Éksondo̱ 4 - Xo̱jo̱n eén Néná

¹ Ta̱nga Moisee̱ bi̱ katsoó Néná: —Ngito̱ko̱o̱ xota̱ Israee̱l sꞌi̱jinjiín nga je kamábee̱ ji, kó ti̱nde ku̱i̱ntꞌiéꞌénjínna nga.

² Kósꞌe̱ Néná bi̱ katsoó Moisee̱: —Mí nii̱ bo̱a̱ xi katsjayindse̱ ji. —Yánísié boá —katsó Moisee̱.

³ —Tjajmi ji tꞌanangii̱ —katsó Néná. Kó Moisee̱ tsꞌajmi tꞌanangi yánísieé, kó ye̱ kamá. Kó Moisee̱ tsangandikoón kui ye̱e̱,

⁴ ta̱nga Néná bi̱ katsoó: —Ngotꞌe̱ ꞌne̱ tjintie ji ndse̱ kó ńtsꞌen ye̱e̱ chjábéní ji. Kó Moisee̱ bo̱a̱ katsꞌén, yejéntie tsja kó iskjíbéní ńtsꞌen kui ye̱e̱, kó yánísié kamá nginí kui ye̱e̱ ngi̱ya tsja Moisee̱. Kósꞌe̱ Néná bi̱ katsoó:

⁵ —Kui nii̱ ti̱ꞌin ji ngindyi̱ko̱n ngito̱ko̱o̱ xota̱ Israee̱l nga. Ngije sku̱i̱e̱ nga yánísieé ye̱ kamá, kjiꞌá boá nga sꞌi̱jii̱n nga je kamáyèní án, kó nga án boá xi Nee̱ xota̱ xi xchaá.

^6-8 Ta̱nga tsi sa̱ꞌínsꞌijinjiín, kó tsi ti̱nde ku̱i̱ntꞌiéꞌénjiín, te̱ꞌée̱ ingo chi̱bo̱a̱: Nangísꞌín ji ndse̱ ngindie chi̱ngàa̱ xtji̱e̱e̱n ni̱se̱e̱n, kósꞌe̱ ꞌna̱xié nginí ndse̱. Kó Moisee̱ bo̱a̱ katsꞌén, kó ngije tsꞌaxié tsja, kisꞌijña tiboa tiboa nga kisꞌiee̱ chiꞌin xi tsꞌénkjátsón tji̱xin yojoná. Kósꞌe̱ Néná bi̱ katsó nginií: —Nangísꞌín nginí ji ndse̱ ngindie chi̱ngàa̱ xtji̱e̱e̱n ni̱se̱e̱n. Kó Moisee̱ katsꞌén ni xi kiꞌmií, kó ngije tsꞌaxié tsja, jè ngiti̱ jmí nijiín. Kó Néná bi̱ katsó nginií Moisee̱:

⁹ —Tsi ngije kamábe kui xotaa̱ nga jó kui chi̱bo̱a̱a̱, kó tsi sꞌi̱jinjiín ko̱jo tsi ku̱i̱ntꞌiéꞌénjiín, tꞌen ji nínga tikón ndejèꞌ Niloo̱, kó ꞌna̱xié chií ji ndáfoaa̱ ndejeèꞌ kó chjatjén ji nga̱són tꞌanangii̱, kó tji̱e̱nmá jín kamá kui ndáfoaa̱.

¹⁰ Ta̱nga Moisee̱ bi̱ katsoó Néná: —¡Ji Ndi̱a̱! Ta̱nga jmí tsi nda chjiá an, ngatsjéni̱xtjin nga chjiá an, tsájín chji̱a̱ an, kó ngongá stingí najén án, kuíni nga jmíjín xi tsꞌensénna, ngatꞌa̱ ngaskande koó nga chichí an nga bo̱a̱ mana.

