Énkjínkón 28 - Xo̱jo̱n eén Néná

Nda ti̱ꞌin ji, kó nda ko̱e̱je̱e̱

¹ Xota̱ xi ꞌniú ndajiín, monga ndatsi jmí tsi tjimíyotji̱ngii̱, ta̱nga xota̱ xi kixi̱i̱ maꞌniátakón nga xió ꞌbíjñá, xikó maá ngo xandi̱je̱.

² Kjiꞌanga kjo̱a̱xchán tjín ngo na̱xi̱ńdá, ma kjín ngase xota̱ xi botixómaá, ta̱nga nda̱ xi botixómaá xi nda makjiín ko̱jo xi kjínkoón, kuí xí mongase nga nda ꞌbíjñá kui ngi̱ndiee̱.

³ Xota̱ ni̱ma̱ xi tsꞌénchéjeé kje̱ꞌe xota̱ ni̱ma̱, xikónií ngo stsé ꞌniú xí tsꞌenkjié ngayeje ni tjieé.

⁴ Xota̱ xi tsjánié kjo̱a̱kitii̱, kuí boá xi tsꞌéndíkón xota̱ xi ꞌniú ndajiín, ta̱nga xota̱ xi tsꞌénkjátjosoón, kuí boá xi kjánjo̱ xota̱ xi ꞌniú ndajiín.

⁵ Xota̱ xi ꞌniú ndajiín nde makjínjiín kjo̱a̱kixi̱i̱, ta̱nga xota̱ xi mongase Néná, ngayeje nii̱ xi makjiín.

⁶ Chjí ngasenii̱ ngo xota̱ ni̱ma̱ xi kixi̱, ta̱bo̱a̱jiín ngo xota̱ cho̱n xi ꞌniú ndajín.

⁷ Xota̱ xi tsꞌénkjátjosón kjo̱a̱kitii̱ Néná, kuí boá xi ngo ndí xí kjínkón, ta̱nga xota̱ xi nijanma xota̱ xi xki̱ꞌaá, ta̱ kjo̱a̱soboá tsí xi tsjaá na̱ꞌmii̱.

⁸ Xota̱ xi kjimacho̱n nga tsꞌénkíyà to̱n nga tsie ndyi̱ko̱n foaꞌáchjí, kui to̱o̱n, tsi̱ꞌe̱ xota̱ xi nda tsꞌénjo̱ xota̱ ni̱ma̱ boá.

⁹ Xota̱ xi ntꞌiéjiín kjo̱a̱kitii̱ Néná, Néná achichí chꞌo maá nga chji̱a̱a̱.

¹⁰ Xota̱ xi ndi̱yà xi ndajín fíjo̱ xota̱ xi kixi̱i̱, ti̱kuíní xi kꞌo̱kayà chja̱ya̱ xi ꞌbíjñá. Ta̱nga xota̱ xi kixi̱i̱ kuí boá xi sa̱ko̱ó ni xi ndaa̱.

¹¹ Xota̱ xi cho̱o̱n xota̱ xi kjínkón tsoó yojoo̱, ta̱nga xota̱ ni̱ma̱ xi tjiín kjo̱a̱kjíntakoón, kuí boá xi bokó nga ja̱koxi̱ ꞌyá xotaa̱ bo̱a̱.

¹² Kjiꞌanga tsꞌén xota̱ xi kixi̱i̱ achichí sꞌué má ta̱nga kjiꞌanga tsꞌén xota̱ ꞌniú ndajín, ngayeje xotaa̱ ꞌbíndoꞌmá.

¹³ Xi ꞌbíꞌmá jé xi tsꞌén, jmíni̱xtjin nda ko̱e̱je̱e̱, ta̱nga kui xi ka̱tso̱yaa̱, kó ngiti̱ sa̱ꞌínjéjín, kuí boá xi sa̱ko̱ó kjo̱a̱jetakoón Néná.

¹⁴ ¡Achichíra̱tsjaa̱ xota̱ xi ngatsjéni̱xtjin nga bendikón Néná! Ta̱nga xota̱ xi tajá ini̱ma̱a̱ ndajín ka̱maa̱.

