Énkjínkón 17 - Xo̱jo̱n eén Néná

Jmíjín xi kjo̱chótji̱ngi chjií kjo̱a̱kjínkoón

¹ Chjí ngasenii̱ ndeta̱ nga ngo pan tajá xi̱ni̱e̱, ta̱nga nga kꞌuiéná kjo̱a̱xió, ta̱bo̱a̱jiín tsi tsie nichinie xi̱ni̱e̱ ngo ndiꞌa nínga tjín kjo̱a̱xti.

² Moso̱ xi xi̱ꞌinkjo̱a̱a̱ kuí boá xi ko̱tíxomaa̱ ndí xí chi̱nii̱ xi tsi̱ꞌe̱ xaá, kó kuí boá xi nijan sa̱ko̱ó ni xi tsoboaá ndí xí ngasee̱.

³ To̱nsinieé ko̱jo to̱ntiboaa̱, ndiꞌií boá xi chitꞌani tsi nda ko̱jo tsi ndajín, ta̱nga ñá, Néná boá xi kotꞌa ini̱ma̱ná.

⁴ Xota̱ xi ndajiín tsꞌensíjin ni xi chji̱a̱ xota̱ xi ndajiín, kó xota̱ xi ndisoo̱ tsꞌensíjin ni xi chji̱a̱ xota̱ xi ndisoo̱.

⁵ Xota̱ xi mojnókie xota̱ ni̱ma̱a̱, Néná boá xi tsꞌénkjánjo̱, kó xota̱ xi tsja maa̱ kjo̱a̱a̱ ni ndajín xi kjimaa̱, ka̱majérií.

⁶ Ndíndeé boá xi tsjaá kjo̱a̱tsja xota̱ xi xchaá kó xikoó tsi ngo korona̱ xi ꞌbíꞌá to̱ko̱ ka̱maa̱, kó xi xchaá boá xi tsjaá kjo̱a̱tsja ndií.

⁷ Achichí chꞌo tsꞌén ya nga ngo xota̱ xi kitikjo̱a̱a̱ ndikóntsꞌèn ku̱i̱chji̱a̱, ti̱ bo̱a̱ má ti̱ kjiꞌi nga ngo xota̱ xi botixómaá ngo éndísó ku̱i̱chji̱a̱ nga.

⁸ Xikó maá ngo ndi̱jo̱ tsjakjiꞌi maa̱, xota̱ xi tsjá ngo to̱n tsi̱ꞌe̱ nga ngo kjo̱a̱nda si̱ꞌaa̱n, sꞌijin maá nga xikoó tsi ta̱tra ma ni xi tsꞌén, ngatꞌa̱ ngatsjéni̱xtjin nga fotjosón ni xi mejeén tsꞌén.

⁹ Xota̱ xi tsꞌénjétakoón, kuí boá xi mongase nga nda ko̱a̱ꞌa xotaa̱, ta̱nga kui xi tsꞌénjétakónjiín, tsꞌénkjii̱n yojoo̱ xota̱ xi nda yaꞌaa̱.

¹⁰ Nda ngase sa̱ꞌiín nga si̱ꞌanxchánjo̱ ngo xota̱ xi kjínkón, ta̱bo̱a̱jiín tsi úchán ńꞌniú kjo̱a̱a̱, xota̱ xi kitikjo̱a̱a̱.

¹¹ Xota̱ xi kitikjo̱a̱a̱, ngatsjéni̱xtjin nga ni xi ndajiín xi mongase, ta̱nga ti̱chaa̱n kjo̱chó ngo ni̱xtjin nga skjánjo̱ ngo kondra̱ xi ta̱nisién ꞌniú ndajín.

¹² Ta̱sá nda ngase nga ngo cho̱ꞌoso̱ chjo̱on xí kachjeꞌéxiín ndií ku̱i̱xkánjo̱, ta̱bo̱a̱jiín tsi ngo xota̱ kitikjo̱a̱ xi mején kjo̱a̱ꞌniuú nga sa̱ꞌín ngo ni.

¹³ Xota̱ xi ndajíntsꞌèn ꞌbíchjí kjo̱a̱a̱ ngo ni nda xi kiniꞌaán, ngatsjéni̱xtjin nga ndajíntsꞌèn kꞌuijñá ndiꞌaa̱.

