Énkjínkón 25 - Xo̱jo̱n eén Néná

Kje̱ꞌe ngase énkjínkón xi katsꞌénda re Salomoo̱

¹ Kui énkjínkoón ti̱ re Salomoo̱ boá xi katsꞌénda nga, kui xi jaꞌátꞌa xota̱ xi tsꞌénxájo̱ Esekiyaa̱, nda̱ re xi chji̱a̱ni nangi Jundáa̱.

² Kjo̱a̱jee̱ Néná boá nga ꞌbíꞌmá ngo ni, ta̱nga kjo̱a̱yandikoón ree̱ boá nga kui xi sku̱i̱e̱ mí nii̱ bo̱a̱.

³ Xikótsꞌèn nkꞌa nkꞌajmii̱, xikótsꞌèn na̱nga̱ tꞌanangii̱, ko̱jo xikótsꞌèn tjíjin ini̱ma̱a̱ ree̱, jmíjín xi ka̱maa̱ sku̱i̱e̱.

⁴ Ti̱ꞌintsjiejín ji xtjié xí tjiín to̱ntiboaa̱, tsi̱ꞌe̱ nga nda̱ xi tsꞌénda nii̱, ka̱maa̱ sa̱ꞌínda ni tsjakon.

⁵ Chje̱ꞌéxín ji moso̱ xi ndajín xi tsꞌénxájo̱ ree̱, kó kixi̱ tsꞌén ko̱tíxoma.

⁶ Ngata̱ nkꞌajín ꞌnaxié ji yojòo̱ ngindyikón ree̱, ti̱nde ngata̱ ki̱a̱jín mindyin ji ngi̱ndie nínga ꞌbíndo xota̱ xi yandikoón.

⁷ Ngatꞌa̱ nda ngase kjiꞌi nga bi̱ kꞌuiín: kꞌi̱e̱ ndibékindyin ji kꞌi̱e̱e̱. Kó nga jmí kjo̱a̱soboá boeꞌéjiín ngindyikón xota̱ xi yandikoón. Tsi ngo ni kamáyè ji,

⁸ ngata̱ xi tsá xi boaꞌájín ꞌmikꞌíyée̱ xota̱ xi tsꞌendájin kjo̱a̱xtii̱, ngatꞌa̱ tsita̱ ingo chistiko̱ katsóyà nga bo̱a̱jín kjiꞌi kui nii̱ kó tasa̱ kjo̱a̱soboá sa̱ꞌínkjaꞌaa̱ ngijee̱.

⁹ ꞌNa̱xiéꞌé ji yojòo̱ kjiꞌanga tjín xí ko̱óngítaꞌiin, ta̱nga ngata̱ jmíjín xi ꞌmíyée̱ ngo ni xi tjiꞌmá xi kiꞌmíyaà,

¹⁰ ngatꞌa̱ kó tsita̱ tjín xí ku̱i̱ntꞌie̱é kó kjo̱a̱soboá sa̱ꞌínkjaꞌaa̱, kósꞌe̱ ngiti̱ jmíjín xi nda ku̱i̱chji̱a̱ kjo̱a̱a̱ ji.

¹¹ Ngo én xí kjiꞌa má nga chjién nga ko̱ndókjo̱a̱, xikónií ngo masana̱ to̱nsinié xi ni to̱ntiboa kiniꞌánchonnii̱.

¹² Kjiꞌa ngo xota̱ xi kjínkón sa̱ꞌínchji̱ni̱e̱e̱, bo̱a̱ kjiꞌi chjínií xikoó ngo nangínijon ko̱jo tsi ngo ni xi jmeyá xi to̱nsinié.

¹³ Xota̱ xi ꞌniátakón nga nangiyajo̱ ngo én, kuí boá xi xikoó ngo tjo̱ nchꞌàn xí foaꞌa kjiꞌanga ma cho̱ndoboaá, ngatꞌa̱ kuí boá xi tsjaá kjo̱a̱ꞌniátakón xota̱ xi katsangiyaa̱.

