Énkjínkón 24 - Xo̱jo̱n eén Néná

-19-

¹ Ngata̱ onjínmátakín kjo̱a̱a̱ xota̱ xi ꞌniú ndajiín, ti̱nde ngata̱ mindyiséjín ji nga ki̱a̱ si̱ꞌinkamaje̱ ji,

² ngatꞌa̱ ta̱soboá ni xi ndajín boá xi ndyi̱tsꞌènkjó kó ta̱soboá kjo̱a̱a̱ kui nii̱ boá xi ndyi̱chji̱a̱.

-20-

³ Kjo̱a̱kjínkoón boá xi niꞌánkjién nga chjaninkꞌa ngo ndiꞌa, kó chjiéngá nda si̱ꞌankjó tsi̱ꞌe̱ nga ꞌniú kꞌuijñá,

⁴ kó ta̱ngatꞌanii̱ kjo̱a̱kjíntakoón nga ka̱ma kꞌuikítsie má ngi̱yaa̱ ni xi nda ko̱jo ni xi tsjakon.

-21-

⁵ Chjí ngasenii̱ ngo xota̱ xi kjínkón, ta̱bo̱a̱jiín ngo xota̱ xi ꞌniú, chjí ngasenii̱ kjo̱a̱kjínkoón, ta̱bo̱a̱jiín ngaꞌniuú.

⁶ Ngatꞌa̱ kjiꞌanga ꞌbítsi̱yanii̱ ngo kjo̱a̱xchán, tjón mara nda ꞌbínda kótsꞌèn ku̱i̱xkán, kó tsi̱ꞌe̱ nga si̱ꞌan ngo kjo̱a̱xchán, tjón mara ko̱nda̱ꞌyaá kjo̱a̱botíxomaa̱ kjín xota̱.

-22-

⁷ Xota̱ xi kitikjo̱a̱a̱ jmíni̱xtjin kjínkón ka̱ma, kó kjiꞌanga tikón ngindyikón nendiꞌamasiee̱n, nde bejín mí ni xi ka̱tso̱.

-23-

⁸ Xota̱ xi ta̱soboá ni xi ndajín xí tsꞌénkjó, kuí boá xi xota̱ xi ta̱nisién ndajín ꞌmií.

⁹ Jé boá ni xi tsꞌénkjó xota̱ xi kitikjo̱a̱a̱. ¡Kó ngayeje xotaa̱ xi achichí tsꞌenchꞌó xota̱ xi mojnókiee̱!

-24-

¹⁰ Tsi si̱ꞌinkjie ji kjo̱a̱ ni̱xtjin nga ngo kjo̱a̱xti kꞌuieé, ja̱ kjo̱a̱a̱ nga jmíjínri ngaꞌniú.

-25-

¹¹ ꞌNa̱xiéꞌé ji xota̱ xi je ndi̱ya̱à kjo̱a̱bo̱yaa̱ ndyi̱fí, ko̱jo xota̱ xi je si̱ꞌankjiesoón.

¹² Ngatꞌa̱ tsi bi̱ sé jí: Yajín ji̱n kui nii̱. Kó a ka̱makjínjínrií kui Néná xí kotꞌa ini̱ma̱a̱. Kui xi kotsijee̱n ko̱jo xi bee ji. Ti̱ ka̱márií sku̱i̱e̱ kui nii̱ nga, ¡kó kuí boá xi tsja̱á ni xi tsoboaá xotaa̱ kjo̱a̱a̱ ni xi katsꞌén nga ngo nga ngo!

-26-

¹³ ¡Ji ndí, chítꞌe ji ntsjieén, ngatꞌa̱ achichí nda! Kó achichí ixi ka̱maa̱ ndso̱ꞌbe ji.

¹⁴ Bo̱a̱ má tsꞌén ixi ka̱maa̱ tsi xchi̱e̱ ji kjo̱a̱kjínkoón, tsi kꞌuieé, nda ku̱i̱ndyin ji, kó jmíni̱xtjin xcha̱ja kjo̱a̱chiyáa̱.

-27-

¹⁵ Ji xi tá ndajín ji, ngata̱ niꞌínkjéjín ji kótsꞌèn si̱ꞌinkjie ji ndiꞌaa̱ ngo xota̱ xi kixi̱i̱, ti̱nde ngata̱ niꞌínchejéjíi̱n ni xi tjiín ndiꞌa xi tikónyà,

¹⁶ ngatꞌa̱ ndatsi yito ndi̱yà kꞌo̱ka xota̱ xi kixi̱i̱, xtjonínkꞌá nginií yojoo̱, ta̱nga xota̱ xi ta̱nisién ꞌniú ndajiín, kꞌo̱ka, kó ngiti̱ xtjonínkꞌájiín yojoo̱.

