Éksondo̱ 21 - Xo̱jo̱n eén Néná

Kjo̱a̱kiti xi chji̱a̱ kjo̱a̱a̱ moso̱ xi kastiñaá

¹ Kó Néná ti̱ atíxomaa̱ Moisee̱ tsi̱ꞌe̱ nga tsja̱á xota̱ Israee̱l kui kjo̱a̱kitii̱ nga:

² «Kjiꞌanga ngo moso̱ xi stiñá xi nda̱ Israee̱l si̱ꞌantsiéjnú, ta̱ jun tsí nó nga si̱ꞌánjnúu̱ kjo̱a̱ꞌniú nga sa̱ꞌínxájo̱jnú, ta̱nga xi ma yito noó, kꞌuijñándéjnú, kó jmí ni ku̱i̱ꞌíchjíjín tsi̱ꞌe̱ nga sꞌi̱jñandé.

³ »Tsi jachó soboá kjiꞌanga kitsꞌítsié, kjo̱tjo soboá, tsi tjiín chjo̱on nga jachó, ko̱jo chjo̱ón chjiéngá kjo̱tjojo̱.

⁴ »Tsi ndi̱a̱a̱ kui mosoo̱ katsjaá ngo chjo̱on, kó tsi kisꞌiee̱ ndí xí xi̱ꞌin ko̱jo tsi ndí xí ínchjín, kui xota̱chjo̱on ko̱jo ndií tsi̱ꞌe̱ ndi̱a̱a̱ ka̱ma, kó kui mosoo̱ kjo̱tjo soboá nga ka̱mandé.

⁵ »Kó tsi kui mosoo̱, ngayeje kon nga bi̱ ka̱tso̱: “Mejénjínna kotíjña̱ ndé án, ngatꞌa̱ tjóna chjo̱onna, ko̱jo ndína, ko̱jo ndi̱a̱na”,

⁶ chjiéngá ngindyi̱ko̱n Néná kongínjo̱, kó ki̱a̱ chjáxꞌá tji̱bo̱a̱nijon. Kuí boá kui chi̱bo̱a̱a̱ xi ko̱kó nga kui mosoo̱ je tsi̱ꞌe̱ ndi̱a̱a̱ ka̱ma ngatsjéni̱xtjin.

⁷ »Tsi tjín xí ko̱tíñá ndí chjo̱ón nga moso̱ ka̱ma, chjiéngá ko̱ójinkon nga kui tsa̱kji̱ín ka̱májín sꞌi̱jñandé xikó niꞌánjo̱ ngo moso̱ xi stiñá xi xi̱ꞌin.

⁸ »Tsi xi kꞌo̱tsie kui tsa̱kji̱ín ka̱mamejénjiín nga chjo̱ón ka̱ma, ngatꞌa̱ tsjajín kjiꞌii̱, ka̱ma tsja̱ndiè nga tjín xí chji̱a̱ni kui na̱xi̱ńdaá xi ka̱ma ku̱i̱ꞌíchjíngí kui naa̱ tsi̱ꞌe̱ nga sꞌi̱jñandé, ta̱nga ka̱májín tsi ngo xota̱ xi xín nangi ko̱tíñaá.

⁹ »Ta̱nga tsi kui xi tsꞌatsie kui tsa̱kji̱ín ka̱mamejeén nga ndí xíꞌiín ku̱i̱xanjo̱, chjiéngá xikó niꞌánjo̱ ngo ndí chjo̱on, bo̱a̱ sa̱ꞌínjo̱.

¹⁰ »Tsi xi tsꞌatsie kui tsa̱kji̱ín ku̱i̱xanjo̱, kósꞌe̱ jaskan kꞌuieé ingo chjo̱on, ka̱májín kjo̱a̱ꞌáxiín kjo̱a̱nda xi tjiín ngo chjo̱on, kui na̱ xi kitsꞌítsieé, ti̱nde ka̱májín kjo̱a̱ꞌáxiín chiboa nichinie ko̱jo ńjño xi boajá xi tsoboaá nga tsja̱á.

¹¹ Tsi nga ján kui nii̱ xi kjo̱a̱ꞌáxiín ndi̱a̱a̱, kui naa̱ jè ka̱mandé, kó jmí ni ku̱i̱ꞌíchjíjín kjo̱a̱a̱ kui kjo̱a̱ndeé.

Jé xí tsꞌén ngo xota̱ nga si̱ꞌankꞌienni

¹² »Tsi ngo xota̱ sa̱ꞌínꞌoón kje̱ꞌe xota̱, kó sa̱ꞌínkꞌién, chjiéngá ko̱yà kuí nga.

¹³ »Ta̱nga tsi ngo xota̱ xi jmí tsi xá katsꞌénkꞌiénni kje̱ꞌe xota̱, kó tsi an je ta̱xà bo̱a̱ tsꞌén íjñá an nga ko̱yà, kui xi bo̱a̱ katsꞌeén, ka̱ma ko̱nga nga kꞌuijñáꞌmá ngo ngi̱ndie xi an xiyàa̱ ñání bo̱a̱.

