Éksondo̱ 33 - Xo̱jo̱n eén Néná

Nga kijí xotaa̱ xtji̱e̱e̱n nangi xi katsó Néná nga tsja̱á

^1-6 Néná bi̱ katsoó Moisee̱: «Tja̱tje ji kui ngi̱ndiee̱, kó tꞌenje̱ ji xota̱ na̱xi̱ńdá xí kaꞌnaxié ji nangi Ejipto̱, ki̱a̱ tꞌanangi xi ji tsjaa kixiáa̱n Abraa̱n, ko̱jo Isaa̱, ko̱jo Jakoo̱b. Án boá xi ja̱koxi̱ boá nga tsjàa̱ xota̱ tji̱e̱ tse̱ kixiáa̱n. ¡Achichí nda kui tꞌanangii̱, nínga tjín tsie ni xi ma chinie! An sangiya an ndítsjiena tsi̱ꞌe̱ nga ko̱e̱je̱tjoón, kó kꞌoxié an kui ngi̱ndiee̱ ngayeje xota̱ na̱xi̱ńdá xi ntꞌiéꞌénjínna. »Bo̱a̱ tꞌíi̱n xota̱ Israee̱l nga kjuínjo̱jín an, ngatꞌa̱ jè achichí kitikjo̱a̱ kamá, kó tsi sa̱ꞌínjé nginí, tsi ndajín ni̱xtjin, sa̱ꞌinkjié an ngi̱ya ndi̱ya̱à. Tji̱e̱n ngatjaꞌáxínra ngayeje ni tsjakon xi tsꞌénkjién nga bónda yojoo̱. Ngi̱chí sájín, án xí be an kóra̱ sa̱ꞌìi̱n kui nii̱». Ngije bo̱a̱ katsoó Moisee̱, xota̱ Israee̱l achichí ndasen kisꞌińdo, ngatꞌa̱ Néná ꞌniú katsꞌénxchánjo̱. Kó ti̱ kjiꞌa ingojín xi katsꞌénkjién ngase ni xi tsꞌénkjién nga bónda yojoo̱.

Ndiꞌańkꞌién nínga kamátikó xotaa̱

⁷ Kó Moisee̱ katsꞌénda ngo ndiꞌańkꞌién xi íjñá ndi̱tsee̱n ngi̱ndie nínga kisꞌińdo xotaa̱, kó, ndiꞌańkꞌién nínga ka̱matikó xotaa̱, ítꞌajaꞌén kuí ngi̱ndiee̱. Kó kjiꞌanga tjín xota̱ xi kamámejeén tsíchji̱a̱jo Néná, jatjoxie nínga kisꞌińdo xotaa̱, kó ki̱a̱ tsꞌasꞌien kui ndiꞌańkꞌieén.

⁸ Kó kjiꞌanga Moisee̱ tsꞌasꞌien kui ndiꞌańkꞌieén, ngayeje xotaa̱ jastjíe̱n, kó ki̱a̱ kixindyia kixi̱ tꞌa nínga tikón ndiꞌa xi tsi̱ꞌe̱, kó askotsijee̱n Moisee̱ ngaskande nga jachókꞌasꞌien nínga tikón kui ndiꞌańkꞌieén.

^9-10 Ti̱ kjiꞌa ngije tsꞌasꞌien Moisee̱ kui ndiꞌańkꞌieén, kui ṉdi̱ xi ja̱kjiꞌi yásé má kjiꞌii̱, ki̱a̱ jachókꞌíjñá nga̱ntjo̱a̱a̱, kósꞌe̱ ngayeje xotaa̱ indyiátikoó nga̱ntjo̱a̱a̱ ndiꞌa xi tsi̱ꞌe̱, tji̱e̱nga Néná tsíchji̱a̱jo Moisee̱.

