Éksondo̱ 28 - Xo̱jo̱n eén Néná

Ńjño xi ko̱a̱ja̱ chináꞌmii̱

¹ »Ngi̱jii̱n ngayeje xota̱ Israee̱l, jè jaꞌajin an ntsꞌie ji Aaroo̱n ko̱jo ndií kui xi ꞌmí: Itamaa̱r, Nandaa̱b, Abiuu̱ ko̱jo Eleasaa̱, tsi̱ꞌe̱ nga ngayejee̱ nga ka̱ma chináꞌmina. Kuíni nga bo̱a̱ tꞌíi̱n nga ki̱a̱ ngatꞌíndo tiña nínga ku̱i̱ndyin ji.

^2-8 »Mejénna nga si̱ꞌandaa̱ ngo ńjño ndikón Aaroo̱n ko̱jo ndií, ngatꞌa̱ chináꞌmina boá. Ti̱ndyi̱sé ji xota̱ xi chji̱ni̱e̱, xi an je katsjáa̱ a̱siénni̱xtjin tsi̱ꞌe̱ nga kꞌuieé kjo̱a̱kjínkón, tsi̱ꞌe̱ nga kui xi sa̱ꞌínda ńjñoo̱ Aaroo̱n, ngatꞌa̱ mejénna nga ꞌniú nda ko̱jo tsjakꞌuié kuí ńjñoo̱, xikoó xi tsoboaá nga ko̱a̱ja̱ chináꞌmi xi tsa̱ꞌa̱n. »Kui ńjñoo̱ chjiéngá kꞌuieé ngo ńjño xi kjótꞌa ni̱se̱e̱n, ngo chi̱nga ndio, ngo ńjño xi fotꞌa nga̱xto̱n, ngo ńjño chji̱ni̱e̱ xi fostsani yojoná, ngo ńjño xi ꞌbíchíngí to̱ko̱ ko̱jo ngo ńjño xi ꞌbíkjá ndáyaá. Tsi̱ꞌe̱ nga ka̱manda ngayeje kui ńjñoo̱, chjiéngá ńjño xi koán, ko̱jo ńjño xi aso, ko̱jo ńjño xi iní, ko̱jo ńjño xi lino̱ xi ꞌniú nda si̱ꞌandani, kó ńchjón xí to̱nsinié boá xi si̱ꞌanni chji̱ni̱e̱e̱. Ńjño ndioo̱ chjiéngá jó ńjño xi ntꞌié kꞌuijñaá nga ngo nga ngo ndiè ko̱jo ngo ńjño xi ꞌbíkjá ndáyaá.

⁹ »Chjábé jí jó ndi̱jo̱ ónise̱ xi kjín a̱si̱én kó nga̱soón tjatꞌe ji jaꞌeén nga tiejó tji̱e̱e̱ xota̱ Israee̱l,

¹⁰ jun jaꞌén tjatꞌe ji ngo kui ndi̱jo̱o̱, kó ti̱ jun tjatꞌe ji xi ingoo̱.

^11-14 Nda̱ xi tsꞌénxájo̱ ndi̱jo̱ tsjakoo̱n, ni to̱nsinié ngatajón nga̱ndee̱ nga ngo nga ngo kui ndi̱jo̱o̱, kó jó ńchjón yiꞌi xi to̱nsinié soboá soboá ngatꞌijñaá, kósꞌe̱ ki̱a̱ ngatítꞌa jaꞌeén, xikoó tsi ngo seyo̱, kó ki̱a̱ ngatítꞌa ńjñondioo̱ Aaroo̱n ki̱a̱ xtji̱e̱e̱n nga̱són tjiaa̱. Kui ndi̱jo̱o̱ ki̱a̱ kjótꞌa tsi̱ꞌe̱ nga, nga kjo̱chókasién ngindyikón án chináꞌmina Aaroo̱n, kjo̱a̱ꞌátsjienna nga tiejó tji̱e̱e̱ xota̱ Israee̱l.

Ńjño xi kjótꞌa ni̱se̱e̱n chináꞌmi ngito̱ko̱o̱

¹⁵ »Ti̱ꞌinde ji ńjño xi kjótꞌa ni̱se̱e̱n chináꞌmi Aaroo̱n kui xi sa̱ꞌínkjién tsi̱ꞌe̱ nga sku̱i̱e̱ ni xi mejénna sa̱ꞌin an, kó chjiéngá ti̱ kuii̱ ńjño si̱ꞌandani xikoó xi kiniꞌándani ńjñondioo̱.

¹⁶ Mejénna nga ngo chi̱bo̱a̱ ka̱ma kui ńjñoo̱ nga ndojoó ko̱jo nga tiyaá, xikoó tsi ngo stsa, kó kan jó sentímetro̱ ngatama nga ngo nga ngo nga̱ndee̱.

