee̱».

¹⁹ Nga tsintꞌié Potifaa̱r ni xí tsíchji̱a̱ chjo̱ón, achichí katsꞌénxchán.

²⁰ Kósꞌe̱ katsjákjo̱a̱ nga ko̱ndo̱bo̱a̱ Kosiee̱, sꞌe̱ akjaꞌya ndo̱bo̱a̱yà, ki̱a̱ akjaꞌya nínga síndo ndo̱bo̱a̱yà já xí katsangisꞌien nda̱ ree̱ nga. Kó ndatsi ngi̱ya ndo̱bo̱a̱yà jàn kisꞌijña,

²¹ Néná to̱kó asíko̱jo ngase, kó akoó kókjiꞌi tjoó, ngatꞌa̱ Néná xí katsꞌén nga nda̱ ngito̱ko̱ xi tsꞌénkonda ndo̱bo̱a̱ya̱à nda katsꞌénjo̱ Kosiee̱.

²² Kó kui nda̱ ngito̱ko̱o̱ katsjaá xá Kosiee̱ nga kui xi skoón ngayeje já xí ndyi̱a̱ ndo̱bo̱a̱ya̱à ko̱jo ngayeje xá xí niꞌán ngi̱ya ndo̱bo̱a̱ya̱à.

²³ Kó kui nda̱ xi ngito̱ko̱o̱ ndo̱bo̱a̱ya̱à nde chjiénjín nga askotsijee̱n ni xi je ngi̱ya tsja Kosiee̱ tikón, ngatꞌa̱ Néná tikónjo̱ Kosiee̱, kó kuí boá xi bosikójo nga nda kamá ngayeje ni xi katsꞌén.