Énkjínkón 21 - Xo̱jo̱n eén Néná

Ngatꞌiéná kjo̱a̱ni̱ma̱takón ngindyi̱ko̱n Néná

¹ Ngi̱ya tsja Néná, ini̱ma̱a̱ ree̱, xikónií ngo ndejèꞌ, xi fí ndi̱yà xí mejeén Néná nga ko̱e̱je̱.

² Xota̱ nga̱sondiee̱ sꞌijin maá nga ndakjiꞌi ngayeje ni xi tsꞌén, ta̱nga Néná boá xi kotsijee̱n ni xi mejeén sa̱ꞌín.

³ Kixi̱ ti̱ꞌin ji, ko̱jo kixi̱ ti̱ꞌinje̱ ji xotaa̱, ngatꞌa̱ kuí nii̱ xi tsja ma ngasee̱ Néná, ta̱bo̱a̱jiín kjo̱a̱tjó xi niꞌánkꞌasꞌiee̱n kui.

⁴ Jé boá kui nii̱: nga nkꞌakon ko̱ꞌna̱xié yojoná, nga kjínkón ko̱ꞌna̱xié yojoná, ko̱jo nga si̱ꞌankjó xikoó xota̱ xi ꞌniú ndajiín.

⁵ Tsi nda si̱ꞌinkjé jí ni xi si̱ꞌin ji, achichí ni xi nda kꞌuieé, ta̱nga tsi ta̱xkiya si̱ꞌin ji ngo ni, ni̱ma̱ tsꞌén ku̱i̱ndyin ji.

⁶ Kjo̱a̱cho̱n xi kasako ta̱ngatꞌanii̱ nga ikꞌíndisoo̱, ta̱ ni xi tsꞌénkjiín kjo̱a̱kjínkoón xota̱ xi mongase kjo̱a̱bo̱yaa̱ tsí bo̱a̱.

⁷ Xota̱ xi ꞌniú ndajiín, ti̱kuíní ni xi ndajín xi ndyi̱tsꞌèn xí sa̱ꞌínkjié, ngatꞌa̱ kamámejénjiín nga ni xi kixi̱ sa̱ꞌín.

⁸ Ndi̱ya̱à xota̱ xi ꞌniú ndajiín, ńkjá ngájén, ta̱nga ndi̱ya̱à xota̱ xi kixi̱i̱, kixi̱ boá.

⁹ Ndakjiꞌi ngase nga ngo ngi̱ndyióngi̱nijoo̱n ndi̱tsee̱n ku̱i̱ndyión, ta̱bo̱a̱jiín tsi ngo chjo̱on xí tamá ku̱i̱ndyionjo̱ ngo ngi̱ya ndiꞌa xi tiyá.

¹⁰ Xota̱ xi ꞌniú ndajiín ta̱ngongá ni xi ndajín xi mejeén sa̱ꞌín xi tsꞌénkjó, kó nde ni̱ma̱jín maa̱ xota̱ xi ngasee̱.

¹¹ Kjiꞌanga niꞌánjeé xota̱ xi mojnókiee̱, xota̱ xi chi̱nii̱, xota̱ xi kjínkón má, kó kjiꞌanga niꞌánchji̱ni̱e̱ xota̱ xi kjínkoón, ta̱tra maa̱ ni xi bokoyaá.

¹² Xota̱ xi kixi̱i̱, kotsijee̱n ndiꞌaa̱ xota̱ xi ꞌniú ndajiín, kó be kótsꞌèn ni xi ndajiín tsꞌenkjié.

¹³ Xota̱ xi tsꞌensénjiín xota̱ ni̱ma̱ xi ni̱ma̱ tsó nga ko̱si̱ko̱joo̱, ti̱nde kui si̱ꞌansénjiín kjiꞌanga kui ku̱i̱ꞌa nga ko̱siko̱jo.

¹⁴ Kjiꞌanga ngo ni xi ta̱ boeꞌéná, kó nga ꞌma boeꞌéná, tsꞌénkꞌíxió ngaskande kjo̱a̱tamá xí ꞌniuú.

¹⁵ Achichí tsjá maá xota̱ xi kixi̱i̱ kjiꞌanga kixi̱ tsꞌén niꞌánseén xotaa̱, ¡ta̱nga xota̱ xi ꞌniú ndajiín ngaskande fotsié ndikón má!

