Énkjínkón 31 - Xo̱jo̱n eén Néná

Énkjínkón xi tsíchji̱a̱ re Lemuee̱l

¹ Kuí eén xi katsꞌénkjién na̱aa̱n re Lemuee̱l nga katsꞌénchji̱ni̱e̱ ndií.

² Ji xi̱ꞌin, jí boá kui ndí xí katsjána Néná nga ꞌniú tsíꞌáa̱, kó mí kjo̱a̱kjínkón xi ka̱ma tsjaa̱ katsaki.

³ ¡Ngata̱ niꞌínkjiéjín ji ngaꞌniúu̱ ngatꞌanii̱ ínchjín! Ngatꞌa̱ ta̱ngatꞌanii̱ kui nga ree̱ tsꞌénchájá yojoo̱.

⁴ »Ji ndína Lemuee̱l, ndajínkjiꞌi nga bino̱ kꞌuí ree̱, ko̱jo ndajínkjiꞌi nga xán kꞌuí xota̱ xi botixómaá.

⁵ Ngatꞌa̱ tsita̱ ngije ka̱ma chꞌi̱, xchi̱yaa̱ kjo̱a̱kitii̱, kó ngiti̱ ndasénjín ka̱maa̱ nga sku̱i̱e̱ndikón kjo̱a̱nda xi tjiín xota̱ ni̱ma̱a̱.

⁶ Xaán tsi̱ꞌe̱ xota̱ xi je mejeén kjifesoón boá, kó binoo̱ tsi̱ꞌe̱ xota̱ xi síndo xtindaa̱ boá.

⁷ ¡Ngatꞌi, kó ngatsꞌénchíyá ni xi chajaa̱! ¡Ko̱jo ngatsꞌénchíyá kjo̱a̱ni̱ma̱ xi ndyi̱foaꞌatio!

⁸ »Ndókjo̱e̱tjé ji xota̱ xi májiín chji̱a̱a̱, tꞌenjindeje̱ ji kjo̱a̱nda xi tjiín xota̱ xi jmíjiín xi kꞌo̱xiéꞌá.

⁹ ¡ꞌNiú ndókjo̱e̱ ji, tsi̱ꞌe̱ nga kixi̱ tsꞌén si̱ꞌansee̱n! ¡Tꞌenjindeje̱ ji xota̱ ni̱ma̱a̱ ko̱jo xota̱ xi ni̱ma̱kjo̱a̱ síndoo̱!»

Na̱ xi kixi̱i̱ xi xikoó tsi ngo chi̱bo̱a̱ ka̱maa̱

¹⁰ ¡Achichí niꞌín kjiꞌi nga sa̱kóná ngo chjo̱on xi ta̱nisién nga ndatsꞌèn! ¡Tsi sa̱kóná xikónií tsi ngo ndi̱jo̱ xi achichí tsjákjiꞌi xi kasakoná!

¹¹ Xi̱ꞌin xi tikónjo̱ kui naa̱ kamáꞌniátakón, kó ta̱ngatꞌanii̱ kui naa̱ nga jmíni̱xtjin xcha̱jaa̱ to̱n xi sa̱ꞌín.

¹² Kui naa̱ ngatsjéni̱xtjin nga nda sa̱ꞌínjo̱ xi̱ꞌii̱n, ngayeje ni̱xtjin nga kꞌuijñá.

¹³ Fíkꞌatsie tsa̱nga̱a̱ cho̱tsa̱nga̱ ko̱jo ńchjón lino̱, kó achichí tsjaꞌbeé nga tsꞌénda ni xi machjieén.

¹⁴ Boá ma tsꞌén, xikoó ngo tjotso yiꞌi xi tsꞌénkjién xota̱ xi botiñá nii̱, kui xi achichí kjin ndibájo̱ni nichiniee̱.

