Énkjínkón 30 - Xo̱jo̱n eén Néná

Kjo̱a̱kjínkoón Anguu̱r

¹ Kuí bí kui eén xi tsíchji̱a̱ Anguu̱r, ndií Jakee̱ xi chji̱a̱ni nangi Masaa̱. Anguu̱r bi̱ tsꞌén tsíchji̱a̱jo Itiee̱l ko̱jo Ukaa̱l:

² «Chi̱ni ngase an ta̱bo̱a̱jiín ngayeje xotaa̱, ngatꞌa̱ makjínjínna xikótsꞌèn makjiín ngo xota̱.

³ Jmí kjo̱a̱kjínkón kisꞌiejínna, kó ti̱nde bejín an ꞌyání xi Néná xi tsjiee̱.

⁴ »ꞌYá xí kijínijíngí nkꞌajmi jàn, sꞌe̱ kjindibájaya nginí. ꞌYá xí kamaá íjñaꞌniú tjo̱o̱ ngi̱ya tsja. ꞌYá xí kamaá nga ngo ńjño íxtiéní ndáchíkoón. ꞌYá xí kamaá íjñaá tsindió tꞌanangii̱. Kó ꞌmí kuí, kó a yé jí jaꞌeén ndií.

⁵ »Tsjie boá ngayeje eén Néná, kó Néná boá xi koo̱n nga jmí ni ka̱májiín xota̱ xi kui maꞌniátakón.

⁶ Ngata̱ fosénjín ngasèe̱ ni eén Néná, ngatꞌa̱ tsájmi̱ sa̱ꞌínjeé nga ko̱kó nga tiꞌbíndisé jí.

⁷ »Ji Ne tsa̱ꞌa̱n, ngindiee̱ nga ko̱ya án jó ni tsꞌénmíꞌaá, ¡kó jmí ngata̱ séjínní!

⁸ Kjin ti̱ꞌinkjeꞌéní ni xi jmí ni chjíjiín ko̱jo kjo̱a̱ndisoo̱, kó ngata̱ jmí kjo̱a̱ni̱ma̱ ko̱jo tsi kjo̱a̱cho̱n boeꞌéjínní, ta̱kuítsí nichinie xi skjíni̱e̱ an ndyiojón ndyiojón.

⁹ Ngatꞌa̱ tsita̱ ngije tsie ni tjínna, ngiti̱ skuiéjaán jí, kósꞌe̱ bi̱ xián án: “ꞌYání bo̱a̱ xi Néná”. Ko̱jo tsi ni̱ma̱ ka̱ma an, sꞌe̱ ta̱sá sa̱ꞌinchejé án, kósꞌe̱ ngaskande ji chꞌo xiaán ngijee̱.

¹⁰ »Ngata̱ fongitaꞌínjín ji ngo moso̱ ngindyikón ndi̱a̱a̱, ngatꞌa̱ kui mosoo̱, ka̱márií ku̱i̱chji̱a̱ nga ndajín ka̱maa̱, kó kjo̱tjosón ni xi katsó.

¹¹ »Tjín xota̱ xi chji̱a̱ nga ndajín ka̱maa̱ na̱ꞌmii̱, kó nde tsꞌénchíkonñéjín na̱aa̱n.

¹² Tjín xota̱ xi achichí tsjie maá yojoo̱, ta̱nga nde kji̱e̱ tsꞌéntsjiejónjín jé xí tjiín.

¹³ Tjín xota̱ xi achichí nkꞌakon maá yojoo̱, kó chꞌo tsꞌén kotsijee̱n ngayeje xota̱ xi ngasee̱.

¹⁴ Tjín xota̱ xi ja̱kon ki̱cha̱ndojó má kón ṉꞌni̱u̱ xi̱xi̱, kó ja̱kon kichiro̱ má kón ṉꞌni̱u̱ yiꞌi, nga mejeén sa̱ꞌínkjié xota̱ ni̱ma̱ xi tjín kuí tꞌanangii̱, ko̱jo xota̱ xi jmí nijiín xi tjín kuí nga̱sondiee̱.

¹⁵ »I̱ti̱i̱ xikónií tsi jó ndí tjiín xi ta̱soboá “te̱ꞌéní”, “te̱ꞌéní” ndyi̱tsó. Ján má ni xi jmíni̱xtjin tsiee̱, kó xi ma nijoón jmíni̱xtjin nga: ta̱ ki̱a̱ tsí tji̱e̱n, tsó.

¹⁶ Ngi̱ndiee̱ kjo̱a̱bo̱yaa̱, xi mején ngasee̱ xota̱ xi fesón, ko̱jo ínchjín ndi̱ xi mejeén nga kꞌuieé ndí, ko̱jo tꞌanangi xi mején ngasee̱ ndáfoaa̱, ko̱jo ndiꞌí xí jmíni̱xtjin nga ta̱ ki̱a̱ tsí tji̱e̱n, tsoó.

