Énkjínkón 3 - Xo̱jo̱n eén Néná

Kje̱ꞌe ngase ni nda xi tjiín kjo̱a̱kjínkoón

¹ Ji ndí ngata̱ niꞌínchíyéjín ji kjo̱a̱kitina, kó tjajintakín ji kjo̱a̱botíxomana,

² kó bo̱a̱ tsꞌén nga kjín ni̱xtjin ko̱jo kjín nó ka̱maa̱ nga ku̱i̱ndyin ji nga̱sondie, kó kꞌuieé kjo̱a̱xió.

³ Ngatsjéni̱xtjin ngatꞌieé kjo̱a̱ni̱ma̱takón ko̱jo kjo̱a̱kixi̱, xikoó tsi ngo ni xi jmeyá kjásen ji ngatamaa̱, kó ngi̱jin ini̱ma̱a̱ tꞌíjñijin ji kui nii̱,

⁴ ngatꞌa̱ bo̱a̱ tsꞌén nga kꞌuieé kjo̱a̱ndaa̱ Néná, kó xotaa̱ ndatsꞌèn ku̱i̱chji̱a̱ kjo̱a̱a̱ ji.

⁵ Ngayeje ini̱ma̱a̱ nga ti̱ꞌinꞌnítakín ji Néná, kó ngata̱ kjo̱a̱kjíntakóo̱njín xi ma ꞌnítakín ji.

⁶ Chꞌi̱e̱xki̱ ji Néná ngayeje ni xi si̱ꞌin ji, kó kuí boá ko̱síko̱joo̱ nga kixi̱ ku̱i̱ndyin ji.

⁷ Ngata̱ nkꞌakonjín ꞌnaxié ji yojòo̱ kjo̱a̱a̱ nga kjínkón ji, che̱ndikín jí Néná, kó tji̱taxíntꞌée̱ ni xi ndajiín,

⁸ ngatꞌa̱ kui boá kui nii̱ xi xikoó tsi ndiki ka̱maa̱ yojòo̱, kó kuí boá xi tsja̱angaꞌniuú ńdaa̱ nga.

⁹ Che̱ndikín jí Néná nga si̱ꞌinkꞌasꞌíi̱n ni xi tsoboaá kui, kjo̱a̱a̱ ni xi tjiín, ko̱jo te̱ꞌée̱ ngo tjín ni xi tjón kamáxchaá,

¹⁰ kó bo̱a̱ tsꞌén nga sꞌi̱kitsie má ni ndiꞌa yiꞌi nínga mindyie ji ni xi maxchaá, kó ni xi mindyie ji binoo̱, xtjónsón má.

¹¹ Ji ndí tsa̱ꞌa̱n, ji ndí tsa̱ꞌa̱n, ngata̱ tonjín yetakín ji kjiꞌanga Néná sa̱ꞌínchji̱ni̱e̱e̱, ti̱nde ngata̱ niꞌínxchínjín ji kjiꞌanga ꞌniú ku̱i̱chji̱a̱joo kui.

¹² Ngatꞌa̱ Néná tsꞌénchjíni̱e̱ boá xota̱ xi tjoó kui, xikótsꞌèn tsꞌénchjíni̱e̱ ndí xí tjoó ngo na̱ꞌmi.

¹³ Achichíra̱tsjaa̱ ngo nda̱ xi kjínkón ka̱ma, ko̱jo xi kꞌuieé kjo̱a̱kjíntakón,

¹⁴ ngatꞌa̱ ni xi tsjá kuí nii̱, nda ngase ta̱bo̱a̱jiín to̱ntiboaa̱, kó to xi tsjá, nda ngase ta̱bo̱a̱jiín to̱nsinié xi ndaa̱.

¹⁵ Kjo̱a̱kjínkoón ko̱jo kjo̱a̱kjíntakoón chjí ngasenii̱ ta̱bo̱a̱jiín ndi̱jo̱ xi ꞌniú tsjákoón, ¡kó ngayeje ni xi mejeén nga kꞌuieé ji, nde ka̱májín tsi kui nijan ndse̱je̱n kꞌuíndo!

¹⁶ Kuí boá xi xikoó tsi ki̱a̱ tjiyá tsja xi kixi̱ nga tsja̱á nga kjín ngase ni̱xtjin ku̱i̱ndyin ji, ko̱jo xikoó tsi ki̱a̱ tjiyá tsja skón nga tsja̱á nga xcha̱ndikoón, ko̱jo nga tsie kjo̱a̱cho̱n tsja̱á.

