Énkjínkón 8 - Xo̱jo̱n eén Néná

Kjo̱a̱kjínkoón tsꞌénchji̱a̱

¹ ¡Kjo̱a̱kjínkoón tsꞌénchji̱a̱! ¡Tsꞌénkjandayá má nga tsꞌénchji̱a̱ kjo̱a̱kjíntakoón!

² Xikoó tsi ki̱a̱ bosién tꞌa tji̱ngi̱i̱, ko̱jo tsi ki̱a̱ nínga foaꞌaxtikjá ndi̱yàtieé, tsi̱ꞌe̱ nga ngayeje xi sku̱i̱e̱.

³ Ki̱a̱ bosién tꞌa nga̱ntjo̱a̱a̱ jee̱, ki̱a̱ nínga bitjasꞌi̱e̱nnii̱ na̱xi̱ńdáꞌniuú, kó ꞌniú kjandayà nga bi̱ tsó:

⁴ «Jún xota̱ xi chji̱a̱ni ngayeje kui nga̱sondiee̱, ¡jún boá xi tsꞌénchji̱a̱jnúꞌun!

⁵ Jún ndí já xo̱ngò xi jmí ni bejín, ndí jákjíndí xi kji̱e̱ jmí ni májiín, ¡nda má ti̱ꞌankjójnú ni xi ndyi̱niꞌánjnú!

⁶ Nda má tasiénijónjnúꞌun, ngatꞌa̱ ngo ni xi achichí kixi̱ ko̱jo xi ndikón xiyàjnúꞌun,

⁷ Ni ja̱koxi̱ boá xi xiánjnúꞌun, ngatꞌa̱ ni xi ndisoo̱, chꞌórií ndso̱ꞌba án,

⁸ kixi̱ boá ngayeje énna, kó jmíjiín ni xi ńkjá ngájén.

⁹ Xota̱ xi kjínkoón ko̱jo xi makjiín nii̱, be nga kixi̱ ko̱jo nga ja̱koxi̱ boá énna.

¹⁰ Ta̱sá kjo̱a̱bokoyána xi ti̱ndyi̱séjnú, kó jmí tsi to̱ntiboaa̱, ta̱sá kjo̱a̱kjínkónna xi ti̱ndyi̱séjnú, kó jmí tsi to̱nsinieé xi kui soboá soboaá,

¹¹ ngatꞌa̱ kjo̱a̱kjínkoón chjí ngasenii̱, ta̱bo̱a̱jiín ndi̱jo̱ tsjakon xi tjiín, ¡chjí ngasenii̱ to̱bo̱a̱jiín ngayeje ni xi nda ngase xi ka̱mamejénná!

¹² »Án boá xi kjo̱a̱kjínkoón, kó ki̱a̱ nijan tikónjo̱na kjo̱a̱niꞌánkjó xi ndaa̱, tjínná kjo̱a̱kjíntakón ko̱jo kjo̱a̱botíxoma xi ndaa̱.

¹³ Xota̱ xi bendikón Néná, chꞌórií ni xi ndajín. An chꞌóna kjo̱a̱nkꞌakoo̱n ko̱jo nga je ꞌnaxié yojoná, ko̱jo ndi̱yà xí ndajiín, ko̱jo én xí chꞌo aa̱.

¹⁴ Ngi̱ya ndsa̱ án tikón, kjo̱a̱botíxomaa̱ ko̱jo ni xi nda niꞌaán, án boá xi kjo̱a̱kjíntakoón, kó án tsa̱ꞌa̱n ngaꞌniuú.

¹⁵ Án boá xi tsꞌen an nga ꞌbíndo xá já ree̱, ko̱jo nga xota̱ xi botixómaá, kjo̱a̱kiti xi kixi̱ tsꞌénda,

¹⁶ án boá xi tsꞌen an nga xota̱ xi ngito̱ko̱o̱, ko̱jo ndií já ree̱, ko̱jo ngayeje xotaa̱ kixi̱ tsꞌén botixómaá tꞌanangii̱.

¹⁷ Tsꞌentjó an xota̱ xi tsꞌéntjóna an, kó tsja mana nga sakoó an ngayeje xota̱ xi ja̱koxi̱ nga an mongasena.

