Éksondo̱ 32 - Xo̱jo̱n eén Néná

Cho̱yojo toro̱ to̱nsinieé

¹ Kó nga Moisee̱ achichí tsꞌandíyaá ki̱a̱ na̱xi̱ Sinaii̱, xota̱ Israee̱l kijíkoón Aaroo̱n, kó bi̱ katsoó: —Moisee̱ boá xi tsꞌaxiéjne̱ nangi Ejipto̱, ta̱nga yàjínjne̱ mí ni xi kamaá. Ta̱sá ndatsi ngo ne si̱ꞌindejne̱, tsi̱ꞌe̱ nga kui xi ko̱e̱je̱tjónjne̱ ko̱jo skónjne̱.

² Kó Aaroo̱n bi̱ katsoó xota̱ na̱xi̱ńdaá: —Tsi̱ꞌe̱ nga kui nii̱ sa̱ꞌinda an, to̱nsinié boá xi ka̱machjiénna. Kó kuíni nga ndibájo̱jnúꞌun ni xi tsꞌénkjién chjo̱ónjnú ko̱jo ndí ínchjínjnú, ko̱jo ndí xíꞌínjnú nga bónda yojoo̱.

³ Kó ngayeje xotaa̱ kijíjoo̱ Aaroo̱n kui nii̱,

⁴ kó Aaroo̱n iskjíbé kui nii̱ kó katsꞌénńdá, sꞌe̱ katsꞌénda ngo cho̱yojo xi to̱nsinié. Kó nga kamábe kui nii̱ xota̱ Israee̱l, bi̱ katsó: «¡Xota̱ Israee̱l, kuí bí kui nii̱ xi Nejnú, kui xi tsꞌaxiéjnú nangi Ejipto̱!»

⁵ Nga kamábe kui nii̱ Aaroo̱n, ngo ṉchandikón katsꞌéndaa̱ kui cho̱yojo toro̱ to̱nsinieé, kó bi̱ katsoó xota̱ na̱xi̱ńdaá: «¡Ndyiojón si̱ꞌáa̱n ngo sꞌué Néná!»

⁶ Kó nga kamángindyiojón, ngayejee̱ nga achichí ta̱jñóyà jastjíe̱n, kó katsꞌénkꞌasꞌiee̱n kjo̱a̱tjó ko̱jo katsꞌénkꞌién cho̱ tsi̱ꞌe̱ nga tsíꞌaá kjo̱a̱niꞌánjetakón nee̱. Sꞌe̱ jaskan iskjinie nichinie, ko̱jo katsꞌe ni xi ꞌyó, sꞌe̱ kitié.

^7-9 Kósꞌe̱ Néná bi̱ katsoó Moisee̱: —Ti̱tjaje̱n ji kui na̱xi̱i̱ ꞌne̱, ngatꞌa̱ kui xota̱ na̱xi̱ńdá xí kaꞌnaxié ji nangi Ejipto̱, jè ndajínkjiꞌi ni xi ndyi̱tsꞌèn. ¡Achichí je tsá katsꞌénchíyà nga an ku̱i̱ntꞌiéꞌénna kui xotaa̱! Ngo cho̱yojo toro̱ to̱nsinié jè katsꞌénda, kó kuí ndyi̱tsꞌéndíkón, kó jè katsꞌénkꞌasꞌiee̱n kjo̱a̱tjó, kó bo̱a̱ ndyi̱tsó nga án xò boá kui cho̱yojoo̱, kui xi tsꞌaxié nangi Ejipto̱. Jè kamábe an nga kui xota̱ na̱xi̱ńdaá nga achichí je kitikjo̱a̱ kamá.

¹⁰ ¡Achichí xtína ngotꞌe̱, kó jè sa̱ꞌinkjié an ngayejee̱! ¡Ngata̱ ꞌbíchjéjínní! Ta̱nga kjo̱a̱a̱ xota̱ tji̱e̱ tse̱, án boá xi sa̱ꞌin an nga ngo na̱xi̱ńdá xí je ka̱ma.

¹¹ Kósꞌe̱ Moisee̱ katsꞌénkjaꞌajinda Néná, kó bi̱ katsoó: —Ne tsa̱ꞌa̱n, ¡ngata̱ niꞌínxchínje̱jín ji kui xota̱ na̱xi̱ńdaá! ¡Ti̱ jíní xi kaꞌnaxié ji ki̱a̱ nangi Ejipto̱ nga kiniꞌínkjín jí ngaꞌniúu̱!

