Jenesii̱s 32 - Xo̱jo̱n eén Néná

Bi̱ tsꞌén Jakoo̱b katsangiyaa̱ chji̱ni̱e̱ꞌén Esau̱ ntsꞌi̱e̱

¹ Kó Jakoo̱b kijíra ndi̱ya̱à, kó ki̱a̱ jatjokjaà jó ndítsjiee̱ Néná.

² Kó kjiꞌanga Jakoo̱b kamábe kui ndítsjiee̱, bi̱ katsó: «¡Ngi̱ndie nínga tsꞌénkjaꞌyá Néná boá kꞌi̱e̱e̱!» Kuíni kui ngi̱ndiee̱ «Jó ngi̱ndie nínga niꞌánkjaꞌyá» ítꞌajaꞌén.

^3-4 Jaskan ngije kamá kui nii̱, Jakoo̱b katsangiyaa̱ já chji̱ni̱e̱ꞌén Esau̱ ntsꞌi̱e̱, kui xi tikón ki̱a̱ nangi Endoo̱n. Kó kuí já chji̱ni̱e̱ꞌe̱én kiꞌmíyà cha̱n cha̱a̱n nga bi̱ ka̱tso̱o̱ Esauu̱: «Nda̱ ntsꞌie ji Jakoo̱b boá xi katsangiyajne̱ nga kꞌuiyájne̱ ji nga je tikónnda kui xikoó tsi mosòo̱, kó tsꞌéntsáyaà jí nga ki̱a̱ kisꞌijña nínga tikón tsini Labaa̱n.

⁵ Kó nga je tjiín cho̱yojo, ko̱jo bórroó, ko̱jo cho̱tsa̱nga̱ ko̱jo moso̱ xi ínchjín ko̱jo xi xi̱ꞌin. Kó kuí boá xi katsangiyajne̱ tsi̱ꞌe̱ nga kꞌuiyájne̱ ji nga si̱ꞌinjo̱ꞌo ji nga kji̱ndi̱bákoón kuí».

⁶ Kó kui já chji̱ni̱e̱ꞌe̱én nga kjindibáꞌoyá nginí nínga tikón Jakoo̱b, bi̱ katsoó: «Jè tsangínjne̱, kó kandokjo̱a̱jojne̱ ntsꞌie, kó ki̱a̱ tji̱e̱ngijne̱, kuí má bo̱a̱ xi tsꞌéndibákjaꞌáyíndi̱ya̱à, kó nijón úchán jáxíꞌín tji̱e̱njo».

⁷ Kósꞌe̱ Jakoo̱b achichí katsakjónní, kó nda̱ kamaá, kósꞌe̱ jó tjín katsꞌén xota̱ xi tjimájo̱ ko̱jo ngayeje cho̱ xi tjiín, kó jó ndiè katsꞌénkꞌíndo,

⁸ ngatꞌa̱ bi̱ tsꞌén katsꞌénkjó: «Tsi Esauu̱ kji̱ndi̱bá, kó tsi skjánjo̱ xtín xota̱ xi síndo ngo kui ngi̱ndiee̱, ka̱márií ko̱nga xtín xí síndo xi ingo ndieè».

⁹ Kósꞌe̱ Jakoo̱b bi̱ katsó nga tsíchji̱a̱a̱ Néná: «Ji Ne xi tsi̱ꞌe̱ na̱ꞌmindyiboana Abraa̱n ko̱jo na̱ꞌmina Isaa̱, Jí boá xi bo̱a̱ kasení nga kji̱ndi̱báꞌoyá ngiñá an nangina ko̱jo nínga síndo xota̱na, kó nga ji xi ko̱si̱ke̱jení.

¹⁰ Achichí nda niꞌínje̱ní, ndatsi tsoboájínna nga ko̱si̱ke̱jení, ngatꞌa̱ an boá xi moso̱ tse̱, kjiꞌanga jaꞌatio an ndejèꞌ Jorndaa̱n, jmí ni kisꞌiejínna ngasꞌe̱, ta̱ ngo tsí yánísié tsaꞌa an, kó ngotꞌe̱ ꞌne̱ ngaskande jó tjín xota̱ ko̱jo cho̱ xi síndona.

^11-12 Jí boá xi bo̱a̱ kasení nga nda ko̱e̱je̱na, kó nga xota̱ tji̱e̱na kjín ka̱ma xikó maá tsomí xí tjín tꞌa ndáchíkoón, nga nde maxki̱jínná. ¡Ngotꞌe̱ ꞌne̱ xín ti̱ꞌinkjeꞌe ji ni xi ndajín xi mejeén sa̱ꞌínjo̱na ntsꞌié án Esauu̱! Ngatꞌa̱ tsakjon an nga kji̱ndi̱bá, kó sa̱ꞌínkjiéjne̱ ngayejejne̱».

¹³ Kó Jakoo̱b ki̱a̱ jaꞌaa̱ ni̱xtji̱e̱n kui ngi̱ndiee̱, kó jaꞌájin cho̱ xi tjiín xi ta̱ tsja̱arií Esau̱ ntsꞌi̱e̱,

¹⁴ iskjíbé jó úchán tindso̱ ínchjín ko̱jo kan tindso̱ xi̱ꞌin, jó úchán cho̱tsa̱nga̱ ínchjín ko̱jo kan cho̱tsa̱nga̱ xi̱ꞌin,

¹⁵ kantié cho̱toꞌoyitsꞌe̱n ínchjín xi je tjín maá ndí, yichán cho̱yojo ínchjín, tie cho̱yojo toro̱, kan bórró ínchjín ko̱jo tie bórró xi̱ꞌin.

