Jenesii̱s 19 - Xo̱jo̱n eén Néná

Bi̱ tsꞌén katsꞌénkjié Néná na̱xi̱ńdaá Sondoma̱ ko̱jo Ngomorra̱

¹ Kó ngije kjimangixoón jachó jó kui já ndítsjiee̱ ki̱a̱ na̱xi̱ńdáꞌniú Sondoma̱, kó Loo̱t ki̱a̱ xió tikóntꞌa nga̱ntjo̱a̱a̱ na̱xi̱ńdáꞌniú Sondoma̱, kó nga kamábe Loo̱t kui já ndítsjiee̱, jastjíe̱n nga kijítsꞌentínde, kó asiéntikoó ngaskande nga kisitꞌaa̱ xtjien tꞌanangii̱ nga kamábendikón kuí jaá,

² kó bi̱ katsoó: —Jún ndi̱a̱, ꞌniú míꞌájnúꞌun nga kji̱ndi̱bájnú ndiꞌana, ki̱a̱ ka̱ma ku̱i̱ndáyájnú, kó ka̱ma ki̱a̱ tsjayójojnú, kó ndyiojón ta̱jñó ka̱ma kongínrajnú ndi̱yàjnú. Ta̱nga kui já ndítsjiee̱ bi̱ katsó: —Jmí, ndokꞌóchji̱ì, ta̱nga ngi̱ya ndi̱yàtieé tsjayójojne̱.

³ Kó Loo̱t ꞌniú tsíꞌaá kui já ndítsjiee̱ nga ko̱e̱je̱ ndiꞌaa̱. Kó ngije tsꞌasꞌien ndiꞌaa̱, Loo̱t katsꞌéndaa̱ pan, kó katsjaá nichinie, kó kui ndítsjiee̱ iskjinie nichiniee̱.

⁴ Jè má mejeén kjoyójo kui já ndítsjiee̱ nga jachó ngayeje jáxíꞌín xi chji̱a̱ni na̱xi̱ńdáꞌniú Sondoma̱, xi xchá xí kjindí, kó jaꞌatjiyajoo̱n ndiꞌaa̱ Loo̱t.

⁵ Kó kui jaá ꞌniú askjandáyaá Loo̱t nga bi̱ katsoó: «Loo̱t ñá síndo kui jáxíꞌín xi jeꞌekoón kui ni̱xtji̱e̱e̱n. ¡ꞌNa̱xié ji! ¡Ngatꞌa̱ mejénjne̱ nga kui tsjayójojojne̱!»

⁶ Kó Loo̱t jataxie tsi̱ꞌe̱ nga tsíchji̱a̱jo kui jaá, kó tji̱e̱nmá íchjá nga̱ntjo̱a̱a̱ nga jataxie.

⁷ Kó ki̱a̱ ndi̱tsee̱n, bi̱ katsoó kui jaá: —Ngo kjo̱a̱nda já amingo̱, ¡ngata̱ niꞌánjínjnú kui ni chꞌokjiꞌii̱!

⁸ Jéꞌe̱n jó ínchjín xo̱ngò síndona xi kji̱e̱ jmí xi̱ꞌin bejín, kꞌoxié an, kó ta̱ ni xi mejénjnú ti̱ꞌanjo̱jnú, ta̱nga kui já ndítsjiee̱, ngata̱ jmí ni niꞌánjo̱jínjnú, ngatꞌa̱ an boá xi tsꞌénkóo̱n.

⁹ Kó kui jaá bi̱ katsó: —¡Tji̱taxínboeꞌé ji! ꞌYá jií bo̱a̱ nga ji kon xi kꞌuiyéjne̱ ni xi si̱ꞌanjne̱. ¡Nde kꞌi̱e̱jín ndokjo̱e̱ ji kui ngi̱ndiee̱! ¡Ngotꞌe̱ ꞌne̱ chꞌo ngase si̱ꞌanjo̱jne̱ ji ta̱bo̱a̱jiín kui jaá! Kó katsangińña Loo̱t ngamasiee̱n kui jaá nga kamámejeén akján nga̱ntjo̱a̱a̱ ndiꞌaa̱.

¹⁰ Ta̱nga kui já ndítsjiee̱ tsꞌaxiéxkjá tsja kó iskjien Loo̱t nga katsꞌénkꞌasꞌien ngi̱yaa̱, sꞌe̱ íchjá nga̱ntjo̱a̱a̱.

¹¹ Kósꞌe̱ kui já ndítsjiee̱ katsꞌénti̱ka̱ ngayeje xota̱ xi síndo ndi̱tsee̱n tsi̱ꞌe̱ nga sa̱kójiín nga̱ntjo̱a̱a̱ nga kꞌo̱sꞌien.