¹² ¡Ngata̱ niꞌínxchínjín ji! ¡Ngata̱ niꞌínkjiéjín ji xota̱ na̱xi̱ńdáa̱! Ngata̱ boeꞌéndièjín ji nga xota̱ Ejiptoo̱ ko̱jno̱kiee̱ nga bi̱ ka̱tso̱: “Néná boá xi tsꞌenṉcha̱jo, ngatꞌa̱ tsꞌaxiéni kui ngi̱ndiee̱, kósꞌe̱ ki̱a̱ katsꞌénkꞌién na̱xi̱i̱”.

¹³ Ngatjaꞌátsjiee̱n ni xi ja̱koxi̱ nga sa̱ꞌinkjatjosón an kasée̱ Abraa̱n, ko̱jo Isaa̱, ko̱jo Jakoo̱b. Jí boá xi bo̱a̱ kasée̱ nga ji xi si̱ꞌin ji nga xota̱ tji̱e̱e̱ ngo na̱xi̱ńdá xí je si̱ꞌin ji, kó nga kjín ka̱ma xikó maá ńño xi tjín nkꞌa jàn, kó nga ngatsjéni̱xtjin ko̱e̱ꞌée̱ tꞌanangi xi chji̱a̱ni nangi Kanaa̱n.

¹⁴ Kó ngije Néná katsꞌénkjaꞌajinda yojoo̱, ngije katsjaákon nga ngiti̱ sa̱ꞌinkjiéjínni xota̱ na̱xi̱ńdaá,

^15-16 Moisee̱ ítsꞌi̱yanii̱ nga jatjajenni kui na̱xi̱ Sinaii̱. Kó ki̱a̱ tjiyátsjà nga jó tie ndi̱jo̱ nínga Néná katsꞌénꞌindó kjo̱a̱botíxomaa̱ ngajó ngaboaá.

¹⁷ Kó kjiꞌanga tsintꞌié Josuee̱ nga ndyi̱kjandayà xota̱ na̱xi̱ńdaá, bi̱ katsoó Moisee̱: —Kjo̱a̱xchánrá kjima, ngatꞌa̱ achichí ni xi ndyi̱tsó nga ndyi̱kjandayà xota̱ na̱xi̱ńdaá ki̱a̱ nínga síndo ndiꞌaa̱.

¹⁸ Ta̱nga Moisee̱ bi̱ katsó: —Ko̱jo an ntꞌie an só xi ndyi̱sie nga, ta̱nga jmí tsi só tsi̱ꞌe̱ nga katsꞌén ko̱jo tsi kichajá ngo kjo̱a̱xchán xí ntꞌie an.

¹⁹ Kó nga jachó Moisee̱ ki̱a̱ nínga síndo ndiꞌaa̱, kamábe nga ndyi̱tié kui xotaa̱. Kó nga kamábe cho̱yojo toroo̱, achichí katsꞌénxchán, kó ti̱ ki̱a̱a̱ tꞌa se na̱xi̱i̱ tsꞌatójó tꞌanangi nga jó nga tiee̱ kui ndi̱jo̱ nínga kjitꞌa kjo̱a̱botíxomaa̱, kó tsakjan kui nii̱.

²⁰ Sꞌe̱ jaskan iskjíbé kuí cho̱yojo toroo̱ kó ngi̱jin ndiꞌií katsanginjin, kó katsꞌénxi̱ nga ngaskande ndso̱ko̱a̱n má kamá kui nii̱, kó ngi̱jin ndáfoaa̱ atítsojo kui ndso̱ko̱a̱a̱n, kósꞌe̱ bi̱ katsoó xota̱ Israee̱l: «¡Tꞌi̱o̱jnú kui ndáfoaa̱ ꞌne̱!»

²¹ Jaskan ngije kamá kui nii̱, Moisee̱ bi̱ katsoó Aaroo̱n: —Mí ni xí ndajín xi katsꞌeén kui xota̱ na̱xi̱ńdaá. Ánní nga katseꞌéndièkòo̱n nga bo̱a̱ kjiꞌi jé xí katsꞌén.

²² Kó Aaroo̱n bi̱ katsoó Moisee̱: —Ngo kjo̱a̱nda kuíꞌaá, ngata̱ niꞌínxchínje̱jínní. Jè yé ji nga kui xota̱ na̱xi̱ńdaá tsja maa̱ nga tsꞌén ni xi ndajín.

²³ Kuí boá xi bo̱a̱ katsóna nga sa̱ꞌindàa̱ ngo ne xi ko̱e̱je̱tjoón ko̱jo xi ko̱síko̱jo, ngatꞌa̱ bejín xò mí ni xi kamaá ji.

