Jenesii̱s 13 - Xo̱jo̱n eén Néná

Bi̱ tsꞌén índomasien xkjín Abra̱n ko̱jo Loo̱t

¹ Kó nga jatjo Abra̱n nangi Ejipto̱, kijí xtji̱e̱e̱n nangi kixí xi tikón xtji̱e̱e̱n na̱ngi, kó kijíjo̱ chjo̱ón ko̱jo Loo̱t ndií ntsꞌie, ko̱jo ngayeje ni xi tjiín.

² Kui ni̱xtjin jàn Abra̱n achichí jè cho̱n, ngatꞌa̱ kisꞌiee̱ to̱nsinié ko̱jo to̱ntiboa ko̱jo kjín to̱ko̱ya cho̱.

³ Sꞌe̱ kijítsꞌén xaá Abra̱n, jatjoni nangi kixí xi tikón xtji̱e̱e̱n na̱ngi, kó chíchi̱ chíchi̱ kijí xtji̱e̱e̱n Betee̱l ngaskande nga jachó ngi̱ndie nínga tjón íjñá ndiꞌa xi tji̱xi̱ín cho̱ kiniꞌándani ngasꞌe̱, xtji̱e̱e̱n na̱xi̱ńdá Betee̱l ko̱jo na̱xi̱ńdá Aii̱.

⁴ Kó ki̱a̱ Abra̱n katsꞌéndaa̱ Néná ngo ṉchandikón, nínga katsꞌéntsjaà Néná.

⁵ Kó Loo̱t, kui nda̱ xi tsoꞌbájo̱ Abra̱n ti̱ kisꞌiee̱ cho̱tsa̱nga̱ ko̱jo cho̱yojo ko̱jo ndiꞌa xi tji̱xi̱ín cho̱ kiniꞌándani nga.

⁶ Loo̱t ko̱jo Abra̱n achichí tsie ni xi kisꞌiee̱ nga ngo nga ngo, kó ngaskande ngiti̱ kamájín nijan kisꞌińdo ngo ngi̱ndie nga joó.

⁷ Kui ni̱xtjin jàn ti̱ ki̱a̱ kisꞌińdo xota̱ Kanaa̱n ko̱jo xota̱ Feree̱ nga. Ngo ndi̱yà já xí koón cho̱tsa̱nga̱a̱ Abra̱n ko̱jo tsi̱ꞌe̱ Loo̱t ísejo̱ xkjín,

⁸ kósꞌe̱ Abra̱n, bi̱ katsoó Loo̱t: «Mejénjínna nga kjo̱a̱xti kꞌuiéná nga jó ñá ko̱jo nga kjo̱a̱xti kꞌuieé já xí koón cho̱tsa̱nga̱ná ngatꞌa̱ xingi̱ ñá má.

⁹ Tjín ngindie ngayeje tꞌanangii̱ nínga ka̱ma si̱ꞌankjién, kuíni nga ꞌniú míꞌaá nga ta̱sá xín tꞌen ji. Tsi xtji̱e̱e̱n ndsa̱ xí skoón kꞌuin jí, xtji̱e̱e̱n ndsa̱ xí kixi̱i̱ kjuín án, kó tsi xtji̱e̱e̱n ndsa̱ xí kixi̱i̱ kꞌuin jí, xtji̱e̱e̱n ndsa̱ xí skoón kjuín án. ¡Ta̱nga chjiéngá kja̱xín kja̱xín kongín!»

¹⁰ Kó Loo̱t askotsijen nga ngo foaꞌatjiyajoo̱n, kó kamábe tꞌanangi són xi tikóntꞌa ndejèꞌ Jorndaa̱n nga tjín síkijí ndáfoa ki̱a̱a̱, ngatꞌa̱ ngindiee̱ nga sa̱ꞌínkjié Néná na̱xi̱ńdáꞌniú Sondoma̱ ko̱jo Ngomorra̱, ngayeje kui ngi̱ndie són xi ꞌmí Soaa̱r achichí tsjachon kamá, xikó maá Endee̱n, kui ngi̱ndie nínga tjitjíe̱ yá tjié xi tjón katsꞌénda Néná, kó achichí ni kamáxchá ki̱a̱a̱, xikó maá tꞌanangi nínga kisꞌijña na̱xi̱ńdá Ejipto̱.

¹¹ Kósꞌe̱ Loo̱t jaꞌájin kui nangi soón, kó xtji̱e̱e̱n nínga fotjo tsꞌueé kijí. Kó bo̱a̱ tsꞌén Abra̱n ko̱jo Loo̱t kja̱xín kja̱xín kijí nga ngo nga ngo.

¹² Kó Abra̱n ki̱a̱ kisꞌijña nangi Kanaa̱n, tji̱e̱nga Loo̱t ki̱a̱ kijíkꞌíjñá na̱xi̱ńdá xi síndotꞌa ndejèꞌ Jorndaa̱n, tiñaa̱ na̱xi̱ńdáꞌniú Sondoma̱.

¹³ Ta̱nga xota̱ xi chji̱a̱ni na̱xi̱ńdáꞌniú Sondoma̱ achichí nga ndajín kamá, kó achichí jé katsꞌén kondra̱a̱ Néná.

¹⁴ Ngije xín kijí Loo̱t, Néná bi̱ katsoó Abra̱n: «Abra̱n, ngotꞌe̱ ꞌne̱ chjanínkꞌé ji kje̱n, kó ki̱a̱ nínga tindyin ji tsitsíjìi̱n xtji̱e̱e̱n ta̱ꞌin, xtji̱e̱e̱n nangi, xtji̱e̱e̱n nínga fotjo tsꞌueé, ko̱jo xtji̱e̱e̱n nínga ꞌbosꞌien tsꞌueé.

¹⁵ Ngatꞌa̱ ngayeje kui tꞌanangi nínga tsꞌén be ndyikin ji, kuí boá xi ngatsjéni̱xtjin tsjaa ji ko̱jo ngayeje xota̱ tji̱e̱ tse̱.

¹⁶ Kó án boá xi sa̱ꞌin an nga kjín ka̱ma xota̱ tji̱e̱ tse̱, xikó maá nga jmíjín xi ka̱maa̱ ku̱i̱ꞌíxki̱ xa̱a̱ tꞌanangii̱, bo̱a̱ má tsꞌén jmíjín xi ka̱maa̱ ku̱i̱ꞌíxki̱ xikó kjiꞌi ka̱ma xota̱ tji̱e̱ tse̱.

¹⁷ Ti̱sítji̱n ji, kó tꞌentsitsíjin ji nga tiyaá ko̱jo nga ndojoó tꞌanangii̱, ngatꞌa̱ jè ji tjítsꞌenkꞌasꞌieen».

¹⁸ Kósꞌe̱ Abra̱n jaꞌáxín ndiꞌa xi tji̱xi̱ín cho̱ kiniꞌándanii̱, sꞌe̱ kijíkꞌíjñá nangi Ebroo̱n, tꞌa nínga tjín yámamree̱, kó ki̱a̱ katsꞌénda ngo ṉchandikón nínga katsꞌéntsjaà Néná.