Énkjínkón 22 - Xo̱jo̱n eén Néná

Jmí ni chjíjiín kjo̱a̱cho̱o̱n

¹ Ndakjiꞌi ngase nga xcha̱ndikónná, ta̱bo̱a̱jiín nga ꞌniú cho̱n ka̱má, ngatꞌa̱ ngo xota̱ xi tjó niꞌánjo̱, chjí ngasenii̱ ta̱bo̱a̱jiín to̱ntiboaa̱ ko̱jo to̱nsinieé.

² Xota̱ xi cho̱o̱n ko̱jo xota̱ xi ni̱ma̱a̱, ngo ndséje̱n boá, ngatꞌa̱ Néná boá xi katsꞌénda ngajoó.

³ Xota̱ xi tjiín kjo̱a̱kjíntakoón be ni xi ndajiín, kó ki̱a̱jín fítji̱ngi, ta̱nga xota̱ xi chi̱nii̱, ki̱a̱ fítji̱ngi, kó ndajín maá ngijee̱.

⁴ Ni̱ma̱kjo̱a̱ ꞌnaxié ji yojòo̱ ko̱jo che̱ndikín jí Néná, kó Néná tsja̱á kjo̱a̱cho̱n, kjo̱a̱yandikón ko̱jo kjo̱a̱mindyion.

⁵ Ndi̱ya̱à xota̱ xi ꞌniú ndajiín, xikónií tsi ndaꞌyá ko̱jo chja̱ya̱ tjiín, ta̱nga xota̱ xi tjoó kjo̱a̱mindyioo̱n, tsꞌénkjii̱n yojoo̱ kui nii̱.

⁶ Ti̱ꞌinchji̱ni̱ ji ndíi̱ ndeskande nga xi̱xi̱, kó ngaskande nga ka̱maxchá ku̱i̱ꞌíjñámasienjín ni xi akakoyée̱.

⁷ Xota̱ xi cho̱o̱n boá xi ndi̱a̱a̱ xota̱ xi ni̱ma̱a̱, kó xota̱ xi míyá to̱o̱n, mosoo̱ xota̱ xi tsꞌénkíyà to̱o̱n boá.

⁸ Xota̱ xi ni xi ndajín ꞌbítji̱e̱, ja̱ ti̱ ni xi ndajín kjo̱a̱ꞌátikó nga, kó Néná sa̱ꞌínkjiéni nga sa̱ꞌínkjién yá xí botixómáni.

⁹ Néná tsꞌénchíkonñé xota̱ xi tjiín kjo̱a̱ni̱ma̱takón, ngatꞌa̱ katsjaá nichinie xota̱ xi ni̱ma̱a̱.

¹⁰ Ti̱yítji̱ngìi̱ xota̱ xi mojnókiee̱, kó kju̱i̱e̱ kjo̱a̱xtii̱, kjo̱a̱see̱, ko̱jo kjo̱a̱chꞌotsoó.

¹¹ Xota̱ xi nda ini̱ma̱a̱ ko̱jo xi kixi̱ chji̱a̱a̱, kuí boá xi tjó ko̱jo xi amingo̱ sa̱ꞌínjo̱ nda̱ ree̱.

¹² Néná koón kjo̱a̱kjínkoón, ta̱nga tsꞌénkjátsón ni xi ꞌbínda xota̱ xi botiñáná.

¹³ Xota̱ xi tsiꞌeé ngo ni ꞌbijñáxtikjà tsi̱ꞌe̱ nga ko̱e̱je̱tsꞌénxájín, ngo xò xandi̱je̱ tsoꞌbá ngi̱ya ndi̱yàtieé xi mején xoò skji̱ni̱e̱, tsó nga chji̱a̱.

¹⁴ Tsꞌoa na̱ xi tsꞌéntꞌaa̱kjo̱a̱ xi̱ꞌii̱n xikó maá tsi ngo chja̱ya̱ xi jmíjiín nínga fetꞌani, kó ki̱a̱ nijan tsꞌénkámajo̱ xota̱ xi Néná jè bo̱a̱ katsó nga ndajín ka̱maa̱.

