Éksondo̱ 31 - Xo̱jo̱n eén Néná

Xota̱ chji̱ni̱e̱ xi katsꞌénda ni xi kamáchjieén ndiꞌandikoón

¹ Kó Néná bi̱ katsoó Moisee̱:

² «Jè jaꞌajin an Besalee̱l ndií Urii̱, kui xi ndíndee̱ Uu̱r xi chji̱a̱ni xota̱ tji̱e̱e̱ Jundáa̱,

³ kó je íkitsie máa̱ a̱si̱énni̱xtjinna nga katsjáa̱ kjo̱a̱kjínkón ko̱jo kjo̱a̱kjíntakón ko̱jo nga ka̱maa̱ ngayeje to̱ko̱ya xá xí nda.

⁴ Márií niꞌánda ni tsjakon, kó maa̱ tsꞌénxájo̱ ni to̱nsinié, ni to̱ntiboa ko̱jo ni ki̱cha̱ bronse̱,

⁵ kó ti̱ maa̱ tsꞌénxájo̱ ndi̱jo̱ tsjakon, ko̱jo maa̱ tsꞌénda ni xi tsꞌénkjién xotaa̱ nga bónda yojoo̱, kó ti̱ maa̱ tsꞌénda ni xi yá ko̱jo tsꞌénda ngayeje to̱ko̱ya ni tsjakon nga.

⁶ »Kó ti̱ je jaꞌajin an Ooliaa̱b nga, kui xi ndií Ayisamaa̱k, kui xi chji̱a̱ni xota̱ tji̱e̱e̱ Ndaa̱n, tsi̱ꞌe̱ nga kui ko̱síko̱jo Besalee̱l. Ngayeje xota̱ xi ko̱síko̱jo jè katsjáa̱ kjo̱a̱kjínkón tsi̱ꞌe̱ nga sa̱ꞌínda ngayeje ni xi je atixomaa nga si̱ꞌanda xikoó:

^7-11 Ndiꞌandikoón, ko̱jo koxa̱a̱ kjo̱a̱ꞌbíndaa̱, ko̱jo yámíxa̱ nínga ꞌbíndo paa̱n, ko̱jo ni xi ꞌbítíyá ndiꞌí xí tsꞌentsíjee̱n, ko̱jo ṉchandikón nínga ꞌbítí nisijee̱n, ko̱jo ndástsié xí ki̱cha̱ bronsee̱ ko̱jo ngindiee̱ kui nii̱ nga, ko̱jo ńjño xi ko̱a̱ja̱ chináꞌmii̱, ko̱jo isti̱ xi nanginjon nga boeꞌéxaá xotaa̱, ko̱jo nisije̱n xi ꞌbítí ndiꞌandikoón, ko̱jo ngayeje ni xi niꞌánkjién nga niꞌántsjána. »Ngayeje kui nii̱ chjiéngá bo̱a̱ tsꞌén si̱ꞌanda xikótsꞌèn je atixomaa ji nga ka̱manda».

Ni̱xtjin xotoo̱

^12-17 Kó Néná atíxomaa̱ Moisee̱ nga bi̱ ka̱tso̱o̱ xota̱ Israee̱l: «Jún chjiéngá xcha̱ndikónjnú ni̱xtjin xotoo̱, ngatꞌa̱ kuí boá xi ni̱xtjin nga niꞌánkjaꞌyá xi je íjñá chi̱bo̱a̱ an. Ndikón ni̱xtjin xotoo̱, kó chjiéngá xcha̱ndikónjnú ngatsjéni̱xtjin. Tsi ngo xota̱ Israee̱l xi sku̱i̱e̱ndikónjín, chjiéngá ko̱yà. Ta̱ꞌyaní xi sa̱ꞌínxá kuí ni̱xtjii̱n, chjiéngá ku̱i̱yòtjíngií ngi̱jii̱n jún. Jun ni̱xtjin ka̱ma si̱ꞌanxájnú, ta̱nga xi ma yito ni̱xtjii̱n, chjiéngá si̱ꞌankjaꞌyájnú, kó ngayeje kui ni̱xtjii̱n nga an si̱ꞌandikónjnúꞌun. Tsi xcha̱ndikónjnú kui ni̱xtjii̱n ki̱a̱ xcha̱jnú nga jún ko̱jo an nda kichꞌiá xingi̱, kó xcha̱jnú nga an, kui xi Nee̱ xota̱ Israee̱l, nga án boá xi jaꞌajinjnúꞌun nga jun xi ka̱majnú xota̱ na̱xi̱ńdána. Ngotꞌe̱ ꞌne̱ kꞌuitsíyanijnú nga chjiéngá si̱ꞌankjaꞌyájnú ni̱xtjin xotoo̱, ngatꞌa̱ jun ni̱xtjin katsꞌéndani an nkꞌa jàn ko̱jo tꞌanangii̱, kó ni̱xtjin xi ma yitoo̱ katsꞌénkjaꞌyá an».

¹⁸ Kó ki̱a̱ na̱xi̱ Sinaii̱, Néná katsꞌénkꞌasꞌiee̱n Moisee̱ kjo̱a̱botíxoma xi chjiéngá sa̱ꞌínkjatjosón xota̱ na̱xi̱ńdaá. Kó Néná má xi katsꞌénꞌindó kui kjo̱a̱botíxomaa̱, kó jó tie ndi̱jo̱ ítꞌa.