Jenesii̱s 22 - Xo̱jo̱n eén Néná

Abraa̱n tsintꞌiéꞌeén Néná

^1-2 Jaskan ngije jaꞌa kjín nó, Néná askotꞌayákón Abraa̱n, kó tsíchji̱a̱a̱, sꞌe̱ bi̱ katsoó: «Abraa̱n, mejénna nga si̱ꞌinkꞌasꞌínní ngo kjo̱a̱tjó xi ndíi̱ Isaa̱, kui xi ndí ngototóo̱, kui xi achichí tjoó. Tꞌenje̱ ji ki̱a̱ nangi Moriaa̱j, ngo na̱xi̱ xi kokoo».

³ Nga kamángindyiojón achichí ta̱jñó jastjíe̱n Abraa̱n, tsatie chikín tsi̱ꞌe̱ ndiꞌí xí ku̱i̱ꞌítsié, sꞌe̱ ísoón xiri̱e̱e̱ bórroó, kó kijí ngi̱ndie xi katsoó Néná. Kijíjo̱ ndií ko̱jo ngi jó já mosoo̱.

^4-5 Xi ma ján ni̱xtjin Abraa̱n bi̱ katsoó já mosoo̱: «Chiyárajnúꞌun kꞌi̱e̱e̱ jún ko̱jo bórroó, ngatꞌa̱ an ko̱jo ndína jàn jàn kui na̱xi̱ xi ta̱ kjin yaná kꞌi̱e̱e̱ kongínjne̱, kó ki̱a̱ si̱ꞌantsjajne̱ Néná, jaskan kji̱ndi̱báchon nginíjne̱ jún».

⁶ Kó Abraa̱n iskjíbé chikiín kó tjiaa̱ Isaa̱ ísoón, sꞌe̱ iskjíbé ngo ni xi ndyi̱a̱ xꞌué ko̱jo ngo kichiro̱ xi sa̱ꞌínkjién, kósꞌe̱ kijí nga joó.

⁷ Ta̱nga Isaa̱, bi̱ katsoó Abraa̱n na̱ꞌmii̱: —Ji na̱ꞌmi, jè tikónná chikiín ko̱jo ndiꞌií, ta̱nga ñá tikón ndí cho̱tsa̱nga̱ xi si̱ꞌankꞌasꞌienñáa̱ ngo kjo̱a̱tjó Néná.

⁸ Kó bi̱ katsó Abraa̱n: —Néná tsja̱aná ndí cho̱tsa̱nga̱ xi si̱ꞌankꞌasꞌién ñá kjo̱a̱tjoó xi̱ꞌin. Kó kijíra ngase nga joó.

⁹ Kó nga jachó ngi̱ndie xi katsoó Néná, Abraa̱n ki̱a̱ katsꞌénda ngo ṉchandikón, kó ki̱a̱ índonda chikiín tsi̱ꞌe̱ nga ku̱i̱ꞌítí, kó ítaꞌniú tsja Isaa̱, sꞌe̱ yíjñasón nga̱soón chikín xí síndo nga̱soón ṉchandikoón.

¹⁰ Kósꞌe̱ Abraa̱n iskjíbé kichiroo̱, iskjininkꞌa tsja tsi̱ꞌe̱ nga sa̱ꞌínkꞌién ndií katsaki,

¹¹ kó kjiꞌá má ndítsjie xi Néná ndeskande ndiꞌakꞌajmi jàn tsíchji̱a̱a̱ Abraa̱n. Kó Abraa̱n, kꞌi̱e̱ tikòn an kꞌi̱e̱e̱, katsó.

¹² Kó bi̱ katsó ngase kui ndítsjie xi Néná: «Ngata̱ jmí ni niꞌínje̱jín ji kui ndií, jè be an nga ndaꞌyéꞌínní, ngatꞌa̱ ndasénjín kamaá nga ndí ngototóo̱ xi si̱ꞌinkꞌasꞌínní jí ngo kjo̱a̱tjó».

¹³ Kósꞌe̱ Abraa̱n, ti̱ kjiꞌa kamábe nga xtji̱e̱e̱n nga̱xto̱n ngi̱jii̱n yásarsaa̱ tjítsakjájin ngo cho̱tsa̱nga̱ xi jaꞌatji ndi̱ja̱a̱, kó katsoboá kui cho̱o̱, sꞌe̱ katsꞌénkꞌasꞌiee̱n Néná ngo kjo̱a̱tjó ngajoo̱ ndií.

¹⁴ Kuíni nga Abraa̱n «Néná tsjá ngayeje nii̱» ítꞌajaꞌén kuí ngi̱ndiee̱, kó ngaskande ngotꞌe̱ ndaꞌyá nga bi̱ ꞌmí «Ngi̱jin na̱xi̱i̱, Néná tsjá ni xi machjiénná».

¹⁵ Kó ndítsjie xi Néná ndeskande ndiꞌakꞌajmii̱ ti̱ tsíchji̱a̱jo nginí Abraa̱n xi ma joó ndi̱yà,

^16-18 kó bi̱ katsoó: «Ta̱ngatꞌanii̱ nga ikꞌíxꞌi̱njínní ndí ngototóo̱, ja̱koxi̱ boá nga sa̱ꞌinchikonñeé, kó án xí sa̱ꞌin an ka̱makjín xota̱ tji̱e̱ tse̱ xikó maá ńño xi tjín nkꞌa jàn ko̱jo tsi xikó maá tsomí xí tjín tꞌa ndáchíkoón, nga jmíjín xi maxki̱i̱. Kó nga kui xota̱ tji̱e̱ tse̱ ngatsjéni̱xtjin nga sa̱ꞌiín nga skjánjo̱ kondraa̱. Án boá xi bo̱a̱ tꞌíxiaán nga sa̱ꞌinchikonñé an ngayeje xota̱ na̱xi̱ńdá xí tjín nga̱sondiee̱, ngatꞌaa̱ xota̱ tji̱e̱ tse̱, ngatꞌa̱ kandaꞌyéꞌínní».

¹⁹ Ngije kamá kui nii̱, Abraa̱n ko̱jo ndií kijí nginí nínga índo já mosoo̱, kó kui jaá nijan kijíjo̱ na̱xi̱ńdá Beersebaa̱, kó ki̱a̱ kisꞌińdo ngijee̱.

Ndií Najoo̱r

^20-23 Jaskan ngije jaꞌa ni̱xtjin, tjín xí kijítsáyaá Abraa̱n ngo ni nga bi̱ katsoó: «Xo̱ngòo̱ kui xi ꞌmí na̱ Milkaa̱, chjo̱ón Najoo̱r ntsꞌie ji, jin ndí jè kisꞌiee̱». Kuí bí xi̱ꞌbi̱ kui ndií: Uu̱, Buu̱, Kemuee̱l, Kesee̱nd, Asoo̱, Pilndaa̱, Indlaa̱f, ko̱jo Betuee̱l. Uu̱ boá xi ndí tjón kamá. Kemuee̱l boá xi kamá na̱ꞌmii̱ Araa̱n, kó Betuee̱l boá xi kamá na̱ꞌmii̱ na̱ Rebekaa̱.

²⁴ Kó Najoo̱r nijón kamá ndí xí kisꞌiejoo̱ na̱ Reúmaa̱, kui xi chjo̱ón xi ma jó kamá, kó kuí bí kui ndií: Tebaa̱, Ngáa̱n, Taa̱, ko̱jo Maakaa̱.