Énkjínkón 20 - Xo̱jo̱n eén Néná

Néná boá xi tsoꞌbátjónná

¹ Binoo̱ ko̱jo xaán kjo̱a̱xti ꞌboxiéná, kó ta̱ꞌyaní xi ta̱ngatꞌanii̱ kui nii̱ nga ndajín sa̱ꞌín, jmí tsi xota̱ xi kjínkón xi bo̱a̱ sa̱ꞌiín.

² Kjiꞌanga tsꞌénxchán nda̱ ree̱, xikó maá nga kjandayà ngo xandi̱je̱, kó xi ta̱ngatꞌanii̱ kui nga tsꞌénxchán, yojoo̱ boá xi tsꞌénjo̱.

³ Xota̱ xi chꞌoo̱ kjo̱a̱xtii̱, achichí yandikón, ta̱nga xota̱ xi kitikjo̱a̱a̱, kuí boá tsjaa kjo̱a̱xtii̱.

⁴ Xota̱ xi tsiꞌeé tsꞌénxájín ni̱xtjin nga ma cho̱nchꞌàn, kó nga fochó cho̱ndoboaá sakójiín nichinie.

⁵ Ni xi tsꞌénkjó ngi̱jin ini̱ma̱a̱ xotaa̱, xikó maá nínga na̱nga̱a̱ ndáchíkoón, kó ta̱ ngo tsí xota̱ xi kjínkoón xi ka̱maa̱ sku̱i̱e̱ kui nii̱.

⁶ Achichí má xi xota̱ xi ndaxota̱ ndyi̱tsoó yojoo̱, ta̱nga nde ngojín xi sa̱ko̱ó xota̱ xi ka̱ma ka̱maꞌniátakón.

⁷ Xota̱ xi kixi̱i̱, tsjie tsꞌén síndo, kó achichíra̱tsjaa̱ ndí xi ki̱a̱ ndyi̱fítji̱ngii̱ ni xi tsꞌén.

⁸ Kjiꞌanga nda̱ ree̱ ꞌbíjñasón yáxíríe̱ nínga ꞌbítꞌajé xotaa̱, ta̱ kotsijen tsí kó tsꞌenkjié ni xi ndajiín.

⁹ Nde ngojín xota̱ xi ka̱ma bo̱a̱ ka̱tso̱ nga je katsꞌéntsjie ini̱ma̱a̱ ko̱jo nga jmíjéjiín.

¹⁰ Jó má ni xi achichí chꞌoó Néná: baskula̱ chejeé, ko̱jo ni xi chꞌíchi̱bo̱a̱ xi bo̱a̱jín kjiꞌi.

¹¹ Ta̱ngatꞌanii̱ ni xi tsꞌén ngo nda̱ nga yà tsi kixi̱ ko̱jo tsi tsjie tikón.

¹² Jó má ni xi katsꞌénda xi katsjáná Néná: tji̱bo̱a̱nijón tsi̱ꞌe̱ nga ku̱i̱ntꞌiè, ko̱jo ndyikón tsi̱ꞌe̱ nga sku̱i̱e̱.

¹³ Tsi ta̱soboá tsjáfé jí, ni̱ma̱ tsꞌén ku̱i̱ndyin ji. Ta̱sá tindyie ndyikin, kó jmíni̱xtjin xcha̱jaa̱ nichinie.

¹⁴ Xota̱ xi ꞌbotsie nii̱, ndajín ni xi tsꞌatsie an tsó, kó ngije tsꞌatsie kui nii̱, achichí tsjá maá kjo̱a̱a̱ ni xi tsꞌatsie.

¹⁵ Achichí to̱nsinié ko̱jo ndi̱jo̱ tsjakon tjín kuí nga̱sondiee̱, ta̱nga jmíjín ingo ni xi ꞌniú chjínií, xikoó kjo̱a̱bokoyaá xota̱ xi kjínkoón.

