Éksondo̱ 29 - Xo̱jo̱n eén Néná

Nga boeꞌéxaá chináꞌmii̱

¹ Néná to̱kó atíxomaraa̱ Moisee̱ kjo̱a̱a̱ nga ko̱e̱ꞌéxaá chináꞌmii̱, kó bi̱ katsoó: «Chjábé jí ngo ndií cho̱yojo ko̱jo jó cho̱tsa̱nga̱ xi jaꞌatji ndi̱ja̱a̱ xi ndakón.

² Jaskan, ti̱ꞌinkꞌájin ji isti̱ ndso̱ko̱a̱n ńño pan xi ꞌniú ndaa̱, kó ti̱ꞌinde ji pan ko̱jo ngayita̱ xi nanginjon isti̱, ta̱nga nga jmí nisan mindyiéjíi̱n.

³ Ngo ni̱se̱nyá tindyie ji kui paa̱n ko̱jo ndí cho̱yojoo̱ ko̱jo nga jó cho̱tsa̱nga̱ xi jaꞌatji ndi̱ja̱a̱, kó tꞌenje̱ ji ki̱a̱ ndiꞌandikoón.

⁴ »Ngije kiniꞌín kui nii̱, tꞌenje̱ ji Aaroo̱n ko̱jo jaá ki̱a̱ nga̱ntjo̱a̱a̱ ndiꞌandikoón, kó bo̱a̱ tꞌíi̱n nga ngatangóyá.

^5-6 Kósꞌe̱ ngije tsangóyá, ti̱ꞌinkajé ji Aaroo̱n ngayeje ńjño xi kixiaan nga si̱ꞌandaa̱. Kó ti̱ tꞌíjñíi̱ kui ndí axtañó xi bokó nga kuí boá xi chináꞌmi xi ngito̱ko̱o̱.

⁷ Kó ti̱ chjatjájìn ji to̱ko̱ kui isti̱ xi nanginjon xotaa̱ xi boeꞌéxaá.

^8-9 »Jaskan ndokjoée̱ jaá Aaroo̱n, kó te̱ꞌéxée̱ nga ko̱jo kui xi ka̱ma chináꞌmina nga. Ti̱ꞌinkajé ji ńjñobichitjé xi xá kiniꞌándani tsi̱ꞌe̱ kui jaá, chjénꞌníi̱ ńjño xi ꞌbíkjá ndáyaá, ko̱jo ni ꞌbíꞌá tokoo̱, xikó je kiniꞌínje̱ ji Aaroo̱n. Kꞌi̱e̱ ku̱i̱ꞌítsꞌi̱yani ngotꞌe̱ nga ngayeje xota̱ tji̱e̱e̱ Aaroo̱n xi chináꞌmina ka̱ma ngi̱yaa̱ kjo̱a̱kitii̱.

¹⁰ »Sꞌe̱ tji̱e̱nmá tꞌenje̱ ji ndí cho̱yojoo̱ ki̱a̱ ndiꞌandikoón, kó bo̱a̱ tꞌíi̱n Aaroo̱n ko̱jo jaá, nga ngatꞌíjñasoón tsja, to̱ko̱ kui cho̱o̱.

¹¹ Jaskan ti̱ꞌinkꞌin ji kui cho̱o̱ ki̱a̱ nga̱ntjo̱a̱a̱ ndiꞌandikoón kje̱n nínga tikón ṉchanna.

¹² Ti̱ꞌinkꞌandyi̱ni ji ngo xtín ndse̱ chií jiín kui ndí cho̱yojoo̱, kó nangínjìn ji ki̱a̱ nínga síndo kui ni xi ja̱kon ndi̱ja̱a̱ ṉchandikoón kon, kósꞌe̱ jín xí kꞌo̱ngii̱ ki̱a̱ tꞌa ṉchandikoón chjatjén ji.

¹³ Kó chja̱ꞌáxín ji ngayeje xinié xí kjijon tsiꞌee̱ kui cho̱o̱ ko̱jo chi̱nga̱ndaa̱ ko̱jo chjo̱ondáyaá, kó ki̱a̱ tꞌítí ji nga̱són ṉchandikoón.