¹⁴ »Kui xota̱ xi ta̱ xá sa̱ꞌínkꞌiénni kje̱ꞌe xota̱, chjiéngá ko̱yà, kó ndatsi ki̱a̱ ṉchandikónna tikóntꞌa, chje̱ꞌéxín ji tsi̱ꞌe̱ nga si̱ꞌankꞌien.

¹⁵ »Kui xi ku̱i̱e̱ꞌeé na̱ꞌmii̱ ko̱jo tsi na̱aa̱n, chjiéngá ko̱yà.

¹⁶ »Kui xi sa̱ꞌínchejé nga kjo̱jo ngo xota̱, tsi ko̱tíñá ko̱jo tsi ta̱kó ngi̱ya tsja tikón kui xotaa̱ nga xcha̱, chjiéngá ko̱yà.

¹⁷ »Kui xi chꞌo ka̱tso̱o̱ na̱ꞌmii̱ ko̱jo tsi na̱aa̱n, chjiéngá ko̱yà.

Kjo̱a̱kiti xi botíjeé nga tjín xí ku̱i̱ꞌeé ko̱jo tsi sa̱ꞌínꞌoón ngo xota̱

¹⁸ »Tsi jó já ndyi̱kjàn, kó tsi ngo xi katsꞌénꞌoón xi ingoo̱ nga yeꞌeé tsi ngo ndi̱jo̱ ko̱jo tsi ngo tji̱ngo̱, tsi kꞌienjín, ta̱nga tsi kisꞌieꞌon,

¹⁹ kui xi katsꞌénkijenꞌoo̱n, jmí jéjiín tsi kui xi kamáꞌoón kjo̱stjíe̱n nginí nga ko̱a̱ꞌa̱ ngo yánísié, ta̱nga chjiéngá ku̱i̱ꞌíchjií ni xi ka̱machjieén nga ka̱mandaya, ko̱jo ku̱i̱ꞌíchjií ni̱xtjin nga katsꞌénxájín nga.

²⁰ »Tsi tjín xí ngo yá ko̱ꞌon moso̱ xi stiñaá tsi chjo̱on ko̱jo tsi xi̱ꞌin, kó tsi ti̱ kjiꞌaa̱ kꞌien, chjiéngá ka̱majeé kjo̱a̱a̱ kui ini̱ma̱ xi katsꞌénkꞌieén.

²¹ Ta̱nga tsi kui moso̱ xi chjo̱on ko̱jo tsi xi xi̱ꞌii̱n, kꞌuijñá ngase ngi ingo ko̱jo tsi ngi jó ni̱xtjin, kui ndi̱a̱a̱ ka̱májín si̱ꞌanjeé, ngatꞌa̱ kuí tsi̱ꞌe̱ kui mosoo̱.

²² »Tsi kjín já xí skja̱n xtín, kó tsi ngo na̱ xi yaꞌa ndí sa̱ꞌínꞌoón, kuí nii̱ xi ka̱ma si̱ꞌan: Tsi jmí ni kamájiín kui naa̱, ta̱nga tsi stse̱n xtió ndií, kó ko̱yà, kui xi bo̱a̱ katsꞌeén chjiéngá ku̱i̱ꞌíchjií xi̱ꞌii̱n kui naa̱ xikó kjiꞌi ku̱i̱ꞌa, ta̱nga chjiéngá nendiꞌamasiee̱n skósoón nga ndakjiꞌi chjí xí ku̱i̱ꞌaa̱.

²³ Ta̱nga tsi kꞌien kui xota̱chjo̱on, kui xi bo̱a̱ katsꞌeén chjiéngá bo̱a̱ tsꞌén ku̱i̱ꞌíchjí xikó kamaá kui naa̱ nga. Tsi ko̱yà kuí naa̱, ti̱ chjiéngá ko̱yà kuí xi katsꞌénkꞌieén nga,

²⁴ tsi ngo ndyi̱ko̱n kꞌo̱xié, ti̱ chjiéngá ngo tsi̱ꞌe̱ ko̱ꞌna̱xié nga, kó tsi ngo ṉꞌni̱u̱ skjítꞌó, ti̱ chjiéngá ngo tsi̱ꞌe̱ chjátꞌó nga. Tsi ngo tsja skjítꞌó, ti̱ ngo chjátꞌó tsi̱ꞌe̱ nga, ko̱jo tsi ngo se skjítꞌó, ti̱ ngo chjátꞌó tsi̱ꞌe̱ nga,

²⁵ ko̱jo tsi ngo ndiè yojoo̱ tjín xí sa̱ꞌínchjaán, ti̱ ngo ndiè yojoo̱ kui xi bo̱a̱ katsꞌeén si̱ꞌanchjaán nga, tsi ngo ndiè yojoo̱ sa̱ꞌínꞌoón, ti̱ ngo ndiè yojoo̱ xi bo̱a̱ katsꞌeén si̱ꞌanꞌoo̱n nga, kó tsi ngo tji̱ngo̱ ku̱i̱e̱ꞌeé, ti̱ ngo tji̱ngo̱ kꞌuieé ndatsi kui nga.

