Énkjínkón 1 - Xo̱jo̱n eén Néná

Kjo̱a̱a̱ nga kamánda kui énkjínkoón

¹ Énkjínkón xi katsꞌénda Salomoo̱, nda̱ ree̱ nangi Israee̱l, kui xi ndií Ndabii̱ kamá.

² Kui énkjínkoón kuí xá kamándani, tsi̱ꞌe̱ nga xota̱ xi kjínkón ka̱majnú, ko̱jo nga ka̱ma chji̱ni̱e̱jnú, ko̱jo tsi̱ꞌe̱ nga xcha̱jnú én xí tjiín kjo̱a̱kjíntakón,

³ ko̱jo tsi̱ꞌe̱ nga ko̱nda̱ꞌyájnú kjo̱a̱botíxoma kjo̱a̱a̱ xikótsꞌèn nga nda si̱ꞌankjójnú ni xi si̱ꞌánjnú, ko̱jo kjo̱a̱a̱ nga kixi̱, nga na̱xo̱, ko̱jo nga ndse̱je̱n ka̱majnú.

⁴ Kó ti̱ machjién kuí eén tsi̱ꞌe̱ nga xi̱ꞌinkjo̱a̱ ka̱ma xota̱ xi kji̱e̱ ꞌniújín maá ni xi bokoyá kjo̱a̱mindyioo̱n, ko̱jo tsi̱ꞌe̱ nga jákjíndí xí xo̱ngo̱ò kꞌuieé kjo̱a̱kjíntakón, ko̱jo nga nda sa̱ꞌínkjó ni xi sa̱ꞌín.

⁵ Jún, xota̱ xi chji̱ni̱e̱ ko̱jo xi kjínkónjnú, tasiénijónjnú, kó bo̱a̱ tsꞌén nga chji̱ni̱e̱ ngase ka̱majnú, ko̱jo ꞌniú ngase xcha̱jnú ni xi bokoyá kjo̱a̱mindyioo̱n.

⁶ Bo̱a̱ tsꞌén nga ka̱ma ka̱makjínjnú mí nii̱ bo̱a̱ xi énkjínkoón, mí nii̱ bo̱a̱ xi ngo chi̱bo̱a̱, ko̱jo mí nii̱ bo̱a̱ xi ngo én xi tjiín ngo ni xi tjiꞌmá.

⁷ Ngayeje xota̱ xi mejeén nga xota̱ xi kjínkón ka̱ma, tjón mára ngatamabendikón Néná. Ngatꞌa̱ xota̱ xi kitikjo̱a̱a̱, mejénjiín nga si̱ꞌanchji̱ni̱e̱, ti̱nde mejénjiín nga xota̱ xi kjínkón ka̱ma.

Kjo̱a̱botíxomaa̱ kondra̱ tsi̱ꞌe̱ amingo̱ xi jmí ni chjíjiín

⁸ Ji ndí, tasínijìi̱n nga sa̱ꞌínchji̱ni̱e̱e̱ na̱ꞌmíi̱, kó ngata̱ niꞌínchꞌíjín ji ni xi ko̱kóyaá na̱áa̱n.

⁹ Ngatꞌa̱ kjo̱a̱bokoyaá xi xcháa̱, kuí boá xi xikónii̱ tsi ngo niꞌbíꞌátoko ka̱maa̱, ko̱jo tsi xikoó ngo ni xi jmeyá kjásen ji ka̱maa̱.

¹⁰ Ji ndí, tsi xota̱ xi ndyi̱tsꞌènjeé mejeén ku̱i̱ꞌíndisojoo̱, ngata̱ boeꞌéndièjín ji nga sa̱ꞌínꞌindatakín.

¹¹ Tsi bi̱ ka̱tso̱o̱: «Ja̱bíꞌi̱n kꞌi̱e̱ ti̱ꞌinkamaje̱jne̱, ku̱i̱ndyionꞌmá kó xchiyá nga tjín xí kjo̱a̱ꞌa tsi̱ꞌe̱ nga si̱ꞌankꞌién, xchindà xotaa̱, ndatsi jmí kjo̱a̱jín nga bo̱a̱ si̱ꞌán.

¹² Xi̱ni̱e̱ tikón, xikoó ngo nga̱tsjo̱ó xí kjinie xotaa̱ xi je jesoón, si̱ꞌankjie ndo̱jò ndójo̱, xikoó xi bixó ki̱a̱ ti̱xa̱na̱nga̱a̱ kjo̱a̱bo̱yaa̱.

¹³ Kó ngayeje to̱ko̱ya kjo̱a̱cho̱n xi sa̱kóná, kꞌuikítsie má ñá ndiꞌaná, kuí ni chejeé.

¹⁴ ¡Ti̱ꞌinkamaje̱jne̱ ji̱n, ja̱nga, kó ngayeje ni xi si̱ꞌán, ndse̱je̱n tsꞌén si̱ꞌankabisóo̱n xingi̱!»

