Énkjínkón 16 - Xo̱jo̱n eén Néná

Ni xi ꞌbínda xotaa̱, ni xi tsó Néná

¹ Ngi̱jin ini̱ma̱a̱ xotaa̱ ndibánií nga ꞌbínda ngo ni, ta̱nga Néná boá xi bo̱a̱ ka̱tso̱ tsi kjo̱tjosón ko̱jo tsi jmí.

² Sꞌijinrií nga tsjie ngayeje ni xi tsꞌén xotaa̱, ta̱nga Néná boá xi kotꞌa ni xi mejeén sa̱ꞌín.

³ Ngi̱ya tsja Néná tꞌíjñí ji ngayeje ni xi si̱ꞌin, kó ngayeje ni xi je tjíjin takín, kjo̱tjosón.

⁴ Tjín ngo kjo̱a̱ nga Néná katsꞌénda ngayeje nii̱, ¡kó ngaskande xota̱ xi ꞌniú ndajiín, kamánda tsi̱ꞌe̱ ni̱xtjin nga ka̱majeé!

⁵ Achichí chꞌoó Néná xota̱ xi kjo̱a̱nkꞌakon tjíjin ini̱ma̱a̱, kó ja̱koxi̱ boá nga ko̱ti̱je̱é.

⁶ Kjo̱a̱ni̱ma̱takón ko̱jo kjo̱a̱kixi̱ boá xi niꞌánjetakónni ngo jé, kó kjiꞌanga yandikón Néná, kuí nii̱ xi tsꞌén nga niꞌánkjìi̱n yojoná ni xi ndajiín.

⁷ Kjiꞌanga Néná tsjá maá kjo̱a̱a̱ xikótsꞌèn síndo xotaa̱, ngaskande ko̱jo xota̱ xi kondra̱a̱, nijan ꞌbeé kjo̱a̱xió.

⁸ Ndakjiꞌi ngase nga chiboa ni tjínná, ta̱nga nga kixi̱ tsꞌén kasakoná, ta̱bo̱a̱jiín nga ka̱macho̱n, kó nga kixi̱jín tsꞌén kasakoná kuí nii̱.

⁹ Ngi̱jin ini̱ma̱a̱ xotaa̱ ndibánií nga ꞌbínda xikótsꞌèn kꞌuíndo, ta̱nga Néná boá xi ko̱ko̱ó ndi̱yà xí mejeén kui.

¹⁰ Ni xi chji̱a̱ nda̱ ree̱ ni xi ja̱koxi̱ boá, kuíni nga chjiéngá kixi̱ ka̱ma kjiꞌanga ku̱i̱ꞌítꞌajé ngo xota̱.

¹¹ Ni xi kixi̱ tsꞌén chꞌíchi̱bo̱a̱joni nii̱, tsi̱ꞌe̱ Néná boá, ngatꞌa̱ kuí boá xi katsꞌénda ngayeje ni xi chꞌíchi̱bo̱a̱jo nii̱.

¹² Achichí chꞌo maá ree̱ kjo̱a̱a̱ xota̱ xi tsꞌén ni xi ꞌniú ndajiín, ngatꞌa̱ kjiꞌanga kixi̱ tsꞌén niꞌánseén xotaa̱, kuí nii̱ xi tsjangaꞌniuú xaá.

¹³ Achichí tsꞌéntjó ko̱jo tsja maa̱ já ree̱, xota̱ xi ni xi kixi̱ chji̱a̱a̱.

¹⁴ Kjiꞌanga tsꞌénxchán ree̱, ka̱marií tjín xí sa̱ꞌínkꞌién, ta̱nga xota̱ xi kjínkoón, kuí boá xi ka̱maa̱ sa̱ꞌínkꞌíxió kui nii̱.

¹⁵ Kjiꞌanga tsjatsꞌèn tikón kje̱n nda̱ ree̱, kuí nii̱ xi bokó kjo̱a̱mindyioo̱n, kó kjo̱a̱bosíko̱joo̱ xikónií tsi ngo stsé nda xí sájín tsaꞌá ka̱ma.

¹⁶ Nda ngase nga kꞌuiéná kjo̱a̱kjínkón, ta̱bo̱a̱jiín to̱nsinié xi ndaa̱, ko̱jo nda ngase nga kꞌuiéná kjo̱a̱kjíntakón, ngatꞌa̱ chjí ngasenii̱ ta̱bo̱a̱jiín to̱ntiboaa̱.

