Jenesii̱s 33 - Xo̱jo̱n eén Néná

Bi̱ tsꞌén yíndaa̱ xkjín Jakoo̱b ko̱jo Esauu̱

¹ Nga kamábe Jakoo̱b nga ta̱ kjin tsꞌéndibá Esauu̱, kó nga nijón úchán má já xí tji̱e̱njo, akjángá xikó tjín má ndií nga katsjaá na̱ Liyaa̱ ko̱jo na̱ Rakee̱l ko̱jo nga jó chji̱ni̱e̱ꞌboo̱.

² Nga tjón tjón índo nga jó chji̱ni̱e̱ꞌboo̱ ko̱jo ndií, jaskan índo na̱ Liyaa̱ ko̱jo ndií, sꞌe̱ ngaskande nga fetꞌa índo na̱ Rakee̱l ko̱jo Kosiee̱.

³ Sꞌe̱ Jakoo̱b kisꞌijñatjón, kó tji̱e̱nga tsꞌénfíkón tiñaa̱ ntsꞌi̱e̱, yito ndi̱yà asiéntikoó Jakoo̱b nga kisitꞌa maá xtjien tꞌanangii̱ nga kamábendikón Esauu̱.

⁴ Ta̱nga Esauu̱ tsanga má nga kijíkoón Jakoo̱b, kó janíkjá xkjín, katsjaá ngo ndsó tꞌanijon, kó nga joó nga askjandá.

⁵ Kó nga kamábe Esauu̱ ínchjiín ko̱jo jákjíndií, bi̱ katsoó Jakoo̱b: —ꞌYá xota̱ bo̱a̱ xi̱ꞌbi̱. Kó Jakoo̱b bi̱ katsó: —Achichí nda katsꞌénjo̱na Néná, kó kuí boá xi katsjána kui ndií.

⁶ Sꞌe̱ jaskan ínchjín chji̱ni̱e̱ꞌboo̱, ko̱jo ndií jachókón tiñaa̱ Esauu̱, kó ti̱ kisꞌińdoxtien nga kisitꞌa maá xtjien tꞌanangii̱ nga.

⁷ Ti̱ bo̱a̱ ti̱ katsꞌén na̱ Liyaa̱ ko̱jo ndií, kó bo̱a̱ katsꞌén Kosiee̱ ko̱jo na̱ Rakee̱l nga.

⁸ Kósꞌe̱ Esauu̱ bi̱ katsó: —Mí ni xi kiniꞌínkjé jí kjo̱a̱a̱ kui xtín xota̱ ko̱jo cho̱ xi je kamábe an ndi̱ya̱à. —Tsi̱ꞌe̱ nga si̱ꞌinjetakínní boá ko̱jo nga nda si̱ꞌinje̱ní —katsó Jakoo̱b.

⁹ Ta̱nga Esauu̱ bi̱ katsó: —¡Jmí ntsꞌie, chjábéra ji ni xi tse̱, jè tsie má ni xi tjínna nga!

¹⁰ Kó Jakoo̱b bi̱ katsó: —Jmí ntsꞌie, ꞌniú míꞌaá, chjábé jí kui nii̱ xi tsꞌéntsjaa, ngatꞌa̱ achichí ndaxota̱ tiniꞌínje̱ní, kó nga je kamábee̱ ji ¡xikó maá tsi kje̱n Néná xí kamábe an!

¹¹ Ngo kjo̱a̱nda míꞌaá chjábé jí kui ni xi yaꞌaa̱ ngotꞌe̱, ngatꞌa̱ Néná achichí ni je katsjána, kó jè tikónna ngayeje ni xi chjiénna. Kó nga ꞌniú ꞌniú katsꞌén Jakoo̱b, ti̱chaa̱n Esauu̱ katsꞌénjo̱ꞌo nga iskjíbé kuí nii̱.

¹² Sꞌe̱ jaskan bi̱ katsó Esauu̱: —Ndakjíꞌí tsobo̱a̱, tjianra ndi̱yàná, kó an kjuínjòo̱.

¹³ Ta̱nga Jakoo̱b bi̱ katsó: —Jmí ntsꞌie, jè yé ji nga jákjíndí xi̱xi̱i̱ tsá fenda, kó ti̱ chjiéngá skóo̱n cho̱tsa̱nga̱a̱ ko̱jo cho̱yojo ínchjiín xi sꞌe̱ katsen má ndií, ngatꞌa̱ tsi ingo ni̱xtjin si̱ꞌankjí ngase, ngayejee̱ nga ko̱yà tsobo̱a̱.

¹⁴ Ta̱sá ndatsi kꞌuíntjénra ji, kó án inda inda kjuín án, xikótsꞌèn ndyi̱fí jákjíndína ko̱jo cho̱na, ngaskande nga kjóchótji̱ngii̱ ki̱a̱ nangi Endoo̱n.

¹⁵ Kó Esauu̱ bi̱ katsó: —Te̱ꞌéndièní nga kꞌuindo an chiboa xota̱ xi tsoꞌbájo̱ an kꞌi̱e̱e̱ tsi̱ꞌe̱ nga nijan kjo̱joo̱ ji. Ta̱nga Jakoo̱b bi̱ katsó: —Ánní nga bo̱a̱ si̱ꞌin kon ji. ¡Jè ndakjiꞌi nga nda tiniꞌínje̱ní!

¹⁶ Kósꞌe̱ Esauu̱ ti̱ kuii̱ ni̱xtjin kijí nginí nangi Endoo̱n.

¹⁷ Kó Jakoo̱b kijí xtji̱e̱e̱n Sukoo̱t, kó ki̱a̱ katsꞌénda ngo ndiꞌa nínga kisꞌijña kui, kó ti̱ katsꞌénda ngo ngi̱ndie nínga kisꞌińdo cho̱o̱, kuíni nga kui ngi̱ndiee̱ Sukoo̱t ítꞌajaꞌén.

^18-20 Kjiꞌanga Jakoo̱b kijíꞌoyá nginí nangi Pandaa̱n-Araa̱n, nda jachó ngo na̱xi̱ńdá nínga tikón ngo nda̱ xi ꞌmí Sikee̱n, kui xi ndií Jamoo̱r. Kui ngindiee̱ ki̱a̱ tikón nangi Kanaa̱n, kó Jakoo̱b ki̱a̱ tsꞌatsie chií tꞌanangi xi úchán to̱ntiboa íchjínií ndií Jamoo̱r, kui tꞌanangii̱ ki̱a̱ kisꞌijña kje̱n na̱xi̱ńdaá, kó ki̱a̱ katsꞌénda Jakoo̱b ndiꞌaa̱ kui xi tji̱xi̱ín cho̱ kamándani. Kó ki̱a̱ katsꞌénda ngo ṉchandikón kui xi, Néná xí tsi̱ꞌe̱ Israee̱l, ítꞌajaꞌén.