Énkjínkón 19 - Xo̱jo̱n eén Néná

Xota̱ xi kjínkoón ntꞌieé kjo̱a̱botíxoma

¹ Chjí ngasenii̱ nga xota̱ ni̱ma̱ xi kixi̱ ka̱má, ta̱bo̱a̱jiín tsi xota̱ xi kitikjo̱a̱ ko̱jo tsi xi ta̱xkiya chji̱a̱ ka̱má.

² Ndajínkjiꞌi tsi jmíjínná kjo̱a̱kjíntakón, kó kjiꞌanga xi tsá xi boaꞌa niꞌán ngo ni, ndajín fotjo.

³ Kjo̱a̱kitikjo̱a̱a̱ boá xi tsꞌénchájá ndi̱ya̱à xotaa̱, kósꞌe̱ Néná tsꞌénxchánjo̱ nga bósieén ni xi maa̱ ngijee̱.

⁴ Xota̱ xi cho̱o̱n achichí amingo̱ ꞌbeé, kó xota̱ xi ni̱ma̱a̱ ngaskande xota̱ xi amingoo̱ fotjoxíntꞌaa̱.

⁵ Chistiko̱ ndisoo̱, chjiéngá ka̱majeé, kó xota̱ xi éndísó chji̱a̱a̱, kjo̱tjongijiín yojoo̱.

⁶ Achichí má xota̱ xi mongase kjo̱a̱ndaa̱ xota̱ xi nda ini̱ma̱a̱, kó ngayeje xotaa̱ xi mongase nga nda ko̱a̱ꞌa, nda̱ xi tsie ni tsjaá.

⁷ Ngayeje já ntsꞌi̱e̱ xi xota̱ xi ni̱ma̱a̱ tsꞌenchꞌó, ngatꞌa̱ jmí to̱njiín ¡kó ngaskande já amingoo̱ tsꞌénkjin yojoo̱! Mongase kó ka̱tso̱o̱ tsi̱ꞌe̱ nga kji̱ndi̱bá nginí, ta̱nga ngiti̱ jmí én sakójiín.

⁸ Xota̱ xi tjiín kjo̱a̱kjíntakón, tjórií yojoo̱, xota̱ xi chíyájiín ni xi je akakoyaá, achichí nda kꞌuijñá.

⁹ Chistiko̱ ndisoo̱, chjiéngá ka̱majeé, kó xota̱ xi éndísó chji̱a̱a̱, si̱ꞌankꞌien.

¹⁰ Xikótsꞌèn ndajín ya nga ngo nda̱ kitikjo̱a̱ kꞌuijñá xikoó tsi cho̱n, ti̱ bo̱a̱ ti̱ tsꞌén ndajín ya nga ngo moso̱ ko̱tíxomaa̱ ree̱.

¹¹ Kjiꞌanga nda tsꞌénkjó ngo xota̱, kuí boá kui nii̱ xi tsꞌénkjáꞌajenda kjo̱a̱xcha̱án, kó kjo̱a̱yandikoón kjo̱a̱niꞌánjetakoón boá.

¹² Kjiꞌanga tsꞌénxchán nda̱ ree̱, xikó maá nga kjandayà ngo xandi̱je̱, kó kjo̱a̱ndaa̱, xikónií xoño xi bixó ngi̱jin kꞌijñaá.

¹³ Ndí xí kitikjo̱a̱a̱ achichí kjo̱a̱ni̱ma̱ tsꞌénkjáꞌa na̱ꞌmii̱, kó ínchjín xí kjánjo̱ xi̱ꞌii̱n, xikó maá ngo ni xi tjítín síkijí.

¹⁴ Ndiꞌaa̱ ko̱jo kjo̱a̱cho̱o̱n, ni xi ꞌbijñáná xi xcháná boá, ta̱nga kui chjo̱on xí kjínkoón, ni xi ta̱ katsjáná Néná boá.