¹² Jaskan ngije kamá kui nii̱, kui já ndítsjiee̱, bi̱ katsoó Loo̱t: —Tsi tjín ngasee̱ ndí chjo̱on, ko̱jo ndí xíꞌín, ko̱jo xkanda, ko̱jo xota̱ xi xingi̱ ji, ꞌna̱xié ji kꞌi̱e̱e̱,

¹³ ngatꞌa̱ si̱ꞌankjiejne̱ kui ngi̱ndiee̱. Achichí ni xi tjíꞌmí kondraa̱ kui xota̱ na̱xi̱ńdaá, kó kuíni nga Néná xí katsangiyajne̱ tsi̱ꞌe̱ nga si̱ꞌankjiejne̱.

¹⁴ Kósꞌe̱ jataxie Loo̱t, kó tsíchji̱a̱jo já xí ka̱ma xkandaa̱, kó bi̱ katsoó: —¡Tsá ti̱sítji̱e̱njnú! ¡Kó tja̱tjójnú kui ngi̱ndiee̱, ngatꞌa̱ Néná jè sa̱ꞌínkjié kui na̱xi̱ńdaá! Ta̱nga kui já xí ka̱ma xkandaa̱ Loo̱t, ta̱ tsajnókie.

¹⁵ Kó ngije ndibáꞌásie̱én, kui já ndítsjiee̱, bi̱ katsó nginií Loo̱t: —¡Loo̱t tsá yé ji! ¡ꞌNa̱xié ji chjóo̱n ko̱jo nga jó ndí ínchjíi̱n kui ngi̱ndiee̱! ¡Tsi bo̱a̱jín si̱ꞌin ji, ko̱yè jí ndatsa ji nga si̱ꞌankjie kui na̱xi̱ńdaá!

¹⁶ Kó nga tsájín tjítsꞌén Loo̱t, kui já ndítsjiee̱ iskjíbé tsja Loo̱t ko̱jo chjo̱ón ko̱jo ndí ínchjiín, kó tsꞌaxié kui na̱xi̱ńdaá. Tsꞌaxiéꞌá ngatꞌa̱ Néná ni̱ma̱ kamaá.

¹⁷ Ngije kaꞌnaxié kui na̱xi̱ńdaá, ngo kui já ndítsjiee̱ bi̱ katsoó: —¡Tsi mejénjnú nga kjo̱tjoꞌajnú, ti̱yójnú! ¡Ngata̱ tsitsijenjínjnú nga̱xtonjnú, ti̱nde nga ki̱a̱jín nangi soón mindyiajnú! ¡Xtji̱e̱e̱n na̱xi̱i̱ ti̱yójnú, tsi mejénjnú nga kjo̱tjoꞌajnú! ¡Tsi bo̱a̱jín si̱ꞌánjnú, kju̱i̱e̱jnú ndatsa jún nga!

¹⁸ Ta̱nga Loo̱t bi̱ katsó: —¡Jmí ndi̱a̱, ꞌniú míꞌájnúꞌun nga jmí!

¹⁹ Jún achichí kjo̱a̱nda je kiniꞌánjnúꞌun, kó ta̱ngatꞌanii̱ nga ndajnú xota̱ nga nda kiniꞌánjo̱jnúꞌun nga kaꞌnaxiéꞌájnúꞌun, ta̱nga ka̱májín konga an xtji̱e̱e̱n na̱xi̱i̱, ngatꞌa̱ tsi ta̱ nga tsꞌénfí an ngi̱ya ndi̱ya̱à kjo̱chótji̱ngina ni xi ka̱maa̱ kósꞌe̱ ko̱yà an.

²⁰ Jéꞌe̱n, ki̱a̱a̱ tikón ngo ndí na̱xi̱ńdá xi chichí xi tikón tiñaa̱, te̱ꞌéndièjnúꞌun nga ki̱a̱ xtji̱e̱e̱n konga an, tsi̱ꞌe̱ nga kjo̱tjoꞌa an. Bokia nga achichí chichí kui ngi̱ndiee̱.

²¹ Kó ngo kui já ndítsjiee̱ xi bi̱ katsoó: —Ndakjíꞌí, sa̱ꞌinkjatjosón an ni xi tꞌísé ji, kó sa̱ꞌinkjiéjín an kui ndí na̱xi̱ńdá xí tꞌísé ji.

²² Ta̱nga tsá tꞌen ji, ti̱yi jí jàn jàn, ngatꞌa̱ jmí ni sa̱ꞌinjín an ngaskande ngije kjóchí ji ki̱a̱a̱. Kuíni nga kui na̱xi̱ńdaá Soaa̱r kiꞌmí, «ngi̱ndie xi chichí» tsó kui jaꞌeén.

²³ Jè má tjitjó tsꞌueé nga jachó Loo̱t ki̱a̱ na̱xi̱ńdá Soaa̱r.

²⁴ Kósꞌe̱ kjiꞌá boá nga Néná katsꞌénkixó ndiꞌí ko̱jo ndso̱ko̱a̱n asufre̱ ki̱a̱ nga̱soón na̱xi̱ńdáꞌniú Sondoma̱ ko̱jo Ngomorra̱.

