Énkjínkón 5 - Xo̱jo̱n eén Néná

Ni xi májín niꞌán kjo̱a̱a̱ ngo chjo̱on xí tsꞌéntꞌaa̱kjo̱a̱ xi̱ꞌii̱n

¹ Ji ndí xi̱ꞌin, nda má tasínijìi̱n kjo̱a̱kjínkónna, ko̱jo nda má ndaꞌyé ji kjo̱a̱kjíntakón xi tsꞌéntsjaa,

² tsi̱ꞌe̱ nga, ngatsjéni̱xtjin nga nda si̱ꞌinkjé ni xi ko̱ndókjo̱e̱ ji, kó ée̱n boá xi ko̱kó nga tjiín kjo̱a̱kjíntakón.

³ Ngatꞌa̱ kui chjo̱on xí tsꞌéntꞌaa̱kjo̱a̱ xi̱ꞌii̱n, ixi má eén xikó maá ntsjieén, kó achichí tsjatsó én xí chji̱a̱joo̱ nga tsꞌénꞌíndatakín,

⁴ ta̱nga nga fetꞌaa̱ kjo̱a̱, eén sa ngase ma ta̱bo̱a̱jiín saa̱, kó yojó ngase ma ta̱bo̱a̱jiín ngo ki̱cha̱ xi yojó ngajó ngoboaá.

⁵ Kui xi ki̱a̱ nijan sa̱ꞌínkamajo̱ kui chjo̱ón, ¡jè xikoó tsi je katsꞌénkꞌién yojoo̱!

⁶ Ngatꞌa̱ kui chjo̱on jmí ndasénjiín ndi̱yà xí ndaa̱ kjo̱a̱mindyioo̱n, ti̱nde bejín nga ndi̱yà xí ndajiín je tsoꞌbá.

⁷ Ji ndí nda̱chií, nda má tasínijìnní: ¡kó ngata̱ niꞌínchꞌíjín ji kjo̱a̱bokoyá xi tsꞌéntsjaa!

⁸ Xín ti̱ꞌinkjeꞌée̱ yojòo̱ kui chjo̱on, kó ngata̱ ki̱a̱jín ꞌmí ji ndiꞌaa̱,

⁹ tsi̱ꞌe̱ nga kje̱ꞌejín xi si̱ꞌinkꞌasꞌíi̱n ngaꞌniú xí tjiín, ko̱jo tsi nó xi nda ngasee̱ kjo̱a̱mindyiòo̱n si̱ꞌinkꞌasꞌíi̱n xota̱ xi ndajín,

¹⁰ ko̱jo tsi tsi̱ꞌe̱ nga xota̱ xi nde yejín ji xi sa̱ko̱ó ni xi tjiín, ti̱nde kje̱ꞌejín ndiꞌa kjo̱chó kjo̱a̱ni̱ma̱ xi kiniꞌín ji.

¹¹ Tsi̱ꞌe̱ nga ngije ma kjietꞌa ni̱xtjíi̱n, ko̱jo ngije chiꞌii̱n kjifee̱ yojòo̱, xchieꞌéjín ji

¹² nga bi̱ sé jí: «¡Míkjo̱a̱a̱ nga katsꞌenchꞌó an kjo̱a̱botíxomaa̱! ¡Míkjo̱a̱a̱ nga ini̱ma̱na katsꞌénchꞌó kjo̱a̱niꞌánchji̱ni̱e̱e̱!

¹³ Jmíni̱xtjin katsꞌensée̱n mostro̱na, ti̱nde tsintꞌieꞌénjáa̱n xota̱ xi akóyána.

¹⁴ ¡Ngotꞌe̱ ꞌne̱ jè ngiti̱ ndajín tikón an, ngindyi̱ko̱n ngayeje xota̱ na̱xi̱ńdaá!»

Ngata̱ niꞌíntꞌejíi̱n kjo̱a̱ chjóo̱n

¹⁵ Tsi mejeén nga tsjatsꞌèn si̱ꞌintsjeje̱ ji yojòo̱, bo̱a̱ ti̱ꞌin ji, ta̱nga chjóo̱n boá xi ti̱ꞌintsjeje̱ ji.

¹⁶ ¡Kjo̱a̱tjóo̱ ta̱kuítsí chjóo̱n xi te̱ꞌée̱! ¡Ngata̱ kje̱ꞌejín xi boeꞌée̱!

¹⁷ Ngata̱ kje̱ꞌejín xi nijan niꞌíntsjeje̱ ji kui kjo̱a̱tsja xi tjiín ji ko̱jo chjóo̱n.

¹⁸ ¡Ngatamachikonñé chjóo̱n, kó ti̱ꞌintsjeje̱ ji kui na̱ xi kiniꞌínmején ji ndeskande koó nga kjindí jí!

¹⁹ Kuí boá xi xikoó ngo ndi̱kꞌijñá chjo̱on, te̱ꞌéndiè ji nga kjo̱a̱tjoó ko̱jo kjo̱a̱niꞌándajoo̱n kui, ngatsjaá kjo̱a̱tsja ngatsjéni̱xtjin.

Néná tsꞌénkotsijee̱n ni xi niꞌín ji

²⁰ Ji xi̱ꞌin, ngata̱ boeꞌéndièjín ji nga kje̱ꞌe chjo̱on sa̱ꞌínmejeén, ti̱nde nga mindyiséjín ji nga ngo chjo̱on xí je ixán sa̱ꞌíndajon sa̱ꞌíndatꞌaa̱.

²¹ Ngatꞌa̱ Néná achichí nda kotsijee̱n ndi̱yà xí tjimá xotaa̱, kó kuí boá xi kotꞌa ngayeje ndi̱ya̱à.

²² Jeé ko̱jo ni xi ndajín niꞌaán, kuí boá xi chja̱ya̱ maa̱ xota̱ xi ꞌniú ndajiín, kó kuí nii̱ xi ꞌbíndoꞌniú.

²³ Bo̱a̱ tsꞌén fesón kuí xotaa̱, kui xi mejénjiín nga sa̱ꞌínchji̱ni̱e̱ yojoo̱, ¡kó kjo̱a̱a̱ nga makjínjiín nii̱, fochó ni̱xtjin nga fe ngijee̱!