^17-21 Kui ńjño xi fotꞌa ni̱se̱e̱n, chjiéngá tiejó ndi̱jo̱ tsjakon kjótꞌaa̱, ngo ndi̱jo̱ tsi̱ꞌe̱ nga ngo tji̱e̱e̱ xota̱ Israee̱l. Nijón ndi̱yà ngatꞌíndo kui ndi̱jo̱o̱, ján ján nga ngo kui ndi̱ya̱à. Nga ngo nga ngo kui ndi̱jo̱o̱ ngo nga̱nde xi to̱nsinié ngatꞌijñaá, kó nga ngo nga ngo ngatjatꞌaa̱ ngo jaꞌeén nga tiejó tji̱e̱e̱ xota̱ Israee̱l.

^22-24 »Nga ngo nga ngo nga̱ndee̱ nkꞌaa̱ kui ńjño xi fotꞌa ni̱se̱e̱n, tꞌíjñíi̱ ngo ni ńtsó xí to̱nsinié. Sꞌe̱ jaskan ti̱ꞌindèe̱ ngo ńꞌniúki̱cha̱ xi to̱nsinié soboá soboá, kó ngo kui ndí ńꞌniúki̱cha̱a̱ tjinyé ji ki̱a̱ ki̱cha̱ńtsoó kui ńjño xi fotꞌa ni̱se̱e̱n.

²⁵ Kui ńjño xi fotꞌa ni̱se̱e̱n ki̱a̱ ti̱ꞌinkaꞌeje̱ ji ńꞌniúki̱cha̱ xi kjitꞌa ndi̱jo̱ tsjakoo̱n, kui xi síndosón nga̱són tjiaa̱ ńjñondio xi boajá chináꞌmii̱.

²⁶ »Ti̱ ti̱ꞌinde ji ngo ni ńtsó xí to̱nsinié, xi kꞌuijñá nga̱ndee̱ nga ngo nga ngo xtji̱e̱e̱n ngi̱yaa̱ kui ńjño xi fotꞌa ni̱se̱e̱n chináꞌmii̱, tsi̱ꞌe̱ nga ki̱a̱ ndse̱je̱n kꞌuijñá chi̱nga ndioo̱.

^27-28 Kui ńjño ntꞌié xi si̱ꞌankaꞌa chi̱nga ndioo̱, ti̱ jó ni ńtsó xí to̱nsinié tꞌíjñíi̱ nga, kui xi ndse̱je̱n ngatꞌíndo nínga síndo ni ńtsó xi síndo ngi̱yaa̱ kui ńjño xi fotꞌa ni̱se̱e̱n chináꞌmii̱. Kui ni ńtsoó kui ńjño xi fotꞌa ni̱se̱e̱n, ki̱a̱ si̱ꞌankaꞌajo̱ ńjñondioo̱, kó ngo ńchjón xí koán kꞌuítꞌa, tsi̱ꞌe̱ nga kui ńjño xi fotꞌa ni̱se̱e̱n nkꞌaa̱ kui ńjño xi ꞌbíkjá ndáyaá ngatꞌíjñá kó nga xtjo̱ꞌóxínjín.

^29-30 »Kó xki̱ nga ko̱e̱je̱ Aaroo̱n ngindyikón án, chjiéngá ko̱a̱ja̱ kui ńjño xi fotꞌa ni̱se̱e̱n, kó bo̱a̱ tsꞌén nga ki̱a̱ xtji̱e̱e̱n nga̱són ni̱se̱e̱n kjótꞌa jaꞌeén tji̱e̱e̱ xota̱ Israee̱l, tsi̱ꞌe̱ nga ngatsjéni̱xtjin kjo̱a̱ꞌátsjienna. Kó ngataꞌa ngo ndí stsa nínga ndyi̱a̱ Urii̱n ko̱jo Tumii̱n, nga jó kui ndi̱jo̱o̱ xi sa̱ꞌínkjién tsi̱ꞌe̱ nga sku̱i̱e̱ ni xi mejénna sa̱ꞌin an.

Ni xi ngase xi boaꞌa ńjño xi boajá chináꞌmii̱

³¹ »Ńjño xi fotꞌa nga̱xto̱n chináꞌmii̱, ńjño xi koán boá xi si̱ꞌandani,

³² kó ngamasiee̱n kui ńjñoo̱ xtji̱e̱e̱n nkꞌaa̱ ngo ti̱xa̱ kꞌuijñaá nínga sa̱ngísꞌién to̱ko̱. Kó kui ti̱xa̱a̱ kui ńjñoo̱ kjókjojó chií nga̱ndee̱, xikó má kón nga̱ndee̱ kui ńjño xi fotꞌa ni̱se̱e̱n xi tji̱xin kamándanii̱, tsi̱ꞌe̱ nga xtjóndiyájín.

