Énkjínkón 2 - Xo̱jo̱n eén Néná

Ni nda xi yaꞌa kjo̱a̱kjínkoón

¹ Ji ndí tsi si̱ꞌinjo̱ꞌo ji énna, ko̱jo tsi kjójintakín ji kjo̱a̱botíxomana,

² tsi ko̱si̱e̱nnijìi̱n kjo̱a̱kjínkoón, tsi ngi̱jin ini̱ma̱a̱ kꞌuijñíjin ji nga nda si̱ꞌinkjé ni xi si̱ꞌin ji,

³ tsi ꞌniú chji̱e̱ꞌe ji nga ka̱makjíntakín ji, ko̱jo tsi ꞌniú chji̱e̱ꞌe ji nga nda si̱ꞌinkjé ni xi si̱ꞌin ji,

⁴ tsi xikó maá to̱ntiboaa̱ nga ku̱i̱ndyi̱sé ji, ko̱jo tsi xikó maá ngo ti̱jìto̱n.

⁵ Kjiꞌa boá nga xchi̱e̱ndikín jí Néná, ko̱jo ja̱koxi̱ nga xchi̱e̱ ji Néná.

⁶ Ngatꞌa̱ Néná boá xi tsjá kjo̱a̱kjínkoón, kó kjo̱a̱kjíntakoón, ko̱jo kjo̱a̱chji̱ni̱e̱e̱ tsꞌoa boá xi fotjonii̱.

⁷ Néná boá xi tsjaá kjo̱a̱kjínkón, kó bosikójo ko̱jo koo̱n xota̱ xi kixi̱i̱.

⁸ Néná boá xi koo̱n ndi̱ya̱à xota̱ xi kixi̱ tsꞌén xaá, ko̱jo koo̱n ndi̱ya̱à xota̱ xi kui kjimaꞌniátakón.

⁹ Bo̱a̱ tsꞌén nga ka̱makjiín ji, ni xi na̱xo̱ ko̱jo ni xi kixi̱, ni xi ngo ndséje̱n, ko̱jo ngayeje ndi̱yà xí nda.

¹⁰ Kjiꞌanga kjo̱a̱kjínkoón kꞌo̱sꞌienjin ini̱ma̱a̱, ko̱jo nga kjo̱a̱kjíntakoón ku̱i̱ꞌíkitsie maá kjo̱a̱tsja,

¹¹ ni nda niꞌínkjé ngindiee̱ nga ngo ni ko̱ndókjo̱e̱, ko̱jo kjo̱a̱kjínkoón boá xi skoón,

¹² tsi̱ꞌe̱ nga ni xi ndajiín xín sa̱ꞌínkjaꞌaa̱, ko̱jo xota̱ xi ꞌniú ndajiín jmí ni sa̱ꞌínjo̱jiín.

¹³ Kui xotaa̱ ꞌbijñámasien ndi̱yà xí kixi̱i̱, kó ndi̱yà xí ndajiín boá xi fotsoꞌbáyà,

¹⁴ achichí tsjá maa̱ nga tsꞌén ni xi ndajín, kó ngaskande sꞌué má tsꞌén,

¹⁵ ndi̱yà xí ńkjá ngájén boá nínga tjimá, kó ngiti̱ ki̱a̱jín fí ndi̱yà xí na̱xo̱o̱.

¹⁶ Kjo̱a̱kjínkoón boá xi sa̱ꞌíndeé kjo̱a̱a̱ kui na̱ xi ꞌboṉcha̱jo xi̱ꞌii̱n, kó ti̱ kꞌo̱ṉcha̱joo̱ nga, kjiꞌanga sa̱ꞌínkjién én xí ixii̱,

¹⁷ kui naa̱ íjñámasien xi̱ꞌin xi kisꞌijñajo̱ nga kjindí, kó je kichíyaá ni xi índa ngindyi̱ko̱n Néná.

¹⁸ Tsi ki̱a̱ kongín ndi̱yà xí fíni xtji̱e̱e̱n ndiꞌaa̱, xikónií tsi ndi̱ya̱à kjo̱a̱bo̱yaa̱ je kachjábé.

¹⁹ Kui xi ki̱a̱ nijan tsꞌénkámajo̱ kui naa̱, ngiti̱ kjo̱e̱ꞌeꞌóyájín, kó nginijánjín kjótsoꞌbá nginí ndi̱ya̱à kjo̱a̱mindyioo̱n.

²⁰ Ji ndí nda̱chií, ki̱a̱ tꞌentji̱ngi ji ndi̱yà xí ndaa̱, kó ngatsjéni̱xtjin nga ndi̱ya̱à xota̱ xi kixi̱i̱ ti̱ńtje̱ ji,

²¹ ngatꞌa̱ ta̱kuítsí xota̱ xi kixi̱i̱ xi kꞌuíndo kui tꞌanangii̱, ko̱jo kui xi ngatsjéni̱xtjin nga ni xi ndaa̱ sa̱ꞌín.

²² Ta̱nga, kui xota̱ xi ꞌniú ndajiín, si̱ꞌankjieni kui tꞌanangii̱, kó xota̱jeé ku̱i̱yòtjíngií.