²⁵ Kó bo̱a̱ tsꞌén katsꞌénkjié nga jó kui na̱xi̱ńdaá ko̱jo ngayeje ngi̱ndie nínga soón, kó katsꞌénkjié ngayeje xota̱ xi kisꞌińdo kui ngi̱ndiee̱ ko̱jo ngayeje ni xi kamáxchá.

²⁶ Ta̱nga chjo̱ón Loo̱t katsꞌénkꞌafóyá nga askotsijen nga̱xto̱n, kó ndi̱jo̱ na̱xa̱ kamá ngayeje yojoo̱ kui xota̱chjo̱on.

²⁷ Nga kamángindyiojón, achichí ta̱jñó jastjíe̱n Abraa̱n kó kijí nginí nínga tsíchji̱a̱jo Néná.

²⁸ Kó askotsijen xtji̱e̱e̱n na̱xi̱ńdáꞌniú Sondoma̱ ko̱jo Ngomorra̱, ko̱jo ngayeje kui tꞌanangi soón, kó kamábe nga ṉdi̱i̱ tꞌanangii̱ tjitjó xikó maá ṉdi̱ xi tjoo̱ ngo orjno̱.

²⁹ Bo̱a̱ tsꞌén Néná katsꞌénkjié kui na̱xi̱ńdá xi kisꞌińdo kui nangi soón, ta̱nga Néná jaꞌátsjiee̱n Abraa̱n kó tsꞌaxiéꞌá Loo̱t nga kiniꞌánkjié kui na̱xi̱ńdaá.

Bi̱ katsꞌén ínchjiín Loo̱t

³⁰ Kó Loo̱t ko̱jo ndí ínchjiín katsakjónní nga ki̱a̱ kꞌuíndo na̱xi̱ńdá Soaa̱r, kó jatjo kui ngi̱ndiee̱, kósꞌe̱ ngo ti̱xa̱na̱xi̱ kijíkꞌíndo.

³¹ Ngo ndi̱yà tsa̱kjìn xí xchaá Loo̱t, bi̱ katsoó tsa̱kjìn xi kjindií: «Na̱ꞌminá jè ꞌniú xchá kó ngiti̱ jmíjín xota̱ xi̱ꞌin kui ngi̱ndiee̱ xi ka̱ma ku̱i̱xanjo̱ tsi̱ꞌe̱ nga kꞌuiéná ndí.

³² ¡Ja̱bíꞌi̱n kó si̱ꞌanchꞌi̱ na̱ꞌminá! Sꞌe̱ jaskan tsjayójojo̱ tsi̱ꞌe̱ nga kꞌuiéná ndí xí tsi̱ꞌe̱».

³³ Kó ti̱ kuii̱ ni̱xtji̱e̱e̱n kui ínchjiín katsꞌénchꞌi̱ na̱ꞌmii̱, sꞌe̱ na̱ xi xchaá kisꞌiejo̱ na̱ꞌmii̱, kó Loo̱t nde kamábejín nga kisꞌiejo̱ tsa̱kji̱ín, ti̱nde kamábejín nga jastjíe̱n kui naa̱ nga kisꞌietꞌaa̱.

³⁴ Nga kamángindyiojón, na̱ xi xchaá bi̱ katsoó na̱ xi kjindií: «Ngoye jñó kisꞌiejo̱ an na̱ꞌminá. Ingo ndi̱yà si̱ꞌanchꞌi̱ ngíñá tsi̱ꞌe̱ nga jí mára tsjajnije̱ nga ꞌne̱. Kó bo̱a̱ tsꞌén nga jó ñá kꞌuiéná ndí xí tsi̱ꞌe̱».

³⁵ Kó kui jñoó, ngije katsꞌénchꞌi̱ na̱ꞌmii̱, na̱ xi kjindií kisꞌiejo̱. Kó Loo̱t nde kamábejín kóchon kisꞌiejo̱ kui tsa̱kji̱ín, ti̱nde kamábejín nga jastjíe̱ntꞌaa̱ kui naa̱.

³⁶ Kó bo̱a̱ tsꞌén nga jó ndí ínchjiín Loo̱t kisꞌiee̱ ndí xí tsi̱ꞌe̱ na̱ꞌmii̱.

³⁷ Kó nga katsen ndií tsa̱kjìn xí xchaá, ngo ndí xíꞌín kisꞌiee̱ kui xi Moaa̱b ítꞌajaꞌén, kó ki̱a̱ kjindibáni tji̱e̱e̱ xota̱ Moaa̱b ngaskande ngotꞌe̱.

³⁸ Kó ti̱ katsen ndií tsa̱kjìn xí kjindií, kó ti̱ ngo ndí xíꞌín kisꞌiee̱ nga, kui xi Bee̱n-Amii̱ ítꞌajaꞌén, kó ki̱a̱ kjindibáni tji̱e̱e̱ xota̱ Bee̱n-Amii̱ ngaskande ngotꞌe̱.