¹⁸ Nijan tsꞌénxájo̱na, kjo̱a̱cho̱o̱n, ko̱jo kjo̱a̱yandikoón, ko̱jo nga tsie ni ꞌbéná, ko̱jo kjo̱a̱kixi̱i̱.

¹⁹ Ni xi tsꞌéntsja an, chjí ngasenii̱ ta̱bo̱a̱jiín to̱nsinié xi kui soboá soboaá, ko̱jo to̱ntiboa xi je katjoꞌójii̱n.

²⁰ Ngatsjéni̱xtjin nga kixi̱ tsꞌen an ni xi tsꞌen an, kó ki̱a̱ fitji̱ngi an ndi̱yà xí kixi̱i̱.

²¹ Kó ꞌbikítsie máa̱ kjo̱a̱cho̱n ndiꞌaa̱ ngayeje xota̱ xi tjoó an.

²² »Néná boá xi katsꞌéndana ndeskande nga tjón tjón, ndeskande ngindiee̱ nga sa̱ꞌínda ngayeje nii̱.

²³ Nde kji̱e̱ tsꞌéndajín nga̱sondiee̱ kó an ja̱bo̱a̱ je katsꞌéntsenna kui.

²⁴ Nde kji̱e̱ jmíjín ndáchíkoón ko̱jo nínga tjo ndáfoaa̱ nga katsꞌéndana.

²⁵ Ngindiee̱ nga si̱ꞌanda na̱xi̱i̱, ngindiee̱ nga si̱ꞌanda tji̱ngi̱i̱, an ja̱bo̱a̱ jè kiniꞌándana.

²⁶ Nde kji̱e̱ niꞌándajín nga̱sondiee̱, ko̱jo kꞌijñaá, ko̱jo xa̱ xi tjón kisꞌie tꞌanangii̱.

²⁷ Ki̱a̱ tikón an kjiꞌanga Néná katsꞌénda nkꞌajmii̱, ko̱jo nga íjñá ngi̱jinꞌa̱sièn nga̱soón ndáchíkoón,

²⁸ ko̱jo nga índo ṉdi̱ ki̱a̱ nkꞌajmii̱, ko̱jo nga íchjá nínga fotjoni ndáfoaa̱ ndáchíkoón,

²⁹ ko̱jo kjiꞌanga katsjaákjo̱a̱ ndáfoaa̱ tsi̱ꞌe̱ nga kjo̱a̱ꞌatjónjiín nínga tji̱e̱n chjiéngá kjo̱chó. »Kjiꞌanga Néná katsꞌénda tꞌanangii̱,

³⁰ ki̱a̱ tikóntꞌáa̱ kui, nga ndyi̱ꞌbíndondajne̱ ngayeje nii̱. Ndyiojón ndyiojón achichí tsjá kamána nga ki̱a̱ kisꞌijña an ngindyi̱ko̱n kui.

³¹ Achichí tsjá kamána, kjo̱a̱a̱ kui nga̱sondie xi kui katsꞌénda, ¡xota̱ nga̱sondie xi katsꞌénda Néná, íkitsie mána kjo̱a̱tsja!

³² »Jún ndí jákjíndí, ¡nda má tasiénijónjnúꞌun! Achichíra̱tsjaa̱ xi ki̱a̱ ko̱e̱je̱tji̱ngi ndi̱yàna.

³³ Kjínkón ngatamajnú, ko̱jo tasiénijónjnúu̱ kjo̱a̱bokoyána, kó ngata̱ niꞌánchꞌójínjnú.

³⁴ Achichíra̱tsjaa̱ xota̱ xi ntꞌiéna, kui xi ndyiojón ndyiojón ndibá ndiꞌana, nga konda nga̱ntjo̱a̱a̱ ko̱jo yáseé.

³⁵ Ngatꞌa̱ kui xi sa̱ko̱ó an, kjo̱a̱mindyioo̱n boá xi sa̱ko̱ó, kó sa̱ko̱ó kjo̱a̱ndaa̱ Néná nga,

³⁶ ta̱nga kui xi tsꞌénjé nga chꞌo tsóna, ndajín tsꞌén ndyi̱ꞌbijñá yojoo̱, ngayeje xi chꞌoo̱ an, kjo̱a̱bo̱yaa̱ boá xi tjoó».