¹⁷ Xota̱ xi kixi̱i̱, ꞌbijñámasien ni xi ndajiín, kó xi koo̱n ni xi tsꞌén, kjo̱a̱mindyioo̱n boá xi tsꞌénkoón.

¹⁸ Tsꞌenkjiéná kjo̱a̱ kjo̱a̱nkꞌakoo̱n, kó kjiꞌanga je máná yojoná, tsꞌénchájáná kuí nii̱.

¹⁹ Chjí ngasenii̱ nga ni̱ma̱kjo̱a̱ ka̱má ngi̱jii̱n xota̱ xi ni̱ma̱kjo̱a̱a̱, ta̱bo̱a̱jiín nga nijan ka̱macho̱njo xota̱ xi nkꞌakoo̱n.

²⁰ Xota̱ xi ndatsꞌèn tsꞌenseén ngo kjo̱a̱ xi boeꞌeé, tjoninkꞌaa̱ yojoo̱, ¡Achichíra̱tsjaa̱ xota̱ xi Néná kjimaꞌniátakón!

²¹ Xota̱ xi tjiín kjo̱a̱kjínkón ngi̱jin ini̱ma̱a̱ nga tsꞌénkjó ngo ni, kuí boá xi xota̱ kjínkón ꞌmií, kó kjiꞌanga ixi tsꞌén chji̱a̱ ngo xota̱, nda ngase tsꞌénꞌíndatakón.

²² Xota̱ xi tjón tsꞌénkjó ngindiee̱ nga sa̱ꞌín ngo ni, kuí xi̱ꞌba̱ xi achichí nó ka̱maa̱ nga kꞌuijñá, ta̱nga kjo̱a̱kitikjo̱a̱ boá nga si̱ꞌanchji̱ni̱e̱ xota̱ xi kitikjo̱a̱a̱.

²³ Xota̱ xi tjiín kjo̱a̱kjínkón ngi̱jin ini̱ma̱a̱ achichí nda tsꞌénkjó ni xi chji̱a̱, kó én xí chji̱a̱ tsꞌoa nda ngase tsꞌénꞌíndatakón.

²⁴ Én tsjatsó xi ndaa̱, xikónií ntsjieén, kuí boá xi nda tsꞌeén kjo̱a̱mindyioo̱n, ko̱jo xi tsꞌendáyà yojoo̱.

²⁵ Tjín ndi̱yà xí achichí kixi̱ maa̱ xotaa̱, ta̱nga nga fetꞌani, ndi̱ya̱à kjo̱a̱bo̱yaa̱ boá.

²⁶ Xota̱ xi tsꞌénxaá, tsꞌénxá ngatꞌa̱ mejeén nga sa̱ꞌínkꞌíxió bojó ko̱jo xíndaá, kó kuí nii̱ xi tsꞌén nga ꞌniú ngase tsꞌénxá.

²⁷ Xota̱ xi ꞌniú ndajiín, kuí boá xi mongase ngase ni xi ndajín, kó én xí chji̱a̱ tsꞌénchjánná, xikó maá ndiꞌií.

²⁸ Xota̱ xi ꞌniú ndajiín kjo̱a̱xchán ꞌboxié, kó xota̱ xi ndisoo̱ bokjangá xota̱ xi nda ngase ndyi̱yaꞌa xkjín.

²⁹ Xota̱ xi tamaá ꞌboṉcha̱jo xota̱ xkjín, kó ki̱a̱ nijan fíjo̱ ndi̱yà xí ndajiín,

³⁰ ꞌbíchjá ndyi̱ko̱n, nga tsꞌénkjó nga ni xi ꞌniú ndajín mejeén sa̱ꞌín, kó ꞌbindyióꞌniú má tsꞌoa nga je katsꞌén ni xi ndajín.

³¹ Tsja̱kichjií xota̱ xi je xchaá, xikó maá tsi ngo korona̱ ma kjo̱a̱a̱ nga kixi̱ tsꞌén tikón.

³² Chjí ngasenii̱ kjo̱a̱chiyákjo̱a̱a̱, ta̱bo̱a̱jiín kjo̱a̱chꞌokoo̱n, chjí ngasenii̱ nga ñá kotixomáa̱ yojoná, ta̱bo̱a̱jiín nga ngo na̱xi̱ńdáꞌniú ko̱ti̱xomáa̱.

³³ Xotaa̱ boá xi tsꞌén ngo kjo̱a̱chꞌáṉcha̱, ta̱nga Néná boá xi bo̱a̱ ka̱tso̱ tsi kjo̱tjosón ko̱jo tsi jmí.