Énkjínkón 6 - Xo̱jo̱n eén Néná

Ti̱ꞌinkjé jí ngindiee̱ nga tjín ni xi si̱ꞌin ji

¹ Ji ndí, tsi ngo amingo̱ xi ku̱i̱ꞌaa̱ nga ji xi ko̱nángí yojòo̱ kjo̱a̱a̱ ngo ni, ko̱jo nga ko̱e̱ꞌé ji ndso̱ꞌbe nga ji kꞌuíchjí jí ni xi ntsjieén ngo xota̱ xi nde yejín ji.

² Tsi je katseꞌé ji ndso̱ꞌbe, ja̱ ti̱kuíní ée̱n xi chja̱ya̱a̱ ka̱ma ngatꞌa̱ chjiéngá si̱ꞌinkjatjosén ji kui nii̱.

³ Ji ndí, tsi̱ꞌe̱ nga kjo̱tjongii̱ yojòo̱ kjo̱a̱a̱ kui nii̱, chjiéngá bi̱ si̱ꞌin ji: tꞌenchíi̱n amingoo̱, kó ꞌniú chjiéꞌée̱ nga jijín sa̱ngínjiin kui nii̱.

⁴ Ngata̱ tsjaféjín ji, ti̱nde nga ꞌbíchjéjín ndyikin,

⁵ ta̱sá ꞌna̱xiéꞌé ji yojòo̱, xikótsꞌèn ni̱siee̱ ko̱jo ndi̱kꞌijñaá kjiꞌanga be já xí tsꞌenkꞌién kui cho̱o̱.

Ngata̱ tsiꞌéjín má ji

⁶ ¡Ji chí tsiꞌé, tsitsíjìi̱n ndi̱ꞌyoo̱! ¡Tsitsíjìi̱n kótsꞌèn tsꞌénxá, kó kjínkón ngatama ji xikoó kui cho̱o̱!

⁷ Ndi̱ꞌyoo̱, jmíjiín ngito̱ko̱, ti̱nde jmíjiín xi botixómaá,

⁸ ta̱nga nga ma cho̱ndoboaá foaꞌátikó nichiniee̱, kó nga fochó cha̱a̱n ni xi kamáxchaá, foaꞌátjó ni xi skji̱ni̱e̱.

⁹ Ji chí tsiꞌé, ngaskande kjiꞌání nga to̱kó tsjáfé ji. Ngaskande kjiꞌání nga kjo̱a̱ꞌaá.

¹⁰ Tsi ngotjón tsjáfé ji, ngotjón niꞌínkjaꞌyé ji, kósꞌe̱ tsjaníkjé má ji yojòo̱.

¹¹ ¡Tsi bo̱a̱ si̱ꞌin ji, ni̱ma̱ tsꞌén ku̱i̱ndyin ji, kó kjo̱a̱ni̱ma̱a̱ kji̱ndi̱bánieé xikó maá tsi ngo xota̱ xi tsoꞌbásón skjánjoo̱!

Ngata̱ ꞌbíndisejín ji

¹² Tjín xota̱ xi ndajín ko̱jo xi jmí kjo̱a̱soboájiín xi ngongá ni ndiso ndyi̱ꞌbini̱jmì,

¹³ tsi̱ꞌe̱ nga ku̱i̱ꞌíndisojo̱ kje̱ꞌe xota̱, ꞌbíchjaá ndyi̱ko̱n, tsja bokóní, ko̱jo se tsꞌéntíyaà.

¹⁴ Kui xotaa̱ ta̱ngongá ni xi ndajiín xi tjíjin ini̱ma̱a̱, kó ngatsjéni̱xtjin nga tsꞌénkjó ni xi ndajín, kó ngongá nga kjo̱a̱xti ndyi̱ꞌboxié.

¹⁵ Kuíni nga ni xi ndajiín ta̱niján má kji̱ndi̱bánié, kjiꞌanga nde tsꞌénkoyàjiín boá nga bo̱a̱ ka̱maa̱ kjiꞌá boá nga si̱ꞌankjie.

Ngata̱ bixkénjín ji

¹⁶ Néná, jun ko̱jo tsi ngaskande yito to̱ko̱ya ma xota̱ xi achichí chꞌoó ini̱ma̱a̱, kó kuí bí xi̱ꞌbi̱:

¹⁷ Xota̱ xi nkꞌakoo̱n, xota̱ xi ꞌbindísoó, xota̱ xi tsꞌenkꞌién xota̱ xi jmí jéjiín,

¹⁸ xota̱ xi tsꞌénkjó ni xi ꞌniú ndajín, xota̱ xi achichí ni xi kjimaa̱ nga tsá tsꞌén ni xi ndajín,

¹⁹ xota̱ xi chistiko̱ ndiso ma, ko̱jo xota̱ xi kjo̱a̱xti ꞌboxié ngi̱jii̱n xota̱ xkjín.