¹⁷ Achichí tsjákjiꞌi nga xikoó tsi ki̱a̱ kongíntji̱ngí ndi̱ya̱à, ngatꞌa̱ kuí boá xi tsja̱aná nga xió tsꞌén ku̱i̱ndyión.

¹⁸ ¡Kjo̱a̱kjínkoón kuí boá xi xikoó tsi ngo yá xí tsjaá kjo̱a̱mindyion xota̱ xi kui foníkjá, kó achichíra̱tsjaa̱ xota̱ xi kui yaá kjiꞌiꞌniuú.

¹⁹ Kjo̱a̱kjínkoón boá xi katsꞌénkjién Néná nga katsꞌénda tꞌanangii̱, kó kjo̱a̱kjíntakoón boá xi katsꞌénkjién nga ꞌniú íjñá nkꞌajmii̱.

²⁰ Kjo̱a̱kjínkoón boá xi katsꞌénkjién nga ngindie tꞌanangii̱ tsꞌaxiéni ndáfoa ndáńchꞌií ko̱jo ndáfoaa̱ ndejeèꞌ, ko̱jo nga ṉdi̱i̱ tsꞌaxiéni xoñoo̱.

²¹ Ji ndí ti̱ꞌinkjatjosén ji kjo̱a̱kitii̱, kó nda má ndaꞌyé ji kjo̱a̱botíxomaa̱, ngatsjéni̱xtjin tjajintakín ji kui nii̱,

²² ngatꞌa̱ kuí boá kui nii̱ xi tsja̱á kjo̱a̱mindyion ini̱ma̱a̱, kó xikoó tsi ngo ni xi jmeyá kjásen ji ka̱ma nga sku̱i̱e̱e̱ xota̱ xi ngasee̱.

²³ Kósꞌe̱ kjiꞌá boá nga tsjatsꞌèn ku̱i̱ńtje̱ ji nga ku̱i̱ndyin nga̱sondie, kó jmí ni sti̱ngíjín ndsa̱ki ji.

²⁴ Kjiꞌanga tsjáfé ji, ko̱nda̱kínjín ji, ta̱sá nda tsjáfé ji, kó achichí nda ko̱e̱ꞌéńjñaá.

²⁵ Ko̱nda̱kínjín ji kui ni xi ta̱niján má mindyiandíkónna, ti̱nde ko̱nda̱kínjín ji ni ndajín xi ndibánié xota̱ xi ꞌniú ndajiín.

²⁶ Ngatꞌa̱ Néná boá xi ka̱maꞌnítakín ji, kó kuí boá xi tsja̱ndièjín nga chja̱ya̱ kꞌo̱kayà ndsa̱ki ji.

²⁷ Ti̱ꞌíi̱n kjo̱a̱nda ngo xota̱ kjiꞌanga ka̱ma xi si̱ꞌin ji.

²⁸ Nga jmíni̱xtjin bi̱ sèe̱ ngo xota̱: «Ndyiojón kosiko̱joo, ndyiojón tsjaa̱», kjiꞌanga ye ji nga ngotꞌe̱ boá nga tikoón, nga ka̱maa̱ ko̱si̱ke̱je ji.

²⁹ Nga jmíni̱xtjin ndajín niꞌínje̱ ji xota̱ xingi̱ ji kjimaꞌniátakoón.

³⁰ Nga jmí kjo̱a̱xti mindyiséjín ji tsi jmí kjo̱a̱jiín, ko̱jo tsi jmíjín xi ngo ni xi ndajín tjítsꞌénjoo̱.

³¹ Ngata̱ maꞌontakínjín ji kjo̱a̱a̱ xota̱ xi kixi̱jiín ti̱nde nga ki̱a̱jín ꞌmitji̱ngi ji ndi̱yà xí ndyi̱fí.

³² Ngatꞌa̱ Néná achichí chꞌoó xota̱ xi ꞌniú ndajiín, ta̱nga achichí tjó tsꞌénjo̱ xota̱ xi kixi̱i̱.

³³ Néná tsꞌénchíkonñé ndiꞌaa̱ xota̱ xi kixi̱i̱, ta̱nga ni xi ndajín ꞌbojminieé ndiꞌaa̱ xota̱ xi ꞌniú ndajiín.

³⁴ Néná mojnókie xota̱ xi mojnókiee̱, ta̱nga xota̱ xi ni̱ma̱kjo̱a̱a̱ tsjaá kjo̱a̱ndaa̱.

³⁵ Xota̱ xi kjínkoón xcha̱ndikón, ta̱nga xota̱ xi kitikjo̱a̱a̱, xcha̱ndikónjín.