Éksondo̱ 30 - Xo̱jo̱n eén Néná

Ṉchan nínga ꞌbítí nisijee̱n

^1-2 »Ti̱ mejénna nga si̱ꞌinde ji ngo ṉchan xi yáꞌakasia̱ nínga kꞌuití nisijee̱n. Yichán ún sentímetro̱ ngatama nga tiyaá ko̱jo nga ndojoó, kó ichítié ko̱jo yichán sentímetro̱ ngatama nga nkꞌa, kó nga ngo nga ngo nijon, ni xi ja̱ kon ndi̱ja̱ kon xi tꞌíndée̱, kó ta̱ ngo ndo̱jò ngatama ngayeje yojoo̱ kui nii̱,

³ kó to̱nsinié xi kui soboá soboá tjajin ji ngayejee̱, kó ngo nga̱nde xi to̱nsinié tꞌíjñíi̱ nga.

⁴ Ngindiee̱ nínga tikón kui nga̱ndee̱ ti̱ꞌindèe̱ jó ni ńtsó xí to̱nsinié, kó ki̱a̱ ko̱na̱ngísꞌién yá xí xi̱nkꞌajo̱ni kui ṉchaa̱n kjiꞌanga tjín nínga kongínjo̱.

⁵ Yáꞌakasia̱ ti̱ꞌindeni ji kui yaá, kó to̱nsinié tjajin ji nga.

⁶ Kó ki̱a̱ tꞌíjñí kui ṉchaa̱n kje̱n nínga tikón ngi̱ndie xi ꞌniú ndikoón, ki̱a̱ xtji̱e̱e̱n nínga tikón koxa̱a̱ kjo̱a̱ꞌbíndaa̱, ki̱a̱ boá nínga ka̱matikó ñá, ji ko̱jo an.

⁷ »Ndyiojón ndyiojón xki̱ ta̱jñó kjiꞌanga Aaroo̱n ku̱i̱ꞌíjñanda ndiꞌí xí tsꞌentsíjee̱n, chjiéngá ku̱i̱ꞌítína nisije̱n nga̱són ṉchanna nga.

⁸ Kó ti̱ bo̱a̱ ti̱ sa̱ꞌín nga kamángixoón, kjiꞌanga ku̱i̱ꞌítí ndiꞌí xí tsꞌentsíjee̱n. Kꞌi̱e̱ ku̱i̱ꞌítsꞌi̱yani kꞌi̱e̱e̱ nga ngatsjéni̱xtjin nga si̱ꞌan kui nii̱.

^9-10 »Kui ṉchaa̱n ta̱ xá tsa̱ꞌa̱n xi ka̱machjiénní. Kó ka̱májín tsi cho̱ ko̱jo tsi ni xi maxchá jno̱ xi kꞌuítísón, ti̱nde ka̱májín bino̱ chjatjájón. Ta̱ nganda tsa̱ꞌa̱n tsí nga kꞌuítísón nisijee̱n. Xki̱ nó kjiꞌanga kjo̱chójo̱ chináꞌmii̱ kjo̱a̱tjó tsi̱ꞌe̱ nga sa̱ꞌinjetakóo̱n jeé, chjiéngá skjíbé jiín kui cho̱ xi kiniꞌánkꞌieén, kó ki̱a̱ nga kjitjónjón nínga síndo kui ni xi ja̱ kon ndi̱ja̱ koo̱n ki̱a̱ ṉchan nínga ꞌbítí nisijee̱n».

Kjo̱a̱kitii̱ nga xtjo̱ꞌóꞌyá xki̱i̱ xotaa̱

¹¹ Kó Néná bi̱ katsoó Moisee̱:

¹² «Ngatjaꞌátsjiee̱n nga ta̱ án tsí xi tjínna kjo̱a̱nda nga kjoaꞌaꞌyá an xki̱i̱ ngayeje xota̱ Israee̱l. Ta̱nga tsi ji xi chja̱ꞌáꞌyé kui xki̱i̱, chjiéngá nga ngo nga ngo xota̱ Israee̱l sa̱ꞌínkꞌasꞌienna ngo ni xi ku̱i̱ꞌíchjítjé yojoo̱, tsi̱ꞌe̱ nga sa̱ꞌinkꞌienjín an, ti̱nde jmí chiꞌin xi bokínná sa̱ngiyájáa̱n.