¹⁵ ¡Ta̱nga, ji ndí, ngata̱ ki̱a̱jín niꞌínkamaje̱ ji! ¡Ti̱ꞌinkjìi̱n yojòo̱ kui ndi̱ya̱à!

¹⁶ ¡Ngatꞌa̱ monga má nga fí tsꞌén ni xi ndajín, kó achichí je tsaá nga mejeén nga xota̱ sa̱ꞌínkꞌién!

¹⁷ Nde ngojín ni̱sie xi kjo̱ya, tsi be nga chja̱ya̱ tjíꞌbíjñaá.

¹⁸ Ta̱nga kui xota̱ xi ndyi̱tsꞌèn jeé ti̱kuíní bo̱a̱ xi ndyi̱tsꞌèntsóbejo̱ kjo̱a̱mindyioo̱n, kó ti̱kuíní bo̱a̱ xi sa̱ꞌínchaja.

¹⁹ Nga fetꞌani, bo̱a̱ kjiꞌi ni xi maa̱ xota̱ xi xki̱ꞌáto̱o̱n, kui xi ta̱ngatꞌanii̱ kui nii̱ nga fesón.

Kjo̱a̱kjínkoón chji̱a̱a̱ jáxóngo̱ó

²⁰ Kjo̱a̱kjínkoón tsꞌénkjandayá ngi̱ya ndi̱yàtié ko̱jo ndi̱tse̱e̱n.

²¹ Ki̱a̱ tsꞌénkjandayá nijon ndi̱yàtieé nínga ꞌniú tjimá xotaa̱, ko̱jo ki̱a̱ nínga bitjasꞌi̱e̱nnii̱ na̱xi̱ńdáꞌniuú, ndaꞌyá nga bi̱ tsó:

²² «Jún ndí jákjíndí xi kji̱e̱ jmí ni yàjínjnú kjo̱a̱a̱ kjo̱a̱mindyioo̱n, ko̱jo xi mojnóchàjnú, ngaskande kjiꞌání nga to̱kó si̱ꞌantjójnú ni xi jmí ni chjíjiín. Ngaskande kjiꞌání nga to̱kó ko̱jno̱chajnú, ngaskande kjiꞌání nga to̱kó si̱ꞌanchꞌójnú kjo̱a̱kjíntakoón.

²³ ¡Tasiénijónjnúꞌun kjiꞌanga sa̱ꞌinchji̱ni̱e̱jnúꞌun! Án boá xi tsjajnúꞌun a̱si̱énni̱xtjinna, kó xiyàjnúꞌun ni xi tsꞌenkjó án ko̱jo énna.

²⁴ Ta̱nga jún tsíchji̱a̱jnúꞌun, kó jmíjín xi tsintꞌiéna, yejenjnúꞌun ndsa̱ án, ta̱nga nde ngojín xi katsꞌénsénna.

²⁵ Ta̱sá kiniꞌánchꞌójnú ngayeje kjo̱a̱botíxomana, kó kamámejénjínjnú nga an katsꞌenxchánjo̱jnúꞌun.

²⁶ Ja̱ ko̱jo an kojnókiejnúꞌun kjiꞌanga achichí ni xi kji̱ndi̱bániéjnú, ko̱jo nga ko̱nda̱konjnú.

²⁷ Kjiꞌanga kui ni xi ndajiín, ko̱jo ni xi ndakonjnú, ko̱jo ni xi nda̱ ka̱majnú, skjiféjnú xikó maá tsi ngo tjo̱ ꞌniú.

²⁸ Kósꞌe̱ kjiꞌá boá nga ko̱ndókjo̱a̱jnúꞌun, ta̱nga sa̱ꞌinsénjínjnúꞌun, ta̱jñó má ku̱i̱ndyi̱séjnúꞌun, ta̱nga ngiti̱ sa̱kójínjnú án.

²⁹ Ta̱ngatꞌanii̱ nga kiniꞌánchꞌójnú kjo̱a̱kjínkoón, kó kamámejénjínjnú nga kamáyàndikónjnú Néná,

³⁰ ti̱nde kamámejénjínjnú kandaꞌyájnú kjo̱a̱botíxomana, kó kiniꞌánjo̱ꞌojínjnú kjo̱a̱chji̱ni̱e̱na.

³¹ Kuíni nga sa̱kójnú ni xi tsoboájnú: ¡kó ngaskande kꞌo̱jòn májnú kjo̱a̱xti!

³² Ngatꞌa̱ xota̱ xi jmí ni bejiín, achichí tsá fesón, ngatꞌa̱ mejénjiín nga xota̱ xi kjínkón ka̱ma. Kó xota̱ xi kitikjo̱a̱a̱, kjo̱a̱a̱ nga nda tjitjóninkꞌaa̱ yojoo̱ boá nga kju̱i̱e̱ni.

³³ Ta̱nga kui xota̱ xi sa̱ꞌínsénna, achichí xió kꞌuíndo, kó stsa̱kjonjiín ni xi ndajiín».