Éksondo̱ 38 - Xo̱jo̱n eén Néná

Ṉchandikón nínga ꞌbítí kjo̱a̱tjó xi niꞌánkꞌasꞌiee̱n Néná

^1-7 Besalee̱l ti̱ kui katsꞌénda ngo ṉchandikón nínga ꞌbítí kjo̱a̱tjó xi niꞌánkꞌasꞌiee̱n Néná, tsi̱ꞌe̱ nga ka̱majetakoón jeé xotaa̱, ko̱jo katsꞌénda ni xi machjieén kui ṉchaa̱n nga, ko̱jo jó yá xí foxtikjaá ngindiee̱ xi chínkꞌajo̱ni. Yáꞌakasia̱ katsꞌéndani, kósꞌe̱ ki̱cha̱ bronse̱ yíjón.

Ndástsié xi moniéyà ndsa̱ xi ki̱cha̱ bronsee̱

⁸ Ínchjín xi katsꞌénxá ki̱a̱ nga̱ntjo̱a̱ na̱ngo̱xi̱i̱, katsꞌénkꞌasꞌiee̱n Besalee̱l chi̱tsen xi tsitsienjenjinni xi ki̱cha̱ bronse̱ xi kisꞌiee̱, kó kuí ki̱cha̱a̱ xi katsꞌéndani Besalee̱l ngo ni xi moniéyà ndsa̱. Kó ti̱ ki̱cha̱ bronse̱ katsꞌéndani nínga ikꞌíjñasón kui nii̱ nga.

Ndi̱tsee̱n na̱ngo̱xi̱ ndikoón

^9-17 Besalee̱l katsꞌénda ndi̱tsee̱n na̱ngo̱xi̱ ndikoón, kó íchjáꞌyá ngayeje kui ngi̱ndiee̱. Kó ti̱ katsꞌénda ńjño kortinaa̱, ko̱jo yáseé, ko̱jo ngindiee̱ kui yáseé, ko̱jo ki̱cha̱ntꞌi̱u̱a̱a̱, ko̱jo ki̱cha̱ńtsoó.

^18-20 Ńjño kortina̱ xi katsꞌénda Besalee̱l tsi̱ꞌe̱ nga̱ntjo̱a̱ na̱ngo̱xi̱ ndikoón Néná, chji̱ni̱e̱ xi ꞌniú kixꞌi kamáni.

Ki̱cha̱ xi kiniꞌándani ni xi kamáchjieén na̱ngo̱xi̱ ndikoón Néná

²¹ Moisee̱ boá xi katsjaákjo̱a̱ já xí bosikójo chináꞌmii̱, tsi̱ꞌe̱ nga ko̱a̱ꞌa̱ xki̱ mí ki̱cha̱a̱ xi ka̱machjién nga si̱ꞌanda na̱ngo̱xi̱ ndikoón Néná. Kó Itamaa̱r, nda̱a̱ chináꞌmi Aaroo̱n boá xi katsꞌénda kui xki̱i̱.

²² Besalee̱l boá xi katsꞌénda ko̱jo xi íjñanda ngayeje ni xi Néná atíxomaa̱ Moisee̱ nga sa̱ꞌín.

²³ Kó Ooliaa̱b boá xi asíko̱jo nga katsꞌén kui xaá, ngatꞌa̱ kui nda̱a̱, nda̱ chji̱ni̱e̱ki̱cha̱ kamá ko̱jo nda̱ xi kamaá kiniꞌánda ńjño boá, kó ti̱ kamaá katsꞌeén chji̱ni̱e̱ ńjño xi koán, ko̱jo ńjño xi aso, ko̱jo ńjño xi iní, ko̱jo ńjño lino̱ xi nda.

²⁴ Ngayeje to̱nsinié xi kamáchjieén, xota̱ Israee̱l boá xi katsꞌénkixó nga katsꞌénkꞌasꞌiee̱n ngo kjo̱a̱tjó Néná. Nijan úchán ichítié ko̱jo tjiꞌún kilo̱ to̱nsinié xi kamáchjién, xi kótsꞌèn tikón chi̱bo̱a̱ xi chꞌíchi̱bo̱a̱joni ni na̱ngo̱xi̱ ndikoón Néná.

²⁵ To̱ntiboa xi katsjá xota̱ Israee̱l nga katjoninkꞌa xki̱i̱ ngayejee̱, ján mi̱ ján úchán tjiꞌúnnijón kilo̱ ko̱jo ún úchán kan ún ngramo̱ kamáꞌé. Ngayeje kui to̱ntiboaa̱ kichꞌíchi̱bo̱a̱ xi kótsꞌèn tikón chi̱bo̱a̱ xi chꞌíchi̱bo̱a̱joni ni na̱ngo̱xi̱ ndikoón Néná.

²⁶ Já xí tsꞌatio kan noó xi kisꞌiya xki̱, jun úchán ko̱jo ján mi̱ ko̱jo ún úchán ichítié kamá ngayejee̱, kó nga ngo nga ngo kui jaá ún ngramo̱ masien to̱ntiboa katsjá.

²⁷ Kó ti̱ kachjaꞌátikó ján mi̱ ján úchán kilo̱ to̱ntiboa tsi̱ꞌe̱ nga kamánda ngindiee̱ nga úchán yásé xi kamándani na̱ngo̱xi̱ ndikoón Néná, ko̱jo nga úchán yáseé ńjño kortinaa̱. Nga ngo nga ngo ngindiee̱ kui yáseé kantié ján kilo̱ to̱ntiboa kijíjo̱.

²⁸ Kó to̱ntiboa xi tsꞌangii̱ kiniꞌándani ki̱cha̱ntꞌi̱u̱a̱a̱ ko̱jo ki̱cha̱ńtsoó yáseé na̱ngo̱xi̱i̱, kó kui to̱ntiboaa̱ ti̱ akjajon nkꞌaa̱ yáseé na̱ngo̱xi̱ nga.

²⁹ Jó mi̱ ján úchán ko̱jo kantjiꞌún ngo kilo̱ kamá ngayeje ki̱cha̱ bronse̱ xi xota̱ Israee̱l katsꞌénkꞌasꞌien xikoó ngo chji̱e̱ tsi̱ꞌe̱ Néná.

³⁰ Kuí ki̱cha̱ bronsee̱ xi kiniꞌánkjién nga kiniꞌánda ngindiee̱ nga̱ntjo̱a̱a̱ na̱ngo̱xi̱ ndikoón Néná, ko̱jo ṉchandikón xi síndoo̱ ki̱cha̱ xi kjiꞌixtikjaá ko̱jo ni xi kamáchjieén,

³¹ ko̱jo ngindiee̱ yá xí ikindyianijín nga ngo foaꞌatjiyajoo̱n ndi̱tsee̱n na̱ngo̱xi̱i̱ ko̱jo ngindiee̱ nga̱ntjo̱a̱a̱ ndi̱tsee̱n.