Éksondo̱ 40 - Xo̱jo̱n eén Néná

Nga kachjaninkꞌa ndiꞌandikoón Néná

¹ Néná tsíchji̱a̱jo Moisee̱, kó bi̱ katsoó:

² «Chjiéngá ni̱xtjin tjoón sá xi ꞌmí Abii̱b chjanínkꞌé ji ndiꞌandikoón. Kó ki̱a̱ boá nínga ka̱matikójo̱na xota̱ na̱xi̱ńdá Israee̱l.

³ Kó ki̱a̱ ngi̱ya ndiꞌandikoón kꞌuijñí ji koxa̱a̱ kjo̱a̱ꞌbíndaa̱, kó tjin ji ńjño kortinaa̱ tsi̱ꞌe̱ nga xcha̱jín.

⁴ Ngi̱yaa̱ ndiꞌandikoón tꞌíjñí ji yámíxa̱a̱ ko̱jo ni xi ꞌbítíyá ndiꞌí xí tsꞌentsíjee̱n. Nda nda má tꞌíjñí ji ngayeje ni xi machjieén ko̱jo ni xi fí nga̱són yámíxa̱a̱, kó tꞌíjñíi̱ ndiꞌií ni xi ꞌbítíyá ndiꞌí xí tsꞌentsíjee̱n.

⁵ Ṉchandikón xí to̱nsinié nínga ꞌbítí nisijee̱n ki̱a̱ tꞌíjñí ji xtji̱e̱e̱n kje̱n koxa̱a̱ kjo̱a̱ꞌbíndaa̱, kósꞌe̱ tjin ji ńjño kortinaa̱ xtji̱e̱e̱n nínga bitjasꞌi̱e̱e̱n ndiꞌandikoón.

⁶ »Xtji̱e̱e̱n kje̱n nínga bitjasꞌi̱e̱e̱n ndiꞌandikoón ki̱a̱ tꞌíjñí ji ṉchandikón nínga ꞌbítísón cho̱ xi niꞌánkꞌieén.

⁷ Ngamasiee̱n nínga tikón ṉchandikoón ko̱jo nínga bitjasꞌi̱e̱e̱n ndiꞌandikoón, ki̱a̱ tꞌíjñí ji ndástsié xí moniéyà ndsa̱ xi ki̱cha̱ bronsee̱, kósꞌe̱ tꞌíkitsieni ji ndáfoa.

⁸ Ngije síndo ngayeje nii̱ ngi̱ndiee̱, tꞌíchjéꞌyé ji nga ngo foaꞌatjiyajoo̱n ndiꞌandikoón, kósꞌe̱ tjin ji ńjño kortinaa̱ ki̱a̱ nínga bitjasꞌi̱e̱nni ndi̱tsee̱n.

⁹ »Chjábé ji isti̱ xi nanginjon xotaa̱ nga boeꞌéxaá, kó tindyie chíi̱ ndiꞌandikoón ko̱jo ngayeje ni xi tjíndo ngi̱yaa̱, ki̱a̱ ka̱maa̱ nga tsa̱ꞌa̱n si̱ꞌin ji kui ndiꞌandikoón, kó ngo ngi̱ndie xi ndikón ka̱ma ngijee̱.

^10-11 Chjatjájìn ji chií isti̱ nga̱soón ṉchandikón nínga ꞌbítí kjo̱a̱tjó xi niꞌánkꞌasꞌiee̱n ko̱jo nga̱soón ni xi niꞌánkjieén, ko̱jo nga̱soón ni ki̱cha̱ bronsee̱ ko̱jo ngindiee̱, tsi̱ꞌe̱ nga ngayeje kui nii̱ xi si̱ꞌankjién nga si̱ꞌandikónna.

¹² »Ngije kamá kui nii̱, tꞌenje̱ ji Aaroo̱n ko̱jo ndií ki̱a̱ nínga bitjasꞌi̱e̱e̱n ndiꞌandikoón, kó bo̱a̱ tꞌíi̱n nga ki̱a̱ ngatangóyá.

¹³ Kó Aaroo̱n chjiéngá ko̱a̱ja̱ ńjñondio xi tsi̱ꞌe̱ chináꞌmii̱, kó nangínjìn ji isti̱ tsi̱ꞌe̱ nga chináꞌmi xi tsa̱ꞌa̱n ka̱ma.

¹⁴ Jaskan ndokjoée̱ ndií, kó bo̱a̱ tꞌíi̱n nga ngatajá ńjño xi chajákjaá,

¹⁵ kó nangínjìn ji isti̱ ngayejee̱, tsi̱ꞌe̱ nga chináꞌmina ka̱ma. Kó ki̱a̱ ko̱a̱ꞌa̱nii̱ nga ta̱ngatꞌanii̱ kui istii̱, nga xota̱ tji̱e̱e̱ Aaroo̱n ko̱jo ndií, chináꞌmina ka̱ma ngatsjéni̱xtjin».

^16-19 Ni̱xtjin ngoo̱ sá xi ꞌmí Abii̱b, kjiꞌá boá nga kachjaninkꞌa ndiꞌandikoón Néná, kó bo̱a̱ má tsꞌén kachjaninkꞌa xikótsꞌèn atíxoma Néná. Jè má ngo nó chi̱bo̱a̱ chi̱bo̱a̱ je jaꞌa nga jatjoni xota̱ Israee̱l nangi Ejipto̱ nga bo̱a̱ kamá.