¹⁶ Xota̱ xi ꞌbijñámasien kjo̱a̱kjínkoón, ki̱a̱ kjo̱chó ngi̱jii̱n xota̱ xi je jesoón.

¹⁷ Xota̱ xi ta̱soboá sꞌué, ko̱jo ndásíje̱n, ko̱jo kjo̱a̱chꞌi̱ tsꞌénkjó, achichí ni̱ma̱ tsꞌén kꞌuijñá, kó jmíni̱xtjin ka̱macho̱n.

¹⁸ Ni xi ndajín xi ka̱maa̱ xota̱ xi kixi̱i̱, xota̱ xi ꞌniú ndajiín boá xi ku̱i̱ꞌíchjí, kó kjo̱a̱ni̱ma̱ xi tsoboaá xota̱ xi kixi̱i̱, xota̱ xi ꞌniú ndajiín boá xi ꞌbókanieé.

¹⁹ Ndakjiꞌi ngase nga ku̱i̱ndyion so̱bo̱a̱ ngo ngi̱ndie xi kixí, ta̱bo̱a̱jiín tsi ngo chjo̱on xí tamá, ko̱jo xi kjo̱a̱xti tsja̱aná xí ku̱i̱ndyionjo̱.

²⁰ Ndiꞌaa̱ xota̱ xi kjínkoón, tjín kjo̱a̱cho̱n ko̱jo ndásíje̱n, ta̱nga ndiꞌaa̱ xota̱ xi chi̱nii̱, ta̱ tjíniꞌánkjatsón kjo̱a̱nda ni.

²¹ Xota̱ xi fítji̱ngi kjo̱a̱kixi̱i̱ ko̱jo kjo̱a̱ni̱ma̱takoón, kuí boá xi sa̱ko̱ó kjo̱a̱mindyion, ko̱jo kjo̱a̱kixi̱ ko̱jo kjo̱a̱yandikón.

²² Nda̱ xi kjínkoón tsꞌéntsi̱ꞌe̱ na̱xi̱ńdáꞌniú xí nda tjíchjáꞌyaá, kó ꞌbojmi xó xí tjíchjáꞌyáni xi kjimaꞌniátakón kui xotaa̱.

²³ Xota̱ xi koo̱n tsꞌoa ko̱jo na̱je̱n, jmíni̱xtjin kꞌuieé kjo̱a̱xti.

²⁴ Xota̱ xi mojnókie ꞌmií, xota̱ xi nkꞌakoo̱n ko̱jo xi je ꞌboxié yojoo̱, kui xi je jaꞌatjoón nga nkꞌakon ma.

²⁵ Xota̱ xi tsiꞌeé ngayeje ni xi mejeén, ta̱nga mejénjiín tsꞌénxá.

²⁶ Tjín xota̱ xi nga ngo ni̱xtjii̱n nga mejeén ngo ni, kó xota̱ xi kixi̱i̱, nde onjín maá nga tsjá ngo ni.

²⁷ Achichí chꞌoó Néná kjo̱a̱tjó xi tsꞌenkꞌásꞌién xota̱ xi ꞌniú ndajiín, kó ngase má nga ndajín tsꞌén tsꞌenkꞌásꞌién.

²⁸ Xi ntꞌieé chistiko̱ ndisoo̱, si̱ꞌankjie, ta̱nga xi ntꞌieé kjo̱a̱botíxoma xi ndaa̱, ngatsjéni̱xtjin kꞌuijñá.

²⁹ Xota̱ xi ꞌniú ndajiín ja̱ma xi nda síndo maa̱ kui, ta̱nga ta̱kuítsí xota̱ xi kixi̱i̱ xi ja̱koxi̱ nga nda ꞌbíndo.

³⁰ Ngindyi̱ko̱n Néná jmíjín ngo kjo̱a̱kjínkón xi chjínií, ko̱jo tsi ngo kjo̱a̱kjíntakón, ko̱jo tsi ngo kjo̱a̱botíxoma.

³¹ Jájuún boá xi tsoboaá nga ku̱i̱ꞌíndonda ndi̱je̱ kjo̱a̱xcha̱án, ta̱nga Néná boá xi bo̱a̱ ka̱tso̱, ꞌyání xi tsja̱á nga kui xi sa̱ꞌín.