¹⁴ Xota̱ xi je ꞌboxié yojoo̱ kjo̱a̱a̱ nga tsja̱á ngo ni, ta̱nga ta̱jmìjín ni xi tsjá, kuí boá xi xikoó tjo̱ ꞌniú ko̱jo ṉdi̱ xi xindyiá jñó jñó, ¡ta̱nga jmí stsé tsꞌénkáꞌájín!

¹⁵ Kjo̱a̱tsietakoón kuí boá xi tsꞌénꞌíndakon kjo̱a̱tamaá xota̱ xi botixómaá, kó én xí nda tsoó ngaskande ńdaa̱ kjítꞌó.

¹⁶ Tsi ntsjién kasakoo̱, ngata̱ tsꞌatiojín chini ji, ngatꞌa̱ tsájmi̱ sa̱ꞌíntsꞌe̱e̱ tsobo̱a̱.

¹⁷ Ngata̱ ngotjón ngotjónjín ꞌmí ji ndiꞌaa̱ xota̱ tꞌa ndiꞌàa̱, ngatꞌa̱ tsájmi̱ ti̱chaa̱n ka̱machꞌoo̱ ji.

¹⁸ Xota̱ xi chistiko̱ ndiso ka̱ma kondraa̱ xota̱ xkjín, kuí boá xi xikoó tsi ngo martiyo̱, ko̱jo tsi ngo kichiro̱, ko̱jo tsi ngo yáyojó ka̱ma.

¹⁹ Tsi ngo xota̱ xi kixi̱jín ka̱maꞌniátakón, kjiꞌanga ngo kjo̱a̱xti tjínná, xikónií tsi kjinieńꞌniú tjínná, ko̱jo tsi katsꞌo ngo ndsa̱kó.

²⁰ Xota̱ xi siee̱ só tsjatsó xi ndasen tikón ini̱ma̱a̱, xikónií tsi ngo xi tsꞌénfoaꞌáxín ńjño xi yajá nga kjima nchꞌàn, ko̱jo tsi xikónií tsi bino̱san tsꞌénmindyiaá nínga oo̱n.

²¹ Tsi bojoó xi chꞌoo̱ ji, te̱ꞌée̱ nichinie, kó tsi xíndaá, te̱ꞌée̱ ni xi kꞌuí,

²² ngatꞌa̱ tsi bo̱a̱ si̱ꞌin ji ngaskande bojójin ma si̱ꞌin ji kje̱n, kó Néná boá xi tsja̱á ngo chjí.

²³ Tjo̱ xi ndibání xtji̱e̱e̱n ta̱ꞌin, kuí boá xi foeꞌejo̱ stseé, kó xota̱ xi see̱n éndísoó, kui boá xi foeꞌejo̱ kjo̱a̱xti.

²⁴ Ndakjiꞌi ngase nga ngo ngi̱ndyióngi̱nijoo̱n ndi̱tsee̱n ku̱i̱ndyión, ta̱bo̱a̱jiín tsi ngo chjo̱on xí tamá ku̱i̱ndyionjo̱ ngo ngi̱ya ndiꞌa xi tiyá.

²⁵ Xikó má tsꞌén ꞌyó nchꞌàn nchꞌàn ndáfoaa̱ nga xíndáná, bo̱a̱ má tsꞌén tsja máná nga ndaꞌyá ngo én nda xi kjin kjindibáni.

²⁶ Kjiꞌanga xota̱ xi kixi̱i̱ tsꞌenkíndi yojoo̱ kje̱n xota̱ xi ꞌniú ndajiín, xikónií tsi ngo ndyi̱ko̱n ndáfoa ko̱jo tsi ngo ndáńchꞌi̱ xi ndáfoa ndándí tjitjoó.

²⁷ Ndajínkjiꞌi nga tsie ntsjién xi̱ni̱e̱, ti̱nde kjo̱a̱jejín bo̱a̱ tsi ti̱ña̱á xi ku̱i̱ndyi̱sé kjo̱a̱jená.

²⁸ Xota̱ xi xtinda xi maꞌniújiín yojoo̱, boá ma kón xikoó ngo na̱xi̱ńdáꞌniú xí je kiniꞌánchaja ko̱jo xi je ixóndó xoó.