Énkjínkón 26 - Xo̱jo̱n eén Néná

Kjo̱a̱kitikjo̱a̱a̱

¹ Xikótsꞌèn nga ndajínkjiꞌi nga nchꞌàn ku̱i̱xo̱ ni̱xtjii̱n cho̱ndoboaá, ko̱jo tsi stsé koaꞌa nga chja̱ꞌáꞌyá cha̱a̱n ni xi ikꞌítji̱e̱e̱, boá má tsꞌén ndajínkjiꞌi nga si̱ꞌandikón ngo xota̱ xi kitikjo̱a̱.

² Xikó maá ngo ni̱sie ngorrio̱n xi tsoꞌbá kichajá, ko̱jo xi tsi xikó maá ngo ni̱siestsé xí jmíjiín ndo̱bo̱a̱, bo̱a̱ má tsꞌén ni xi ꞌniú ndajiín nde kjo̱chójín tsí jmí kjo̱a̱jín nga kjo̱chó.

³ Ndi̱je̱e̱ ńꞌniú foaá nga niꞌánchji̱ni̱e̱ni, bórroó ki̱cha̱ foaꞌa tsꞌoa nga chjenꞌniúnií, kó xota̱ xi kitikjo̱a̱a̱ chjiéngá ńꞌniú kjoaá nga̱xto̱n tsi̱ꞌe̱ nga ka̱machji̱ni̱e̱.

⁴ Ngata̱ nijanmájín ji nga ko̱ndókjo̱e̱tije̱ ji xota̱ kitikjo̱a̱a̱, ngatꞌa̱ tsájmi̱ xikó má kón kuí, bo̱a̱ má kón ka̱ma ji tsobo̱a̱.

⁵ Ndókjo̱e̱ꞌe ji xota̱ xi kitikjo̱a̱a̱, xikótsꞌèn tsoboaá nga ko̱ndókjo̱a̱jo, tsi̱ꞌe̱ nga jmí tsi xota̱ xi kjínkón ka̱maa̱ yojoo̱.

⁶ Tsi ngo xota̱ xi kitikjo̱a̱ ko̱na̱ngíyajo̱ ngo én, xikónií tsi ikichá ndsa̱kó, ko̱jo tsi kjo̱a̱xti ikindyisé.

⁷ Nde jmí ni chjíjiín ngo énkjínkón xi ku̱i̱chji̱a̱ ngo xota̱ kitikjo̱a̱, xikó má tsꞌén nde jmí ni chjíjiín ti̱ꞌmi̱í ngo xota̱ xi ni̱ma̱ xi májín fí.

⁸ Nde jmí ni chjíjiín nga si̱ꞌandikón ngo xota̱ kitikjo̱a̱, xikótsꞌèn nde jmí ni chjíjiín tsi ngo ndi̱jo̱ kuítꞌaꞌniútꞌa ngo yándíchjòn.

⁹ Ngo énkjínkón xi ku̱i̱chji̱a̱ ngo xota̱ xi kitikjo̱a̱, xikónii̱ tsi ngo ndaꞌyá sisꞌieén tsja ngo nda̱ chꞌi̱.

¹⁰ Xota̱ xi ngo xota̱ xi kitikjo̱a̱, ko̱jo tsi xota̱ xi tjimásón ku̱i̱ꞌíxaá ki̱a̱ ndiꞌaa̱, xikónií tsi ngo nda̱ xi kjiní yáyojó, kó ta̱ꞌyaní xi tsꞌénbosieén.

¹¹ Xota̱ kitikjo̱a̱ xi ti̱ tsꞌén nginí ni kitikjo̱a̱ xi tsꞌén, xikónií ńñá xí kjinie nginí ni xi fosoó.

¹² Tjín ngasee̱ kjo̱a̱chiyá ngo xota̱ xi kitikjo̱a̱, ta̱bo̱a̱jiín ngo xota̱ xi ta̱nisién kjínkón ꞌboxié yojoo̱.

