Énkjínkón 7 - Xo̱jo̱n eén Néná

Nga chji̱a̱ná ngo chjo̱on xí tsꞌéntꞌaa̱kjo̱a̱ xi̱ꞌii̱n

¹ Ji ndí, ndaꞌyéꞌín ni xi tꞌíxiaán, kó xikoó tsi ngo ti̱jìto̱n ngatamaa̱ kjo̱a̱botíxomana.

² Ti̱ꞌinkjatjosén ji kjo̱a̱botíxomana kó ku̱i̱ndyin ji nga̱sondie, kó nda má chíi̱n kjo̱a̱kitina xikoó tsi ndyikin ji,

³ ngatsjéni̱xtjin chꞌi̱e̱ xki̱ ji, xikoó tsi ngo ni xi tjítꞌa ndse̱, ko̱jo tsi xikoó tsi ki̱a̱ nga̱són ini̱ma̱a̱ ti̱ꞌinꞌindé ji.

⁴ Xikoó tsi ndichje ji ti̱ꞌin kjo̱a̱kjínkoón, xikoó tsi xingi̱ ji ti̱ꞌin kjo̱a̱kjíntakoón,

⁵ ngatꞌa̱ kuí boá kui nii̱ xi xín sa̱ꞌínkjaꞌaa kui na̱ xi tsꞌéntꞌaa̱kjo̱a̱ xi̱ꞌii̱n, kui xi én tsjatsó tsꞌénkjién nga ꞌboṉcha̱joo̱.

⁶ Ngo ndi̱yà nga tsꞌénkotsijen an nga tikón an tꞌa nga̱ntjo̱a̱masienkjaá ndiꞌana,

⁷ kamábe an achichí já xo̱ngò xi ndasénjiín nga tsꞌén ngo ni, kó askotsijen ndá ndáa̱ ngo xi ꞌniú kitikjo̱a̱ ngase.

⁸ Jachó nijon ndi̱yàtieé, kó jaꞌaxtikjá, sꞌe̱ inda inda kijí ndiꞌaa̱ kui naa̱.

⁹ Jè má kjimaꞌña̱, nga je ngiti̱ tsijénjiín nga bo̱a̱ kamá.

¹⁰ Kjiꞌa má jatjo ndiꞌaa̱ kui naa̱ nga kijí ngase kui nda̱a̱. Tsꞌényajá ngo ńjño xi boajá ínchjínmasieén, kó tsijen má kisꞌie kje̱n kjo̱a̱a̱ ni xi mejeén sa̱ꞌín.

¹¹ Ngo na̱ xi kitikjo̱a̱, ko̱jo xi jmí kjo̱a̱soboá kisꞌiejiín, kó kamámejénjiín nga ki̱a̱ kisꞌijña ndiꞌaa̱.

¹² Kui xkjín kuí ínchjiín, ki̱a̱ ꞌbítso̱ma ngi̱ya ndi̱yàtieé, ko̱jo tsi ki̱a̱ nínga síndo ndi̱tse̱e̱n, ko̱jo tsi ki̱a̱ nínga síndo nijon ndi̱yàtieé, nga ndyi̱koyaa̱ ꞌyára̱ni xi kjo̱a̱ꞌa.

¹³ Kó nga kui naa̱ kamábe kui nda̱ xo̱ngo̱ò, ja̱kamá kijíkjaníkjá, kó atíndsoꞌá, kó nde ndasénjín kamaá nga bi̱ katsoó:

¹⁴ «A ka̱ma xi̱ni̱ ji nichinie, kui yojo xi je katsꞌenkꞌasꞌièe̱n néna. Ngotꞌe̱ boá nga katsꞌenkjatjosóo̱n ni xi katsóyàtjóo̱n, kó achichí kjo̱a̱xió je tjínna an ko̱jo kui.

¹⁵ Kuíni nga ji kijíkjaꞌayindi̱ya̱à, tsꞌénmogaséñaá katsaki, ¡kó jè kasakona ji!

¹⁶ Jè tikónnda ṉchanna, jè katsꞌenchòo̱n, jè kjiꞌisón ngo ńjño xi ńchjón Ejipto̱ kamándani.

¹⁷ Ṉchanna achichí sije̱n katsꞌen an, nga indyiáa̱ ndásíje̱n mirra̱, ko̱jo aloe̱, ko̱jo tji̱bo̱a̱kanera̱.

¹⁸ Ja̱bíchinní, kó si̱ꞌantsjajo̱ yojoná ngaskande nga kamángindyiojón, ngatꞌiéná kjo̱a̱tsja.

¹⁹ Jmíjín xi̱ꞌinna kꞌi̱e̱ ndiꞌana, achichí kjin nínga kijí.

²⁰ Íkitsie má to̱n stsaa̱, kó kjo̱e̱ꞌejín ngotꞌe̱, ngaskande tsí ni̱xtjin xi je tjíndaa̱ kui nga kjo̱e̱ꞌe».

²¹ Kui naa̱ achichí ixi tsꞌén tsíchji̱a̱jo, nga kui nda̱a̱ kamáꞌindakon.

²² Kó kui nda̱ xo̱ngo̱ò kijítji̱ngii̱ kui naa̱, xikótsꞌèn fí ngo cho̱yojo xi̱ꞌin xi fí niꞌánkꞌién, xikó maá ngo nda̱ kitikjo̱a̱ xi tsꞌénfí nínga si̱ꞌanjeé,

²³ xikó maá ngo ni̱sie xi tsá fí nínga tikón chja̱ya̱a̱, ndatsi nde bejín nga ki̱a̱ ko̱yà, ngaskande nga ngo yáyojó kjo̱a̱ꞌaxtikjá ini̱ma̱a̱.

²⁴ Ji ndí nda̱chií: ndaꞌyéꞌínní, kó tasínijìi̱n ni xi tꞌíxiaán.

²⁵ Ngata̱ kuijín kui naa̱ ꞌmitji̱ngi ji, ti̱nde ngata̱ ki̱a̱jín kui ndi̱ya̱à niꞌíncheje ji yojòo̱.

²⁶ Ta̱ngatꞌanii̱ kui naa̱ nga achichí má xi je kamáꞌoón, kó jesón, ¡ngaskande xota̱ xi ꞌniú ngasee̱ xi je jesón kjo̱a̱a̱ kui!

²⁷ Ngayeje xi ki̱a̱ fi ndiꞌaa̱, fí kixi̱ kixi̱ nínga sakoó kjo̱a̱bo̱yaa̱.