Éksondo̱ 5 - Xo̱jo̱n eén Néná

Bi̱ tsꞌén jachó Moisee̱ ko̱jo Aaroo̱n ngindyi̱ko̱n nda̱ ree̱ nangi Ejipto̱

¹ Moisee̱ ko̱jo Aaroo̱n jaskan ngije tsíchji̱a̱jo xota̱ Israee̱l, kijíkoón nda̱ ree̱ nangi Ejipto̱, kó bi̱ katsoó: —Ne xi tsi̱ꞌe̱ xota̱ Israee̱l ngo én katsangiyaa ji nda̱ re, kó bi̱ tsó: “Te̱ꞌéndièe̱ nga kjo̱tjo xota̱ na̱xi̱ńdána tsi̱ꞌe̱ nga sa̱ꞌínna ngo sꞌué ki̱a̱ nangi kixií”.

² Ta̱nga nda̱ ree̱ bi̱ katsó: —Kó ꞌyání bo̱a̱ kui Nee̱. Kó ánní nga an kuintꞌieꞌén kóo̱n. ¡Ngojín nee̱ xota̱ Israee̱l xi be an, kó ti̱nde tsjandièjín an nga kjo̱tjojnú!

³ Kó bi̱ katsó Moisee̱ ko̱jo Aaroo̱n: —Kuí boá xi Nejne̱ kó jè jeꞌekasíko̱jojne̱. Chjiéngá kongínjne̱ nangi kixií, ngo ngi̱ndie xi ján ni̱xtjin mána nga mongín ndsa̱ko, kó ki̱a̱ boá nínga si̱ꞌankꞌasꞌienjne̱ kjo̱a̱tjó Nejne̱. Tsi bo̱a̱jín si̱ꞌanjne̱, ta̱ chaja tsí ngo chiꞌin sa̱ngíyájne̱ ko̱jo tsi ki̱a̱ sa̱ꞌínkjiensónjne̱ ngi̱jii̱n kjo̱a̱xcha̱án.

^4-5 Kósꞌe̱ nda̱ ree̱ nangi Ejiptoo̱ bi̱ katsoó: —¡Ta̱sá tangínni̱ꞌanxárajnú! ¡Ngatꞌa̱ achichí má xota̱ xi ndyi̱ꞌbíndomasien xaá ta̱ngatꞌanii̱ jún!

⁶ Kó ti̱ kui ni̱xtjin nda̱ ree̱ tsíchji̱a̱jo já Ejipto̱ xi síndotjoón ko̱jo já xí kamá ngito̱ko̱o̱ xota̱ Israee̱l, kó bi̱ katsoó:

⁷ «Ngiti̱ boeꞌéjínjnúu̱ ndi̱ji̱ xi sa̱ꞌíndajo̱ ńdiekachján xota̱ Israee̱l xikó ndyi̱niꞌánjo̱jnú, ta̱sá kuí ngatjíkjaꞌáꞌyá kuí ndi̱ji̱i̱.

⁸ Ta̱nga chjiéngá ꞌniú kꞌuijñájnúu̱ nga to̱kó bo̱a̱ kjiꞌi ńdiekachján sa̱ꞌínda, ¡jmí tsi chiboa ngase! Xota̱ tsiꞌé boá kui xota̱ Israee̱l, kjo̱a̱a̱ nga jmíjín ngasee̱ xá, kuíni nga ndyi̱kjandayà nga bo̱a̱ ndyi̱tsó nga ko̱e̱ꞌéndièjne̱ nga nangi kixií ko̱e̱je̱ tsꞌéndíkón Nee̱.

⁹ ꞌNiú ti̱ꞌánjnúu̱ tsi̱ꞌe̱ nga ꞌniú ngase sa̱ꞌínxá, ki̱a̱ ka̱maa̱ nga sa̱ꞌínsénjiín éndísó xi ndyi̱chji̱a̱ Moisee̱ ko̱jo Aaroo̱n».

¹⁰ Kó kui já Ejipto̱ xi síndotjoón ko̱jo ngito̱ko̱o̱ xota̱ Israee̱l tsíchji̱a̱jo xota̱ Israee̱l, kó bi̱ katsoó: «Nda̱ ree̱ jè katsjákjo̱a̱ nga ngiti̱ jmí ndi̱ji̱ ko̱e̱ꞌéjínxójne̱ jún xi si̱ꞌandajo̱jnú ńdiekachjaán,

¹¹ jún xò kongíndyi̱sejnú ko̱jo kongínchja̱ꞌáꞌyájnú ndi̱ji̱i̱, ta̱nga ta̱kó bo̱a̱ xò kjiꞌi ńdiekachján si̱ꞌandajnú».

