Énkjínkón 14 - Xo̱jo̱n eén Néná

Tsi nda si̱ꞌankjó, nda kꞌuijñá yojoná

¹ Xota̱chjo̱on xí kjínkoón, tsjangaꞌniú ngasee̱ xota̱ ndiꞌaa̱, ta̱nga xota̱chjo̱on xi kitikjo̱a̱a̱ kuí boá xi tsꞌénkjátsón.

² Xota̱ xi kixi̱ tjimaá, bendikón Néná, ta̱nga xi ndajín ndi̱yà xí tjimaá, tsꞌenchꞌó.

³ Xota̱ xi kitikjo̱a̱a̱ ta̱soboá kjo̱a̱a̱ kjo̱a̱nkꞌakon boá xi chji̱a̱, ta̱nga xota̱ xi kjínkoón, ni xi chji̱a̱ boá xi skónnií yojoo̱.

⁴ Tsi jmíjín cho̱yojo xi̱ꞌin xi tsꞌénxá, ngi̱ndie nínga xindyiá ni xi maxchaá, sꞌijña kjiꞌitiya, ta̱nga ta̱ngatꞌanii̱ ngaꞌniú xí tjiín cho̱yojo xi̱ꞌii̱n, nga tsie nichinie sakó.

⁵ Chistiko̱ xi kixi̱i̱, ni xi ja̱koxi̱ boá xi chji̱a̱, ta̱nga chistiko̱ xi ndisoo̱, ni xi ndiso boá xi chji̱a̱.

⁶ Xota̱ xi mojnókiee̱ mejeén nga kjínkón ka̱ma, ta̱nga jmíni̱xtjin nga xota̱ kjínkón ka̱ma, ta̱nga xota̱ xi makjiín nii̱, nde niꞌínjín ka̱maa̱ nga kjínkón ka̱ma.

⁷ Ti̱ꞌinkjìi̱n yojòo̱ xota̱ xi kitikjo̱a̱a̱, ngatꞌa̱ kui xotaa̱ ngojín kjo̱a̱kjíntakón ku̱i̱chji̱a̱joo.

⁸ Xota̱ xi kjínkoón ko̱jo xi xi̱ꞌinkjo̱a̱a̱, jè be ndi̱yà nínga fí, ta̱nga xota̱ xi kitikjo̱a̱a̱, ti̱kuíní kjo̱a̱kitikjo̱a̱a̱ xi ꞌboṉcha̱jo.

⁹ Xota̱ xi kitikjo̱a̱a̱ mojnókie jeé, ta̱nga xota̱ xi kixi̱i̱ mejeén nga nda sa̱ꞌín.

¹⁰ Ini̱ma̱a̱ boá xi be ni xi tsꞌénxtií, kó nde ngojín xota̱ xi nijan tsja ka̱maa̱ kjo̱a̱tsjaa̱.

¹¹ Ndiꞌaa̱ xota̱ xi ꞌniú ndajiín, xcha̱ja, ta̱nga ndiꞌaa̱ xota̱ xi ndaa̱, xtjonínkꞌá.

¹² Tjín ndi̱yà xí achichí kixi̱ maa̱ xotaa̱, ta̱nga nga fetꞌani, ndi̱ya̱à kjo̱a̱bo̱yaa̱ boá.

¹³ Tjín ni̱xtjin nga ndatsi ndyi̱mojnó, kó on maa̱ ini̱ma̱ná, kó ti̱ tjín kjo̱a̱tsja xi kjo̱a̱ndasen ma nga fetꞌani.

¹⁴ Xota̱ xi kitikjo̱a̱a̱ ngaskande ꞌbojón maá ndi̱yà xí tjimá, ta̱nga xota̱ xi ndaa̱, achichí tsjá ka̱maa̱ kjo̱a̱a̱ ni nda xi tsꞌén.

¹⁵ Xota̱ xi chi̱nii̱ ngayeje ni xi ntꞌié xí sꞌijii̱n, ta̱nga xota̱ xi xi̱ꞌinkjo̱a̱a̱ nda kotsijee̱n nínga fotsoꞌbá.

¹⁶ Xota̱ xi kjínkoón tsakjón má ni xi ndajiín, kó ꞌbijñámasien, ta̱nga xota̱ xi kitikjo̱a̱a̱ nkꞌa ꞌboxié yojoo̱, kó jmí ni ndasénjiín.

¹⁷ Xota̱ xi xtindaa̱, ta̱xkiya tsꞌén ngo kjo̱a̱tsobé, kó xota̱ xi ꞌniú ndajiín, niꞌánchꞌó.

¹⁸ Xota̱ xi jmí ndasénjiín, kjo̱a̱kitikjo̱a̱ boá xi sa̱ko̱ó, ta̱nga xota̱ xi xi̱ꞌinkjo̱a̱a̱, kjo̱a̱kjínkón boá xi sa̱ko̱ó.

