Éksondo̱ 7 - Xo̱jo̱n eén Néná

¹ Kósꞌe̱ Néná bi̱ katsoó Moisee̱: —Ngindyi̱ko̱n nda̱ ree̱ jí boá xi kꞌuin jí ngajona, ta̱nga ntsꞌie ji Aaroo̱n, kuí boá xi ku̱i̱chji̱a̱ ngajo tse̱.

² Jí boá xi kꞌuiyée̱ Aaroo̱n ngayeje ni xi xiaán ji, kó Aaroo̱n boá xi ku̱i̱chji̱a̱jo nda̱ ree̱, tsi̱ꞌe̱ nga tsja̱ndieè nga kjo̱tjo xota̱ Israee̱l ki̱a̱ nangi Ejiptoo̱.

^3-5 Sa̱ꞌínsénjínjnú nda̱ ree̱, kó tsja̱ndièjín nga kjo̱tjojnú, ngatꞌa̱ ti̱ ánní bo̱a̱ xi sa̱ꞌintajá án ini̱ma̱a̱. Ta̱nga kjín chi̱bo̱a̱ ko̱jo kjo̱a̱ndikón sa̱ꞌin an ki̱a̱ nangi Ejipto̱, kó jaskan sa̱ꞌínkjatjójnú ngijee̱. Ngayeje ngaꞌniúna sa̱ꞌinkjièn án nga sa̱ꞌinjée̱ xota̱ Ejiptoo̱, ¡kó án xí sa̱ꞌin an nga kixi̱ ka̱masee̱n ko̱jo nga kꞌoxié an xota̱ Israee̱l, kui xi xota̱ na̱xi̱ńdána, kó xikoó tsi jájún ka̱ma nga kjo̱tjoni kui nangii̱! ¡Kó kui xota̱ Ejiptoo̱ sku̱i̱e̱ nga án boá xi Nee̱ xota̱ Israee̱l!

⁶ Kó Moisee̱ ko̱jo Aaroo̱n bo̱a̱ má tsꞌén katsꞌénkjatjosón xikótsꞌèn atíxomaa̱ Néná nga sa̱ꞌín.

⁷ Ichítié ko̱jo kantié noó Moisee̱, kó ichítié ko̱jo kantié ján noó Aaroo̱n kjiꞌanga kijíchji̱a̱jo nda̱ ree̱ nangi Ejipto̱.

Bi̱ tsꞌén tsíchji̱a̱jo Moisee̱ ko̱jo Aaroo̱n nda̱ ree̱ nangi Ejiptoo̱

⁸ Kó Néná bi̱ katsoó Moisee̱ ko̱jo Aaroo̱n nga tsíchji̱a̱jo:

⁹ «Kjiꞌanga ngo kjo̱a̱ndikón ku̱i̱ꞌájnú nda̱ ree̱, ji Moisee̱, bo̱a̱ tꞌíi̱n Aaroo̱n nga nga kjíbé yánísiée̱, kó nga tꞌajmi tꞌanangii̱ kje̱n nda̱ ree̱ tsi̱ꞌe̱ nga ye̱ ka̱ma».

¹⁰ Kó bo̱a̱ tsꞌén Moisee̱ ko̱jo Aaroo̱n kijíkoón nda̱ ree̱ nangi Ejipto̱. Kó kjiꞌanga nda̱ ree̱ tsíꞌaá nga ko̱kó ngaꞌniú xí tjiín, kui jaá katsꞌén ni xi katsoó Néná nga sa̱ꞌín. Aaroo̱n tsꞌajmi tꞌanangi yánísieé ngindyi̱ko̱n nda̱ ree̱ ko̱jo mosoo̱, kó kui yánísieé ye̱ kamá.

¹¹ Kósꞌe̱ nda̱ ree̱ tsíchji̱a̱a̱ xota̱ chji̱ni̱e̱ ko̱jo tjiꞌe xi kisꞌiee̱, tsi̱ꞌe̱ nga ti̱ bo̱a̱ ti̱ sa̱ꞌín kui jaá nga.

¹² Nga ngo nga ngo kui jaá tsꞌajmi yánísieé, kó ti̱ ye̱ kamá nga, ta̱nga yánísié xi ye̱e̱ Aaroo̱n katjéjén kui xi tsi̱ꞌe̱ kui jaá.

¹³ Ndatsi kui nii̱ kamá, ti̱ kuí xí nda̱ ree̱ katsꞌéntajá ini̱ma̱a̱, kó katsꞌénsénjiín Aaroo̱n ko̱jo Moisee̱, bo̱a̱ kamá xikó má katsoó Néná nga ka̱ma.