-28-

¹⁷ Kjiꞌanga kꞌo̱ka kondra̱a̱, ngata̱ mojnóchièjín ji, ti̱nde ngata̱ tsjajín maá ini̱ma̱a̱, kjiꞌanga ndajín ka̱maa̱,

¹⁸ ngatꞌa̱ tsi Néná sku̱i̱e̱ kui nii̱, tsjajín ka̱maa̱ ni xi tiniꞌín, kó ta̱sá kondra̱a̱ ko̱e̱je̱jindajo.

-29-

¹⁹ Ngata̱ niꞌínxchínjín ji kjo̱a̱a̱ xota̱ xi ta̱nisién ꞌniú ndajiín, ti̱nde ngata̱ onkonjín má ji kjo̱a̱a̱ kui,

²⁰ ngatꞌa̱ xota̱ xi ꞌniú ndajiín, ndajín ka̱maa̱ nga kju̱i̱e̱tꞌa ni̱xtjii̱n, ¡si̱ꞌankjiesón, kó xikó maá tsi si̱ꞌankꞌo ndiꞌíxoò!

-30-

²¹ Ji ndí, che̱ndikín jí Néná ko̱jo ree̱, kó ngata̱ ki̱a̱jín niꞌínkamaje̱ ji xota̱ xi kitikjo̱a̱a̱,

²² ngatꞌa̱ ta̱niján má kji̱ndi̱bánié kjo̱a̱botíjeé, kó jmíjín xi be kjo̱a̱botíjé xí tsjá Néná ko̱jo ree̱.

Kje̱ꞌe ngase énkjínkón

²³ Ko̱jo kui ni xi kjitꞌa kꞌi̱e̱e̱ xi énkjínkoón xota̱ xi kjínkón boá: Ndajínkjiꞌi nga nendiꞌamasien xi tsꞌénjeé xotaa̱, kjo̱a̱ꞌájin xota̱ xi ko̱e̱je̱ kjo̱a̱ndaa̱.

²⁴ Kui xi xota̱ xi kixi̱ ka̱tso̱o̱ xota̱ xi ndajiín, ngayeje xotaa̱ na̱xi̱ńdaá chꞌo ka̱tso̱o̱ ko̱jo sa̱ꞌínchꞌó.

²⁵ Ta̱nga kui xi ko̱tíjeé xota̱ xi tjiín jeé, kuí xí kꞌuieé kjo̱a̱tsja ko̱jo si̱ꞌanchikonñé.

²⁶ Ngo xota̱ xi ngo én xí kixi̱ ku̱i̱chji̱a̱, xikónií tsi ngo ndsó tsjá.

²⁷ Ngindiee̱ nga si̱ꞌinde ji ndiꞌàa̱, tjónmára ti̱ꞌin ji xá xí niꞌín ji nínga xín, ko̱jo xá xí niꞌín ji ngi̱jin jno̱o̱.

²⁸ Ngata̱ chistiko̱ ndisojín niꞌín ji yojòo̱, ti̱nde ngata̱ ꞌbíndisetaꞌinjín ji xota̱ xingi̱ ji.

²⁹ Ngata̱ niꞌínkjéjín ji nga si̱ꞌingojo ji ngo ni, tsi ti̱ bo̱a̱ ti̱ tsꞌén kꞌuíchjíi̱ xi ngo ni katsꞌénjoo̱.

³⁰ Ngo ndi̱yà jaꞌa an ki̱a̱ ngi̱ndie nínga ꞌbítji̱e̱ tostsi̱je̱è ngo xota̱ xi tsiꞌé ko̱jo xi chi̱ni,

³¹ kó ngayeje kui ngi̱ndie achichí je tjen, kó ta̱soboá yándáꞌyá xí tjiín, kó xóndi̱jo̱ xi tjíchjáꞌyáni je tsixóndó.

³² Nga askotsijèe̱n kui nii̱, katsꞌenkjó án, kó nga kamábe an, kui nii̱ xi kisꞌijinko̱n an:

³³ Tsi ngotjón tsjáfé ji, sꞌe̱ ti̱ si̱ꞌinkjaꞌyé nginí ji ngi̱chí, kósꞌe̱ tsjaníkjé má ji yojòo̱,

³⁴ tsi bo̱a̱ si̱ꞌin ji, ni̱ma̱ tsꞌén ku̱i̱ndyin ji, kó kjo̱a̱ni̱ma̱a̱ kji̱ndi̱bánieé xikó maá tsi ngo xota̱ xi tsoꞌbásón skjánjoo̱.