¹⁹ Xota̱ xi ndajiín ni̱ma̱kjo̱a̱ ku̱i̱ꞌíndo yojoo̱ ngindyi̱ko̱n xota̱ xi ndaa̱, kó xota̱ xi ꞌniú ndajiín ni̱ma̱ ka̱tso̱ ngindyi̱ko̱n xota̱ xi kixi̱i̱.

²⁰ Xota̱ xi ni̱ma̱a̱, ngaskande xota̱ xi nda yaꞌaa̱ xi chꞌo maa̱, ta̱nga xota̱ xi cho̱o̱n, achichí má xota̱ xi tsꞌéntjó.

²¹ Tjítsꞌénjé boá xota̱ xi ni̱ma̱kjo̱a̱ tsꞌénjo̱ xota̱ xi ngasee̱, ta̱nga achichíra̱tsjaa̱ xota̱ xi ni̱ma̱ maa̱ xota̱ xi ni̱ma̱a̱.

²² Xota̱ xi tsꞌénkjó nga ni xi ndajín sa̱ꞌín, tsꞌénchájá ndi̱ya̱à, ta̱nga xota̱ xi mongase nga ni xi ndaa̱ sa̱ꞌín, sakoó kjo̱a̱tjó ko̱jo kjo̱a̱kixi̱.

²³ Chjírií ngayeje xá xí niꞌán, ta̱nga kui xi achichí tsie chji̱a̱a̱, ta̱ kjo̱a̱ni̱ma̱ tsí xi sa̱ko̱ó.

²⁴ Xota̱ xi kjínkoón, kjo̱a̱kjínkoón boá xi kjo̱a̱cho̱o̱n, ta̱nga xota̱ xi kitikjo̱a̱a̱, kjo̱a̱kitikjo̱a̱a̱ boá xi kjo̱a̱cho̱o̱n.

²⁵ Chistiko̱ xi ni xi ja̱koxi̱ chji̱a̱a̱, kuí boá xi ꞌboxiéꞌá xotaa̱, ta̱nga chistiko̱ ndisoo̱, ni ndiso boá xi chji̱a̱.

²⁶ Tsi xcha̱ndikón Néná, kjiꞌá boá nga ꞌniú ka̱maꞌniátakón, kó ndíná kꞌuieé kjo̱a̱chiyá.

²⁷ Tsi xcha̱ndikón Néná, xikónií tsi ki̱a̱ tjitjó kjo̱a̱mindyioo̱n, kó kui nii̱ xi kꞌo̱xiéꞌaá ngi̱ya tsja kjo̱a̱bo̱yaa̱.

²⁸ Achichí tsjá maá nda̱ ree̱ kjiꞌanga kjín má xota̱ xi botixómaá, kó kjiꞌanga kjínjín má xota̱ xi botixómaá, achichí inda má.

²⁹ Xota̱ xi kjínkón boá kui xi achichí tsiekoo̱n, ta̱nga xota̱ kitikjo̱a̱ boá kui xi tsiejínkoón.

³⁰ Ngo ini̱ma̱ xi tjiín kjo̱a̱xió, kuí boá xi tsjaá kjo̱a̱mindyion yojoo̱, ta̱nga kjo̱a̱ꞌontakoón, kuí boá xi tsꞌenkjié ngaskande ńdaa̱.

³¹ Kui xi ꞌniútsꞌeén xota̱ ni̱ma̱a̱, Néná boá xi tsꞌénkjánjo̱, ta̱nga kui xi ni̱ma̱ maa̱ xota̱ ni̱ma̱a̱, tsꞌénbendikón Néná.

³² Xota̱ xi ꞌniú ndajiín, ti̱kuíní ni xi ndajiín xi tsꞌénchájá, ta̱nga xota̱ xi kixi̱i̱, kjo̱a̱kixi̱i̱ xí koo̱n ngaskande nga ko̱yà.

³³ Ngi̱jin ini̱ma̱a̱ xota̱ xi nda tsꞌénkjó ni xi tsꞌén, tjiín kjo̱a̱kjínkón, ta̱nga yajín kui nii̱, ngi̱jii̱n xota̱ xi kitikjo̱a̱a̱.

³⁴ Kjo̱a̱kixi̱i̱ boá xi nkꞌa ꞌbijñá ngo na̱xi̱ńdá, ta̱nga jeé boá xi tsjaá kjo̱a̱soboá.

³⁵ Nda̱ xi kjínkón xi bosikójo nda̱ ree̱, kuí boá xi tsjaá kjo̱a̱nda ree̱, ta̱nga kui nda̱ xi tsjaá kjo̱a̱soboá, kuí boá xi tsꞌén nga tsꞌénxchán nda̱ ree̱.