^33-34 Kó ngayeje nga̱ndee̱ kui ńjño xi fotꞌa nga̱xtoo̱n, a̱sie̱én kjín to̱ko̱ya to xi ma chinie kꞌuíndoo̱, kó ńjño xi koán, ńjño xi aso ko̱jo ńjño xi iní ꞌniú si̱ꞌandani. Ngamasiee̱n nga ngo nga ngo kui to xi kjótꞌaa̱, tꞌíndée̱ ndí ki̱cha̱ fonie xi to̱nsinié.

³⁵ Kó bo̱a̱ tsꞌén kjiꞌanga chináꞌmi Aaroo̱n kꞌo̱sꞌien ko̱jo tsi kjo̱tjo ki̱a̱ ndiꞌandikoón nga sa̱ꞌín xaá, kuintꞌie an kui ndí ki̱cha̱ foniee̱, kó sa̱ꞌinkꞌienjín an.

³⁶ »Kó ti̱ ti̱ꞌinde ji ngo axtañó xi to̱nsinié xi kui soboá soboá, kó ngo jaꞌén tꞌítꞌée̱ xi xikoó tsi ngo seyo̱ xi bi̱ ka̱tso̱: “Tsi̱ꞌe̱ Néná boá”.

^37-38 Kó ngo ńchjón xí koán tꞌítꞌe ji kui axtañó to̱nsinieé ki̱a̱ kje̱n ni ꞌbíꞌá tokoo̱ chináꞌmii̱, tsi̱ꞌe̱ nga ngatsjéni̱xtjin kꞌuijñá kui nii̱ xtjien Aaroo̱n. Kuí nii̱ xi ko̱kó nga kjiꞌanga Aaroo̱n sa̱ꞌínkꞌasꞌien kjo̱a̱tjó, kuí boá xi sꞌi̱nieé jé xí sa̱ꞌín xota̱ Israee̱l, kó án boá xi sa̱ꞌinjetakóo̱n, kó skjíbé án kjo̱a̱tjó xi sa̱ꞌínkꞌasꞌien.

³⁹ »Ńjñobichitjeé ko̱jo ni ꞌbíꞌá tokoo̱ Aaroo̱n, chjiéngá ńjño lino̱ ngatamandani, kó chjiéngá ngo nda̱ xi ꞌniú chji̱ni̱e̱ xi ngatsꞌeén chji̱ni̱e̱.

Ńjño xi ko̱a̱ja̱ chináꞌmi xi ngasee̱

⁴⁰ »Ti̱ chjiéngá si̱ꞌandaa̱ ndií Aaroo̱n ńjño xi ko̱a̱ja̱ nga, ko̱jo ńjño xi chajákjaá, ko̱jo ńjño xi ku̱i̱ꞌíkjá ndáyaá, ko̱jo ńjño xi ku̱i̱ꞌíꞌá to̱ko̱, kó tsjakon ngatama kui nii̱ xikoó xi bokiín nga ko̱a̱ja̱ ngo chináꞌmi.

⁴¹ Tatíxomée̱ Aaroo̱n, ko̱jo ndií nga kui ńjñoo̱ xi sa̱ꞌínkjién nga ko̱a̱ja̱, kósꞌe̱ kjiꞌá boá nga ko̱na̱ngínjin ji isti̱ to̱ko̱, tsi̱ꞌe̱ nga kui xi ko̱e̱ꞌéxée̱, nga kui xi ka̱ma chináꞌmina.

⁴² »Chjiéngá si̱ꞌinde ji xkángíndié xi ńjño lino̱ ka̱mandani xi ko̱óꞌmá yojoo̱ chináꞌmii̱, ndeskande ndáyaá, ngaskande ngi̱ndie ti̱ꞌmi̱í.

⁴³ Kuí xkángíndieé xi ko̱a̱ja̱ Aaroo̱n ko̱jo ndií kjiꞌanga kꞌo̱sꞌien ndiꞌandikoón, ko̱jo tsi kjiꞌanga ko̱e̱je̱ tiña nínga tikón ṉchaa̱n nga sa̱ꞌín xaá. Tsi sa̱ꞌínkjiénjín kui ńjñoo̱, kotijéñáa̱, kó ngaskande ka̱ma ko̱yà. Kjo̱a̱kiti boá kui nii̱ kó chjiéngá sa̱ꞌínkjatjosón Aaroo̱n ko̱jo xota̱ tji̱e̱e̱ ngatsjéni̱xtjin».