Énkjínkón 18 - Xo̱jo̱n eén Néná

A ni xi nda ko̱e̱ꞌeé, axa̱ si̱ꞌanjeé, jí xí yé ji

¹ Xota̱ xi ndikonkoón, ta̱ ni xi nda maá kuí tsí xi mongase, kó chꞌo maa̱ nga tjín xí tsjaá ngo kjo̱a̱botíxoma xi nda.

² Xota̱ xi kitikjo̱a̱a̱ tsjajín maá kjo̱a̱kjínkoón, ta̱kuítsí ni xi tsꞌénkjó kuí, xi mejeén bokó.

³ Ni xi ndajiín, kjo̱a̱soboá tsjáná, kó kjo̱a̱nkꞌakoo̱n boá xi tsꞌén nga ngiti̱ yandikónjínná.

⁴ Én xí chji̱a̱ xotaa̱, xikónií ndáfoa xi tjín nínga ꞌniú na̱nga̱a̱, ta̱nga kjo̱a̱kjínkoón, kuí boá xi xikoó ndáfoa xi jmíni̱xtjin fe.

⁵ ¡Ndajínkjiꞌi, nga kꞌuiyá nga jmíjéjiín, xota̱ xi ꞌniú ndajiín, ko̱jo nga chje̱ꞌéxiín kjo̱a̱nda xi tjiín xota̱ xi kixi̱i̱!

⁶ Kjiꞌanga chji̱a̱ xota̱ xi kitikjo̱a̱a̱, kjo̱a̱xti boá xi mongase, kó kjo̱a̱a̱ ni xi chji̱a̱ boá nga ka̱ma kjoánií.

⁷ Kjiꞌanga chji̱a̱ xota̱ xi kitikjo̱a̱a̱, ti̱kuíní yojoo̱ xi ndajín tjítsꞌeén, kó kjo̱a̱a̱ kui nii̱, ti̱kuíní yojoo̱ xi tsꞌénꞌbijñaá ngo chja̱ya̱.

⁸ ¡Xikó maá tsi ixi eén xota̱ xi see̱n ényaà, ta̱nga ngaskande ngi̱jin ini̱ma̱ná fóchó!

⁹ Xota̱ xi tsiꞌeé ko̱jo xota̱ xi tsꞌénkjátsón nii̱, ¡ngaskande xikó maá tsi ngo ntsꞌi̱e̱ ma xkjín!

¹⁰ Jaꞌeén Néná, kuí boá xi xikoó ngo tarié xi ꞌniú tikón, kó ki̱a̱ boá nínga fí manga manga xota̱ xi kixi̱i̱, nga mongase nga ko̱si̱ko̱jo.

¹¹ Xota̱ xi cho̱o̱n tsꞌénkjó nga kjo̱a̱cho̱o̱n, kuí boá xi xikoó ngo na̱xi̱ńdáꞌniú xí xó tjíchjáꞌyáni, nínga jmíjín xi ni xi ndajín ka̱ma sa̱ꞌínjo̱.

¹² Kjo̱a̱nkꞌakoo̱n tsꞌénchájáná, kó kjo̱a̱ni̱ma̱kjo̱a̱a̱ boá xi tsꞌén nga yandikónná.

¹³ Kjo̱a̱chi̱ni ko̱jo kjo̱a̱soboá boá, nga tjón ta̱xkiya ko̱ndókjo̱a̱ ngo ni ngindiee̱ nga ko̱nda̱ꞌyá.

¹⁴ Xota̱ xi oo̱n, kjo̱a̱ꞌniútakoón boá xi sa̱ꞌínkjastjíe̱n, ta̱nga xota̱ xi xkꞌién tsoꞌbaá, ꞌyá xí sa̱ꞌínkjastjíe̱n.

¹⁵ Xota̱ xi makjiín sakoó kjo̱a̱kjínkoón, kó xota̱ xi nda bosiénníjoón, tsie ngase ni xi ka̱makjiín.

¹⁶ Tsi ngo ni xi ndakjiꞌi ta̱ tiboeꞌé jí, ngayeje xotaa̱ nga tsja ka̱maa̱ nga sa̱ꞌínjo̱ꞌoo̱, ¡ngaskande xota̱ xi ꞌniú ndikoón, skjíxꞌaá nga̱ntjo̱a̱ ndiꞌaa̱!

¹⁷ Xota̱ xi tjón ꞌboxiéꞌá yojoo̱, kjanyá nga kuí boá xi jmíjéjiín tsó, ta̱nga nga fochó chistikoo̱, kuí boá xi tsꞌentsíjen nga bo̱a̱jín kjiꞌi ni xi katsó.

¹⁸ Kjo̱a̱xti xi ꞌniú niꞌín ngasee̱, chjiéngá ngi̱ya tsja Néná kꞌuijñá, kó kuí nii̱ xi ko̱síko̱jo xi ndyi̱tsꞌèndajin kui kjo̱a̱xtii̱.

¹⁹ Kui ntsꞌie xi ndajín kasasiee̱n ngo ni, tajá ngase má, ta̱bo̱a̱jiín xoó ngo na̱xi̱ńdáꞌniú, kjo̱a̱xtii̱ kja̱xín kja̱xín ꞌbijñáná, xikó maá nga̱ntjo̱a̱a̱ ngo ndo̱bo̱a̱xa̱á.

²⁰ Ni xi kjo̱tjoo̱ tsꞌoa xotaa̱, kuí boá ni xi sa̱ꞌíntsiee̱, sa̱ꞌíntsie cha̱n cha̱a̱n ni xi ku̱i̱chji̱a̱.

²¹ Najee̱n tjínrií ngaꞌniú tsi̱ꞌe̱ nga tsjá kjo̱a̱mindyioo̱n, ko̱jo tsi kjo̱a̱bo̱yaa̱, kó xota̱ xi tjó maá kui nii̱, ti̱kuíní xi sa̱ꞌínjo̱ yojoo̱.

²² Xi je kasakoo̱ chjo̱on xí tikónjo̱, jè ngo ni xi nda je kasakoo̱, ¡kó ja̱ jè kasakoo̱ kjo̱a̱ndaa̱ Néná!

²³ Xota̱ xi ni̱ma̱a̱, ata̱ ni̱ma̱ tsó nga chji̱a̱, ta̱nga xota̱ xi cho̱o̱n, achichí tajá chji̱a̱.

²⁴ Tjín amingo̱ xi jmí tsi amingo̱, kó ti̱ tjín amingo̱ xi ta̱bo̱a̱jiín tsi ngo ntsꞌié má.