Énkjínkón 29 - Xo̱jo̱n eén Néná

Tsjaꞌbeé ini̱ma̱ná nga ni xi nda niꞌán

¹ Xota̱ xi tsjajín maá nga niꞌánxchánjo̱, ta̱niján má kji̱ndi̱bá nga si̱ꞌankjie, kó jmíjín xi ka̱ma ku̱i̱ꞌíchjaá nga bo̱a̱ ka̱ma.

² Kjiꞌanga makjín xota̱ xi kixi̱i̱, tsjá maá xota̱ na̱xi̱ńdaá, ta̱nga kjiꞌanga xota̱ xi ndajiín xi makjín, ndasen ꞌbíndo xota̱ na̱xi̱ńdaá.

³ Xota̱ xi tsjaa̱ kjo̱a̱kjínkoón, kjo̱a̱tsja tsjaá na̱ꞌmii̱, ta̱nga xota̱ xi ínchjínmasién fíkoón, tsꞌenkjié ngayeje ni xi tjiín.

⁴ Re xi kixi̱ botixómaá, nda tsꞌénkꞌíndo xota̱ na̱xi̱ńdaá, ta̱nga kui xi ta̱soboá to̱n xi machjítjé ni foaꞌáchjí, kuí boá xi tsꞌenkjié kjo̱a̱ na̱xi̱ńdaá.

⁵ Xota̱ xi achichí nda chji̱a̱ kjo̱a̱a̱ kje̱ꞌe xota̱, nga ja̱koxi̱, ta̱ chja̱ya̱ tsí tsꞌénꞌbijñaá.

⁶ Xota̱ xi ndajiín, ti̱kuíní xi ꞌbókayá chja̱ya̱ xi kui ꞌbíjñá, ta̱nga xota̱ xi kixi̱i̱, sie ko̱jo tsjaꞌbeé.

⁷ Xota̱ xi kixi̱i̱ tsꞌenseén kjo̱a̱nda xi tjiín xota̱ ni̱ma̱a̱, ta̱nga xota̱ xi ꞌniú ndajiín makjínjiín kjo̱a̱kjínkoón.

⁸ Xota̱ xi achichí nga ndajiín kjo̱a̱xti ꞌboxié ngayeje na̱xi̱ńdáꞌniuú, ta̱nga xota̱ xi kjínkoón kjo̱a̱xió boá xi mongase.

⁹ Xota̱ kjínkón xi xota̱ xi kitikjo̱a̱a̱ ꞌbísejo̱, ndatsi sa̱ꞌínxchán, ko̱jo ndatsi ko̱jno̱, nde jmí ni sa̱ꞌíndajìnjín.

¹⁰ Xota̱ xi ꞌniú ndajiín chꞌoo̱ xota̱ xi kixi̱i̱, ta̱nga xota̱ xi kixi̱i̱ mongase kjo̱a̱ndaa̱.

¹¹ Xota̱ xi kitikjo̱a̱a̱ bokó yeje kjo̱a̱xtindaa̱, ta̱nga xota̱ xi kjínkoón maꞌniúrií yojoo̱.

¹² Xota̱ xi botixómá xi sa̱ꞌínseén ngo éndísó, kuí boá xi tsꞌéndándí ngayeje xota̱ xi nijan tsꞌénxájo̱.

¹³ Xota̱ ni̱ma̱a̱, ko̱jo xota̱ xi ꞌbínié ꞌniuú xá, nga joó nga Néná boá xi tsꞌentsíjee̱n ndyi̱ko̱n.

¹⁴ Re xi kixi̱ tsꞌén botixómaá xota̱ ni̱ma̱a̱, ꞌniú tsꞌénꞌbijñá nga kui xi ngatsjéni̱xtjin ko̱tíxoma.

¹⁵ Nga foaa̱ ńꞌniú ko̱jo nga niꞌánchji̱ni̱e̱ ngo ndí, kuí boá kui nii̱ xi tsjaá kjo̱a̱kjínkón, ta̱nga kui nda̱chí xi tsꞌatio nga tjó niꞌaán, kuí boá xi kjo̱a̱soboá tsꞌénkjáꞌa na̱aa̱n.

¹⁶ Kjiꞌanga makjín xota̱ xi ꞌniú ndajiín, ti̱ makjín jeé nga, ¡ta̱nga xota̱ xi kixi̱i̱, kuí boá xi sku̱i̱e̱ kótsꞌèn kju̱i̱e̱ kui xota̱ xi ndajiín!

¹⁷ Ti̱ꞌinchji̱ni̱ ji ndíi̱, kó kꞌuieé kjo̱a̱xió, ko̱jo achichí tsjá kꞌuieé ini̱ma̱a̱.

¹⁸ Tsi Nénájín xi ka̱tso̱yàtjón ni xi sa̱ꞌín xota̱ na̱xi̱ńdaá, ta̱ ni xi mejénrií sa̱ꞌín, ta̱nga achichíra̱tsjaa̱ xota̱ xi tsꞌénkjátjosón kjo̱a̱kitii̱ Néná.

¹⁹ Mosoo̱ jmí tsi ta̱ én tsí xi niꞌánkjieén nga niꞌánchji̱ni̱e̱, ngatꞌa̱ makjínrií, ta̱nga tsꞌensénjín.

²⁰ A je kandaꞌyée̱ ni xi tsó xota̱ xi ta̱xkiya chji̱a̱a̱. ¡Tjín ngasee̱ xki̱ ni xi tsó xota̱ chi̱nii̱, ta̱bo̱a̱jiín kui xotaa̱!

²¹ Xota̱ xi ꞌniú tsꞌéntjó mosoo̱ ndeskande nga chichí, nga fetꞌani, kuí mosoo̱ xi ka̱matsi̱ꞌe̱ ngayeje ni xi tjiín ndi̱a̱a̱.

²² Xota̱ xi tamaá kjo̱a̱xti ꞌboxié, kó xota̱ xi xtindaa̱, tsꞌénjé.

²³ Xota̱ xi nkꞌakoo̱n ni̱ma̱kjo̱a̱ si̱ꞌankꞌijñá, kó xota̱ xi ni̱ma̱kjo̱a̱a̱ kuí boá xi si̱ꞌandikón.

²⁴ Xota̱ xi tsꞌénkámajo̱ xota̱chejeé, ti̱kuíní xi tjítsꞌénchꞌó yojoo̱, ngatꞌa̱ kjiꞌanga niꞌánjeé xota̱chejeé, tsakjón má, kó chji̱a̱jín.

²⁵ Tsi ngo xota̱ xi tsakjón kje̱ꞌe xota̱, xikónii̱ tsi ngo chja̱ya̱ tsꞌénꞌbijñaá yojoo̱, ta̱nga xota̱ xi Néná ꞌniátakón, kuí boá xi jmí ni ka̱májiín.

²⁶ Achichí má xota̱ xi mongase nga nda ko̱a̱ꞌa xota̱ xi botixómaá, ta̱nga ta̱kuítsí Néná xi kixi̱ tsꞌén sa̱ꞌínseén ngayeje xotaa̱.

²⁷ Xota̱ xi kixi̱i̱ chꞌo maa̱ xota̱ xi ꞌniú ndajiín, kó xota̱ xi ꞌniú ndajiín chꞌo maa̱ xota̱ xi kixi̱i̱.