Éksondo̱ 26 - Xo̱jo̱n eén Néná

Ndiꞌandikoón Néná

^1-2 »Tsi̱ꞌe̱ ndiꞌandikoón mejénna nga si̱ꞌinde ji tie kortina̱ xi tiejó metro̱ masien nga ndojó, kó jó metro̱ nga tiyá, kó jó keruu̱b tjatꞌée̱ xi chji̱ni̱e̱ nga niꞌánni. Kui kortinaa̱ ńjño xi lino̱ xi nda, ńjño xi aso, ńjño xi koán ko̱jo ńjño xi iní ꞌniú boá xi si̱ꞌandani, kó chjiéngá ngo ni xi ta̱nisién nda ngatꞌié kui chji̱ni̱e̱e̱.

³ »Ún kui kortinaa̱ xi chja̱ye ji nga ti̱ꞌinkaꞌeje̱ ji xkjín nga ngo nga ngo, kó ti̱ bo̱a̱ ti̱ ti̱ꞌíi̱n xi ngi uún nga.

^4-5 Kó nga jó kui kortina̱ xi je tjíkjoo̱ ki̱a̱ ti̱ꞌinkaꞌe ji xkjín. Ichítié ti̱xa̱ ndyi̱ko̱n xi ńchjón koán tꞌíndée̱ nga̱ndee̱ kui kortina̱ xi tjón tikoón, xi ún ndyi̱yaꞌa xkjín, kó ti̱ ichítié ti̱xa̱ ndyi̱ko̱n kꞌuíndoo̱ kortina̱ xi fetꞌani xi ngi ún ndyi̱yaꞌa xkjiín nga.

⁶ Sꞌe̱ jaskan ti̱ꞌinkaꞌeje̱ ji xkjín nga jó tjín kuí kortinaa̱, kó ichítié ki̱cha̱ntꞌi̱u̱a̱ xi to̱nsinié tꞌíndée̱, tsi̱ꞌe̱ nga kui ndiꞌandikoón ta̱ ngo tsí ńjño kjoꞌmáni.

^7-8 »Ti̱ ti̱ꞌinde ji tiengo ńjño tie, xi tsja̱a̱ tindso̱ si̱ꞌindeje̱ ji, kó kuí boá xi kjósón nga̱soón kui ndiꞌandikoón. Nga ngo kui ńjño tiee̱ tie ján metro̱ masien ngatama nga ndojoó, kó jó metro̱ ngatama nga tiyaá.

^9-10 Ún kui ńjño tiee̱ xi ti̱ꞌindeje̱ ji ngo kortina̱ xi je, kó ichítié ti̱xa̱ ndyi̱ko̱n tꞌíndée̱ nga̱ndee̱. Kó xi ngi jun ńjño tiee̱, ingo kortina̱ ti̱ꞌindeje̱ ji, kó ti̱ ichítié ti̱xa̱ ndyi̱ko̱n tꞌíndée̱ nga. Xi ma jun kui ńjño tiee̱ chjiéngá kjókjojó xtji̱e̱e̱n kje̱n kui ńjño xi kjiꞌisón kui ndiꞌandikoón.

¹¹ Tꞌíkje ji nga jó kui kortinaa̱ kó ichítié ki̱cha̱ntꞌi̱u̱a̱ xi ki̱cha̱ bronse̱ tꞌíndée̱, tsi̱ꞌe̱ nga ta̱ ngo tsí ńjño ka̱ma xi si̱ꞌma ngijee̱.

^12-13 Kó nga kui ni xi kjiꞌisón kui ndiꞌandikoón ngo metro̱ nga tiyá ngase ta̱bo̱a̱jiín ndiꞌandikoón, chjiéngá masien metro̱ nga ngo nga ngo nga̱ndee̱ nga tsjienjén kui ńjño kortinaa̱. Kó bo̱a̱ tsꞌén nga si̱ꞌma ngayeje nkꞌaa̱.

¹⁴ Nga̱soón ni xi kjiꞌisón kui ndiꞌandikoón ngo ńjño xi tji̱xi̱ín ndií cho̱tsa̱nga̱ xi iní si̱ꞌankꞌi tjasén ji, kó ingo ńjño xi tji̱xin xí ꞌniú nda tꞌíjñíi̱ nga̱soón ngijee̱.