^20-21 Jaskan Moisee̱ índoyá nga jó ndi̱jo̱ tie nínga kjitꞌa kjo̱a̱kitii̱, ngi̱yaa̱ koxa̱a̱ kjo̱a̱ꞌbíndaa̱, kó índoo̱ kui koxa̱a̱ yá ndojó xi chínkꞌajo̱ni ko̱jo íjñaá tsꞌoa koxa̱a̱, kósꞌe̱ katsjákjo̱a̱ nga ki̱a̱ ikꞌíjñá ngi̱yaa̱ ndiꞌandikoón Néná. Kui koxa̱a̱ ki̱a̱ ikꞌíjñá ngi̱ndie nínga ꞌniú ndikoón, kósꞌe̱ Moisee̱ iskjien boaꞌá ńjño Kortinaa̱ tsi̱ꞌe̱ nga yíꞌmá kui ngi̱ndiee̱, ngatꞌa̱ bo̱a̱ tsꞌén atíxoma Néná nga ka̱ma.

²² Kósꞌe̱ Moisee̱ íjñá yámíxa̱a̱ xtji̱e̱e̱n ta̱ꞌii̱n nínga tikón ndiꞌandikoón, ki̱a̱ ngi̱ndie ndikoón,

²³ kó nga̱són yámíxa̱a̱ índosón paa̱n, xikó má katsoó Néná Moisee̱ nga sa̱ꞌín.

²⁴ Ni xi ꞌbítíyá ndiꞌí xí tsꞌentsíjee̱n ki̱a̱ íjñá xtji̱e̱e̱n kje̱n yámíxa̱a̱, xtji̱e̱e̱n na̱ngi nínga tikón ndiꞌandikoón.

²⁵ Sꞌe̱ jaskan ítí ndiꞌí xi tsꞌentsíjee̱n ngindyi̱ko̱n Néná, ngatꞌa̱ kuí boá xí bo̱a̱ katsoó nga bo̱a̱ sa̱ꞌín.

²⁶ Kó ṉchandikón xi to̱nsinieé ti̱ ki̱a̱ ikꞌíjñá ngi̱ya ndiꞌandikoón Néná, xtji̱e̱e̱n kje̱n ńjño kortina̱ xi tji̱e̱n ngi̱ndie ndikoón.

²⁷ Kó Moisee̱ ki̱a̱ ítí nisijee̱n, xikó má tsꞌén atíxomaa̱ Néná nga sa̱ꞌín.

²⁸ Ngije kamá ngayeje kui nii̱, Moisee̱ yején ńjño kortinaa̱ xtji̱e̱e̱n nínga bitjasꞌi̱e̱e̱n ndiꞌandikoón Néná,

²⁹ kó ki̱a̱ kje̱n ndiꞌandikoón, íjñá ṉchandikón nínga ꞌbítísón cho̱ xi niꞌánkꞌasꞌiennii̱ kjo̱a̱tjó Néná, kó Moisee̱ ki̱a̱ ítí cho̱ ko̱jo ni xi maxchá jno̱ xi kjo̱a̱tjó katsꞌeén, xikó má tsꞌén atíxomaa̱ Néná nga sa̱ꞌín.

³⁰ Ngamasiee̱n nínga bitjasꞌi̱e̱e̱n ndiꞌandikoón Néná ko̱jo nínga tikón ṉchandikón nínga ꞌbítí kjo̱a̱tjó xi niꞌánkꞌasꞌiee̱n Néná, ki̱a̱ íjñá Moisee̱ ndástsié xi bronse̱ xi moniéyà ndsa̱a̱, kó íkitsieni ndáfoa.

^31-32 Kó kuí boá kui ndáfoaa̱ xi katsꞌénkjién Moisee̱, ko̱jo Aaroo̱n ko̱jo jaá Aaroo̱n nga anié tsja ko̱jo se xki̱ nga tsꞌasꞌien ndiꞌandikoón Néná ko̱jo kjiꞌanga kijí nínga tikón ṉchandikoón, xikó má tsꞌén atíxomaa̱ Néná Moisee̱ nga sa̱ꞌín.

³³ Nga jetꞌa, Moisee̱ íchjáꞌyá nga ngo foaꞌatjiyajoo̱n ndiꞌandikoón ko̱jo ṉchandikoón, kó ti̱ yején ńjño kortinaa̱ nínga bitjasꞌi̱e̱nni ndi̱tsee̱n. Ngije kamándo̱jo̱ó Moisee̱ nga iskjininkꞌa ndiꞌandikoón,

Bi̱ tsꞌén jachó Néná ki̱a̱ ndiꞌandikoón

^34-35 Néná ngo ṉdi̱ katsꞌéntji̱nkꞌi̱e̱nnií kui ngi̱ndiee̱, kósꞌe̱ Néná jachó ki̱a̱ ndiꞌandikoón. Kuíni nga Moise̱ kamájín tsꞌasꞌien.

³⁶ Xki̱ nga katjoninkꞌa kui ṉdi̱i̱ ki̱a̱ ndiꞌandikoón, xota̱ na̱xi̱ńdá Israee̱l atíkaya ndiꞌandikoón, kósꞌe̱ xín kijíjo̱.

³⁷ Nde ngojín xota̱ Israee̱l xi xín kijí, ngototo tsi katjoninkꞌa kui ṉdi̱i̱.

³⁸ Ngayeje ngi̱ndie nínga jachó xota̱ Israee̱l, kamábe nga Néná ngo ṉdi̱ íjñá nga̱soón ndiꞌandikoón nga ni̱xtjin, kó nga jñoó ngo ndiꞌí íjñá nga̱soón.