¹⁴ Kó nga kui kjo̱a̱tjoó tsi̱ꞌe̱ nga ka̱majetakón jé boá, kuíni nga chjiéngá ndi̱tsee̱n nínga síndo xotaa̱ ki̱a̱ kꞌuití yojoo̱, ko̱jo tji̱xi̱ín, ko̱jo yeꞌee̱ kui ndí cho̱yojoo̱.

¹⁵ »Chjábé jí ngo nga jó kui cho̱tsa̱nga̱ xi jaꞌatji ndi̱ja̱a̱, kó bo̱a̱ tꞌíi̱n Aaroo̱n ko̱jo jaá nga ngatꞌíndosoón tsja to̱ko̱ kui cho̱o̱.

¹⁶ Ngije kamá kui nii̱, ti̱ꞌinkꞌin ji kui cho̱tsa̱nga̱ xi jaꞌatji ndi̱ja̱a̱, kó jiín chjatjájìn ji nga ngo nga ngo nga̱ndee̱ ṉchandikoón.

¹⁷ Ti̱chíyé ji yojoo̱ kui cho̱o̱, kó taníjín ji tsiꞌee̱ ko̱jo se, kó tꞌítikí yeje ji ngije kitiyà yojoo̱ ko̱jo to̱ko̱.

¹⁸ Kó ki̱a̱ nga̱són ṉchaa̱n tꞌítí ji ngayeje kui nii̱, kuí boá kui nii̱ kjo̱a̱tjó xi sije̱n ka̱mana an, tsi̱ꞌe̱ nga sa̱ꞌinjetakón an jeé xotaa̱.

¹⁹ »Sꞌe̱ jaskan ngije Aaroo̱n ko̱jo jaá íjñasoón tsja, to̱ko̱ kui cho̱tsa̱nga̱ xi jaꞌatji ndi̱ja̱a̱ xi ingoo̱,

²⁰ ti̱ꞌinkꞌin ji kui cho̱o̱, kó chjábé jí chií jiín, kó ki̱a̱ tindyie chíi̱ ngi̱ya ti̱xa̱nijon xi kixi̱ Aaroo̱n ko̱jo jaá, kó ti̱ nangínjìn chií kui jiín xtín tsja xi je ko̱jo xtín sé xi je xi kixi̱i̱, kó jín xí ngasee̱ ki̱a̱ chjatjájìn ji nga̱ndee̱ ṉchandikoón.

²¹ Kó jaskan chjatjájìn ji ńjñoo̱ Aaroo̱n ko̱jo ńjñoo̱ jaá chií kui jín xí tikón nga̱són ṉchaa̱n ko̱jo chií kui isti̱ xi nanginjon xotaa̱. Kó bo̱a̱ tsꞌén nga kui jaá ko̱jo ńjñoo̱ jè ta̱ xá tsa̱ꞌa̱n boá xi sa̱ꞌín.

²² »Kó nga kui cho̱tsa̱nga̱ xi jaꞌatji ndi̱ja̱a̱ xi si̱ꞌankꞌasꞌiennii̱ xaá chináꞌmii̱, tꞌíjñitꞌaxín ji xinieé ńtsꞌen kui cho̱o̱, ko̱jo xinié xí kjijon tsiꞌee̱, ko̱jo xinié xí kjijon chi̱nga̱ndaa̱ ko̱jo ti̱ꞌmi xí kixi̱i̱, ko̱jo nga jó chjo̱ondáyaá, ko̱jo kui xinié xí kjijoo̱n.

²³ »Ngi̱yaa̱ kui ni̱se̱nyá xí ndyi̱a̱ pan xi jmí nisanjiín kui xi tikón kje̱n ṉchandikoón, chjábé ji ngo pan ńtsó, ko̱jo ngo pan xi kixindyiaa̱ isti̱, ko̱jo ngo ngayita̱.

²⁴ Ngayeje kui nii̱ ngi̱ya tsja Aaroo̱n ko̱jo jaá tꞌíjñí ji, kó ngatsꞌénkjítji̱ya kui nii̱ kje̱n án, xikoó ngo kjo̱a̱tjó xi niꞌánkꞌasꞌienna.

