Énkjínkón 13 - Xo̱jo̱n eén Néná

Ni nda xi sakoó xota̱ xi ndaxotaa̱, ko̱jo kjo̱a̱botíjé xí sakoó xota̱ xi ndajiín

¹ Ndí xí kjínkoón, tsꞌénjóꞌo kjo̱a̱botíxomaa̱ na̱ꞌmii̱, ta̱nga ndí xí mojnókiee̱, ntꞌiéjiín nga tjín xí sa̱ꞌínxchánjo̱.

² Ni xi chji̱a̱ xotaa̱ boá xi nda sa̱ꞌíntsienii̱, ta̱nga xota̱ xi botiñáná, ni xi ndajín boá xi sa̱ko̱ó.

³ Xota̱ xi koo̱n ni xi chji̱a̱, ti̱kuíní yojoo̱ xi tsꞌénkoón, ta̱nga kui xi ta̱xkiya chji̱a̱a̱, ti̱kuíní yojoo̱ xi sa̱ꞌínchaja.

⁴ Xota̱ xi tsiꞌeé achichí ni xi ma mejeén, kó nde jmí ni sakójiín, ¡ta̱nga xota̱ ꞌniú tsꞌénxaá, kuí xí tjoninkꞌaa̱ yojoo̱!

⁵ Xota̱ xi kixi̱i̱ chꞌórií kjo̱a̱ndisoo̱, kó xota̱ xi ꞌniú ndajiín, kuí boá xi niꞌánchꞌó ko̱jo xi yandikónjín.

⁶ Kjo̱a̱kixi̱i̱ boá xi koo̱n xota̱ xi kixi̱i̱, ta̱nga ni xi ndajiín boá tsꞌénkjátsón xota̱jeé.

⁷ Tjín xota̱ xi xota̱ cho̱n tsoó yojoo̱, ta̱nga nde ta̱jmìjín ni xi tjiín, kó kje̱ꞌe xí xota̱ ni̱ma̱ ꞌboxié yojoo̱, kó ngayeje nii̱ xi tjiín.

⁸ Xota̱ xi cho̱o̱n to̱o̱n xí ka̱ma ku̱i̱ꞌíchjítjéni yojoo̱ tsi tjín xí ku̱i̱ꞌíjñaꞌniú, ta̱nga xota̱ ni̱ma̱a̱, nde jmíjín xi mindyiandíkoón.

⁹ Kjo̱a̱mindyioo̱n xota̱ xi kixi̱i̱, xikónií ngo ndiꞌí xí tsjá tsꞌén tí, ta̱nga kjo̱a̱mindyioo̱n xota̱ xi ꞌniú ndajiín, xikónií ngo ndiꞌí xí kꞌo̱.

¹⁰ Kjo̱a̱nkꞌakoo̱n ta̱ kjo̱a̱xti tsí xi ꞌboxié, kó xota̱ xi ni̱ma̱kjo̱a̱a̱ boá xi tjiín kjo̱a̱kjínkón.

¹¹ Kjo̱a̱cho̱n xi ndajín tsꞌén kasakoo̱, achichí tsá fe, ta̱nga xota̱ xi tsꞌénxaá, ma tsie ngase kjo̱a̱cho̱o̱n.

¹² ¡Ni xi chiyaá kó fotjosónjín, kjo̱a̱ndasen tsjaá ini̱ma̱ná! ¡Ta̱nga xikónií tsi ngo yaá kjo̱a̱mindyion ma, kjiꞌanga fotjosón ni xi mejénná si̱ꞌán!

¹³ Kui xi sa̱ꞌínsénjiín ngo kjo̱a̱ xi ko̱e̱ꞌeé, achichí chjí ku̱i̱ꞌíchjí, ta̱nga kui xi sa̱ꞌínkjatjosoón, ngo kjo̱a̱nda sa̱ko̱ó.

¹⁴ Ni xi bokoyá xota̱ xi kjínkoón, xikónií tsi ki̱a̱ tjitjó kjo̱a̱mindyioo̱n, kó kui nii̱ xi kꞌo̱xiéꞌaá ngi̱ya tsja kjo̱a̱bo̱yaa̱.

¹⁵ Xota̱ xi tsjá ngo kjo̱a̱botíxoma xi nda, niꞌántjó, ta̱nga xota̱ xi kixi̱jiín, tsꞌénchájá soboá yojoo̱.

¹⁶ Xota̱ xi nda tsꞌénkjó ni xi tsꞌén, xota̱ xi kjínkón boá, ta̱nga xota̱ xi kitikjo̱a̱a̱ bokó kjo̱a̱chi̱nii̱.

¹⁷ Chji̱ni̱e̱ꞌén xí ndajiín, ni xi ndajiín foeꞌejo̱, ta̱nga chji̱ni̱e̱ꞌén xí kixi̱i̱, kuí boá xi foeꞌejo̱ná ni xi ndatsꞌénná.

¹⁸ Kjo̱a̱ni̱ma̱ ko̱jo kjo̱a̱soboá kꞌuieé xota̱ xi tsꞌenchꞌó kjo̱a̱botíxomaa̱, ta̱nga si̱ꞌandikón boá kui xi jo̱ꞌo maá nga niꞌánchji̱ni̱e̱e̱.

¹⁹ ¡Achichí tsjá máná kjiꞌanga fotjosón ni xi mejénná nga ka̱ma! ¡Ta̱nga xota̱ xi kitikjo̱a̱a̱, achichí chꞌo maá nga kjo̱ta̱xíntꞌaa̱ ni xi ndajiín!

²⁰ Xota̱ xi ki̱a̱ tsꞌénkámajo̱ xota̱ xi kjínkoón, kjínkón ka̱ma, ta̱nga xota̱ xi ki̱a̱ tsꞌénkámajo̱ xota̱ xi kitikjo̱a̱a̱, ndajín ka̱maa̱.

²¹ Ni xi ndajiín boá xi maa̱ xota̱jeé, ta̱nga xota̱ xi kixi̱i̱ ni xi nda boá xi sa̱ko̱ó.

²² Xota̱ xi ndaxotaa̱ ꞌbijñaá ni ndíndeé, ta̱nga kjo̱a̱cho̱o̱n xota̱jeé, xota̱ xi kixi̱i̱ boá xi sa̱ko̱ó.

²³ Ngi̱jin kꞌijñaá xota̱ ni̱ma̱a̱, achichí nichinie ꞌbeé, ta̱nga chaja kuí nii̱ kjiꞌanga kixi̱jín niꞌánseén xotaa̱.

²⁴ Xi tsꞌénchjíni̱e̱jín ndií, kjo̱a̱a̱ nga chꞌórií, ta̱nga xi tjoó ndií, xotí tsꞌénchjíni̱e̱.

²⁵ Xota̱ xi kixi̱i̱ kjinie nichinie ngaskande nga nda tsiee̱, ta̱nga xota̱ xi ꞌniú ndajiín jmíni̱xtjin tsiee̱.