¹⁶ Kó katsjaá já mosoo̱, kja̱xín kja̱xín katsꞌénkꞌasꞌiee̱n nga ngo tjín kuí cho̱o̱, kó bo̱a̱ katsoó nga ko̱e̱je̱tjón, kó ta̱nga kjin kjin kꞌuítso̱manii̱ xkjín nga ngo tjín kuí cho̱o̱.

¹⁷ Kó kuí nda̱ xi katsꞌénkjítjoón, bi̱ katsoó: «Tsi ji tjón sa̱ko̱ó ntsꞌié án Esauu̱, kó tsi bi̱ ka̱tso̱o̱ nga ko̱síyaá: ꞌYá jií bo̱a̱. Ñá tìꞌmi ji. ꞌYá tsi̱ꞌe̱ cho̱ xi tji̱e̱ntjoón ji.

¹⁸ Bo̱a̱ tꞌíi̱n nga tsa̱ꞌa̱n boá kuí cho̱o̱, kó án boá xi katsangiyáa̱, kó bo̱a̱ tꞌíi̱n nga ki̱a̱ tji̱e̱ngi an nga̱xtonjnú».

¹⁹ Kó Jakoo̱b ti̱ bo̱a̱ ti̱ katsoó moso̱ xi ma joó, ko̱jo xi ma jaán, ko̱jo ngayeje xi tjimájo̱ cho̱o̱, nga bo̱a̱ ka̱tso̱o̱ Esauu̱, kó ngayejee̱ nga ꞌniú katsꞌeén

²⁰ nga bo̱a̱ ka̱tso̱o̱ nga Jakoo̱b nga̱xto̱n kui jaá tsꞌéndibá. Ngatꞌa̱ bi̱ tsꞌén katsꞌénkjó Jakoo̱b: «Sa̱ꞌinkjaꞌajindamára an Esauu̱ nga sangiyáa kui cho̱o̱, ki̱a̱ ka̱maa̱ kjiꞌanga ska̱jin an kui, jè nda sa̱sieén an.»

²¹ Ngije katsangiyatjón kui cho̱o̱, Jakoo̱b ki̱a̱ katsꞌénkjaꞌa ni̱xtji̱e̱n nínga síndo ngo ndiè xtín xotaa̱.

Bi̱ tsꞌén askjan Jakoo̱b

^22-23 Kó ti̱ kuii̱ ni̱xtji̱e̱n jastjíe̱n Jakoo̱b, kó kijíjo̱ ngayeje xota̱ ndiꞌaa̱, ko̱jo ngayeje ni xi tjiín, kó jaꞌaxtikjá xo̱ngàndántꞌié Jaboo̱k.

²⁴ Kósꞌe̱ kjindibáꞌoyá soboá nginí, kó ki̱a̱ askjanjo̱ ngo nda̱ ngaskande nga kisisie̱èn.

²⁵ Kó kjiꞌanga kui nda̱a̱ kamájín xi katsꞌeén Jakoo̱b, ngo tji̱ngo̱ yeꞌeé ndáyaá, kó jatjokjo ńdatjatsꞌen Jakoo̱b tji̱e̱nga ndyi̱kjàn.

²⁶ Kósꞌe̱ kui nda̱a̱, bi̱ katsoó Jakoo̱b: —¡Ti̱ntjoénní! ¡Ngatꞌa̱ jè kisisie̱èn! Kó Jakoo̱b bi̱ katsó: —Tsjuiénjaán, ngaskande nga si̱ꞌinchikonñíní.

²⁷ Kó kui nda̱a̱ bi̱ katsó: —Kó ꞌmií. Kó ngije Jakoo̱b katsóyaà jaꞌeén,

²⁸ kui nda̱a̱ bi̱ katsoó: —Jè ngiti̱ Jakoo̱bjín kꞌuiín, Israee̱l kꞌuiín ngotꞌe̱, ngatꞌa̱ jè ikixkénje̱ ji Néná ko̱jo xota̱ nga̱sondiee̱, kó kiniꞌíi̱n.

²⁹ Kósꞌe̱ Jakoo̱b bi̱ katsoó nga asíyaá: —Tꞌíyéní jaꞌée̱n ngotꞌe̱. Kó kuí nda̱a̱ bi̱ katsó: —¡Jè chjiéngá xchi̱e̱ ji jaꞌénna katsaki! Kósꞌe̱ ki̱a̱ katsꞌénchikonñé Jakoo̱b,

³⁰ kó kuíni nga Jakoo̱b, Penuee̱l, ítꞌajaꞌén kuí ngi̱ndiee̱, ngatꞌa̱ bi̱ katsó: «¡Kamábe tíkje̱n tíkje̱n an Néná, kó ta̱kó tikòn an!»

³¹ Kó nga jatjo tsꞌueé, jatjo Jakoo̱b kui ngi̱ndiee̱ xi ꞌmí Penuee̱l, kó kijí katsꞌo.

³² Kuíni nga ngaskande ngotꞌe̱ xota̱ Israee̱l kjiniéjín yojo xi kjijon ńdatjatsꞌen ngo cho̱, ngatꞌa̱ ki̱a̱ boá nínga ikꞌieé Jakoo̱b.