Jenesii̱s 30 - Xo̱jo̱n eén Néná

Ndií Jakoo̱b xi kisꞌiee̱ na̱ Bilaa̱

¹ Kó nga kamábe na̱ Rakee̱l nga jmí ndí kisꞌiejiín, kamáꞌonkon kjo̱a̱a̱ ndichja, kó bi̱ katsoó Jakoo̱b: —Tsi jmí ndí ko̱e̱ꞌéjínní, ¡ta̱sá ngatꞌien an!

² Kó Jakoo̱b katsꞌénxchánjo̱ na̱ Rakee̱l, nga bi̱ katsoó: —A Néná boá an nga bo̱a̱ se kon ji. ¡Kuí boá xi jmí ndí tsjájiín!

³ Kósꞌe̱ bi̱ katsó na̱ Rakee̱l: —Tsjajnije̱ ji na̱ moso̱na Bilaa̱, tsi̱ꞌe̱ nga kꞌuieé ngo ndí jí ko̱jo kui naa̱, kó nga stse̱n kuí ndií, xikónií tsi tsa̱ꞌa̱n ngatama.

⁴ Kó bo̱a̱ tsꞌén na̱ Rakee̱l katsjaá Jakoo̱b nga kjojñájo̱ na̱ Bilaa̱, kó Jakoo̱b kisꞌiejo̱ kui naa̱,

⁵ kó na̱ Bilaa̱ kisꞌiee̱ ngo ndí xí tsi̱ꞌe̱ Jakoo̱b.

⁶ Sꞌe̱ na̱ Rakee̱l, Ndaa̱n ítꞌajaꞌén, kui jaꞌeén «Kjo̱a̱kixi̱» tsó. Ngatꞌa̱ bi̱ katsó: «Kixi̱ Néná, ngatꞌa̱ nga kamábe nga jmí ni xi ndajínkjiꞌi tjítsꞌen an, katsjána ngo ndí».

⁷ Na̱ Bilaa̱ ti̱ tsaꞌa nginií ingo ndí, kó katsen ndií xi ma jó xi tsi̱ꞌe̱ Jakoo̱b.

⁸ Kó na̱ Rakee̱l Neftali̱ ítꞌajaꞌén, ngatꞌa̱ kui jaꞌeén «Kjo̱a̱bixkán» tsó, ngatꞌa̱ bi̱ katsó: «ꞌNiú askjanjo̱na ndichja án, kó án boá xi katsꞌée̱n».

Ndií Jakoo̱b xi kisꞌiee̱ na̱ Silpaa̱

⁹ Nga kamábe na̱ Liyaa̱ nga ngiti̱ jmí ndí kisꞌiejiín kui, katsꞌénkꞌasꞌiee̱n Jakoo̱b na̱ mosoo̱ xi ꞌmí Silpaa̱ tsi̱ꞌe̱ nga kjojñájo̱.

¹⁰ Kó na̱ Silpaa̱, kisꞌiee̱ ngo ndí xí tsi̱ꞌe̱ Jakoo̱b,

¹¹ kó na̱ Liyaa̱ Ngaa̱nd ítꞌajaꞌén, ngatꞌa̱ kui jaꞌeén «Kjo̱a̱ndani̱xtjin» tsó, ngatꞌa̱ bi̱ katsó kui naa̱: «¡Achichí nda kamá ni̱xtjinna!»

¹² Jaskan na̱ Silpaa̱ ti̱ kisꞌie nginií ingo ndí xí tsi̱ꞌe̱ Jakoo̱b,

¹³ kó na̱ Liyaa̱ Asee̱r ítꞌajaꞌén, ngatꞌa̱ kui jaꞌeén «Kjo̱a̱tsjatjín» tsó, ngatꞌa̱ bi̱ katsó: «¡Achichí tsjátjínna! ¡Kó ínchjiín achichíra̱tsjaa̱ kui ka̱tso̱na!»

Jakoo̱b kisꞌie ngase ndí ko̱jo na̱ Liyaa̱

¹⁴ Ngo ni̱xtjin nga je kjimaxchá to ndso̱ko̱a̱n ṉño̱pan, kijí Rubee̱n ngi̱jin kꞌijñá jàn, kó ki̱a̱ kasakoo̱ to xi ꞌmí mandrángora̱, kósꞌe̱ kijíjoo̱ na̱ Liyaa̱, kó nga kamábe kui too̱ na̱ Rakee̱l ꞌniú tsíꞌaá na̱ Liyaa̱ nga tsja̱á joó kui too̱,

¹⁵ ta̱nga na̱ Liyaa̱ bi̱ katsó: —Jè kachjeꞌéxínní xi̱ꞌinna, a kó ngaskande to xi yaꞌa ndína mejeén chje̱ꞌéxínní nga. Kó bi̱ katsó na̱ Rakee̱l: —Tsi ko̱e̱ꞌéní to mandrángora̱ xi yaꞌa ndíi̱, kui ni̱xtji̱e̱e̱n, ka̱ma kjojñájoo̱ Jakoo̱b.