¹⁷ »Xota̱ xi mojnókie na̱ꞌmii̱, ko̱jo xi tsꞌenchꞌó kjo̱a̱bokoyaá na̱aa̱n, kuí boá xi tsoboaá nga ni̱sie kuerboo̱ kꞌo̱xié ndyi̱ko̱n, ko̱jo nga cho̱ xi kjinie yojo siee̱n skji̱ni̱e̱ tikón.

¹⁸ »Ján ko̱jo tsi ngaskande nijón má ni xi achichí fíndikónna kó nde chií makjínjínna, kó kuí bí xi̱ꞌbi̱:

¹⁹ chi̱bo̱a̱ xi ꞌbijñá ja̱a̱ nínga foaꞌa, ko̱jo chi̱bo̱a̱ xi ꞌbijñá ngo ye̱ nga foaꞌa nga̱soón ngo ndi̱jo̱, ko̱jo chi̱bo̱a̱ xi ꞌbijñá ngo tjotso xi ta̱nisién ꞌniú je ki̱a̱ ngi̱jin ndáchíkoón, ko̱jo chi̱bo̱a̱ xi ꞌbijñá ngo nda̱ xi je kisꞌiejo̱ ngo na̱.

²⁰ »Na̱ xi tsꞌéntꞌaa̱kjo̱a̱ xi̱ꞌii̱n, bi̱ tsꞌén: kje̱ꞌe xíꞌín fojñajo̱, jaskan mongáyà, kósꞌe̱ bi̱ tsó: “¡Jmí ni xi ndajín katsꞌénjín an!”

²¹ »Kjo̱a̱a̱ ján to̱ko̱ya ma xota̱ xi fotsiení tꞌanangii̱, kó xi ma nijoón chikjo̱a̱jiín:

²² Kjo̱a̱a̱ kui moso̱ xi re ma, ko̱jo kjo̱a̱a̱ xota̱ kitikjo̱a̱ xi ꞌbongii̱ nichiniee̱,

²³ ko̱jo kjo̱a̱a̱ kui na̱ xi xi̱ꞌii̱n je katsꞌénchꞌó, kósꞌe̱ bixan nginí, ko̱jo kjo̱a̱a̱ kui chji̱ni̱e̱ꞌbo xi tsꞌén tsi̱ꞌe̱ ngi̱ndie xi tsoboaá chjo̱on ndi̱a̱a̱ ndiꞌaa̱.

²⁴ »Nijón má cho̱ xi ꞌniú xi̱xi̱ ngase xi tjín kuí nga̱sondiee̱, kó kuí boá xi ꞌniú ngase kjínkón, ta̱bo̱a̱jiín xota̱ xi kjínkoón, kó kuí bí xi̱ꞌbi̱:

²⁵ »Ndi̱ꞌyoo̱, kui xi xikónií ngo xtín xota̱ na̱xi̱ńdá xi jmí ngaꞌniújiín, ta̱nga nga ma cho̱ndoboaá ꞌbitíkó ni xi kjinie,

²⁶ ko̱jo chińtsi̱e̱é, kui xi xikónií ngo xtín xota̱ na̱xi̱ńdá xi jmí ngaꞌniújiín, ta̱nga ngi̱jin ndi̱jo̱o̱ tsꞌénda ndo̱bo̱a̱a̱,

²⁷ ko̱jo chjo̱bo̱a̱a̱, kui ndí cho̱ xi jmíjiín ngo re xi botixómaá, ta̱nga ꞌbítso̱ma chji̱ni̱e̱ chji̱ni̱e̱, xikó maá ngo xtín jájún,

²⁸ ko̱jo róxchó xí ndse̱ ndoboéje̱ni ji, kó ki̱a̱ ꞌbíndo ngi̱ya ndo̱bo̱a̱xa̱á nda̱ ree̱.

²⁹ »Ján ko̱jo tsi ngaskande nijón má xi ndikóntsꞌèn ꞌbítso̱maa̱, kó kuí bí xi̱ꞌbi̱:

³⁰ xandi̱je̱e̱, kui cho̱ xi ꞌniú ngase ngi̱jii̱n ngayeje cho̱o̱, kó ta̱ꞌyajín xi tsakjoón,

³¹ ko̱jo xo̱nda̱xi̱ꞌin xi ndikón tsꞌén fií, ko̱jo cho̱tsa̱nga̱ xi jaꞌatji ndi̱ja̱a̱, ko̱jo kui re xi fotsoꞌbátjoón jájuún.

³² »Tsi nkꞌakon tiniꞌín ji yojòo̱ xikoó ngo xota̱ xi kitikjo̱a̱, ko̱jo tsi tiniꞌínkjé jí nga ni xi ndajín mejeén si̱ꞌin ji, ngatjaꞌátsjien kui nii̱:

³³ Tsi tsá si̱ꞌinkꞌájin ji ntsjeén, mantekiya̱ ko̱ꞌna̱xié ji, tsi ꞌniú ko̱ndákiní ji ńtjen, jín ko̱ꞌna̱xiée̱, kó tsi kjo̱a̱xti ku̱i̱ndyi̱sé ji, kjo̱a̱xti kꞌuieé».