¹⁵ Kjo̱a̱kitikjo̱a̱a̱, ngi̱jin ini̱ma̱a̱ ndií jè tikónjin, ta̱nga ńꞌniú xí tsꞌénchjíni̱e̱e̱ boá xi ka̱maa̱ kjo̱a̱ꞌáxiín.

¹⁶ Xota̱ xi tsꞌénchéjeé xota̱ ni̱ma̱a̱ tsi̱ꞌe̱ nga kꞌuié ngasee̱ to̱n, nga kju̱i̱e̱tꞌaa̱ kuí xí ni̱ma̱ tsꞌén kꞌuijñá ngase.

Kjín ngase énkjínkón

¹⁷ Nda nda má tasínijìi̱n eén xota̱ xi kjínkoón, kó tjajintakín ji kjo̱a̱bokoyá xi an tsꞌéntsjaa.

¹⁸ Achichí nda kui eén tsi nda kjójintakín ji, ko̱jo tsi je tjiꞌàmá ndso̱ꞌbe nga ko̱ndókjo̱e̱ ji.

¹⁹ Jè tsꞌénxiyaa kui eén ngotꞌe̱, tsi̱ꞌe̱ nga ka̱maꞌnítakín ji Néná,

²⁰ Kꞌi̱e̱ tsꞌéntsjaa kꞌi̱e̱e̱ kantié énkjínkón xí yaꞌa kjo̱a̱botíxoma ko̱jo kjo̱a̱kjíntakón.

²¹ Én xi maꞌniátakón ko̱jo xi ja̱koxi̱ boá xi tsꞌéntsjaa, tsi̱ꞌe̱ nga ka̱maa̱ ko̱ndókjo̱e̱je ji én xí ja̱koxi̱ kui xota̱ xi kanangiyachoo̱n ji.

-1-

²² Ngata̱ niꞌínchejéjíi̱n xota̱ ni̱ma̱a̱, kjo̱a̱a̱ nga xota̱ ni̱ma̱, ti̱nde ngata̱ ndakinníjín ji ngase jé xota̱ xi ndasen síndoo̱ ki̱a̱ ngindyi̱ko̱n xota̱ xi tsꞌénjeé,

²³ ngatꞌa̱ Néná boá xi kꞌo̱xiéꞌá kjo̱a̱a̱ ni xi kjimataꞌin, kó kuí boá xi sa̱ꞌínkꞌién xota̱ xi kjo̱a̱ꞌáxiín ngayeje ni xi tjiín xota̱ ni̱ma̱a̱.

-2-

²⁴ Ngata̱ ki̱a̱jiín niꞌínkamaje̱ ji xota̱ xi xi xtinda, ti̱nde ngata̱ amingo̱jín niꞌínje̱ ji xota̱ xi tamá,

²⁵ tsi̱ꞌe̱ nga bo̱a̱jín kón ka̱ma ji xikoó kuí, kósꞌe̱ ti̱ jii kꞌuijñíi̱ chja̱ya̱ yojòo̱.

-3-

²⁶ Nga boeꞌéjín jí ndso̱ꞌbe nga ji kꞌuíchjí jí, ni xi ntsjieén kje̱ꞌe xota̱,

²⁷ ngatꞌa̱ tsi si̱ꞌinsénjín ji kui to̱o̱n, ngaskande ṉchan xi tsjajnisén ji chje̱ꞌéxiín.

-4-

²⁸ Ngatꞌa̱ ꞌnitíyéjíi̱n tsindió xí je tikoón xoꞌbáa̱ xikó kjiꞌi chi̱bo̱a̱ xi je índoo̱ xi xcháa̱.

-5-

²⁹ Kjiꞌanga xchi̱e̱ ji ngo xota̱ xi nda tjítsꞌén xaá, jmí tsi ta̱xkiya xota̱ xi sa̱ꞌínxátꞌaa̱, nda̱ ree̱ boá xi kjo̱chótsꞌénxátꞌaa̱.