¹¹ Kó Néná bi̱ katsoó: —Ndaꞌyéní Moisee̱, ¡Án boá xi sa̱ꞌinkíchji̱a̱a̱ ko̱jo tsi sa̱ꞌinkíchji̱a̱jaán! ¡Án boá xi sa̱ꞌin an nga ko̱nda̱ꞌyé ji, ko̱jo tsi ko̱nda̱ꞌyéjín ji! ¡Án boá xi sa̱ꞌintsijeen ko̱jo tsi ka̱matsijenjiín!

¹² Ngotꞌe̱ ꞌne̱, tꞌen ji nangi Ejipto̱, ngatꞌa̱ án boá xi kosiko̱joo nga nda ko̱ndókjo̱e̱ ji, kó án boá xi xiyaá mí ni xi ko̱ndókjo̱e̱ ji.

¹³ Ta̱nga Moisee̱ bi̱ katsó nginí: —Ji Ndi̱a̱, ꞌniú míꞌaá ta̱sá kje̱ꞌe xí nangíyé ji.

¹⁴ Kósꞌe̱ Néná katsꞌénxchánjo̱ Moisee̱ nga bi̱ katsoó: —¡Ja̱ ki̱a̱ tikón ntsꞌie ji xi ꞌmí Aaroo̱n, kui chináꞌmi xi chji̱a̱ni xota̱ tji̱e̱e̱ Lebii̱! Achichí nda maa̱ chji̱a̱ kui, kó maa̱ tsꞌénꞌíndakon xotaa̱, jè tsꞌénfíkjaꞌáyíndi̱ya̱à, kó achichí tsjá ka̱maa̱ nga sku̱i̱e̱e̱ ji.

^15-16 Ndókjo̱e̱je ji Aaroo̱n, kó tꞌíyée̱ ngayeje ni xi je kixiaan, tsi̱ꞌe̱ nga kui xi ku̱i̱chji̱a̱jo xota̱ na̱xi̱ńdaá ngajo tse̱, xikó maá tsi ji xi tindokjo̱e̱, xikótsꞌèn ji ndokjo̱e̱je ji xikó maá tsi an xi tsꞌénchji̱a̱ an, kó an kosiko̱jójnúꞌun nga ko̱ndókjo̱a̱jnú ko̱jo kokojnúꞌun ni xi si̱ꞌánjnú.

¹⁷ Tꞌen, kó chjábé jí yánísiée̱, kó ti̱ꞌin ji ni xi je atixomaa nga si̱ꞌin ji.

¹⁸ Kó Moisee̱ kijí nginí ndiꞌaa̱ Jetroo̱ kui xi chiꞌyaá, kó bi̱ katsoó: —Te̱ꞌéndièní nga kjuín ngiñá an nangi Ejipto̱, mejénna sku̱i̱e̱ an tsi ta̱kó síndo ngase nga̱sondie xota̱ Israee̱l. Kó Jetroo̱ bi̱ katsoó: —Tꞌen xió xió ji. Kó nda ngatjií nínga tiꞌmi ji.

Bi̱ tsꞌén kijí nginí Moisee̱ nangi Ejipto̱

¹⁹ Nga to̱kó tikónra ngase Moisee̱ ki̱a̱ nangi Mandiaa̱n, Néná bi̱ katsoó: —Tꞌen nginí ji nangi Ejipto̱, ngatꞌa̱ jè jesón ngayeje xota̱ xi kamámejeén katsꞌénkꞌieén ngasꞌe̱.

²⁰ Kósꞌe̱ Moisee̱ iskjíbé ngo bórró kó katsꞌénkꞌíndosón chjo̱ón ko̱jo ndií, kó kijí xtji̱e̱e̱n nangi Ejipto̱. Kó ti̱ iskjíbé yánísié xi Néná katsjaá nga.