^15-25 »Kui ndiꞌandikoón yáꞌakasia̱ tꞌíchjéngíni ji. Kan yátie tꞌíjñinde ji xi ka̱makjién xtji̱e̱e̱n na̱ngi, ko̱jo kan xi ka̱makjién xtji̱e̱e̱n ta̱ꞌin, jun yátiee̱ xi ka̱makjién xtji̱e̱e̱n nínga ꞌbosꞌien tsꞌueé, ki̱a̱ nínga nga̱xto̱n ndiꞌandikoón, kó jó yátie tꞌíjñinde ji tsi̱ꞌe̱ nga jó nijon xi síndo xtji̱e̱e̱n nga̱xto̱n ndiꞌandikoón. Nga jó kui yátie xi kꞌuíndo xtji̱e̱e̱n nga̱xto̱n, ki̱a̱ si̱ꞌankaꞌajo̱ xkjín, ki̱a̱ nkꞌaa̱ nínga tikón ni ńtsó xí tjoón. Ngayeje yátiee̱ chjiéngá nijón metro̱ masien ka̱ma nga ndojó, kó ichítié ko̱jo kan ún sentímetro̱ ka̱ma nga tiyá, kó chjiéngá ngo nga̱nde nínga katjongaá si̱ꞌankaꞌajo̱ xkjín. Nga ngo nga ngo nínga katjongaá kui yátiee̱ tꞌíjñíi̱ ngo ngindie xi to̱ntiboa ka̱mandani, kó kui yátiee̱ jó ngindie xi to̱ntiboa ko̱a̱ꞌa̱joni xkjín nga ngo nga ngo.

^26-27 »Kó ti̱ tꞌíjñinde ji tjiꞌún yándojó xi yáꞌakasia̱: Ún kui yá ndojoó xi si̱ꞌankaꞌajo̱ni yátie xi kꞌuíndo xtji̱e̱e̱n nínga ta̱ꞌin, kó ti̱ ún kui yándojoó xi si̱ꞌankaꞌajo̱ni yátie xi kꞌuíndo xtji̱e̱e̱n nínga na̱ngi, kó ti̱ ún yándojoó xi si̱ꞌankaꞌajo̱ni yátie xi kꞌuíndo xtji̱e̱e̱n nínga ꞌbosꞌien tsꞌueé.

²⁸ Kó yándojó xi kꞌuijñá ngamasiee̱n ki̱a̱ kjojñá ngamasiee̱n yátiee̱, kó ngatjaꞌaxtikjá ngaskande xi ingoboá jàn.

²⁹ Kó kui yátiee̱ ko̱jo kui yándojoó to̱nsinié tjajin ji, kó ni ńtsó xí to̱nsinié ti̱ꞌindèe̱ nga ngo nga ngo kui yátiee̱ nínga ko̱na̱ngísꞌién yándojoó.

³⁰ Bo̱a̱ má tsꞌén ti̱ꞌinde ji ndiꞌandikoón, xikoó xi akoo ki̱a̱ na̱xi̱i̱.

Ńjño kortinaa̱ ndiꞌandikoón

³¹ »Ti̱ ti̱ꞌinde ji ngo ńjño kortina̱ xi aso, xi koán, xi iní, ko̱jo xi ńjño lino̱ xi ꞌniú nda. Ngo nda̱ xi maa̱ chji̱ni̱e̱ tꞌíxée̱ tsi̱ꞌe̱ nga jó keruu̱b ngatsꞌén.

^32-34 Tꞌíndée̱ ki̱cha̱ntꞌi̱u̱a̱ xi to̱nsinié, kó ki̱a̱ tjinboeꞌe kui ńjño kortinaa̱ nga nijón kui yásé xi kjijon to̱nsinieé. Nga ngo nga ngo kui yáseé chjiéngá ngo ngindie xi to̱ntiboa kꞌuieé. »Kuí bí kui kortinaa̱ xi ku̱i̱ꞌíchjákjáꞌyaá ngi̱ndie nínga tsjiee̱ ko̱jo ngi̱ndie nínga ꞌniú tsjiee̱. Nga̱xto̱n nínga tikón kui kortinaa̱ ki̱a̱ kꞌuijñá ngi̱ndie nínga ꞌniú tsjiee̱, kó ki̱a̱ boá nínga kꞌuijñí ji koxa̱a̱ kjo̱a̱ꞌbíndaa̱ nga tjíchjaá.

³⁵ Kui yámíxa̱ nínga kꞌuijñásón pan xi si̱ꞌankꞌasꞌienjnúꞌun, ki̱a̱ kꞌuijñájnú ngi̱ndie ndikoón. Kó ni to̱nsinié xi ꞌbítíyá ndiꞌí xí tsꞌentsíjee̱n xtji̱e̱e̱n na̱ngi kꞌuijñá, kje̱n yámíxa̱a̱.

³⁶ »Kó ki̱a̱ nga̱ntjo̱a̱a̱ ndiꞌandikoón, mejénna nga ngo kortina̱ si̱ꞌinde ji xi chji̱ni̱e̱ si̱ꞌanni, xi ńjño aso, ko̱jo ńjño xi koán, ko̱jo ńjño xi iní ko̱jo ńjño xi lino̱ xi ꞌniú nda ngatamandani.

³⁷ Kó ti̱ꞌindèe̱ ki̱cha̱ntꞌi̱u̱a̱ xi to̱nsinié, kó ki̱a̱ tjin ji nínga síndo nga ún kui yásé xi yáꞌakasia̱ kamándani kui xi kjijon to̱nsinieé. Ki̱a̱ tꞌínde ji kui yáseé nínga síndo kui ngindie xi ki̱cha̱ bronse̱ kamándanii̱.