Énkjínkón 27 - Xo̱jo̱n eén Néná

¡Jmíjín xi be ni xi jaskan ka̱ma!

¹ Ngata̱ nkꞌakonjín má ji kjo̱a̱a̱ ni xi si̱ꞌin ji ndyiojón, ¡ngatꞌa̱ jmíjín xi be ni xi ka̱ma ndyiojón!

² Ngata̱ jijín xi nda ꞌna̱xié ji yojòo̱, ta̱sá xota̱ xi ngasee̱ xi nda ngatíchji̱a̱ kjo̱a̱a̱ ji.

³ Ndi̱jo̱o̱ ko̱jo tsomií achichí é má, ta̱nga é ngase ꞌbókaná nga tsꞌénxchán xota̱ xi kitikjo̱a̱a̱.

⁴ Achichí nga ndajín kjo̱a̱niꞌánxchaán, kó kjo̱a̱xtindaa̱ tsꞌenkjiéná kjo̱a̱, ta̱nga kjo̱a̱ꞌontakoón jmíjín xi ka̱maꞌniuú.

⁵ Ndakjiꞌi ngase nga tjín xí tsijen sa̱ꞌínxchánjo̱ maá, ta̱bo̱a̱jiín nga tjín xí ꞌma sa̱ꞌíntjoó.

⁶ Ndakjiꞌi ngase nga ꞌniú si̱ꞌinꞌnítakín ngo amingo̱ xi sa̱ꞌínꞌoón, ta̱bo̱a̱jiín ngo kondra̱ xi ngo ndsó tsja̱á.

⁷ Xota̱ xi je nda kitsiee̱, ngaskande ntsjieén tsꞌenchꞌó, ta̱nga xota̱ xi bojoó, ngaskande ni xi saa̱, ixi maá.

⁸ Xota̱ xi kjin tjimánii̱ nangi nínga katsen, xikónií ni̱sie xi je índomasien ndo̱bo̱a̱a̱.

⁹ Ndásíjee̱n ko̱jo ni xi nangijon yojoná tsjatsꞌèn tsꞌénkꞌijñá ini̱ma̱ná, kó ngo amingo̱ xi nda ko̱tíxománá, kuí boá xi tsjáná kjo̱a̱tsja.

¹⁰ Ngata̱ ꞌbíjñímasínjín ji amingo̱ xi tse̱, ko̱jo tsi amingoo̱ na̱ꞌmíi̱. Ngatꞌa̱ ndiꞌaa̱ ntsꞌiejín ꞌmije̱ ji kjo̱a̱xti xi tjiín. Ndakjiꞌi ngase nga ngo xota̱tꞌandiꞌa xi nda ko̱a̱ꞌa̱ná, ta̱bo̱a̱jiín ngo ntsꞌié xí kjin tikón.

¹¹ Ji ndí, ngatꞌieé kjo̱a̱kjínkón, kó tsjangatꞌieé ini̱ma̱na, ngatꞌa̱ bo̱a̱ tsꞌén nga ka̱ma kuichjiáꞌa an xota̱ xi chꞌo ka̱tso̱na.

¹² Xota̱ xi tjiín kjo̱a̱kjíntakoón be ni xi ndajiín, kó ki̱a̱jín fítji̱ngi, ta̱nga xota̱ xi chi̱nii̱, ki̱a̱ fítji̱ngi, kó ndajín maá ngijee̱.

¹³ Chjábée̱ ńjño xi ku̱i̱ꞌíjñangini ngo xi tsja̱a tsꞌoa nga kui ku̱i̱ꞌíchjí to̱n xi ntsjieén ngo xota̱ xi kje̱ꞌe, kó tꞌíjñiꞌníi̱ ni xi sa̱ꞌínkꞌasꞌien tsi kjo̱a̱a̱ ngo na̱ xi tsꞌéntꞌaa̱kjo̱a̱ xi̱ꞌii̱n.