¹⁶ Kó nga kamájñoó nga jachó Jakoo̱b nga kjindibáni ngi̱jin kꞌijñá jàn, na̱ Liyaa̱ kijíkjaꞌáyíndi̱yà, kó bi̱ katsoó: «Chjiéngá án tsjajníje̱ní kuí ni̱xtji̱e̱e̱n, ngatꞌa̱ to mandrángora̱ xi yaꞌa ndína ngoye ichjítjéñaa̱». Kó Jakoo̱b kisꞌiejo̱ na̱ Liyaa̱ kui ni̱xtji̱e̱e̱n.

¹⁷ Néná tsintꞌieé na̱ Liyaa̱ nga tsíchji̱a̱a̱, kó tsaꞌa nginí ingo ndí, xi ma uún xi tsi̱ꞌe̱ Jakoo̱b.

¹⁸ Kó na̱ Liyaa̱ Isakaa̱r ítꞌajaꞌén. Kui jaꞌeén «ni xi niꞌán» tsó, ngatꞌa̱ bi̱ katsó «Néná katsjána ngo ni xi niꞌán, ta̱ngatꞌanii̱ nga na̱ moso̱na katsjáa̱ xi̱ꞌinna».

¹⁹ Jaskan ti̱ kisꞌie nginií ingo ndí na̱ Liyaa̱ xi tsi̱ꞌe̱ Jakoo̱b, ndí xi ma juu̱n.

²⁰ Kó na̱ Liyaa̱ Sabulo̱n ítꞌajaꞌén «Ni xi ta̱ boeꞌéná» tsó kui jaꞌeén, ngatꞌa̱ bi̱ katsó: «¡Néná boá xi ta̱ katsjána ngo ni xi ta̱nisién tsjákjiꞌi! Ngotꞌe̱ ꞌne̱ nda ngase sa̱ꞌínjo̱na xi̱ꞌinna, ngatꞌa̱ jè jun ndí katsjáa̱».

²¹ Jaskan ngije jaꞌa ni̱xtjin na̱ Liyaa̱ kisꞌiee̱ ngo ndí chjo̱on, kó na̱ Ndina̱ ítꞌajaꞌén.

Bi̱ tsꞌén katsen Kosiee̱

²² Kó Néná kamáni̱ma̱a̱ na̱ Rakee̱l, kó tsintꞌieé nga tsíchji̱a̱a̱, kó katsjaá ngi̱ndie nga tsaꞌa ndí,

^23-24 kó ngije katsen ndií bi̱ katsó: «Néná jè jaꞌáxínna kjo̱a̱soboána nga jmí ndí ꞌbéjínna katsaki». Kó Kosie̱ ítꞌajaꞌén «Néná ngatsjána ingo ndí» tsó kui jaꞌeén. Ngatꞌa̱ bi̱ katsó: «¡Achichíra̱ ndakjiꞌi tsi Néná tsja̱ana ingo ndí!»

Bi̱ tsꞌén tsꞌenṉcha̱jo xkjín Jakoo̱b ko̱jo Labaa̱n

^25-26 Ngije jaꞌa ni̱xtjin nga katsen ndií na̱ Rakee̱l kui xi ꞌmí Kosiee̱, Jakoo̱b bi̱ katsoó Labaa̱n: —Te̱ꞌéní ínchjínna, ko̱jo ndína, ngatꞌa̱ ta̱ngatꞌanii̱ kui nga je katsꞌenxá kjo̱a̱ndaa̱ ji, kó te̱ꞌéndièní nga kjuín ngiñá an nangina.

²⁷ Kó Labaa̱n bi̱ katsoó: —Ngo kjo̱a̱nda kuíꞌaá, ngata̱ ꞌmijín ji, ta̱sá ti̱ndyinra ji kꞌi̱e̱e̱, jè kamábe an nga ta̱ngatꞌanií ji nga Néná katsꞌéncho̱nna,

²⁸ ta̱sá tꞌíyéní kótjín mejeén si̱ꞌin ji, kó án kꞌuichjií xikó kjiꞌi chji̱e̱ꞌéní.

²⁹ Kó Jakoo̱b bi̱ katsó: —Jè yé ji kókjiꞌi je katsꞌenxá kjo̱a̱ndaa̱ ji, kó kótsꞌèn nga nda askóo̱n cho̱ xi tjiín.

³⁰ Ngindiee̱ nga kjoéꞌe̱ an chiboa tsí kamá cho̱ xi kisꞌiee̱ ji, kó ngotꞌe̱ ꞌne̱ achichí jè cho̱n ji, ngatꞌa̱ ndeskande koó nga jéꞌe̱ an Néná tjítsꞌénchíkonñé ngayeje ni xi niꞌín ji, ta̱nga ti̱ chjiéngá sa̱ꞌinxá an nganda tsi̱ꞌe̱ ndína ko̱jo tsi̱ꞌe̱ ínchjínna nga.

