Énkjínkón 23 - Xo̱jo̱n eén Néná

-6-

¹ Kjiꞌanga xi̱ni̱je ji nichinie ngo xota̱ xi ꞌniú yandikoón, nda nda má ti̱ꞌinkjé jí ꞌyá xota̱ xi tindyintꞌée̱.

² Kó ndatsi ꞌniú bojoó, ti̱ꞌinchíkjo̱e̱ ji.

³ Ngata̱ má xke̱éjín ji ni xi nda chiniee̱, ngatꞌa̱ ꞌboṉcha̱joná kuí nii̱.

-7-

⁴ Ngata̱ niꞌínmejénjín ji nga ka̱macho̱n ji, ta̱sá nda ti̱ꞌinkjé jí, kó tꞌíjñímasin ji kui nii̱.

⁵ A jè kamáyè ji tsi tjín kjo̱a̱cho̱n. Jmí jmíjín. Ngatꞌa̱ xikónií tsi nga̱a̱ ja̱ fotjoo̱, sꞌe̱ fítji̱e̱n nga chaja nkꞌa jàn.

-8-

⁶ Ngata̱ jmí ni chinije̱jín ji xota̱ xi ndikonkoón, ti̱nde ngata̱ ma xke̱éjín ji nichinie xi nda xi tjiín.

⁷ Ngatꞌa̱ kui xotaa̱ xikótsꞌèn tsꞌénkjó, bo̱a̱ tsꞌén síndo ngi̱jin ini̱ma̱a̱. Chi̱ni ji ko̱jo tꞌi̱ ji, ka̱tso̱o̱, ta̱nga ngayejejín ini̱ma̱a̱ nga bo̱a̱ ka̱tso̱.

⁸ Ngafetꞌakjo̱a̱ si̱ꞌinkjasé ngayeje ni xi kichini ji, kó ngayeje ni nda xi kandokjo̱e̱ ji kjo̱a̱a̱ kui xotaa̱ nde jmí chjí ka̱májiín.

-9-

⁹ Ngata̱ jmí kjo̱a̱botíxoma boeꞌéjíi̱n xota̱ xi kitikjo̱a̱a̱, ngatꞌa̱ ta̱ ko̱jno̱kie tsí én kjínkón xi kandokjo̱e̱je ji.

-10-

¹⁰ Ngata̱ niꞌíntíyéjíi̱n tsindió xchá xí tikoón xoꞌbáa̱, kó ngata̱ chiboa chjábétꞌejín ji xoꞌbaa̱ xota̱ xi xꞌi̱a̱a̱n.

¹¹ Ngatꞌa̱ tikónrií ngo Néná xí tjiín ngaꞌniú, kó kuí boá xi kꞌo̱xiéꞌá, ko̱jo xi kondra̱ tse̱ kꞌuijñáni ngijee̱.

-11-

¹² Nda nda má tꞌíjin ji ngi̱jin ini̱ma̱a̱ kjo̱a̱bokoyaá, kó nda nda má tasínijìi̱n én kjínkoón.

-12-

¹³ Ti̱ꞌinchji̱ni̱ ji jáxóngo̱ó, kó tsi ńꞌniú kjoée̱, ko̱yàjín,

¹⁴ tsi ńꞌniú kjoée̱, ko̱ꞌna̱xiéꞌé ji ngi̱ya tsja kjo̱a̱bo̱yaa̱.

-13-

¹⁵ Ji ndí, tsi tjiín kjo̱a̱kjínkón ngi̱jin ini̱ma̱a̱, ko̱jo an achichí tsjá kꞌuieé ini̱ma̱na nga.

¹⁶ Kó ti̱ achichí tsjá kꞌuiéna, kjiꞌanga kixi̱ ni xi ko̱ndókjo̱e̱ ji.

-14-

¹⁷ Ngata̱ maꞌónjíntakín, kjo̱a̱a̱ xota̱ xi ndyi̱tsꞌèn jeé, ta̱sá ngatsjéni̱xtjin che̱ndikín jí Néná,

¹⁸ ngatꞌa̱ sꞌe̱ tikón ngo ni xi sꞌe̱ ka̱ma, kó kju̱i̱e̱jín kui kjo̱a̱chiyaá.

-15-

¹⁹ Ji xi̱ꞌin, ngatꞌieé kjo̱a̱kjínkón, kó nda ndá má tasínijìnní, te̱ꞌéndièe̱ ini̱ma̱a̱ nga ndi̱yà xí ndaa̱ ko̱e̱je̱.

