Éksondo̱ 22 - Xo̱jo̱n eén Néná

Kjo̱a̱kiti xi niꞌánjénií xota̱ xi tsꞌénchéjé

¹ »Tsi tjín xí sa̱ꞌínchejé ngo cho̱yojo toro̱ ko̱jo tsi ngo cho̱tsa̱nga̱, kó tsi sa̱ꞌínkꞌién ko̱jo tsi ko̱tíñá, chjiéngá ún cho̱yojo ku̱i̱ꞌíchjí ngajo kjo̱a̱a̱ nga ngo cho̱yojo xi katsꞌénchejé, kó nijón cho̱tsa̱nga̱ ku̱i̱ꞌíchjí ngajo kjo̱a̱a̱ nga ngo cho̱tsa̱nga̱ xi katsꞌénchejé.

^2-4 Kó tsi kui cho̱ xi kiniꞌánchejeé ta̱kó tikón ngi̱ya tsja xi katsꞌénchejeé, kui chejeé chjiéngá jó cho̱ tsja̱á ngajoo̱ xi tsi̱ꞌe̱ kui cho̱o̱. Ngayeje xi sa̱ꞌínchejé, chjiéngá ku̱i̱ꞌíchjí xikó kjiꞌi chjií kui cho̱o̱. Tsi ka̱májiín ku̱i̱ꞌíchjí, chjiéngá sti̱ñá kui chejeé xikoó ngo moso̱ xi stiñá, tsi̱ꞌe̱ nga ka̱machjí kuí cho̱ xi katsꞌénchejé. »Tsi ngo nda̱ xi tikoón ngo ngi̱ndie sku̱i̱e̱ nga ngo xi tjítsꞌénchéjeé nga jñoó, kó tsi sa̱ꞌínkꞌién, jmí jé kꞌuiéjiín. Ta̱nga tsi nga ni̱xtjii̱n nga sku̱i̱e̱ kui xi tjítsꞌénchéjeé, kó tsi sa̱ꞌínkꞌién, tjínrií jé.

Kjo̱a̱kiti xi niꞌánjénií xota̱ xi tsꞌénkjátsón ni xi tsi̱ꞌe̱ kje̱ꞌe xota̱

⁵ »Tsi tjín xí skjíndó cho̱ xi tjiín, kósꞌe̱ kui cho̱o̱ ko̱e̱je̱tsꞌenkjié ni tjieé kje̱ꞌe xota̱, chjiéngá ni xi nda ngase xi kamáxchaá xi ku̱i̱ꞌíchjíní nga sa̱ꞌínsón ni tjié xi katsꞌénkjié cho̱o̱.

⁶ »Tsi tjín xí ku̱i̱ꞌítꞌandiꞌí ngo ngi̱ndie xi kuijín tsi̱ꞌe̱, kó tsi kui ndiꞌií sa̱ꞌínkjié ngayeje nínga tjitjíe̱ to ndso̱ko̱a̱n ṉño̱paa̱n ko̱jo kui kꞌijñaá, kui xi bo̱a̱ katsꞌeén, chjiéngá ku̱i̱ꞌíchjií ndi̱a̱a̱ kui nii̱ ngayeje ni xi kitítaꞌii̱n.

⁷ »Tsi tjín xí sa̱ꞌínkjaꞌátjó kje̱ꞌe xota̱ to̱n ko̱jo tsi ni chjí xí síndoo̱, kó tsi ngo nda̱ sa̱ꞌínchejé ngayeje kui nii̱, tsi ko̱ndo̱bo̱a̱ xi katsꞌénchejeé, chjiéngá jó bo̱a̱ kjiꞌi ni xi katsꞌénchejé ku̱i̱ꞌíchjí.

⁸ Tsi tsanga xi katsꞌénchejeé, kui nda̱ xi tsi̱ꞌe̱ ndiꞌa nínga kachjaꞌátjó kui nii̱, chjiéngá kongínjo̱ na̱ngo̱xi̱i̱, kó ngindyi̱ko̱n Néná ka̱tso̱yà nga kuijín xi yeꞌé tsja kui nii̱.