Nga tie kjo̱a̱botíjé xi katsangiyaa̱ Néná xota̱ Ejiptoo̱ Kjo̱a̱botíjé xí tjoón: Nga jín kamá ndáfoaa̱

¹⁴ Néná tsíchji̱a̱jo Moisee̱, kó bi̱ katsoó: «Nda̱ ree̱ nangi Ejipto̱ achichí je tajá ini̱ma̱a̱, kó mejénjiín tsja̱ndieè xota̱ na̱xi̱ńdána nga kjo̱tjoni nangii̱.

¹⁵ Chjábé jí yánísié xi ye̱ kamaá, kó ndyiojón ta̱jñó nga ko̱e̱je̱ nda̱ ree̱ ndejèꞌ Niloo̱, ki̱a̱ tꞌentji̱ngìi̱.

¹⁶ Kó ki̱a̱ bi̱ tꞌíi̱n: “Kuí Néná kui xi tsi̱ꞌe̱ xota̱ Israee̱l, kui xi katsangiyakonna ji, bi̱ katsóna nga ꞌna̱xié xòjne̱ kui ngi̱ndiee̱, tsi̱ꞌe̱ nga ki̱a̱ nangi kixií si̱ꞌandikónjne̱ Nejne̱. Ta̱nga nga ngaskande ngotꞌe̱ mejénjín xoò niꞌínkjatjosén ji ni xi tsꞌénmíꞌaá,

¹⁷ ingo xò chi̱bo̱a̱ sa̱ngíyaá tsi̱ꞌe̱ nga xchi̱e̱ ji nga kui xi Néná. Kuíni nga kjiꞌanga kꞌonié an yánísiéna ndáfoaa̱ ndejèꞌ Niloo̱, jín ka̱ma kui ndáfoaa̱.

¹⁸ Kó ngayeje tji̱o̱ xi tjín ngi̱jin ndáfoaa̱, ko̱yà, kó ꞌniú chꞌoje̱n ka̱ma ndáfoaa̱ ndejeèꞌ nga ngaskande xota̱ Ejiptoo̱ tsꞌe̱ ka̱maa̱ nga kꞌuí”.

¹⁹ »Ngije katseꞌée̱ kui eén nda̱ ree̱, bo̱a̱ tꞌíi̱n Aaroo̱n nga nga kjíbé yánísiée̱ kó ngatiejéntie tsja nga̱soón ndejèꞌ, xo̱ngàndántꞌié ko̱jo ngi̱ndiò ko̱jo ngayeje ngi̱ndie nínga ndyi̱a̱ ndáfoa xi tjín nangi Ejipto̱, tsi̱ꞌe̱ nga jín ka̱ma. ¡Kó ngaskande ni xi yá ko̱jo xi ndi̱jo̱ xi ndyi̱a̱ ndáfoaa̱ ti̱ jín ka̱ma nga!»

²⁰ Kó Moisee̱ ko̱jo Aaroo̱n katsꞌén ngayeje ni xi atíxomaa̱ Néná nga sa̱ꞌín. Aaroo̱n iskjininkꞌa yánísieé ngindyi̱ko̱n nda̱ ree̱ ko̱jo já mosoo̱, kó tsꞌanié ndáfoaa̱ ndejèꞌ Niloo̱. Kó ti̱ kjiꞌa jín kamá ngayeje ndáfoaa̱,

²¹ kó jesón tji̱o̱ xi tjín ngi̱jin ndejeèꞌ, kó achichí ꞌniú chꞌoje̱n kamá ndáfoaa̱, nga ngaskande xota̱ Ejiptoo̱ ngiti̱ kamájín katsꞌe. ¡Kó ngayeje nangi Ejiptoo̱ nga kisꞌie jín!

^22-23 Kó bo̱a̱ kamá xikó má katsó Néná, achichí tajá kamá ini̱ma̱a̱ nda̱ ree̱. Kó nga já tjiꞌe xi tjín nangi Ejipto̱ ti̱ jín katsꞌén ndáfoaa̱ nga, kó tsintꞌiéꞌénjiín Aaroo̱n ko̱jo Moisee̱. Kó nda̱ ree̱ kijí nginí ndiꞌaa̱.

²⁴ Kó xota̱ Ejiptoo̱ kamájín katsꞌe ndáfoaa̱ ndejèꞌ Niloo̱, kuíni nga ngayeje nga̱ndee̱ ndejeèꞌ katsꞌénda ndáńchꞌi̱, tsi̱ꞌe̱ nga ka̱maa̱ nga ki̱a̱ kꞌo̱xié ndáfoaa̱ xi tsjie.

²⁵ Ngije jaꞌa yito ni̱xtjin, Néná tsꞌanié ndáfoaa̱ ndejèꞌ Niloo̱.