¹¹ Ngatsjéni̱xtjin nga tsꞌasꞌien Moisee̱ ngi̱yaa̱ kui ndiꞌańkꞌieén, kuí má xi tsíchji̱a̱jo Néná xikótsꞌèn ndokjo̱a̱ni̱jmìjo̱ ngo amingo̱. Jaskan Moisee̱ kijí nginí ngi̱ndie nínga síndo xotaa̱. Josuee̱ kui nda̱ xi bosikójo Moisee̱ ngatsjéni̱xtjin nga ki̱a̱ kisꞌijña nínga tikón ndiꞌańkꞌién nínga kamátikó xotaa̱.

Moisee̱ tsíꞌaá Néná nga sku̱i̱e̱ kje̱n

¹² Kó Moisee̱ bi̱ katsoó Néná: —Jí boá xi bo̱a̱ kasení nga an xi kjuíntjóo̱n kui xota̱ na̱xi̱ńdaá, ta̱nga kiꞌmíyéjínní ꞌyání xi ko̱síko̱jona. Kó ti̱ bo̱a̱ ti̱ kasení nga tjoó an, ko̱jo nga ka̱maꞌnítakínní.

¹³ Tsi ja̱koxi̱ kui nii̱, tꞌíyéní mí ni xi mejeén si̱ꞌin ji, tsi̱ꞌe̱ nga ka̱mana sa̱ꞌintjoó ji, kó ji to̱kó ka̱maꞌnítakínní. Ngata̱ chíyájiín nga kui xota̱ na̱xi̱ńdaá tse̱ boá, jmí tsi tsa̱ꞌa̱n.

¹⁴ Kó Néná bi̱ katsoó Moisee̱: —Án má bo̱a̱ xi kjuínjòo̱, tsi̱ꞌe̱ nga kꞌuieé kjo̱a̱xió ini̱ma̱a̱.

¹⁵ Kó Moisee̱ bi̱ katsoó Néná: —Tsí kꞌuínje̱jínjne̱ nínga ndyi̱mongínjne̱, ngata̱ chjiéꞌéjínjne̱ nga kjo̱tjojne̱ kui ngi̱ndiee̱.

¹⁶ Tꞌenje̱jne̱, kó skján ka̱majne̱ xikoó xota̱ na̱xi̱ńdá xí tjín kuí nga̱sondiee̱. Kótsꞌèn sku̱i̱e̱ni xota̱ Israee̱l nga ꞌnítakínní tsi kꞌuínje̱jínjne̱.

¹⁷ Kó Néná bi̱ katsoó: —Ndakjiꞌi tsobo̱a̱, kjuínjo̱jnúꞌun, ngatꞌa̱ ja̱koxi̱ boá nga tjóna ji ko̱jo nga ꞌniákoo̱n.

¹⁸ Kósꞌe̱ Moisee̱ bi̱ katsoó Néná: —Te̱ꞌéndièní nga skotsijèe̱n kje̱n ji.

¹⁹ Ta̱nga Néná bi̱ katsoó: —Achichí nda tsꞌenjo̱ an xota̱ xi mejénna nga nda sa̱ꞌínjo̱ an. Kuíni nga kokóo̱ ngayeje kjo̱a̱je xi tjínna, kó ti̱ xiyaá jaꞌénna nga.

^20-21 Ta̱nga ka̱májín xchi̱e̱ ji kje̱n án, ngatꞌa̱ ngayeje xota̱ xi sku̱i̱e̱ kje̱n án, ko̱yà. Ki̱a̱ ti̱ndyinra ji tꞌa kui ndi̱jo̱ xi tikóntꞌana.

²² Kjiꞌanga kjoaꞌa an kje̱n ji, ki̱a̱ sa̱ꞌinkꞌijñaá nínga tikón ti̱xa̱a̱ kui ndi̱jo̱o̱, kó ndsa̱ án koꞌmáña an ndyikin ji, ngaskande ngije jaꞌa an.

²³ Jaskan kjoaꞌaxín an ndsa̱ án, kó ka̱ma xchi̱e̱ ji nga̱xto̱n án, ta̱nga ka̱májín xchi̱e̱ ji kje̱n án.