⁹ »Tsi jó má xota̱ xi ndyi̱kjányà ngo cho̱, nga tsa̱ꞌa̱n boá ndyi̱tsó nga ngo nga ngo, tsi ngo cho̱yojo toro̱, ngo bórró, ngo cho̱tsa̱nga̱, ko̱jo tsi ngo ni, chjiéngá nga joó nga ko̱e̱je̱ na̱ngo̱xi̱i̱ tsi̱ꞌe̱ nga ngindyi̱ko̱n Néná ka̱mandajin kui nii̱. Kui xi índisoo̱, chjiéngá jó bo̱a̱ kjiꞌi ku̱i̱ꞌíchjií xi ja̱koxi̱ nga tsi̱ꞌe̱ kui cho̱o̱ ko̱jo tsi kui nii̱.

¹⁰ »Tsi tjín xí ndyi̱fí kjin, kó tsja̱á nga skoón kje̱ꞌe xota̱ ngo cho̱o̱, tsi ko̱yà ko̱jo tsi tjín ni xi ka̱maa̱ kui cho̱o̱, ko̱jo tsi tjín xí kjo̱jochejé nga jmíjín xi sku̱i̱e̱ xi bo̱a̱ katsꞌeén, kui xi tsꞌénkoón cho̱o̱, jmí jéjiín.

¹¹ Ta̱nga chjiéngá ngindyi̱ko̱n Néná bo̱a̱ ka̱tso̱ nga jmí jéjiín. Ndi̱a̱a̱ kui cho̱o̱ chjiéngá sa̱ꞌínsꞌijii̱n, kó kui nda̱a̱ jmí ni ku̱i̱ꞌíchjíjín.

¹² Ta̱nga tsi kui xi tsꞌénkoón cho̱o̱ kamábe nga kamáchejé kuí cho̱o̱, chjiéngá ku̱i̱ꞌíchjií ndi̱a̱a̱ kui cho̱o̱.

¹³ Tsi kui cho̱o̱ ngo cho̱ tamá katsꞌénxi̱, kó tsi kui xi tsꞌénkoón kui cho̱o̱ ka̱maa̱ ko̱kó xi̱i̱ kui cho̱o̱, chjiénjín nga ku̱i̱ꞌíchjií ndi̱a̱a̱ kui cho̱o̱.

¹⁴ »Tsi tjín xí ku̱i̱ya ngo cho̱, kó tsi ka̱maꞌoo̱n kui cho̱o̱ ko̱jo tsi ko̱yà, kó tsi ki̱a̱jín tikón ndi̱a̱a̱, kui xi tsíyá kui cho̱o̱, chjiéngá ku̱i̱ꞌíchjí ngajo.

¹⁵ Ta̱nga tsi ki̱a̱ tikón ndi̱a̱a̱ cho̱o̱, jmí ni ku̱i̱ꞌíchjíjín kui xi tsíyaá. Kó tsi ndi̱a̱a̱ kui cho̱o̱ kjo̱a̱ꞌáchjí nga katsꞌénkíyá, ta̱ chjií nga katsꞌénkíyaá tsí xi ngatamachjií.

Kje̱ꞌe ngase kjo̱a̱kiti

¹⁶ »Tsi tjín xí kꞌo̱ṉcha̱jo ngo tsa̱kji̱ín xo̱ngò xi kji̱e̱ bixanjín tsi̱ꞌe̱ nga kjojñájo̱, chjiéngá ku̱i̱xanjo̱, kó ngatꞌíchjií xkjín kuí tsa̱kji̱ín xikó kjiꞌi machjí, xikótsꞌèn tikón kjo̱a̱xcha̱á nga bixan xotaa̱.

¹⁷ Ta̱nga tsi na̱ꞌmii̱ kui tsa̱kjìn xo̱ngo̱ò jo̱ꞌojín ka̱maa̱ nga ku̱i̱xan, kui nda̱a̱ chjiéngá ku̱i̱ꞌíchjií na̱ꞌmii̱ xikó kjiꞌi machjítáꞌín ngo na̱ xi je ku̱i̱xan.

¹⁸ »Ngayeje xota̱ xi sa̱ꞌín kjo̱a̱tjiꞌe, chjiéngá ko̱yà.

¹⁹ »Ta̱ꞌya xota̱ní xi chꞌo sa̱ꞌínjo̱ kjo̱a̱ꞌniú ngo cho̱, chjiéngá ko̱yà.