Chíi̱n kui chjo̱on xí tsꞌéntꞌaa̱kjo̱a̱ xi̱ꞌii̱n

²⁰ Ji xi̱ꞌin, nda nda má ti̱ꞌinkjatjosén ji kjo̱a̱botíxomaa̱ na̱ꞌmíi̱, kó nga ꞌbíjñímasínjín ji kjo̱a̱bokoyaá na̱áa̱n.

²¹ Ngatsjéni̱xtjin tꞌíjin ji ngi̱jin ini̱ma̱a̱, kó xikoó tsi ngo ni xi jmeyé kjásen ti̱ꞌin ji.

²² Kui boá kui nii̱ xi ko̱ko̱ó ndi̱yà nínga kꞌuin jí, kuí boá xi skoón kjiꞌanga tsjáfé ji, kó kuí boá xi ku̱i̱chji̱a̱joo kjiꞌanga kjo̱a̱ꞌaá.

²³ Kjo̱a̱botíxomaa̱ ko̱jo kjo̱a̱bokoyaá, kuí boá xi xikoó ngo ndiꞌíxò xi tjítí ka̱maa̱, kó kjo̱a̱niꞌánchji̱ni̱e̱e̱, kuí boá xi ko̱ko̱ó kótsꞌèn nga nda ku̱i̱ndyin ji,

²⁴ kuí boá kui nii̱ xi skoón kjo̱a̱a̱ kui chjo̱on xí tsꞌéntꞌaa̱kjo̱a̱ xi̱ꞌii̱n, kui xi ta̱ngatꞌanii̱ én ixii̱ nga jo̱ꞌo se ji.

²⁵ Ngata̱ tsꞌénmejénjín ini̱ma̱a̱ kjo̱a̱tsjakjiꞌii̱ kui chjo̱on, ti̱nde ngata̱ boeꞌéndièjín ji nga ta̱ngatꞌanii̱ xikótsꞌèn kotsijee̱n, nga tsja ka̱maa̱ kui.

²⁶ Ngatꞌa̱ ta̱ngatꞌanii̱ ngo na̱masien, nga xotaa̱ ka̱ma skji̱ni̱e̱jín ngo ndso̱ꞌba nichinie, kó ta̱ngatꞌanii̱ ngo chjo̱ón kje̱ꞌe nda̱, ka̱ma si̱ꞌankꞌiennii.

²⁷ Tsi ngo nda̱ skjitjónjón xꞌué ni̱se̱e̱n, a ku̱i̱ti̱jín ńjñóo̱ tsobo̱a̱.

²⁸ Tsi ngo nda̱ ko̱e̱je̱jin xꞌué, a chja̱njínrií se tsobo̱a̱.

²⁹ Ja̱ ti̱ bo̱a̱ ti̱ tsꞌén kui nda̱ xi kjojñájo̱ chjo̱on kje̱ꞌe nda̱, chjiéngá sa̱tíjeé.

³⁰ Jmíjín xi sa̱ꞌínchꞌó ngo nda̱ xi chejé tsi ta̱ngatꞌanii̱ nga bojoó nga sa̱ꞌínchejé,

³¹ ta̱nga tsi tjín xí sku̱i̱e̱, chjiéngá yito bo̱a̱ kjiꞌi ngase tsja nginí xikó kjiꞌi katsꞌénchejé, ndatsi ngaskande ngayeje ni xi tjiín xi sa̱ꞌínkꞌasꞌien.

³² Ta̱nga kui nda̱ xi tsꞌénkámajo̱ chjo̱on xí tjítsꞌéntꞌaa̱ kjo̱a̱ xi̱ꞌii̱n, achichí nga ndajínkjiꞌi ni xi tjítsꞌeén ini̱ma̱a̱,

³³ kó tsꞌénmongase nga si̱ꞌanꞌoo̱n, ko̱jo nga kjo̱a̱soboá sa̱ko̱ó, ¡kó jmíni̱xtjin kju̱i̱e̱ kui nii̱!

³⁴ Ngatꞌa̱ nga ka̱machi̱ni̱ xi̱ꞌii̱n kui xota̱chjo̱on, achichí sa̱ꞌínxchán, kó sa̱ꞌínjetakónjín nga ka̱mamejeén sa̱ꞌíngojo.

³⁵ Nde ngojín ni skjíbéngí kjo̱a̱a̱ ni xi kamátaꞌin ti̱nde sa̱ꞌínjetakónjín, ndatsi kjín ni xi ta̱ko̱e̱ꞌérií.