^13-15 »Tsi̱ꞌe̱ nga an sa̱ꞌinjetakóo̱n ngayeje xota̱ Israee̱l xi je tsꞌatio kan noó xi je kjiya xki̱i̱, chjiéngá ún to̱ntiboa ngatsꞌénkꞌásꞌiénna, masien tsí má kui chjií xikó kjiꞌi machjí ki̱a̱ ndiꞌandikoón. Ti̱nde xi cho̱o̱n ka̱májín tsie ngase tsja̱á, ti̱nde xi ni̱ma̱ xi jmí to̱njiín chiboajín ngase tsja̱á.

¹⁶ »Ngayeje to̱ntiboa xi sa̱ꞌínkꞌasꞌien xota̱ Israee̱l, ji si̱ꞌinkꞌasꞌíi̱n chináꞌmii̱ tsi̱ꞌe̱ nga ki̱a̱ ku̱i̱ꞌíchjíní to̱n xi machjieén nga niꞌántsjána ki̱a̱ ndiꞌandikoón. Bo̱a̱ tsꞌén nga kjo̱a̱ꞌátsjienna nga xota̱ Israee̱l je íchjína, kó nga ka̱májín sa̱ꞌinkꞌién an».

Ni ńtsó xí xi̱ndyiá ndáfoaa̱

¹⁷ Kó Néná tsíchji̱a̱jo ngase Moisee̱ nga bi̱ katsoó:

¹⁸ «Mejénna nga si̱ꞌinde ji ngo ni ńtsó xí ki̱cha̱ bronse̱ ko̱jo ngo ngindie xi ti̱ kuii̱ ki̱cha̱a̱ ngatamandani nga. Tꞌíkitsieni ji ndáfoa, kó ki̱a̱ tꞌíjñí ji ngamasiee̱n nínga tikón ndiꞌandikoón ko̱jo ṉchandikoón,

^19-21 tsi̱ꞌe̱ nga ki̱a̱ ko̱niéjón tsja ko̱jo se Aaroo̱n ko̱jo jaá xki̱ nga kꞌo̱sꞌien ki̱a̱a̱. Kó ti̱ chjiéngá ko̱niéjón tsja ko̱jo se kjiꞌanga ko̱e̱je̱ tiñaa̱ ṉchandikoón nga sa̱ꞌínkꞌasꞌien kjo̱a̱tjó xi ꞌbítií. Kjo̱a̱kiti boá kui nii̱ kó chjiéngá sa̱ꞌínkjatjosón Aaroo̱n ko̱jo xota̱ tji̱e̱e̱ ngatsjéni̱xtjin. Tsi sa̱ꞌínkjatjosón, ko̱yàjín».

Isti̱ xi nanginjon xotaa̱ nga boeꞌéxaá

²² Kó Néná tsíchji̱a̱jo ngase Moisee̱ nga bi̱ katsoó:

^23-25 «Isti̱ xi nanginjon xotaa̱ nga boeꞌéxaá, kuí boá kui istii̱ xi chjatjájón ngayeje ni ko̱jo xota̱ xi ta̱ xá tsa̱ꞌa̱n tsí xi sa̱ꞌín. Chjiéngá bo̱a̱ tsꞌén si̱ꞌinde ji xikótsꞌèn niꞌánda ndásíje̱n xi ndaa̱. »Nga si̱ꞌinde ji, kuí nii̱ xi si̱ꞌinkjìn: Ján litro̱ masien istii̱ toꞌolibo̱ xi kjín xka̱ sije̱n tsꞌájinni. Xi kótjín ni xi si̱ꞌinkjìn jí, bo̱a̱ tsꞌén xꞌi̱chi̱bo̱a̱ xikó tsꞌén chꞌíchi̱bo̱a̱ ni ki̱a̱ ndiꞌandikoón.

