Énkjínkón 4 - Xo̱jo̱n eén Néná

Jmíjín ngo ni xi kjo̱chótji̱ngi kjo̱a̱kjínkoón

¹ Jún ndí jákjíndí: Ndaꞌyájnú ni xi ko̱kóyájnú na̱ꞌmijnú, kó nda má tasiénijónjnúu̱ tsi̱ꞌe̱ nga kꞌuiéjnú kjo̱a̱kjíntakón.

² Nda tsꞌén tsꞌénbokoyájnúꞌun an, kuíni nga, ngata̱ niꞌánchꞌójínjnú kui kjo̱a̱bokoyaá.

³ Ti̱ nda̱chí kamá an ngasꞌe̱ nga, kó ti̱ kisꞌiena ngo na̱ꞌmi ko̱jo ngo na̱an xi achichí tjó katsꞌénjo̱na nga katsꞌénxchána.

⁴ Na̱ꞌmina boá xi akóyána, nga bi̱ katsóna: «Ngi̱jin ini̱ma̱a̱ tjajin ji ni xi tꞌíxiaán, ti̱ꞌinkjatjosén ji kjo̱a̱botíxomana, kó bo̱a̱ tsꞌén nga tsie ka̱maa̱ nga ku̱i̱ndyin ji nga̱sondie.

⁵ ꞌNiú ngase kjínkón ti̱ꞌin ji yojòo̱, ko̱jo ꞌniú ngase ngatamakjíntakín ji, nga jmíni̱xtjin niꞌínchíyé ji kjo̱a̱bokoyána. ¡Nga jmíni̱xtjin xín niꞌínkjeꞌe ji ni xi tsꞌénchji̱a̱ an!

⁶ Tjó ti̱ꞌin ji kjo̱a̱kjínkoón, kó nga jmíni̱xtjin ꞌbíjñímasin ji, ngatꞌa̱ kuí boá xi skoón.

⁷ Ni xi tjón tjón xi ꞌniú chjí ngasee̱, kuí boá nga kꞌuieé kjo̱a̱kjínkón, ko̱jo nga tsie ngase kjo̱a̱kjíntakón kꞌuieé, ndatsi ko̱ti̱ñi ji ngayeje ni xi tjiín.

⁸ Te̱ꞌée̱ chjí xí tsoboaá kjo̱a̱kjínkoón, kó kuí boá xi nkꞌa ku̱i̱ꞌíjñá jaꞌée̱n, tsi ji tse̱ si̱ꞌin ji kjo̱a̱kjínkoón, ngayeje xotaa̱ xi sku̱i̱e̱ndikoón,

⁹ kuí boá xi ka̱ma xikoó ngo naxó xí ꞌbíjñaá tokó, kuí boá xi ka̱ma xikoó ngo korona̱ xi tsjakjiꞌi.

¹⁰ »Ji ndí, ndaꞌyéní kó ti̱ꞌinjo̱ꞌo ji énna, tsi̱ꞌe̱ nga kjín ngase nó ka̱maa̱ nga ku̱i̱ndyin ji nga̱sondie.

¹¹ Án boá xi je tsꞌénbokoo ndi̱ya̱à kjo̱a̱kjínkoón, kó ki̱a̱ tsꞌénfíjoo̱ xtji̱e̱e̱n ndi̱yà xí kixi̱i̱.

¹² Kjiꞌanga ku̱i̱ńtje̱ ji, jmí ni ku̱i̱ꞌíchjájiín ndsa̱ki, kó kjiꞌanga ku̱i̱yì jí, jmí ni sti̱ngíjín ji.

¹³ ꞌNiú chjábé jí kjo̱a̱bokoyána, kó ngata̱ ꞌbíjñímasínjín ji, ꞌniú chíi̱n, ngatꞌa̱ kuí boá kui nii̱ xi ku̱i̱ndyinni ji.

¹⁴ Ngata̱ ki̱a̱jín niꞌínkamaje̱ ji xota̱ xi ꞌniú ndajiín, ti̱nde ngata̱ ki̱a̱jín ꞌmitji̱ngi ji ni xi ndajín xi ndyi̱tsꞌèn.

¹⁵ ¡Ngata̱ ki̱a̱jín nijan mińtje̱je ji! ¡Xín tꞌen ji, kó tꞌenra ji nínga tiꞌmi ji!

¹⁶ Ngatꞌa̱ kui xotaa̱ nde foféjín ngaskande nga tsꞌén ngo ni xi ndajín, ¡nde tsꞌénkjaꞌyájín ngaskande nga tjín xí tsꞌenkjié!

¹⁷ Ngindiee̱ nga ṉño̱ skji̱ni̱e̱, ta̱sá ni xi ndajín boá xi tsꞌén, ngindiee̱ nga ni xi ꞌyó xi kꞌuí, ta̱sá achichí tsjá maá nga chejé tsꞌén.

¹⁸ »Ta̱nga ndi̱yà xí tjimáyà xota̱ xi kixi̱i̱, ꞌna̱ ma xikoó nda̱a̱ ndiꞌí xí ya nga ndibáꞌásie̱én: kó saꞌniú sáꞌniú ngase ma ꞌna̱, ngaskande nga ma ndisꞌueé.

¹⁹ Kó ndi̱ya̱à xota̱ xi ꞌniú ndajiín, xikónií tsi ngo ngi̱ndie nínga jñó, ngaskande nde bejín mí nii̱ bo̱a̱ xi stingí.

²⁰ »Ji ndí ti̱ꞌinsée̱n énna, kó nda nda má tasínijìi̱n ni xi tꞌíxiaán.

²¹ Nda nda má tjajintakín ji, kó ngi̱jin ini̱ma̱a̱ tꞌíjñijin ji,

²² ngatꞌa̱ kuí boá xi tsja̱á kjo̱a̱mindyioo̱n, kó kuí boá xi xikoó tsi ndiki ka̱maa̱ ngayeje yojoo̱.

²³ Kó nga̱soón ngayeje nii̱, chíi̱n ni xi fojin ji ini̱ma̱a̱, ngatꞌa̱ ki̱a̱ boá nínga ndibánií kjo̱a̱mindyioo̱n.

²⁴ Ngata̱ én chꞌo tsójín ndokjo̱e̱ ji, chje̱ꞌéxíi̱n ndso̱ꞌbe ji kjo̱a̱ndisoo̱.

²⁵ Ngatsjéni̱xtjin nga xtji̱e̱e̱n kje̱n ji tsitsíjin, kó ki̱a̱ tsitsíjìi̱n ni xi tjíndo ngindyikin ji.

²⁶ Ti̱ꞌinkjé jí ndi̱yà xi tsꞌentje̱ ji, kó kixi̱ ngatama ngayeje ndi̱yà nínga kꞌuín.

²⁷ Ngata̱ kje̱ꞌejín ndi̱yà chjábé jí, ti̱nde xtji̱e̱e̱n nga skóo̱n, ti̱nde xtji̱e̱e̱n nga kixi̱i̱, ¡xín ti̱ꞌinkjeꞌèe̱ yojòo̱ ni xi ndajiín!»