^26-27 »Kó tsi tjín ndi̱a̱ xí sa̱ꞌínꞌoón ngo ndyi̱ko̱n mosoo̱ tsi xi chjo̱on ko̱jo tsi xi xi̱ꞌin, kó tsi ka̱mati̱ka̱, chjiéngá ku̱i̱ꞌíjñandé ta̱ngatꞌanii̱ ndyi̱ko̱n. Kó ti̱ kuii̱ kjo̱a̱kitii̱ si̱ꞌankjién tsi ngo ṉꞌni̱u̱ skjítꞌó.

Kjo̱a̱kiti xi niꞌánkjién kjo̱a̱a̱ ni xi jmí tsi xá kamáni

²⁸ »Tsi ngo cho̱yojo toro̱ tamá sa̱ngií ndi̱ja̱a̱ tsi ngo xi chjo̱on ko̱jo tsi ngo xi xi̱ꞌin, kó tsi ko̱yà, chjiéngá ndi̱jo̱ kjoyá nga si̱ꞌankꞌienni kui cho̱yojoo̱, ta̱nga ka̱májín xi̱ni̱e̱ yojoo̱. Kó ndi̱a̱a̱ kui cho̱yojoo̱ ka̱majéjiín.

²⁹ »Ta̱nga tsi ndi̱a̱a̱ kui cho̱yojo toro̱ tamaá ja̱bo̱a̱ je be nga kui cho̱yojoo̱ ta̱xà tsangínii̱ ndi̱ja̱a̱ xotaa̱, kó tsi íchjáꞌyájín kui cho̱ tamaá, kuí boá xi sꞌi̱nié kjo̱a̱a̱ xota̱ xi katsꞌénkꞌién kui cho̱o̱. Tsi bo̱a̱ ka̱ma chjiéngá ndi̱jo̱ kjoyá nga si̱ꞌankꞌienni kui cho̱yojoo̱ ko̱jo ndi̱a̱a̱ nga.

³⁰ Ta̱nga tsi chji̱a̱ꞌaa̱ ngo chjí tsi̱ꞌe̱ nga jmí ni si̱ꞌanjo̱jín kui ndi̱a̱ xi tsi̱ꞌe̱ kui cho̱o̱, ka̱ma ku̱i̱ꞌíchjítjé yojoo̱.

³¹ Ti̱ kuíní kui kjo̱a̱kitii̱ xi si̱ꞌankjién tsi ngo ndí xí xi̱ꞌin ko̱jo tsi ndí xí chjo̱on xí katsangii̱ ndi̱ja̱a̱ kui cho̱yojo toroo̱.

³² »Tsi kui cho̱yojo toro̱ tamaá katsangii̱ ndi̱ja̱a̱ ngo moso̱ tsi xi chjo̱on ko̱jo tsi xi xi̱ꞌin, ndi̱a̱a̱ kui cho̱yojo toroo̱ chjiéngá kantié to̱ntiboa tsja̱á ndi̱a̱a̱ kui moso̱ xi bo̱a̱ ka̱mataꞌii̱n, kó kuí cho̱yojo toroo̱ chjiéngá ndi̱jo̱ kjoyá nga si̱ꞌankꞌien.

³³ »Tsi ngo nda̱ kjo̱a̱ꞌáxiín ni xi kjiꞌmani ngo ndáńchꞌi̱ ko̱jo tsi ngo ndáńchꞌi̱ sa̱ꞌínda kó ko̱óꞌmájín, kó tsi ki̱a̱ kꞌo̱kayà ngo cho̱yojo toro̱ ko̱jo tsi ngo bórró,

³⁴ kui xi yíꞌmájín kui ndáńchꞌií chjiéngá ku̱i̱ꞌíchjií xi tsi̱ꞌe̱ kui cho̱o̱, ta̱nga ka̱ma skjíbé kui cho̱ xi kꞌiee̱n.

³⁵ »Kó tsi ngo cho̱yojo toroo̱ ngo nda̱, sa̱ꞌínꞌoón, kó ko̱yà cho̱yojo toroo̱ kje̱ꞌe nda̱, chjiéngá ko̱ti̱ña kui cho̱ xi bo̱a̱ katsꞌeén, kó kui to̱o̱n masien masien ngatakjangá nga jó kui jaá, kó yojoo̱ kui cho̱yojo toro̱ xi kꞌiee̱n, masien masien nga kjíbé nga.

³⁶ Ta̱nga tsi kui cho̱yojoo̱ toroo̱ je ta̱xà tamání, kó tsi asiénꞌyájín xi tsi̱ꞌe̱, chjiéngá ngo cho̱yojo toro̱ xi tikón tsja̱anií xi tsi̱ꞌe̱ cho̱ xi kiniꞌánkꞌieén, kó kuí cho̱yojo xi kꞌiee̱n kuí tsi̱ꞌe̱ ka̱ma kui xi je íchjií.