¹⁵ Xikó maá ngo xandi̱je̱ xi tsꞌénꞌbìtsjè, ko̱jo tsi xikó maá ngo cho̱ꞌoso̱ xi bojoó, bo̱a̱ má kón má ngo xota̱ xi ꞌniú ndajín xi botixómaá ngo nangi xi ni̱ma̱.

¹⁶ Xota̱ xi botixómá xi jmí ni makjínjiín, ta̱ tsꞌénkjó tsí nga tsie ngase to̱n kjo̱a̱ꞌáchjií xotaa̱, ta̱nga xota̱ xi chꞌoo̱ kjo̱a̱xkétoo̱n, kuí boá xi tsie ngase ka̱maa̱ nga kꞌuijñá nga̱sondie.

¹⁷ Xota̱ xi katsꞌenkꞌién ngo ini̱ma̱, kjótsoꞌbá chinga ngaskande nga ko̱yà, ¡ngata̱ jmíjín xi bosikójo!

¹⁸ Xota̱ xi kixi̱ tsoꞌbaá, kjo̱tjoꞌa, ta̱nga xota̱ xi ꞌniú ndajiín, ti̱kuíní xi ndajín ka̱maa̱.

¹⁹ Xota̱ xi tsꞌénxájin tꞌanangii̱, tsie nichinie kꞌuieé, ta̱nga xota̱ xi tsꞌénkámajo̱ xota̱ xi tsiꞌeé, ni̱ma̱ tsꞌén kꞌuijñá.

²⁰ Xota̱ xi ma maꞌniátakoón, ngatsjéni̱xtjin nga tsie kjo̱a̱niꞌánchikonñé kꞌuieé, ta̱nga xota̱ xi tsá mejeén nga ka̱macho̱n, ka̱majérií.

²¹ Ndajínkjiꞌi tsi tjín xota̱ xi si̱ꞌanchꞌo, ngatꞌa̱ tjín xota̱ xi ngaskande chií pan tsꞌénjéní.

²² Xota̱ xi xki̱ꞌáto̱o̱n mejeén nga tsá ka̱macho̱n, ta̱nga nde bejín nga kjo̱a̱ni̱ma̱ boá xi tsá kji̱ndi̱bánié.

²³ Nga kjo̱chó ni̱xtjin tjó ngase si̱ꞌan ngo xota̱ xi ꞌniú ku̱i̱chji̱a̱jo kje̱ꞌe xota̱, ta̱bo̱a̱jiín kui xi achichí tsjatsó én xí ku̱i̱chji̱a̱joo.

²⁴ Xi sa̱ꞌínchejeé na̱ꞌmii̱ ko̱jo na̱aa̱n, kósꞌe̱ bo̱a̱ ka̱tso̱ nga katsꞌénjéjín, kuí boá xi amingo̱ manii̱ xota̱ xi ꞌniú ndajín.

²⁵ Xota̱ xi xki̱ꞌáto̱o̱n, ta̱ kjo̱a̱xti boá xi ko̱ngase, ta̱nga kui xi Néná kjimaꞌniátakoón, kuí boá xi nda ko̱e̱je̱e̱.

²⁶ Xota̱ xi ti̱ kuii̱ yojoo̱ ꞌniákón, xota̱ kitikjo̱a̱ boá, ta̱nga kui xi kjínkoón, kuí boá xi kjo̱tjoꞌa.

²⁷ Xota̱ xi bosikójo xota̱ ni̱ma̱a̱, jmí kjo̱a̱ni̱ma̱ kjo̱a̱ꞌatiojín, ta̱nga xota̱ xi bosikójojín, achichí kjo̱a̱ni̱ma̱ kjo̱a̱ꞌatio.

²⁸ Kjiꞌanga tsꞌén xota̱ xi ꞌniú ndajiín, ngayeje xotaa̱ ꞌbíndoꞌmá, ta̱nga ngije fe ni̱xtjii̱n, kjiꞌá boá nga makjín xota̱ xi kixi̱i̱.