²⁵ Sꞌe̱ jaskan kui jaá ngatsꞌénkꞌásꞌieén ji paa̱n ko̱jo yojoo̱, kó nganda tsa̱ꞌa̱n tꞌítí ji ki̱a̱ ṉchandikoón, xikoó ngo kjo̱a̱tjó xi sije̱n mana.

²⁶ »Ngije katseꞌéxée̱ Aaroo̱n nga kui xi ka̱ma chináꞌmina, chjábé jí ni̱se̱e̱n kui cho̱tsa̱nga̱ xi jaꞌatji ndi̱ja̱a̱, kó án ti̱ꞌinkꞌasꞌinní ki̱a̱ ṉchandikónna. Kó kui ni̱se̱e̱n kui cho̱o̱ ji chjábé jí,

^27-28 ta̱nga Aaroo̱n ko̱jo jaá, kuí tsoboaá ni̱se̱e̱n ko̱jo ti̱ꞌmi̱í kui cho̱tsa̱nga̱ xi jaꞌatji ndi̱ja̱a̱ xi kiniꞌánkꞌasꞌien nga katseꞌéxaá. Ngotꞌe̱ ku̱i̱ꞌítsꞌi̱yani nga ni̱se̱e̱n ko̱jo ti̱ꞌmi̱í kui cho̱tsa̱nga̱ xi jaꞌatji ndi̱ja̱a̱ xi sa̱ꞌínkꞌasꞌienna xota̱ Israee̱l tsi̱ꞌe̱ nga sa̱ꞌinjetakóo̱n jeé, Aaroo̱n ko̱jo xota̱ tji̱e̱e̱ boá xi tsoboaá nga skjíbé. Ngatsjéni̱xtjin kꞌuijñá kui kjo̱a̱kitii̱.

²⁹ »Kó kui ńjño tsjiee̱ kui xi tsi̱ꞌe̱ Aaroo̱n, tsi̱ꞌe̱ xota̱ tji̱e̱e̱ kui ka̱ma, jaskan ngije kꞌien Aaroo̱n, kjiꞌanga ko̱e̱ꞌéxaá nga ka̱ma chináꞌmina.

³⁰ Ngatsjéni̱xtjin, kjiꞌanga ngo kui jaá ko̱e̱je̱ ki̱a̱ ndiꞌandikoón nga chináꞌmina ka̱ma, chjiéngá yito ni̱xtjin ko̱a̱ja̱ kui ńjñoo̱.

³¹ »Yojoo̱ kui cho̱tsa̱nga̱ xi jaꞌatji ndi̱ja̱a̱ xi kiniꞌánkꞌasꞌien nga katseꞌéxaá Aaroo̱n ko̱jo jaá, ki̱a̱ ti̱ꞌinchjén ji ngo ngi̱ndie xi xá kachjeꞌéjinni tsi̱ꞌe̱ kui nii̱.

^32-33 Kó ki̱a̱ nínga bitjasꞌi̱e̱nnii̱ ndiꞌandikoón skji̱ni̱e̱ Aaroo̱n ko̱jo jaá kui yojoo̱ ko̱jo pan xi ndyi̱a̱ ni̱se̱nya̱á, ngatꞌa̱ kuí kjo̱a̱tjoó xi katsꞌenjetakónñáa̱ jeé, kó katsjaxáa̱ nga chináꞌmina ka̱ma.

³⁴ Kó tsi kꞌo̱ngi ngi̱chí kui paa̱n ko̱jo yojo xi kiniꞌánkꞌasꞌiee̱n tsi̱ꞌe̱ nga kamángindyiojón, chjiéngá kꞌuití. Ka̱májín tjín xí skji̱ni̱e̱ ngase, ngatꞌa̱ kjo̱a̱tjó xi ndikón boá.