Kjo̱a̱tsiꞌeé

¹³ Xota̱ xi tsiꞌeé ngo ni ꞌbijñáxtikjà tsi̱ꞌe̱ nga ko̱e̱je̱tsꞌénxájín, ngo xò xandi̱je̱ tsoꞌbá ngi̱ya ndi̱ya̱à xi mején xoò skji̱ni̱e̱ tsó nga chji̱a̱.

¹⁴ Xikó má maá nga̱ntjo̱a̱a̱ nga ta̱ ki̱a̱ foaꞌatjiya tsí, bo̱a̱ má maá xota̱ xi tsiꞌeé, nga ta̱ ki̱a̱ foaꞌatjiya nga̱són ṉchaa̱n.

¹⁵ Xota̱ xi tsiꞌeé tsangijin tsja ngi̱ya ti̱bo̱a̱a̱, kó ngaskande é maá nga skji̱ni̱e̱ nichiniee̱.

¹⁶ Xota̱ xi tsiꞌeé achichí kjínkón tsoó yojoo̱, ta̱bo̱a̱jiín yito xota̱ kjínkón xi maa̱ tsjá kjo̱a̱botíxoma.

¹⁷ Tsi kjo̱a̱xtii̱ xotaa̱ ko̱na̱ngínjin yojoná, xikónií tsi tji̱bo̱a̱nijon ngo ńñaá chjén.

¹⁸ Xikó maá ngo xota̱ xi tsobeé, kó ta̱xkiya kjiní yáyojó xi tjítokó ndiꞌí,

¹⁹ bo̱a̱ má kón má xota̱ xi ꞌboṉcha̱jo amingoo̱, kósꞌe̱, ta̱ tsꞌéntsaton tsí an, tsoó ngijee̱.

²⁰ Tsi ngiti̱ jmí chikín mindyiajiín ndiꞌií, ꞌbo, kó tsi jmíjín xi ꞌbindísó ngase, fe kjo̱a̱xtii̱.

²¹ Xikótsꞌèn nga ki̱xo̱o̱n boá xi ma xꞌué, ko̱jo nga chikiín boá xi tsꞌénꞌniú ndiꞌií, bo̱a̱ má tsꞌén nga kui nda̱ xi tamaá boá xi ꞌboxié kjo̱a̱xtii̱.

²² Xikó maá tsi ixi eén xota̱ xi see̱n ényaà, ta̱nga ngaskande ngi̱jin ini̱ma̱ná fóchó.

²³ Én tsjatsó xi chji̱a̱ xota̱ xi ndajín ini̱ma̱a̱, bo̱a̱ má kón xikoó to̱ntiboa xi ta̱ kjiꞌijon tsí ngo ti̱ji̱í.

²⁴ Xota̱ xi tsꞌenchꞌó xotaa̱, achichí tsjatsꞌèn chji̱a̱, ta̱nga ngi̱jin ini̱ma̱a̱ ꞌbínda ni xi ndajín.

²⁵ Ngata̱ niꞌínsꞌinjinjíi̱n ni xi tsjatsꞌèn ku̱i̱chji̱a̱joo, ngatꞌa̱ ngi̱jin ini̱ma̱a̱ yito ni xi ꞌniú ndajín tjíjii̱n.

²⁶ Ndatsi ko̱óꞌmá kjo̱a̱niꞌánchꞌoó nga tsjatsꞌèn ku̱i̱chji̱a̱, ta̱nga kui ni xi ndajín xi tjíjii̱n xcha̱ ngindyi̱ko̱n xotaa̱.

²⁷ Xi sa̱ꞌínda ngo ti̱xa̱, ti̱kuíní bo̱a̱ xi ki̱a̱ kꞌo̱kayà, xi ngo ndi̱jo̱ sa̱ꞌíngátíkjayá, ti̱kuíní ndi̱jo̱o̱ xi sa̱ꞌínkjítie kui.

²⁸ Najen xi chji̱a̱ én ndisoo̱, chꞌórií xota̱ xi tjítsꞌénꞌoón, kó ndso̱ꞌba xi kixi̱jiín, kuí boá xi tsꞌénkꞌákaa̱.