¹⁴ Xota̱ xi skja̱ndáyà má nga sa̱ꞌíntinde amingoo̱ nga ndibáꞌásie̱én, xikónií tsi ni xi ndajín katsoó, bo̱a̱ tsꞌén xꞌi̱a̱xki̱.

¹⁵ Ngo chjo̱on xí tamá, xikónií tsi ngo nínga tín síkijí ndáfoaa̱ kjiꞌanga boaꞌa stseé.

¹⁶ ¡Tsi ka̱mamejénná si̱ꞌankjaꞌajendà, xikónií tsi tjo̱o̱ xi ka̱mamejénná kꞌuichjáa̱, ko̱jo tsi xikónií tsi xinié isti̱ chjábé yíndsa̱!

¹⁷ Tsi̱ꞌe̱ nga ka̱mayojó ngo ki̱cha̱, ti̱ ki̱cha̱ní bo̱a̱ xi ka̱machjieén, kó amingo̱ boá xi ka̱machjién nga nda xota̱ ka̱ma ngo xota̱.

¹⁸ Xota̱ xi nda koo̱n yáꞌingoo̱, ka̱maa̱ skji̱ni̱e̱ to xi ko̱a̱ja̱a̱, kó xota̱ xi koo̱n ni xi tjiín ndi̱a̱a̱, kui ndi̱a̱a̱, sku̱i̱e̱ndikón.

¹⁹ Xikó tsꞌén nga ngi̱jin ndáfoaa̱ ya kje̱en, ti̱ bo̱a̱ ti̱ tsꞌén xotaa̱ bokó kje̱n, xikó tsꞌén tjíjii̱n ngi̱jin ini̱ma̱a̱.

²⁰ Nga̱tsjo̱ó ko̱jo kjo̱a̱bo̱yaa̱, jmíni̱xtjin tsiee̱, kó ndyi̱ko̱n xotaa̱ tsie ngase ni mejeén sku̱i̱e̱.

²¹ To̱nsinieé ko̱jo to̱ntiboaa̱, ndiꞌií boá xi chitꞌani tsi nda ko̱jo tsi ndajín, kó xikó tsꞌén nda ndokjo̱a̱ kjo̱a̱a̱ xotaa̱, bo̱a̱ tsꞌén chitꞌani kui.

²² Xota̱ xi kitikjo̱a̱a̱, ndatsi ki̱a̱ nijan kꞌuínieé nínga ꞌbínieé to ndso̱ko̱a̱n ṉño̱o̱, jmíni̱xtjin ku̱i̱ꞌíjñámasien kjo̱a̱kitikjo̱a̱a̱.

²³ Nda nda má tsitsíjìi̱n xikótsꞌèn síndo cho̱tsa̱nga̱a̱, kó nda chíi̱n nga ngo nga ngo xtín,

²⁴ ngatꞌa̱ kjo̱a̱cho̱o̱n jmí tsi ngatsjéni̱xtjin nga sꞌijña, ti̱nde jmí tsi ngatsjéni̱xtjin nga ko̱tíxoma ngo nda̱ re,

²⁵ nga kjo̱tjo ndi̱xcho̱o̱, ti̱ kjo̱tjo kꞌijñaá nga, kó ku̱i̱chá kꞌijñá xí tjín tꞌa na̱xi̱i̱.

²⁶ Cho̱tsa̱nga̱a̱ boá xí tsja̱á tsa̱nga̱ tsi̱ꞌe̱ nga ka̱manda ńjño xi xchi̱e̱je, kó ndií tindsoo̱ boá xi ka̱ma si̱ꞌan to̱n tsi̱ꞌe̱ nga sꞌi̱tsie ji tꞌanangi,

²⁷ kó tindso̱ ínchjiín boá xi tsja̱á ntsjén ji, ko̱jo tsi̱ꞌe̱ xota̱ ndiꞌàa̱, ko̱jo ngaskande tsi̱ꞌe̱ chji̱ni̱e̱ꞌbòo̱ nga.