¹⁴ Xota̱ xi ꞌbítsi̱yanii̱ ngo kjo̱a̱xcha̱án, xikó maá tsi tsꞌaxiéni ndi̱ya̱à ngo ndejèꞌ xi tsꞌénmonga xchán, ta̱sá ndatsi si̱ꞌinkjìn yojòo̱ ta̱bo̱a̱jiín tsi ku̱i̱ꞌítsꞌi̱yanii̱ nga bo̱a̱ ka̱ma.

¹⁵ Jó má ni xi achichí chꞌoó Néná: nga si̱ꞌanjetakoón ngo xota̱ xi tjiín jé, ko̱jo nga kꞌuítꞌajé ngo xota̱ xi kixi̱i̱.

¹⁶ Kótsꞌèn ka̱maa̱ kꞌo̱tsieni kjo̱a̱kjínkón xota̱ xi kitikjo̱a̱a̱, xi ndatsi tjiín to̱n, ta̱nga jmí ni makjínjiín.

¹⁷ Ngatsjéni̱xtjin ti̱ꞌintjé ji amingoo̱, ngatꞌa̱ kuí boá xi xikoó tsi ngo ntsꞌie ka̱maa̱, kjiꞌanga kji̱ndi̱bá ni̱xtjin nga nda̱ ka̱maa̱.

¹⁸ Xota̱ xi tsꞌénkjójín ni xi tsꞌén, kuí boá xi tsangi yojoo̱ kjo̱a̱a̱ kje̱ꞌe xota̱, kó kuí boá xi ꞌbíchjí ni xi míꞌangi amingoo̱.

¹⁹ Xota̱ xi tsja maa̱ nga kján, ja̱ ti̱ tsjá maá nga tsꞌénjé, xota̱ xi senkjo̱a̱a̱, ti̱kuíní xi tsꞌénchájá soboá yojoo̱.

²⁰ Xota̱ xi ni xi ndajín tjíjin ini̱ma̱a̱, jmíni̱xtjin ni xi nda sa̱ko̱ó, kó xota̱ xi ndisoo̱, ni xi ndajín ka̱maa̱.

²¹ ¡Achichí ndasen kjiꞌi tsi ngo ndí xí kitikjo̱a̱ kꞌuiéná! Kó ti̱ tsjajín ka̱máná tsí ngo ndí xí chi̱ni kꞌuiéná.

²² Ini̱ma̱ xi tsjatjiín, xikónií tsi kui xi ngo ndiki xi nda, ta̱nga a̱siénni̱xtjin xi ndasen tikoón, kuí boá xi tsꞌénꞌoón ngayeje yojoo̱.

²³ Xota̱ xi ꞌniú ndajiín tsꞌénjóꞌo to̱n xi machjíꞌmaá, kó kui to̱o̱n xi tsꞌénkjién nga ꞌbotsieni xota̱ xi botíjeé.

²⁴ Xota̱ xi tjiín kjo̱a̱kjíntakoón, bi̱ má ya kje̱n nga kjínkón, ta̱nga xota̱ xi kitikjo̱a̱a̱, ndeta̱ yàjín ñá xtji̱e̱e̱n tsꞌénkotsijen.

²⁵ Ndí xi kitikjo̱a̱a̱, kjo̱a̱xti tsjaá na̱ꞌmii̱, kó achichí kjo̱a̱ndasen tsjaá na̱aa̱n.

²⁶ Ndajínkjiꞌi nga si̱ꞌanjeé xota̱ xi jmíjéjiín, ti̱nde ndajínkjiꞌi tsi kjoaá xota̱ xi kixi̱i̱.

²⁷ Xota̱ xi kjínkoón ta̱xkiya chji̱a̱jín, kó xi tsꞌénkjó ni xi tsꞌeén, kuí boá xi tjiín kjo̱a̱kjíntakón.

²⁸ Ngaskande xota̱ xi kitikjo̱a̱a̱ xota̱ kjínkón niꞌán kjiꞌanga chji̱a̱jín, kó kjiꞌanga bókjo tsꞌoaa̱, xota̱ xi tjiín kjo̱a̱kjíntakón boá.