¹⁵ Achichí jñóyà fostjíe̱n, nga tsjaá nichinie xota̱ ndiꞌaa̱, ko̱jo nga tsáyaà xá xí sa̱ꞌín chji̱ni̱e̱ꞌboo̱.

¹⁶ Kosoón kótjín chjií ngo xoꞌba, kósꞌe̱ ꞌbotsiejo̱ni to̱n xi je katsꞌén, sꞌe̱ jaskan ꞌbítji̱e̱ tostsi̱je̱è.

¹⁷ Kó ꞌniú tsꞌénxá nga tsjaá kjo̱a̱ni̱ma̱ yojoo̱.

¹⁸ Kuí má xi koo̱n xaá tsi̱ꞌe̱ nga nda ko̱e̱je̱e̱, kó nga ngo ni̱xtji̱e̱e̱n nga tí ndiꞌí ndiꞌaa̱, ngatꞌa̱ nga ngo ni̱xtji̱e̱e̱n nga tsꞌénxá.

¹⁹ Ti̱ kuíní bo̱a̱ xi tsꞌénkjién ṉtji̱i̱ nga tsꞌénda ńchjón xí tsꞌéndani ńjño xi boajá.

²⁰ Kó ngatsjéni̱xtjin nga bosikójo xota̱ ni̱ma̱a̱, ko̱jo xota̱ xi ni chjieén.

²¹ Nda̱jín maá nga nchꞌàn ma, ngatꞌa̱ ngayeje xota̱ ndiꞌaa̱ tjiín ńjño xi nda tsꞌénꞌásoo̱ yojoo̱.

²² Kjíbé ńjño lino̱ xi nda ko̱jo xi ńchjón koán kamándani, kó kuí tsꞌéndani ńjñotjibé ko̱jo chi̱nga xi boajá.

²³ Achichí yandikón xi̱ꞌii̱n ki̱a̱ nga̱ntjo̱a̱a̱ na̱xi̱ńdáꞌniuú, kjiꞌanga ki̱a̱ ꞌbíjñajii̱n xota̱ xi xchaá kui ngi̱ndiee̱.

²⁴ Tsꞌénda ńjño xi botiñá, ko̱jo ńjño xi ꞌbíkjá ndáyáná xi botiñaá xota̱ xi botiñá nii̱.

²⁵ Kuí boá ngo na̱ xi tjiín ngaꞌniú, ko̱jo xi yandikón, kó nda̱jín maá ni xi jaskan ka̱maa̱.

²⁶ Ngatsjéni̱xtjin nga én kjínkón xi chji̱a̱, kó achichí tsjatsꞌèn bokoyá nga nda xꞌi̱a̱ xingi̱.

²⁷ Ngatsjéni̱xtjin nga tikónnda kjo̱a̱a̱ ni xi chjieén ndiꞌaa̱, kó jmíni̱xtjin nga ta̱xkiya skji̱ni̱e̱ ni xi kuijín kisꞌingii̱ nga katsꞌénxá.

²⁸ Ndií achichí tsjá tsoó kjo̱a̱a̱ ni xi tsꞌén, kó xi̱ꞌii̱n tsꞌéndíkón má nga bi̱ tsoó:

²⁹ «Achichí ínchjín xí ndatsꞌèn, tjín, ta̱nga ji ikitatjénríi̱ ngayejee̱».

³⁰ Kjo̱a̱tsjakjiꞌii̱ ngo na̱, ta̱ ꞌboṉcha̱jo tsíná, kjo̱a̱tsjakjiꞌii̱ ta̱kjo̱a̱ndaní bo̱a̱, ¡kuí na̱ xi bendikón Néná xí chjiéngá si̱ꞌandikón!

³¹ ¡Ngatamayandikón kjo̱a̱a̱ ngayeje ni xi tsꞌén! ¡Ti̱ꞌantsjàjnúu̱ ngindyi̱ko̱n ngayeje xotaa̱ kjo̱a̱a̱ ni xi katsꞌén!