²⁰ »Tsi tjín xota̱ xi sa̱ꞌínkꞌasꞌiee̱n ngo kjo̱a̱tjó kje̱ꞌe ne, chjiéngá ko̱yà.

²¹ »Ka̱májín ndajín si̱ꞌanjo̱jnú ko̱jo ka̱májín moso̱ xi stiñá si̱ꞌánjnú ngo nda̱ xi xín nangi chji̱a̱ni. Ngatjaꞌátsjienjnú nga jún ti̱ xota̱ xi xín nangi kamájnú ki̱a̱ nangi Ejipto̱.

²² »Ka̱májín ndajín si̱ꞌanjo̱jnú ínchjín kꞌán xi je kꞌien xi̱ꞌii̱n ko̱jo xota̱ xi xꞌi̱a̱n xi jmíjiín na̱ꞌmi ko̱jo na̱an.

²³ Ngatꞌa̱ tsi ndajín si̱ꞌanjo̱jnú, kó tsi an ku̱i̱chji̱a̱na nga kosiko̱jo an, kuintꞌièñáa̱,

²⁴ kó ꞌniú sa̱ꞌinxchán án nga sa̱ꞌinkꞌiénjnúꞌun. Kósꞌe̱ ínchjínjnú, ínchjín kꞌán ka̱ma, kó ndíjnú, ndí xꞌi̱a̱n ka̱ma ngijee̱.

²⁵ »Tsi tjín xí sa̱ꞌínkíyaá to̱n ngo xota̱ Israee̱l xi ni̱ma̱ xi jmí to̱njiín, chjiénjín nga ndyi̱ko̱n kjo̱a̱ꞌáchjií, ti̱nde ka̱májín bo̱a̱ si̱ꞌanjo̱jnú xikó tsꞌén xota̱ xi foaꞌáchjí nga tsꞌénkíyà to̱o̱n.

²⁶ Kó tsi kui nda̱ Israee̱l ńjño xi boajá ku̱i̱ꞌíjñangini nga tsꞌéntsáyà nga ku̱i̱ꞌíchjí to̱n xi si̱ꞌankíyaá, chjiéngá nga ka̱mangixoón ko̱e̱ꞌéꞌoyá nginíi̱ ńjñoo̱,

²⁷ ngatꞌa̱ ta̱kuítsí ńjñoo̱ xi tikoón xi ko̱óꞌmáni yojoo̱ nga nchꞌàn ka̱maa̱ nga jñoó. Kó an bi̱ xiánjnúꞌun, nga kui nda̱a̱ tsi an ku̱i̱chji̱a̱na nga kosiko̱jo an, kosiko̱jo an, ngatꞌa̱ tjínna kjo̱a̱ni̱ma̱takón.

²⁸ »Ngata̱ chꞌójín tsꞌén ndokjo̱a̱taꞌínjnú nendiꞌamasiee̱n, ti̱nde ngata̱ chꞌójín ꞌmíjnúu̱ xota̱ xi botixómaá nangijnú.

²⁹ »Ngata̱ chíyájínjnú nga xotí si̱ꞌankꞌasꞌienjnúꞌun bino̱ ko̱jo to ndso̱ko̱a̱n ṉño̱pan xi tjón kamáxchájnú. »Ngata̱ chíyájínjnú nga an si̱ꞌankꞌasꞌienjnúꞌun ndí xíꞌín xi tjónjnú,

³⁰ ko̱jo ndí tjoón cho̱yojojnú ko̱jo cho̱tsa̱nga̱jnú. Yito ni̱xtjin ka̱ma ko̱e̱ꞌéndièjnúu̱ nga ngatꞌíjñajo̱ na̱aa̱n, ta̱nga xi ma jin ni̱xtjin ti̱ꞌankꞌasꞌiénjnúꞌun.

³¹ »Ngatsjéni̱xtjin ndaꞌyáꞌénjnúꞌun. »Ngata̱ chiniejínjnú yojo tꞌiuaá cho̱ xi je iskjinie cho̱ tamá xi tjín ngi̱jin kꞌijñaá. Kui yojoo̱, ńñaá te̱ꞌéjnúu̱.