²⁰ Ngata̱ ki̱a̱jín niꞌínkamaje̱ ji xota̱ xi ꞌbi xán, ko̱jo xota̱ xi xki̱ꞌá yojo,

²¹ ngatꞌa̱ nga kjo̱chó ni̱xtjin xi ꞌbi xaán ko̱jo xi xki̱ꞌaá, ka̱mani̱ma̱, kó ta̱ngatꞌanii̱ nga ta̱soboá kjófé, nga ńjño ndso̱ ko̱a̱ja̱.

-16-

²² Ndaꞌyée̱ nga ko̱tíxomaa na̱ꞌmíi̱, kó nga ka̱maxchá na̱áa̱n, ngata̱ niꞌínchꞌíjín ji.

²³ Ti̱ndyi̱sé ji kjo̱a̱kixi̱i̱, ko̱jo kjo̱a̱kjínkoón, ko̱jo kjo̱a̱chji̱ni̱e̱e̱, ko̱jo kjo̱a̱kjíntakoón, ¡kó ngata̱ bosíkjejín ji kui nii̱!

²⁴ Achichí tsjá ka̱maa̱ na̱ꞌmii̱ ngo ndí xí kixi̱, kó kui na̱ꞌmi xi tjiín ngo ndí xí kjínkoón, achichí tsjá maá.

²⁵ Ti̱ꞌin ji nga tsja ka̱maa̱ na̱ꞌmíi̱ ko̱jo na̱áa̱n, ngatꞌa̱ kuí boá xi katsꞌénxchaá.

-17-

²⁶ Ji xi̱ꞌin, an ti̱ꞌinkꞌasꞌinní ini̱ma̱a̱, kó tsjangatamaa̱ ndyikin ji nga ki̱a̱ kꞌuíntjíngí ji ndi̱yàna.

²⁷ Ngatꞌa̱ na̱masiee̱n xikónií ngo ti̱xa̱na̱nga̱ xi jmíjín nínga fetꞌanii̱, kó na̱ xi tsꞌéntꞌaa̱kjo̱a̱ xi̱ꞌii̱n xikónií tsi ngo ndáńchꞌi̱ xi xkjó.

²⁸ Ngatꞌa̱ kui na̱ xi tsꞌéntꞌaa̱kjo̱a̱ xi̱ꞌii̱n xikónií tsi ngo chejé: ꞌbíjñaꞌma ngaskande nga sakoó xi tsꞌénkámajo̱, kó kuí boá xi tsꞌén nga kjín ngase xota̱ xi tsꞌénjé.

-18-

²⁹ ꞌYání bo̱a̱ xi a xi o̱n ka̱tso̱. ꞌYání bo̱a̱ xi on ka̱maa̱. ꞌYání bo̱a̱ xi kꞌuieé kjo̱a̱xti. ꞌYání bo̱a̱ xi ndasen ka̱tso̱. ꞌYání bo̱a̱ xi ka̱maꞌon kjo̱a̱ndaa̱. ꞌYání bo̱a̱ xi chji̱ndi̱ má ka̱ma ndyi̱kon.

³⁰ Kuí boá xota̱ xi ta̱soboá xán ndyi̱ꞌbi, ko̱jo xi ndyi̱mongase kjín to̱ko̱ya xán xi je tsꞌájii̱n.

³¹ Ngata̱ ma xke̱éjín ji binoo̱ kjiꞌanga ndyi̱a̱ iní iní, ko̱jo nga ndyi̱a̱ ꞌna̱ ꞌna̱ ngi̱ya chi̱tse̱én, ngatꞌa̱ achichí tsjatsꞌèn fíjénná nga ndyi̱ꞌyò,

³² ta̱nga nga fetꞌani kjiniéná xikoó ngo ye̱, kó xindyiájin ndakjan ndakjanná xaán.

³³ Tsi sꞌi̱ ji, kje̱ꞌe ni ko̱ko̱ó, kó ta̱xkiya si̱ꞌinkjé ko̱jo ko̱ndókjo̱e̱ jí kje̱ꞌe ni.

³⁴ Xikó maá tsi ki̱a̱ titsjajnifé ji ngamasiee̱n ndáchíkoón, ko̱jo tsi xikó maá tsi ki̱a̱ tꞌa yá xí jee̱ ngo tjotso xi ta̱nisién ꞌniú je titsjajni ji.

³⁵ Kó bi̱ sé jí: Kiniꞌánꞌónna, kó nde onjín kamána, akjana, kó nde kamábejín yojona. Kó kjiꞌanga nga kjo̱a̱ꞌána ti̱ kjuín ngase nginí an ngase xán.