Éksondo̱ 39 - Xo̱jo̱n eén Néná

Bi̱ tsꞌén ka̱manda ńjño xi ko̱a̱ja̱ chináꞌmii̱

^1-7 Kó ńjño xi tsajá chináꞌmii̱ ńjño xi koán, ko̱jo xi aso, ko̱jo ńjño xi iní kamándani. Kó ti̱ kiniꞌánda ńjñondio xi tsajá Aaroo̱n, kó ki̱a̱ akjatꞌaa̱ nga jó ndi̱jo̱ tsjakon xi ónise̱ xi kjín a̱sie̱én, nínga kjitꞌa jaꞌeén nga tiejó xota̱ tji̱e̱e̱ na̱xi̱ńdá Israee̱l. Kó kiniꞌánda jó axtañó to̱nsinié xi ta̱soboá martiyo̱ kiniꞌánkjítieni nínga jaskan ikichá, sꞌe̱ ki̱a̱ kaꞌnaxiéni ńchjón xí to̱nsinieé. Kó kuí ńchjoón xi kiniꞌánni chji̱ni̱e̱e̱ ńjñondioo̱ ko̱jo ńjño xi ꞌbíkjá ndáyaá Aaroo̱n. Ngayeje kui nii̱, bo̱a̱ tsꞌén kamánda xikótsꞌèn Néná atíxomaa̱ Moisee̱ nga si̱ꞌanda.

^8-26 Kó ńjño xi fotꞌa ni̱se̱e̱n chináꞌmii̱, ti̱kuíní to̱ko̱ya ńjño xi kiniꞌánni ńjñondioo̱ nga, kó ńjño xi fotꞌa nga̱xtoo̱n, ńjño xi koán kamándani. Ngayeje kui nii̱ bo̱a̱ tsꞌén kamánda, xikótsꞌèn atíxoma Néná nga ka̱manda.

^27-29 Kó ńjño xi tsajákjá Aaroo̱n ko̱jo ndií achichí tsjákón chji̱ni̱e̱ kixꞌi ikꞌíjñaá,

^30-31 ti̱ bo̱a̱ ti̱ tsꞌén kiniꞌándani ńjño xi ꞌbíꞌá to̱ko̱ ko̱jo ńjño xi boajá ngindiee̱ ńjño ndaa̱. Xkángíndieé ńjño lino̱ xi nda kamándani, kó ńjño xi ꞌbíkjá ndáyaá, ńjño xi ꞌniú nda kiniꞌándani. Ngo nda̱ xi ꞌniú chji̱ni̱e̱, katsꞌeén chji̱ni̱e̱ xi kixꞌi kui ńjño xi ꞌbíkjá ndáyaá. Kó ti̱ kiniꞌánda ngo tie axtañó xi to̱nsinié soboá soboá, nínga akjatꞌaa̱ ngo jaꞌén xi tsáyà nga Aaroo̱n boá xi chináꞌmii̱ xi ta̱kuítsí xaá Néná xí sa̱ꞌín. Kó kui ni to̱nsinieé ki̱a̱ ikítꞌa nkꞌaa̱ ńjño ꞌbíꞌá tokoo̱, kui xi ngo ńchjón koán ikítꞌani. Ngayeje kui nii̱, bo̱a̱ má tsꞌén kamánda xikótsꞌèn Néná atíxomaa̱ Moisee̱ nga si̱ꞌanda.

Bi̱ tsꞌén kamándo̱jo ndiꞌandikoón Néná

^32-41 Kó xota̱ Israee̱l bo̱a̱ má tsꞌén kijítji̱ngi xikótsꞌèn Néná atíxomaa̱ Moisee̱ nga si̱ꞌanda ngayeje nii̱, kó kamándo̱jo̱ó ndiꞌandikoón Néná. Kósꞌe̱ xota̱ Israee̱l kijíkoón Moisee̱, kó katsꞌénkꞌasꞌiee̱n ndiꞌandikoón Néná ko̱jo ngayeje ni xi niꞌánkjién ngi̱yaa̱ kui ndiꞌaa̱, ko̱jo pan xi niꞌánkꞌasꞌiee̱n Néná, ko̱jo isti̱ xi nanginjon xotaa̱ nga boeꞌéxaá, ko̱jo nisijee̱n, ko̱jo ngayeje ńjño xi boajá xota̱ xi tsꞌénxá ndiꞌandikoón Néná, ko̱jo ńjño xi ko̱a̱ja̱ chináꞌmi Aaroo̱n ko̱jo jaá.

⁴² Ngayeje kui nii̱ xi katsꞌén xota̱ Israee̱l, xikó má tsꞌén Néná atíxomaa̱ Moisee̱ nga si̱ꞌanda ngayeje nii̱.

⁴³ Kó nga kamábe Moisee̱ nga xotaa̱ nda katsꞌénkjatjosón ni xi kiꞌmií, katsꞌénchikonñé ngijee̱.