³⁵ »Kjiꞌanga ko̱e̱ꞌéxaá Aaroo̱n ko̱jo jaá nga je chináꞌmina kamá, yito ni̱xtjin kꞌo̱ndíyaá kui nii̱, kó bo̱a̱ tsꞌén ngatama kui nii̱ xikó má tsꞌén atixomáa̱ nga si̱ꞌan.

^36-37 Nga ka̱ma kui nii̱ ndyiojón ndyiojón si̱ꞌinkꞌasꞌin ji ngo kjo̱a̱tjó xi ngo ndií cho̱yojo, tsi̱ꞌe̱ nga sa̱ꞌinjetakóo̱n jeé, kó nga ki̱a̱ kui ṉchaa̱n nínga ka̱ma ngo ngi̱ndie nínga xá si̱ꞌankꞌasꞌienna kjo̱a̱tjó. Kó ti̱ chjatjájìn ji isti̱ kui ṉchandikoón nga, tsi̱ꞌe̱ nga ki̱a̱ si̱ꞌandikónna, kó ta̱jmì niní xi si̱tꞌaa̱ kui ṉchaa̱n ti̱ tsa̱ꞌa̱n ka̱ma nga.

Kjo̱a̱tjó xi niꞌánkꞌasꞌien ndyiojón ndyiojón

³⁸ »Ndyiojón ndyiojón si̱ꞌinkꞌasꞌin ji nga̱són ṉchandikoón jó ndií cho̱tsa̱nga̱ xi ngo noó.

³⁹ Ngo kui ndií cho̱tsa̱nga̱, xi si̱ꞌinkꞌasꞌínní nga ta̱jño̱ó, kó xi ingoo̱ ngije kjimangixoón si̱ꞌinkꞌasꞌínní.

⁴⁰ Kui ndií cho̱tsa̱nga̱ xi si̱ꞌinkꞌasꞌin ji nga ta̱jño̱ó, jó kilo̱ ndso̱ko̱a̱n ṉño̱pan xi ndaa̱ nijan ti̱ꞌinkꞌasꞌin ji, xi si̱ꞌankꞌájinni ngo litro̱ istii̱ toꞌolibo̱. Kó nga̱soón kui ṉchaa̱n ngo litro̱ bino̱ chjatjájìn ji.

⁴¹ Kó nga si̱ꞌinkꞌasꞌin ji ndií cho̱tsa̱nga̱ xi ma joó, ti̱ bo̱a̱ ti̱ tsꞌén ti̱ꞌinkꞌasꞌin ji xikoó xi tjoón. »Ndií cho̱tsa̱nga̱a̱, ko̱jo ndso̱ko̱a̱n ṉño̱paa̱n ko̱jo binoo̱ kꞌuití yejena kui kjo̱a̱tjoó nganda tsa̱ꞌa̱n, kó kui nda̱ sije̱e̱n kui nii̱ kjo̱a̱ꞌándána kó tsja ka̱mana.

^42-43 Ngayeje xota̱ Israee̱l ko̱jo xota̱ tji̱e̱e̱ chjiéngá ngatsjéni̱xtjin sa̱ꞌínkꞌasꞌienna kui kjo̱a̱tjoó ki̱a̱ nínga bitjasꞌi̱e̱nnii̱ ndiꞌandikoón. Kó ki̱a̱ boá nínga skuie an xota̱ Israee̱l, kó ki̱a̱ kuichjiájoo ji. Án boá xi ngo ngi̱ndie xi tsjie sa̱ꞌin an ki̱a̱a̱.

⁴⁴ Ndiꞌandikoón ko̱jo ṉchandikoón ta̱ xá tsa̱ꞌa̱n xi ka̱machjiénní, kó Aaroo̱n ko̱jo jaá, ta̱ xá tsa̱ꞌa̱n bo̱a̱ xi sa̱ꞌín nga.

⁴⁵ Án boá xi kotíjña̱jìi̱n xota̱ Israee̱l, kó án boá xi Nee̱ ka̱ma an.

⁴⁶ Kó bo̱a̱ tsꞌén nga sku̱i̱e̱ kui xotaa̱ nga án boá xi Nee̱ an, kó nga án boá xi tsꞌaxié an nangi Ejipto̱.