²⁶ »Kuí istii̱ xi chjatjájìn ji ndiꞌandikoón ko̱jo koxa̱a̱ kjo̱a̱ꞌbíndaa̱,

^27-28 ko̱jo yámíxa̱a̱, ko̱jo ni xi ꞌbítíyá ndiꞌí xí tsꞌentsíjee̱n, ko̱jo ṉchandikón nínga ꞌbítí kjo̱a̱tjoó, ko̱jo ni xi mindyia ndáfoa nínga moniéjón sé ko̱jo tsja chináꞌmii̱, ko̱jo ngindiee̱ kui nii̱, ko̱jo ngayeje ni xi niꞌánkjién nga niꞌánkꞌasꞌien ngo kjo̱a̱tjó.

²⁹ Ngije kiniꞌín ji kui nii̱, ngayeje ni xi niꞌánkjieén, ni xi ta̱ xá tsa̱ꞌa̱n je ka̱ma, kó chjiéngá ni xi ndikón ka̱ma ngijee̱. Ngayeje ni xi si̱tꞌaa̱ kui nii̱, ka̱matsjie nga, kó jè ta̱ xá tsa̱ꞌa̱n ka̱ma ngijee̱.

³⁰ »Ti̱ kuíní kui istii̱ xi ko̱na̱ngínjin ji chináꞌmi xi tsa̱ꞌa̱n, xikoó Aaroo̱n ko̱jo jaá.

³¹ Bo̱a̱ tꞌíi̱n xota̱ Israee̱l nga kuí bí kui istii̱ xi si̱ꞌankjién nga ko̱na̱ngínjón ngayeje ni xi je ta̱ xá tsa̱ꞌa̱n kꞌuíndoni.

³² Kuíni nga ka̱májín ta̱xkiya ko̱na̱ngínjón ta̱ꞌya xota̱ní, ti̱nde ka̱májín bo̱a̱ tsꞌén si̱ꞌandani kje̱ꞌe isti̱ xikótsꞌèn niꞌánda xi̱ꞌbi̱, ta̱nisién ndikón kuí istii̱, kó chjiéngá ndikóntsꞌèn si̱ꞌanjo̱jnú.

³³ Tsi tjín xota̱ Israee̱l xi sa̱ꞌínda ingo isti̱ xi xikoó xi̱ꞌbi̱, kó tsi ta̱xkiya sa̱ꞌínkjién nga sa̱ngínjón kje̱ꞌe xota̱, kui xi bo̱a̱ katsꞌeén chjiéngá ku̱i̱yòtjíngií ngi̱jii̱n jún».

Nisijee̱n

^34-37 Kó Néná bi̱ katsó ngasee̱ Moisee̱: «Kui nisije̱n xi kꞌuití nganda tsa̱ꞌa̱n, chjiéngá kui soboá soboá ngatama, kó ta̱ án tsí xi kꞌuitína. Kjiꞌanga si̱ꞌinde ji chjiéngá nisije̱n xi kui soboá soboá ko̱jo kje̱ꞌe xka̱ xi sije̱n ngase xi si̱ꞌinkjìn jí. Kui ndásíjee̱n chjiéngá nda si̱ꞌankꞌájin ngayeje ni xi ku̱i̱ndyiaa̱, kó ti̱ kuii̱ chi̱bo̱a̱ nga ngo nga ngo ni xi ku̱i̱ndyiaa̱. Kó chjiéngá nda sꞌió ngayeje kui nii̱. Ngije kamánda kui ndásíjee̱n, tꞌen ji ndiꞌandikoón, kó chjábé jí chiboa kui nisijee̱n, kó ki̱a̱ tꞌíjñí ji kje̱n nínga tikón koxa̱a̱ kjo̱a̱ꞌbíndaa̱. Kui nisijee̱n ꞌniú ndikón ka̱ma, kó ta̱ tsa̱ꞌa̱n tsí bo̱a̱, kó chjiéngá bo̱a̱ tsꞌén ka̱manda. Ka̱májín ngo xota̱ xi sa̱ꞌínda ingo nisije̱n xi ti̱ bo̱a̱ ti̱ tsꞌén kamánda xi kje̱ꞌe tsꞌén sa̱ꞌínkjién.

³⁸ Tsi tjín xota̱ Israee̱l xi bo̱a̱ sa̱ꞌín, chjiéngá ku̱i̱yòtjíngií ngi̱jii̱n jún».