³¹ Kó bi̱ katsó Labaa̱n: —Mí xí mejeén nga tsjaa. Kó Jakoo̱b bi̱ katsó: —Jmí ni mejénjínna, tsi mejeén skónràa̱ cho̱o̱ tsi si̱ꞌinjo̱ꞌo ji ngo ni xi xiaán.

³² Te̱ꞌéndièní nga ngotꞌe̱ kjoaꞌa an ngi̱jii̱n nínga síndo cho̱ xi tjiín, kó xín kꞌuijñá an cho̱tsa̱nga̱ ko̱jo tindso̱ xi indoó, ko̱jo ngayeje ndií cho̱tsa̱nga̱ xi jmaá, kó kui te̱ꞌéní xikoó tsi chjína.

³³ Nga kjo̱a̱ꞌa ni̱xtjii̱n xchi̱e̱ ji nga ndakjiꞌi ni xi tꞌíxiaán. Kó ni̱xtjin nga mejeén stsitsíjìi̱n cho̱ xi tsa̱ꞌa̱n, ka̱ma tsitsíjìi̱n, kó tsi tjín tindso̱ ko̱jo tsi cho̱tsa̱nga̱ xi indójín ko̱jo tsi ndií cho̱tsa̱nga̱a̱ xi jmájín, ka̱ma bo̱a̱ sé jí nga katsꞌenchejeé.

³⁴ Kó Labaa̱n katsꞌénjo̱ꞌo kui nii̱,

³⁵ kó ti̱ kui ni̱xtjin Labaa̱n índotꞌaxín tindso̱ xi̱ꞌin xi indoó ko̱jo tindso̱ ínchjín xi indoó, ko̱jo ngayeje cho̱ xi chií tiboa jin, ko̱jo ngayeje cho̱tsa̱nga̱ xi jmaá, kó jaá katsꞌénkꞌasꞌiee̱n tsi̱ꞌe̱ nga kui skoón.

³⁶ Kósꞌe̱ kui xtín cho̱tsa̱nga̱a̱ ichítié kilometro̱ nga kjinnii̱ nínga tikón Jakoo̱b katsꞌénkjí. Kó Jakoo̱b to̱kó ki̱a̱ kisꞌijñara nga askoo̱n cho̱o̱ Labaa̱n.

³⁷ Ta̱nga Jakoo̱b tsatie tjiaa̱ yáꞌálamo̱, ko̱jo tjiaa̱ yáꞌabeyano̱ ko̱jo yáńchja̱, kó itjiájón kui yaá, kó kamábe nga ndi̱yà xí tiboa tjiín.

³⁸ Jaskan ngije tsitjia kui yaá ki̱a̱ índo kje̱n nínga ꞌbi ndáfoa cho̱o̱, ki̱a̱ ka̱maa̱ kjiꞌanga kjo̱chókꞌi ndáfoa sku̱i̱e̱ kui yaá. Kó bo̱a̱ tsꞌén kjiꞌanga cho̱ xi je mejeén xi̱ꞌii̱n jachókꞌi ndáfoaa̱,

³⁹ ki̱a̱ ixánjo̱ xkjín kje̱n kui yaá, kó ndí xí kisꞌiee̱ kui cho̱o̱, ndí ndi̱yà xí tiboa kisꞌiee̱ ko̱jo tjín xí indó kamá.

⁴⁰ Kó Jakoo̱b índotꞌaxín ndií cho̱tsa̱nga̱a̱, kó ki̱a̱ índojii̱n cho̱ xi tsi̱ꞌe̱, kó cho̱ xi ngasee̱ kje̱n cho̱ xi tjiín ndi̱yà xí tiboa ko̱jo xi jmaá índo ko̱jo ngayeje cho̱ xi jmá xi chji̱a̱ni Labaa̱n. Kó bo̱a̱ tsꞌén xín tji̱e̱n índo xi tsi̱ꞌe̱, kó ki̱a̱jín índojii̱n xi tsi̱ꞌe̱ Labaa̱n.

⁴¹ Kó kjiꞌanga fochó cho̱ xi ma mejeén xi̱ꞌin xi ꞌniú yiꞌii̱, Jakoo̱b índo tjiaa̱ yaá kje̱n nínga ꞌbi ndáfoa, ki̱a̱ ka̱maa̱ nga ki̱a̱ ku̱i̱xanjo̱ xkjín kje̱n nínga síndo kui tjiaa̱ yaá,

⁴² ta̱nga nga jachó cho̱tsa̱nga̱ xi xkꞌieén jaꞌáxín Jakoo̱b tjiaa̱ kui yaá, ki̱a̱ ka̱maa̱ nga cho̱ xi yiꞌii̱ tsi̱ꞌe̱ Jakoo̱b kamá, kó cho̱ xi xkꞌieén tsi̱ꞌe̱ Labaa̱n kamá.

⁴³ Kó bo̱a̱ tsꞌén nga achichí kamácho̱n Jakoo̱b, kó kisꞌiee̱ kjín cho̱tsa̱nga̱, ko̱jo já moso̱, ko̱jo ínchjín moso̱ ko̱jo cho̱toꞌoyitsꞌe̱n, ko̱jo bórró.