Énkjínkón 9 - Xo̱jo̱n eén Néná

Kjo̱a̱kjínkoón ko̱jo kjo̱a̱kitikjo̱a̱a̱

¹ Kjo̱a̱kjínkoón xikónií tsi ngo ndiꞌa katsꞌénda kó yito yásé índoo̱.

² Kó xikónií tsi ti̱ katsꞌénda ngo sꞌué, nínga katsjá yojo xi chinie ko̱jo bino̱ xi nda ngasee̱. Kó ngije tikónnda yámíxa̱a̱,

³ katsangiya chji̱ni̱e̱ꞌe̱én xí ínchjiín, ki̱a̱ xtji̱e̱e̱n nínga nkꞌaa̱ na̱xi̱ńdaá, tsi̱ꞌe̱ nga ndeskande ki̱a̱a̱ bi̱ ka̱tso̱ nga skja̱ndáyà:

⁴ «Jún ndí i̱xtikjindí xo̱ngò xi kji̱e̱ jmí ni májínjnú, ndibáchonjnúꞌun kꞌi̱e̱e̱, jún xi niꞌánkjójínjnú ni xi niꞌánjnú,

⁵ ndibá chi̱ni̱e̱jnú ni chiniena, ndibá tꞌi̱o̱jnú bino̱ xi je tikónndana.

⁶ Tꞌíjñámasiénjnú kjo̱a̱chi̱nii̱, tsi mejénjnú nga ku̱i̱ndyionjnú, kó ki̱a̱ tangíntji̱ngíjnú ndi̱ya̱à kjo̱a̱kjíntakoón.

⁷ »Xota̱ xi tsꞌénchjíni̱e̱ xota̱ xi mojnókiená, chꞌo ꞌmií, xota̱ tsꞌénchjíni̱e̱ xota̱jeé, niꞌánchꞌó.

⁸ Ngata̱ niꞌínxchínje̱jín ji xota̱ xi mojnókiená, tsi̱ꞌe̱ nga sa̱ꞌínchꞌójiín, ta̱sá xota̱ xi kjínkoón xi ti̱ꞌinchji̱ni̱ ji, kó tjó sa̱ꞌiín kuí.

⁹ Takoyèe̱ xota̱ xi kjínkoón, kó tsie ngase kjo̱a̱kjínkón kꞌuieé, takoyèe̱ xota̱ xi kixi̱i̱, kó tsie ngase ni xi ka̱maa̱ kui.

¹⁰ »Ngayeje xota̱ xi mejeén nga xota̱ xi kjínkón ka̱ma, tjón mára ngatamabendikón Néná. Kjiꞌanga yà kuí Néná xí tsjiee̱, kuí nii̱ xi bokó nga tjínná kjo̱a̱kjíntakón.

¹¹ Ngatꞌa̱ án boá xi sa̱ꞌin an nga kjín ngase ni̱xtjin ku̱i̱ndyin ji nga̱sondie, kó kjín ngase nó ka̱maa̱.

¹² Tsi xota̱ xi kjínkón ji, jí boá xi nda ka̱maa̱, ta̱nga tsi xota̱ xi kitikjo̱a̱a̱ ji, jí boá xi tsie kjo̱a̱ni̱ma̱ ku̱i̱tja̱tí ji».

¹³ Kjo̱a̱kitikjo̱a̱a̱, xikónií ngo xota̱chjo̱on xí see̱n én, xi chi̱ni ko̱jo xi jmí kjo̱a̱soboájiín boá.

¹⁴ Kjiꞌanga ndiꞌaa̱ tikón, ki̱a̱ ꞌbíjñaxtio nga̱ntjo̱a̱a̱, kó kjiꞌanga na̱xi̱ńdáꞌniuú tikón, ki̱a̱ ꞌbíjñá nínga ngayeje xi sku̱i̱e̱,

¹⁵ kó chji̱a̱a̱ xota̱ kixi̱ tjimá xi foaꞌa kui ndi̱ya̱à:

¹⁶ «Jún ndí i̱xtikjindí xo̱ngò xi kji̱e̱ jmí ni májínjnú, ndibáchonjnúꞌun kꞌi̱e̱e̱, jún xi niꞌánkjójínjnú ni xi niꞌánjnú,

¹⁷ ¡Nda ngase ꞌyó, ndáfoa xi niꞌánchejeé! ¡Nda ngase chinie pan xi chinie nínga ꞌmaa̱!»

¹⁸ Ta̱nga kui xota̱ chi̱nii̱ nde bejín nga ndiꞌaa̱ kjo̱a̱bo̱ya boá kui ndiꞌaa̱, ¡nde bejín xota̱ xi je jachó ki̱a̱a̱, nga jè ngi̱yaa̱ ti̱xa̱nga̱tsjo̱ó je síndo!