Xota̱ Israee̱l bi̱ tsꞌén kijítsáyaá nda̱ ree̱ nga ndajín kjimataꞌin

¹² Kósꞌe̱ xota̱ Israee̱l kijí ngayeje nangi Ejipto̱, nga kijíkjaꞌaꞌyá ngayeje to̱ko̱ya ndi̱xcho̱ kixí, tsi̱ꞌe̱ nga xikoó tsi ndi̱ji̱ sa̱ꞌín kui xi katseꞌé máraa̱ ngasꞌe̱.

¹³ Kó já Ejipto̱ xi síndotjoón ko̱jo ngito̱ko̱o̱ xota̱ Israee̱l bi̱ katsó: «¡Tsá ti̱ꞌánjnú! Ndyiojón ndyiojón chjiéngá ti̱ bo̱a̱ ti̱ kjiꞌi ńdiekachján si̱ꞌandajnú, xikó kjiꞌi kiniꞌándajnú kjiꞌanga katseꞌémárajnú ndi̱ji̱i̱».

¹⁴ Kó nga kamájiín kui xotaa̱ nga bo̱a̱ kjiꞌi ńdiekachján katsꞌénda, já Ejipto̱ xi síndotjoón tsaꞌon já ngito̱ko̱o̱ xota̱ Israee̱l xi askondá kui jaá, kó bi̱ katsoó: «Jè ján ni̱xtjinnii̱ nga bo̱a̱jín kjiꞌi ńdiekachján ndyi̱niꞌánkꞌasꞌienjnú».

¹⁵ Kósꞌe̱ já xí síndotjoón xota̱ Israee̱l kijíkoón nda̱ ree̱, kó bi̱ katsoó: —Ánní nga bo̱a̱ má ta̱ ndajín niꞌínje̱jne̱ ji nda̱ re.

¹⁶ Xota̱ tse̱ jmí tsi ta̱ ꞌniú tsí ndyi̱tsꞌènjne̱ nga si̱ꞌandajne̱ ńdiekachján, ngiti̱ jmí ndi̱ji̱ tsjájínjne̱, kó ngaskande ndyi̱moꞌonjne̱. Tsi bo̱a̱jín kjiꞌi ńdiekachján xi ndyi̱niꞌánkꞌasꞌienjne̱, xota̱ tse̱ boá xi konnii̱.

¹⁷ Ta̱nga kui nda̱ ree̱ bi̱ katsó: —¡Tsiꞌé xi bo̱a̱ kónjnú! ¡Xota̱ tsiꞌé boá jún! Kuíni nga ndyi̱chjiáꞌájnúꞌun nga tsjandièjnúꞌun nga kongínniꞌándikónjnú Nejnú, ta̱nga kjo̱a̱a̱ nga ngiti̱ mejénjínjnú si̱ꞌanxájnú.

¹⁸ Kuíni nga tangínni̱ꞌanxárajnú. Kó ndatsi ngiti̱ jmí ndi̱ji̱ tsjajínjnúꞌun, ti̱ kuí xí bo̱a̱ kjiꞌi ńdiekachján si̱ꞌankꞌasꞌiennijnú.

¹⁹ Kó kui ni xi katsó nda̱ ree̱, achichí nda̱ kamaá já xí síndotjoón xota̱ Israee̱l,

²⁰ kó kuíni nga kjiꞌanga kamábe Moisee̱ ko̱jo Aaroo̱n, nga síndo ndi̱tsee̱n nga ndyi̱koyaa̱ kui jaá,

²¹ bi̱ katsoó: —¡Néná ngatsꞌénjéjnú kjo̱a̱a̱ ni ndajín xi kiniꞌánjo̱jnú jún ji̱n! Ngotꞌe̱ ꞌne̱ nda̱ ree̱ ko̱jo xotaa̱ achichí ꞌniú chꞌo ngasee̱ ji̱n ta̱bo̱a̱jiín ngasꞌe̱. ¡Ti̱ júnní bo̱a̱ xi ndyi̱boeꞌéjnú ngo kjo̱a̱ tsi̱ꞌe̱ nga sa̱ꞌínkꞌiénjne̱ nda̱ ree̱!

²² Kósꞌe̱ Moisee̱, bi̱ katsoó Néná nga tsíchji̱a̱a̱: —Ne tsa̱ꞌa̱n, a kuí xá kanangiyení kꞌi̱e̱e̱. A ta̱ tsi̱ꞌe̱ nga sa̱ꞌinkꞌatio tsí an kjo̱a̱ni̱ma̱ xota̱ na̱xi̱ńdáa̱.

²³ Ngatꞌa̱ ndeskande koó nga jéꞌe̱ an nangi Ejipto̱, kó nga kijíkóo̱n nda̱ ree̱ nga katsóyàa̱ én xí kanangiye ji, kui nda̱a̱ ngatsjéni̱xtjin nga ndajín tjítsꞌénjo̱ xota̱ na̱xi̱ńdáa̱, ta̱nga ji, nde kji̱e̱ niꞌíndéjínjne̱.