²⁴ Kósꞌe̱ tsíꞌáa̱ to̱nsinié, kó jeꞌejo̱na, kó ta̱ ki̱a̱ katsanginjin an ngi̱jin ndiꞌí jàn kuí nii̱, ¡kó ki̱a̱ jatjoni kui cho̱yojo toroo̱!

²⁵ Kó kamákjiín Moisee̱ nga xota̱ Israee̱l jmíjín xi kisꞌijñatjoón, ngatꞌa̱ Aaroo̱n kamájiín katsꞌénkintꞌiéꞌén kuí xotaa̱, kó ta̱ ni xi mejénrií katsꞌén. Kó ti̱ kamákjiín Moisee̱ nga xota̱ kondraa̱ kui xota̱ na̱xi̱ńdaá ko̱jno̱kie,

²⁶ kó kuíni nga Moisee̱ ki̱a̱ kisꞌijña nga̱ntjo̱a̱a̱ nínga síndo ndiꞌaa̱, kó bi̱ katsoó xotaa̱: «Xota̱ xi majo̱ Néná xí tsi̱ꞌe̱ xota̱ Israee̱l, kꞌi̱e̱ ngatjandibakónna». Kó ngayeje xota̱ tji̱e̱e̱ Lebii̱ ki̱a̱ nijan kamátikójo̱ Moisee̱,

²⁷ kó bi̱ katsoó: «Néná xí tsi̱ꞌe̱ xota̱ Israee̱l, tsꞌén botixómájnú nga chjábéjnú ki̱cha̱ndojójnú, kó tangínꞌóyájnú nínga síndo xotaa̱, kó xki̱ ndiꞌa tangínjnú, tsi̱ꞌe̱ nga si̱ꞌankꞌiénjnú ta̱ꞌyaní xi sa̱kójnú, tsi ntsꞌiejnú, tsi amingo̱jnú ko̱jo tsi xota̱ tꞌa ndiꞌajnú».

²⁸ Kó xota̱ tji̱e̱e̱ Lebii̱ bo̱a̱ katsꞌén xikó katsó Moisee̱, kó kui ni̱xtjii̱n kamára̱ ján mi̱ jáxíꞌín xi jesón.

²⁹ Jaskan Moisee̱ bi̱ katsoó: «Ngotꞌe̱ ꞌne̱ Néná tjítsꞌénchíkonñéjnú kó tsꞌéntsjájnú xá nga jún xi ka̱majnú chináꞌmii̱, ngatꞌa̱ kondra̱ kamánijnú ntsꞌiejnú ko̱jo ndíjnú tsi̱ꞌe̱ nga Néná si̱ꞌankjatjasónjnúu̱».

³⁰ Kó nga kamángindyiojón, Moisee̱ bi̱ katsoó ngayeje xota̱ na̱xi̱ńdaá: «Ngo jé xí ta̱nisién ꞌniú kiniꞌánjnú jún, kuíni nga kjuínnijíngín an kui na̱xi̱i̱ nga kjuinchjiájo an Néná, a ka̱mamejénraa̱ sa̱ꞌínjetakoón jéjnú».

³¹ Kó Moisee̱ kijínijíngí nginí kui na̱xi̱ nínga tikón Néná, kó bi̱ katsoó: —Jè be an nga xota̱ na̱xi̱ńdaá ndajínkjiꞌi ni xi katsꞌén, ngatꞌa̱ ne xi to̱nsinié katsꞌénda.

³² ꞌNiú míꞌaá ngotꞌe̱ nga si̱ꞌinjetakíi̱n jeé. Ta̱nga tsi si̱ꞌinjetakinjíi̱n, ¡ta̱sá ti̱ꞌinkꞌinní an nga!

³³ Kósꞌe̱ Néná bi̱ katsoó Moisee̱: —Xi sa̱ꞌínjé kondra̱na, án boá xi sa̱ꞌinkjié an jaꞌeén ki̱a̱ xo̱jo̱n nínga kjitꞌa.

³⁴ Kuíni nga ta̱sá tꞌen ji ngotꞌe̱, kó tꞌenje̱ ji kui xota̱ na̱xi̱ńdaá ki̱a̱ nangi xi katsóyàtjóo̱n nga tsjàa̱. Ndítsjiena ko̱e̱je̱tjoón nínga kꞌuin, ta̱nga nga kjo̱chó ni̱xtjin, án boá xi sa̱ꞌinjée̱ kjo̱a̱a̱ jé xí katsꞌén.

³⁵ Kó Néná katsangiyaa̱ ngo chiꞌin xota̱ na̱xi̱ńdaá kjo̱a̱a̱ nga katsꞌéndikón kui cho̱yojo toro̱ xi katsꞌénda Aaroo̱n.