¹⁶ Chjábée̱ ńjño xi ku̱i̱ꞌíjñangini ngo xi tsja̱a tsꞌoa nga kui ku̱i̱ꞌíchjí to̱n xi ntsjieén ngo xota̱ xi kje̱ꞌe, kó kui ńjñoo̱ xi ngasꞌijñangini kui to̱o̱n.

¹⁷ Achichíra̱ nda xi̱ni̱e̱e̱ nichinie xi katsꞌén ngo nda̱ nga tsꞌenṉcha̱, ta̱nga nga fetꞌani xikoó tsi tsomí ka̱ma ngi̱ya tsꞌoa.

¹⁸ Ngo kjo̱a̱botíxoma xi nda tꞌentji̱ngi ji, kjiꞌanga kꞌuínde ngo ni, kó tsi̱ꞌe̱ nga xcha̱jàjín ji ngo kjo̱a̱xchán, tꞌínde ji kótsꞌèn nga si̱ꞌinni ji.

¹⁹ Xota̱ xi see̱n ényaà, tsóyá ngo ni xi tjiꞌmá, ngatꞌa̱ ki̱a̱jín niꞌínkamaje̱ ji xota̱ xi see̱n ényaà.

²⁰ Kui ndí xí chꞌo ka̱tso̱o̱ na̱ꞌmii̱ ko̱jo na̱aa̱n, bo̱a̱ ka̱maa̱ xikoó ngo ndiꞌí xí inda inda ꞌbo nínga jñoó.

²¹ Kjo̱a̱cho̱n xi tsá ko̱jo xi niꞌínjín sakóná nga tjón tjón, jmí kjo̱a̱tsja tsjájínná nga fetꞌanii̱.

²² Ngata̱ bo̱a̱jín sé nga ji xi si̱ꞌingojo ji, ta̱sá chiyée̱ nga Néná xí bo̱a̱ sa̱ꞌín, kó kuí boá xi kꞌo̱xiéꞌaá.

²³ Néná achichí chꞌoó baskula̱ chejeé kó nisochi̱bo̱a̱ chejeé, ndajínkjiꞌi.

²⁴ Néná boá xi tjiyátsjà ndi̱ya̱à kjo̱a̱mindyioo̱n xotaa̱, kó xotaa̱ kótsꞌèn ka̱makjínnii̱ kui ndi̱ya̱à.

²⁵ Ndikón kjíꞌí nga xotaa̱ tsá ku̱i̱chji̱a̱ ngo ni xi sa̱ꞌínkjatjosoón Néná, ngatꞌa̱ jaskan sa̱ꞌínkjó, kó sa̱ꞌínkjatjosónjín.

²⁶ Nda̱ re xi kjínkoón ki̱a̱ ꞌbojmi nínga ꞌyo to ndso̱ko̱a̱n ṉño̱paa̱n xota̱ xi ꞌniú ndajiín, kósꞌe̱ tsꞌénkjáꞌanié ndi̱jo̱je ńtsoó molinoo̱.

²⁷ A̱siénni̱xtjin xi Néná katsjaá xota̱ nga̱sondiee̱, kuí boá xi xikoó ngo ndiꞌí xí tsꞌénkjién Néná nga kotsijennii̱ ngaskande ngi̱jin ini̱ma̱a̱ xotaa̱.

²⁸ Nda̱ ree̱ achichí ꞌniú ꞌbíjñá xá xí tjiín, kjiꞌanga kixi̱ tikón ngindyi̱ko̱n Néná, ko̱jo kjiꞌanga nda tsꞌénjo̱ xota̱ na̱xi̱ńdaá.

²⁹ Ngaꞌniú xí tjiín jáxóngo̱ó boá xi kjo̱a̱nkꞌakoo̱n, ta̱nga tsja̱ tiboaa̱ xota̱ xi xchaá boá xi kjo̱a̱yandikoón.

³⁰ Nga foáná, tsꞌénꞌónná, ta̱nga foaꞌáxín ni xi ndajiín, kó kjo̱a̱botíjeé boá xi tsꞌéntsjie ini̱ma̱a̱.