²¹ Néná ja̱bo̱a̱ jè bi̱ katsoó Moisee̱: «Ngije kjóchí ji nangi Ejipto̱, ti̱ꞌin ji ngindyi̱ko̱n nda̱ ree̱ ngayeje kjo̱a̱ndikón xí kixiaan nga si̱ꞌin ji nga si̱ꞌinkjìn jí yánísiée̱. Án boá xi sa̱ꞌintajá án ini̱ma̱a̱ nda̱ ree̱ tsi̱ꞌe̱ nga sa̱ꞌínkjatjójín xota̱ na̱xi̱ńdaá.

²² Kósꞌe̱ ji bi̱ sée̱ nda̱ ree̱, bi̱ tsó én xí katsangiya Néná: “Án boá xi Ne an, kó achichí tjóna xota̱ Israee̱l, kuí boá xi xikoó tsi ndí tjónna.

²³ Kuíni nga bo̱a̱ tꞌíxiaán jí nga te̱ꞌéndièe̱ nga ko̱e̱je̱ kui xotaa̱ tsi̱ꞌe̱ nga an sa̱ꞌíndikónna. Ta̱nga kó nga tiboeꞌéndièjíi̱n nga kjo̱tjo, ngotꞌe̱ ꞌne̱ sa̱ꞌinkꞌién an ndí tjóo̱n”».

²⁴ Kó nga ndyi̱fí xtji̱e̱e̱n nangi Ejipto̱, Moisee̱ ko̱jo xota̱ ndiꞌaa̱ jachó ngo ngi̱ndie nínga sa̱ꞌínkjaꞌyá kui ni̱xtji̱e̱e̱n, kó ki̱a̱ jatjokjaà Néná, kó Néná kamámejeén katsꞌénkꞌién Moisee̱ katsaki,

^25-26 ta̱nga na̱ Séforaa̱ iskjíbé ngo kichiro̱ xi yojó, kó katsꞌeén sirkunsisioo̱n ndií ngatꞌa̱ tsatie tji̱xi̱ín yojo ndikoón, kó kui tji̱xi̱ín ítꞌaa̱ yojo ndikoón Moisee̱, kósꞌe̱ bi̱ katsoó: «Jiín ndína boá xi ko̱síko̱joo̱ nga jmí ni ka̱májiín ngotꞌe̱ ꞌne̱». Kó nga kamábe Néná ni xi katsꞌén na̱ Séforaa̱, katsꞌénkꞌiénjínni Moisee̱.

Moisee̱ ko̱jo Aaroo̱n bi̱ tsꞌén tsíchji̱a̱jo xota̱ na̱xi̱ńdaá

²⁷ Kó Néná bi̱ katsoó Aaroo̱n: —Tꞌen ji nangi kixií, kó ki̱a̱ tꞌenchje̱ꞌéyindi̱ye jí Moisee̱. Kó kijí Aaroo̱n ki̱a̱ nínga tikón na̱xi̱i̱ Néná, kó nga kasakoo̱ Moisee̱, katsjaá ngo ndsó tꞌanijon.

²⁸ Kósꞌe̱ Moisee̱ katsóyaà Aaroo̱n ngayeje chi̱bo̱a̱ yiꞌi ko̱jo kjo̱a̱ndikón xí sa̱ꞌín Néná ki̱a̱ nangi Ejiptoo̱, ko̱jo ngayeje én xí katsóyaà kjo̱a̱a̱ ni xi sa̱ꞌín.

²⁹ Kósꞌe̱ nga joó kijí, kó ítikó ngayeje ngito̱ko̱o̱ xota̱ Israee̱l,

³⁰ kó Aaroo̱n tsíchji̱a̱jo kui xotaa̱ kjo̱a̱a̱ kui ni xi Néná katsóyaà Moisee̱, kó Moisee̱ katsꞌén kui chi̱bo̱a̱ xi katsjaá Néná nga sa̱ꞌín.

³¹ Kó xota̱ Israee̱l katsꞌénsꞌijii̱n Moisee̱, kó nga tsintꞌié nga Néná ko̱síko̱jo kui xotaa̱, asiéntikoó ngaskande nga kisitꞌaa̱ xtjien tꞌanangii̱, kó katsꞌéntsjaà Néná.