¹⁵ Kjo̱a̱tsiꞌeé tsꞌénkáfétjénná, kó xota̱ xi tsiꞌeé kjindiá kjo̱a̱ꞌa.

¹⁶ Xota̱ xi tsꞌénkjátjosón kjo̱a̱botíxomaa̱, yojoo̱ xí tsꞌénjo̱, kó xi kónjiín ni xi tsꞌén, ko̱yà.

¹⁷ Xota̱ xi tsꞌénkíyaà to̱n xota̱ xi ni̱ma̱a̱, xikónií tsi Néná xí tjítsꞌénkíyaá. ¡Kó kui kjo̱a̱ndaa̱ Néná ku̱i̱ꞌíchjí nginií!

¹⁸ Ti̱ꞌinchji̱ni̱ ji ndíi̱ tji̱e̱nga ka̱ma ngase si̱ꞌanchji̱ni̱e̱, ta̱nga ngata̱ ngaskande niꞌínkꞌínjín ji nga bo̱a̱ si̱ꞌin ji.

¹⁹ Xota̱ xi ꞌniú tsꞌénxchaán, ku̱i̱ꞌíchjí kuí nii̱, ka̱májín si̱ꞌankjaꞌajenda, ngatꞌa̱ ta̱sá má ꞌniú ngase sa̱ꞌínxchán.

²⁰ Tasínijìi̱n kjo̱a̱botíxomaa̱, kó tsjangatamaa̱ nga si̱ꞌanchji̱ni̱e̱e̱, tsi̱ꞌe̱ nga xota̱ xi kjínkón ka̱ma ji nga ka̱maxchá jí.

²¹ Achichí má ni xi ꞌbínda nga sa̱ꞌín ngo xota̱, ta̱nga kjo̱a̱botíxomaa̱ Néná boá xi kꞌuijñá ngatsjéni̱xtjin.

²² Achichí tsjá maa̱ xota̱ xi tjiín kjo̱a̱ni̱ma̱takón, chjí ngasenii̱ nga xota̱ xi ni̱ma̱ ka̱má, ta̱bo̱a̱jiín tsi xota̱ xi ndiso ka̱má.

²³ Tsi ndyi̱yandikón Néná, kuí nii̱ xi tsja̱aná kjo̱a̱mindyion, kó tsjatsꞌèn ku̱i̱ndyión nga jmí ni ka̱májínná.

²⁴ Xota̱ xi tsiꞌeé tsangijin tsja ngi̱ya ti̱bo̱a̱a̱, kó ngaskande é maá nga skji̱ni̱e̱ nichiniee̱.

²⁵ Ti̱ꞌinjée̱ xota̱ xi mojnókiee̱, kó bo̱a̱ tsꞌén nga tsjièndíkón xota̱ xi chi̱nii̱, kó tsi si̱ꞌinchji̱ni̱ ji xota̱ xi kjínkoón, kꞌuié ngasee̱ kjo̱a̱kjíntakón.

²⁶ Ndí xí tsꞌénchéjeé na̱ꞌmii̱, ko̱jo xi mongatji̱ngii̱ na̱aa̱n, ndí xí tsjá kjo̱a̱soboá, ko̱jo xi ndajín boá.

²⁷ Ji ndí, tsi si̱ꞌinsénjín nga tjín xí sa̱ꞌinchji̱ni̱e̱e̱, tiniꞌínkjinríi̱ yojòo̱ kjo̱a̱botíxoma xi tsjá kjo̱a̱kjínkoón.

²⁸ Chistiko̱ xi ꞌniú ndajiín, mojnókie kjo̱a̱kixi̱i̱, kó én xí chji̱a̱ xota̱ xi ꞌniú ndajiín ko̱óꞌmá ni xi ndajiín.

²⁹ Jè tikónnda kjo̱a̱botíjé tsi̱ꞌe̱ xota̱ xi mojnókiee̱, kó ti̱ jè tikónnda ńꞌniú xí kjónié nga̱xto̱n xota̱ xi kitikjo̱a̱a̱.