Jenesii̱s 12 - Xo̱jo̱n eén Néná

Bi̱ tsꞌén kjindibáni Abraa̱n ( 12:1—25:18 ) Bi̱ tsꞌén Néná katsjáxaá Abra̱n

¹ Néná bi̱ katsoó Abra̱n: «Tꞌíjñímasin ji nangìi̱ ko̱jo xota̱ xingi̱ ji, ko̱jo ndiꞌaa̱ xota̱ xi xcháa̱, kó tꞌen ji ngi̱ndie xi sꞌe̱ kokoo.

² Kó ngo na̱xi̱ńdá xí ta̱nisién je sa̱ꞌin an ngayeje xota̱ tji̱e̱e̱, kó sa̱ꞌinchikonñeé, kó nkꞌa kꞌuijñá an jaꞌée̱n, kó ta̱ngatꞌanii̱ ji nga kjín xota̱ xi ka̱machikonñé.

³ Xi nda sa̱ꞌínjoo̱, nda ka̱mataꞌin, kó xi ndajín sa̱ꞌínjoo̱, ndajín ka̱mataꞌin kui. ¡Ta̱ngatꞌanii̱ ji nga ka̱machikonñé ngayeje na̱xi̱ńdá xí tjín nga̱sondiee̱!»

^4-5 Kó Abra̱n tsintꞌiéꞌeén Néná, kó jatjoni nangi Araa̱n, sꞌe̱ kijí nangi Kanaa̱n, kó kijíjo̱ chjo̱ón ko̱jo nda̱ xi ꞌmí Loo̱t, kui xi ndií ntsꞌi̱e̱, ko̱jo ngayeje moso̱ xi kisꞌiee̱ xi tsꞌatsie ki̱a̱ nangi Araa̱n, kó ti̱ kijíjo̱ ngayeje ni xi kisꞌiee̱ nga. Ichítié ko̱jo kan ún noó Abra̱n nga bo̱a̱ kamá.

⁶ Kui ni̱xtjin jàn xota̱ Kanaa̱n to̱kó ki̱a̱ kisꞌińdo nangii̱, ki̱a̱ jaꞌa Abra̱n ngaskande nga jachó ngi̱ndie xi ꞌmí Sikee̱n nínga tikón yámoree̱.

⁷ Kó Néná jatjokjaà Abra̱n ki̱a̱a̱, kó bi̱ katsoó: «Xota̱ tji̱e̱ tse̱ boá xi tsjàa̱ ngayeje kui tꞌanangii̱». Kó Abra̱n ki̱a̱ katsꞌéndaa̱ ngo ṉchandikón Néná, ngatꞌa̱ ki̱a̱ jatjokjaà.

⁸ Sꞌe̱ kijíra ngo na̱xi̱ xi tikón xtji̱e̱e̱n nínga fotjo tsꞌueé ki̱a̱ na̱xi̱ńdá Betee̱l, kó nga jachó ki̱a̱a̱, ki̱a̱ katsꞌénda ndiꞌaa̱, kui xi tji̱xi̱ín cho̱ kiniꞌándani. Na̱xi̱ńdá Aii̱ xtji̱e̱e̱n nínga fotjo tsꞌueé kisꞌijñanii̱ kui ngi̱ndiee̱, kó na̱xi̱ńdá Betee̱l xtji̱e̱e̱n nínga ꞌbosꞌien tsꞌueé kisꞌijñanii̱. Kó ti̱ ki̱a̱ katsꞌéndaa̱ ngo ṉchandikón Néná nga.

⁹ Kó Abra̱n jatjoni ki̱a̱a̱, sꞌe̱ kijí xtji̱e̱e̱n nangi kixí xi tikón xtji̱e̱e̱n na̱ngi.

Bi̱ tsꞌén jachó Abra̱n nangi Ejipto̱

¹⁰ Kui ni̱xtjin jàn kisꞌie ngo kjindiá xí ta̱nisién ꞌniú ngayeje nangi Kanaa̱n. Achichí ꞌniú kamá kui kjindiaá nga ngaskande Abra̱n nangi Ejipto̱ kijíkꞌíjñá, ngatꞌa̱ kisꞌie nichinie kui ngi̱ndiee̱.

¹¹ Ngije makjachó má Abra̱n na̱xi̱ńdá Ejipto̱, bi̱ katsoó na̱ Saraii̱ chjo̱ón: «¡Jéꞌe̱n, jè be an nga achichí tsjákjiꞌi ji!

¹² Kó nga sku̱i̱e̱e̱ xota̱ Ejiptoo̱, ko̱jo nga sku̱i̱e̱ nga chjo̱onna má ji, sa̱ꞌínkꞌiénna, ta̱nga ji jmí ni sa̱ꞌínjo̱jiín.

¹³ Kuíni nga kjiꞌanga ko̱síyaá kui jaá ꞌyá mánii̱ an, ndichja Abra̱n án tꞌíi̱n, tsi̱ꞌe̱ nga nda si̱ꞌanjo̱na, kó si̱ꞌankꞌiénjínna ta̱ngatꞌanii̱ ji».

¹⁴ Kó ngije tsꞌasꞌien Abra̱n na̱xi̱ńdá Ejipto̱, xota̱ xi chji̱a̱ni ki̱a̱a̱ kamábe nga na̱ Saraii̱ achichí tsjákjiꞌi.

¹⁵ Kó já xí tsꞌénxátꞌaa̱ nda̱ ree̱ kijítsáyaá nda̱ ree̱ nga achichí tsjákjiꞌi kui naa̱. Kó nda̱ ree̱ tji̱e̱nmá tsíꞌá nga tsangínjo̱ na̱ Saraii̱ ndo̱bo̱a̱xa̱á.

¹⁶ Kó kui ree̱ nda katsꞌénjo̱ Abra̱n, ta̱ngatꞌanii̱ na̱ Saraii̱, ngatꞌa̱ katsjaá cho̱tsa̱nga̱, cho̱yojo, bórró xíꞌín ko̱jo bórró ínchjín, ko̱jo moso̱, ko̱jo chji̱ni̱e̱ꞌbo, ko̱jo cho̱toꞌoyitsꞌe̱n.

¹⁷ Kó kui nii̱ tsjajín kamaá Néná, kó chiꞌin xi ta̱nisién ꞌniú ndajín katsangiyaa̱ nda̱ ree̱ ko̱jo xota̱ ndiꞌaa̱.

¹⁸ Kósꞌe̱ nda̱ ree̱ ta̱tra katsangiyakjaꞌá Abra̱n, kó bi̱ katsoó: «¡Míkjo̱a̱a̱ nga bo̱a̱ kjiꞌi ni xi kiniꞌínje̱ní! Ánní nga kiꞌmíyéjínní nga chjóo̱n ma na̱ Saraii̱.

¹⁹ Ánní nga: Ndichja án má kase ji. ¡A yejín ji nga jè chjo̱onna sa̱ꞌin an katsaki! ¡Jiꞌín, chjábé chjóo̱n, kó chjéndi̱yáa̱ kꞌi̱e̱e̱!»

²⁰ Kósꞌe̱ nda̱ ree̱ katsjaákjo̱a̱ xotaa̱ tsi̱ꞌe̱ nga tsꞌaxié Abra̱n kui ngi̱ndiee̱, kó Abra̱n kaꞌnaxié kui ngi̱ndiee̱ ko̱jo chjo̱ón ko̱jo ngayeje ni xi tjiín.